རྫོགས་ཆེན་དོན་གྲུབ་རྡོ་རྗེ།
ང་མཚོ་སྔོན་པོའི་གཡས་འགྲམ་ནས་མེ
སེམས་ཁམས་ཀྱི་འཚོ་བ་མྱོང་དུས།
སྒྲོལ་དཀར་འཚོ།
གློ་བུར་གྲོགས་པོ་ཞིག་གིས།
ཁྱོད་ལུས་མེ་རུ་བསྲེགས་པའི་ཆ་འཕྲིན་འབྱོར་བྱུང་།
ངའི་ནང་སེམས་ལ་རྨ་ཁ་གས་སོང་།
མདུན་ཕྱོགས་དེ་མིག་ཆུས་རླན་སོང་།
བུ་མོ་སྒྲོལ་དཀར་འཚོ།
བརྩེ་བ་ཆེན་པོའི་དྲིན་ཆེན་གྱི་ཕ་མ་དང་།
སྙིང་རྗེ་བའི་བྱིས་པ་སྣབས་ལུག ནར་མ་སོན་པའི་ལོ་ལོ་གཉིས།
བཟའ་ཡ་ཚེ་གྲོགས། ཡུལ་མི་སྙིང་ཉེ་སོགས་མི་ཡུལ་འཇིག་རྟེན་གྱི་དགའ་སྐྱོའི་འཚོ་བའི་བག་ཆགས་ཡོངས་སུ་བསྐྱུར་ཏེ།
བུ་མོ་སྒྲོལ་དཀར་འཚོ།
ཁྱོད་ཀྱིས་ཡུན་རིང་ཉར་བའི་སུ་ཞིག་གི་སྡུག་ཡུས་སེམས་ཁ་ནས་ཁྱེར་ཏེ།
སྨོན་ལམ་གྲངས་མེད་ཀྱི་གྱེས་ཕྱག་ཕུལ་ནས།
རང་གི་ཕ་མ་བུ་ཕྲུག་ལ་མིག་ཆུ་གཏོང་ཞོར།
ཁྱོད་ཀྱི་མི་ལུས་རིན་ཆེན་གྱི་ནོར་བུ།
འདི་ལྟར་ཚ་ན་གཟེར་ཟུག་ལས་གྲུབ་པའི་མེ་ཕུང་གི་ཀློང་དུ་གཟིམས་སོང་།
མི་ཚེ་རྫོགས་སོང་།
ཁྱོད་རང་ཕེབས་ཤུལ་ནས།
ཆུང་བྱིས་པའི་སྣབས་ཆུ་དང་མིག་ཆུ་སུ་ཡིས་ཕྱི་དགོས།
འགྲོ་གོམ་པའི་མདུན་ལམ་དང་མི་ཚེ་སུ་ཡིས་སྐྱོང་དགོས།
ཀ་ཡིག་འབྲིའི་བློ་རྒྱུགས་དང་ཨ་མ་སུ་ལ་འབོད་དགོས།
འོ་ད་ནི་གནམ་སྔོན་མོའི་སྤྱན་ཆབ་
བསིལ་རོཊ་དང་།
ས་དོག་མོའི་སྙིང་རྗེ་སྒོམ་རོགས་དང་།
ལྷ་ཡིས་མི་གཟིགས་འདྲེ་ཡིས་མི་འདུལ་ཡང་།
སྐྱོ་བ་འདི་མི་དང་མི་ཡི་ཤེས་པས་མཐོང་ཞིང་།
སེམས་པས་གསལ་བར་སྨོན།
བུ་མོ་སྒྲོལ་དཀར་འཚོ།
ཁྱོད་ཀྱི་རྣམ་ཤེས་བདེ་བ་གཟིམས་པར་སྨོན།
སངས་རྒྱས་བྱང་སེམས་ཀྱི་ཐུགས་རྗེས་སྐྱོང་བར་སྨོན།
ང་ཚོས་ཁྱོད་ཀྱི་ལོ་རྒྱུས་དང་གཟི་བརྗིད།
བདེན་དོན་དང་སྙིང་སྟོབས།
ཕ་མ་དང་ནང་མི་ཡོད་ཚད་ནམ་ཡང་བརྗེད་མི་སྲིད།
༢༠༡༢ ༨ ༧ དགོང་མོར་ལྷ་མོའི་གཞོངས་ཀྱི་མཚོ་འགྲམ་དུ་རྫོགས་ཆེན་དོན་གྲུབ་རྡོ་རྗེས།
མཛད་རྗེས་མ་རྗེད་པས་ཅང་མི་ཡོང་། བྱས་རྗེས་ལ་ཁ་སྣོན་ཅི་ལྟར་བྱེད། གངས་རི་ནས་སྐྱེས་ཞིང་། གངས་རི་ནས་ཤི་ན་འདོད་པའི་བོད་ཕྲུག་ངོ་མ་ཚོ།