ཁྱུང་སྲས་བསམ་གཏན་ཚེ་རིང་།
༼སྡོམ་ཆར་ལོའི་དྲ་བ༽ནི་ཨ་མེ་རི་ཀའི་རྩོམ་པ་པོ་གྲགས་ཅན་ E.B ཧིའི་ཐིས་བརྩམས། བོད་ཀྱི་རྩོམ་པ་པོ་སྒྲགས་པ་པདྨ་དབང་ཆེན་གྱིས་བོད་སྐད་དུ་བསྒྱུར། དེབ་འདི་ཕྱི་གླིང་ཨ་མེ་རི་ཀའི་རྩོམ་རིག་ཁྲོད་ན་བྱིས་སྒྲུང་སྐད་གྲགས་ཅན་བཅུ་ཡོད་པའི་གྲས་ཡིན་པ་བོད་འགྱུར་དེབ་ཏུ་གསལ་འདུག འདི་ནི་བོད་སྐད་དུ་སྒྱུར་མཁན་གྱི་སྙེག་སའི་ཆ་ཤས་ཤིག་ཀྱང་ཡིན་འདུག མིག་སྔའི་ལོ་འགའི་ནང་། ང་ཚོར་འགྱུར་གྱི་ཚད་གཞིའི་ཐད་ནས་གླེང་གཞི་ཅན་གྱི་སྒྱུར་དེབ་དེ་འདྲ་བསྟུད་མར་བྱུང་། དེ་དག་ལ་གཤེ་བའི་རྩོམ་ཡིག་དང་གཏམ་བཤད་སྤེལ་མཁན་ཡང་བསྟུད་མར་བྱུང་། ལྟོས་འཇོག་གིས་བཤད་ན། དེབ་གཅིག་ལ་འགྱུར་ཡིག་ཁ་ཤས་བྱུང་བ་དང་། མ་མཐར་ཡང་གཉིས་ཅན་བྱུང་བ་དེ་ཚོ་བསྡུར་ནས་གླེང་སྟངས་ཤིག་གི་ཚད་ཐིག་ཅིག་བསླངས། ཕྱི་གླིང་གི་རྩོམ་དེབ་གྲགས་ཅན་དེ་འདྲ་བོད་སྐད་ནང་ལ་བསྒྱུར་བའི་རྗེས་ལ་བོད་སྐད་ཀྱི་གོ་བརྡ་མི་འཕྲོད་པར་འགྱུར་འགྲོ་གི་འདུག་ཅེས་སྡིག་མཁན་ནི་བསྟུད་མར་ཡོང་གི་
ཡོད། དེ་དག་གི་ཁྲོད་ན་བོད་ཀྱི་སྐད་ཡིག་འདི་དེང་རབས་ཕྱི་གླིང་གི་རྩོམ་དེབ་གྲགས་ཅན་སྒྱུར་བྱེད་དུ་མི་རུང་བ་འདྲ། བོད་ཀྱི་སྐད་ཡིག་ལ་དེང་རབས་ཀྱི་རྩོམ་རིག་གླེང་བའི་ནུས་པ་མེད་པ་འདྲ་ཞེས་ཟུར་ཟ་བྱེད་མཁན་ཡང་འདུག ལྟ་སྟངས་དེ་དག་ནི་འགྱུར་གྱི་ཚད་ལོངས་ཡོད་མེད་དང་འབྲེལ་བ་ཡོད་པ་དང་། འགྱུར་གྱི་ཚད་ནི་སྔོན་གྱི་ལོ་ཙཱ་བ་ཚོའི་འགྱུར་དང་བསྡུར་ནས་གཞལ་གྱི་འདུག དེར་བརྟེན། དེང་སང་། འགྱུར་གྱི་སྤུས་ཀ་ཡག་པོ་འདུག་ཅེས་བཤད་ན། གྲོགས་པོ་དང་ངོ་ཤེས་ཕན་ཚུན་ལ་བསྟོད་ར་བྱེད་སྟངས་ཤིག་རེད་ཅེས་འཕྱ་དམོད་བྱེད། དུས་སྐབས་འདི་འདྲ་ཞིག་ལ། ༼སྡོམ་ཆར་ལོའི་དྲ་བ༽བཀླགས་པ་ཡིན། གཤམ་ལ་དེའི་སྐོར་གྱི་བསམ་ཚུལ་ཞིག་བརྗོད་འདོད་བྱུང་། ང་ཚོ་ཀློག་པ་པོ་ཚོས་འགྱུར་ལེགས་པོ་རེར་རེ་སྒུག་བྱེད་ཀྱིན་ཡོད། སྒྲ་སྦྱོར་བམ་པོ་གཉིས་པ་ན། ༼གོ་རིམ་ལས་མི་བསྣོར་བར་བོད་སྐད་དུ་བསྒྱུར་ན་དོན་དང་ཚིག་ཏུ་འབྲེལ་ཞིང་བདེ་ན་མ་བསྣོར་བར་སྒྱུར་ཅིག །བསྣོར་ན་བདེ་ཞིང་གོ་བ་བསྐྱེད་པ་ཞིག་ཡོད་ན། ཚིགས་སུ་བཅད་པ་ལ་ནི་རྩ་བ་བཞི་པའམ་དྲུག་པའང་རུང་སྟེ། ཚིགས་སུ་བཅད་པ་གཅིག་གི་ནང་ན་གང་བདེ་བསྣོར་ཞིང་བསྒྱུར་ཅིག །རྐྱང་པ་ལ་ནི་དོན་གང་སྙེགས་པ་ཡན་ཆད་ཀྱི་ཚིག་དང་དོན་གཉིས་ཀ་ལ་གར་བདེ་བའང་བསྣོར་ཞིང་བསྒྱུར་ཅིག །སྐད་གཅིག་ལ་མིང་དུ་མར་འདྲེན་པ་ནི་ལྟག་འོག་དང་བསྟུན་ལ་གར་སྙེགས་པ་བཞིན་དུ་མིང་ཐོགས་ཤིག༽ཅེས་གསུངས་ཡོད་པ་འགྱུར་གྱི་སྤུས་ཀ་འདྲེན་པའི་རྩ་འཛིན་གཞུང་ལུགས་ཀྱི་ཚིག་རེད། ༼སྡོམ་ཆར་ལོའི་དྲ་བ༽བོད་འགྱུར་གྱི་དེབ་འདི་ནི། ཉེ་བའི་ལོ་འགའི་ནང་དབྱིན་ཡིག་ནས་བོད་ཡིག་ཏུ་བསྒྱུར་བའི་སྒྲུང་རྩོམ་དེབ་འགའ་བཀླགས་པ་དེ་ཚོའི་ནང་ནས་འགྱུར་ལེགས་པའི་གྲས་ཤིག་ཏུ་ངོས་འཛིན་ཞུ་གི་ཡོད། ཁྱད་ཆོས་འགའ་མཇལ་བྱུང་། དེ་ཚོ་ནི། མིང་ཚིག་གི་གོ་ཡུལ་དུ་མིང་ཚིག་བཞག་སྟེ་བསྒྱུར་བ་ལས་འགྲེལ་བཤད་འབྲི་བར་འཐམ་པའི་ཚིག་ལྷག་སྤེལ་བར་འཛེམས་ཟོན་གཉིས་ཀ་གནང་འདུག དམའ་རིམ་ནས་བྱས་ན་བྱེད་འབྲེལ་གཉིས་ཀྱི་ཕྲད་སྦྱོར་སྟངས་ནོར་བའི་འཐེང་འགྲོས་ཅན་ཚོ་དང་མི་འདྲ་བར་དོ་བརྟན་གནང་འདུག བྱ་དངོས་སྟོན་པའི་དག་ཆ་འདམ་ང་ཅན་ལ་མ་ཡན་པར་གཅིག་གྱུར་དང་། ཚིག་སྦྱོར་སྤེལ་སྟངས་སྒང་གཤོང་ངོས་མི་སྙོམ་པ་དེ་འདྲ་མ་ཡིན་པར་རྩོམ་གཤིས་གཅིག་ཏུ་གནས་པ་ཞིག་བསྒྱུར་གནང་འདུག བོད་ཀྱི་སྐད་ཡིག་འབྲི་ཀློག་ཤེས་མཁན་ཕལ་མོ་ཆེ་བས་བཀླགས་ན་གོ་བདེ་ཞིང་དོན་ཡིད་ལ་སྟེར་བ་ཞིག་བསྒྱུར་གནང་འདུག འགྱུར་དེབ་ཡག་པོ་གཞན་འགའ་ཡང་མཇལ་སོང་ཡང་། ལ་རེར་འགྱུར་གཉིས་རེ་དང་། ལ་ཤས་ལ་འགྱུར་གསུམ་རེ་དེ་འདྲ་ཡང་འདུག་པ་མ་གཞི་བྱས་ན་འགྱུར་སྔ་མ་སྔ་མ་ཡོད་བཞིན་དུ་ཕྱི་མ་ཕྱི་མ་ཐོན་པའི་དགོས་པ་ནི་སྔ་མ་ལས་ལེགས་པ་ཞིག་གི་ཆེད་ཡིན་དགོས་ཚོད་ཀྱང་། ཕྱི་མ་ཕྱི་མ་ནི་ཇེ་ཞན་ཇེ་སྡུག་ལྟ་བུར་སོང་བའང་འདུག་པ་སོགས་མཚུངས་བསྡུར་བྱས་ན། ཕོག་ཐུག་མང་པོ་ཞིག་ལ་ལག་པ་འཆང་དགོས་པས་བསྡུར་ནས་གླེང་རྒྱུ་སྤངས་ཏེ་ཀློག་པ་པོ་ཞིག་གི་ལྟ་སྟངས་ཞུས་པ་འདིར་འགལ་འཁྲུལ་ཡོད་ན་མ་ཤེས་རྨོངས་བཤད་ཡིན་པས་དགོངས་དག་ཞུ།
