—-མཁོ་གཏོང་བ། རྨེའུ་དཀོན་རྒྱམ།
དེ་ཡང་ཕྱི་ལོ་ ༢༠༡༦ ཟླ་ ༡༢ ཚེས་ ༤ ཉིན་གྱི་མཚན་མོའི་ཆུ་ཚོད་ ༩ ཡས་མས་སུ་རྔ་བ་རྫོང་རྨེའུ་རུ་མའི་རུ་ཆེན་གསུམ་པའི་དགེ་རིག་ཚང་གི་སྒྲོལ་མ་མཚོར་རྒྱ་གཞུང་གིས་ལོ་ངོ་གསུམ་ལ་ཁྲིམས་ཐག་བཅད་པའི་བཙོན་དུས་ཚང་ནས་རང་ཁྱིམ་དུ་བསྐྱལ་འདུག སྐབས་དེར་སྒྲོལ་མ་མཚོ་ལ་གཉེན་ཉེ་དང་ཡུལ་མི། བོད་མི་ཉིས་བརྒྱ་ལྷག་གིས་ཁ་བཏགས་གཡོགས་ནས་ཕེབས་བསུ་བྱས་འདུག
ཕྱི་ལོ་ ༢༠༡༣ ཟླ་ ༡༢ ཚེས་ ༣ ཉིན་རྔ་བ་རྫོང་རྨེའུ་རུ་མའི་ཡུལ་ཚོ་གསེར་སྡེ་ནས་དཀོན་མཆོག་ཚེ་བརྟན་ལགས་ཀྱིས་རང་ལུས་མེར་སྲེག་གནང་སྐབས། སྒྲོལ་མ་མཚོས་ཁོང་གི་སྐུ་ཕུང་རླངས་འཁོར་ནང་དུ་འཇོག་རོགས་བྱས་པ་སོགས་ཀྱི་རྐྱེན་གྱིས་བཙན་བཟུང་བྱས་ཏེ་ཟླ་བ་ ༡༡ རིང་ལ་བཀག་ཉར་ཁང་ནས་གཅར་རྡུང་དང་མནར་གཅོད་སྣ་ཚོགས་མྱངས་དགོས་བྱུང་ཞིང་། ཕྱི་ལོ་ ༢༠༡༤ ཟླ་ ༡༡ ཚེས་ ༣ ཉིན་སྒྲོལ་མ་མཚོར་རྒྱ་གཞུང་གིས་མི་བསད་པའི་ནག་ཉེས་བཙུགས་ནས་ལོ་གསུམ་ལ་ཁྲིམས་ཐག་བཅད་ནས་སི་ཁྲོན་མེ་ཡན་བཙོན་ཁང་ནང་བཅུགས་པ་རེད།
ཕྱི་ལོ་ ༢༠༡༥ ཟླ་ ༡༢ ནང་ལ་ཁྲིམས་ཁང་རང་ནས་ཡི་གེ་སྔ་ཕྱི་གཉིས་ཁྱིམ་བདག་ཚོར་འབྱོར་ནས་སྒྲོལ་མ་མཚོར་ཛ་དྲག་གི་གཤག་བཅོས་གཏོང་དགོས་སྐོར་བྲིས་ཤིང་ཁྱིམ་བདག་ཚོའི་མིང་རྟགས་འགོད་ཚུལ་བཙན་བཀའ་གཏོང་སྐབས། ཁྱིམ་བདག་ཚོས་ཁྲིམས་ཁང་ལ་ཁ་པར་བཏང་སྟེ་སྒྲོལ་མ་མཚོ་ལ་དངོས་སུ་ཐུག་བཅུག་ན་སྒྲོལ་མ་མཚོའི་གནས་བབ་གང་ཞིག་ཡིན་པ་ཤེས་རྟོགས་ཡོང་བས། དངོས་སུ་ཐུག་འཇུག་པའི་རེ་འདུན་བཏོན་ཀྱང་ཐུག་བཅུག་མེད་འདུག མ་ཟད་སྒྲོལ་མ་མཚོས་ཁྲིམས་ཁང་ནས་ཁྱིམ་བདག་ཚོར་སྐར་མ་ལྔའི་རིང་ཁ་པར་བཏང་སྟེ་བཙོན་སྲུང་བ་ཚོས་ང་ལ་ན་ཚ་ཞིག་ཡོད་པས་བཙན་གྱིས་གཤག་བཅོས་གཏོང་དགོས་པའི་བཙན་སྐུལ་ཡང་ཡང་བྱས་རུང་། ངའི་ངོས་ནས་ཁས་ལེན་རྩ་བ་ནས་བྱས་མེད། ཁྱོད་ཚོས་ཀྱང་ཁས་ལེན་རྩ་བ་ནས་མ་བྱེད་ཅེས་བརྗོད་འདུག
ད་སྐབས་སྒྲོལ་མ་མཚོའི་གནས་སྟངས་དེ་མགོ་ཡུ་འཁོར་བ། གཉིད་མི་ཡོང་། གཟུགས་པོ་སྐྱོ་བོ་ཆགས་པ། སྔར་གྱི་གཤིས་ཀ་འགྱུར་བ། སྙིང་ཁམས་མི་བདེ་བ་སོགས་ཀྱི་གནས་བབ་ན་ཡོད་པས། མ་འོངས་པའི་མོ་རང་གི་འཕྲོད་བསྟེན་སོགས་ཀྱི་ཐད་ལ་ཁྱིམ་བདག་ཚོར་སེམས་འཚབ་ཆེན་པོ་ཡོད་འདུག
སྒྲོལ་མ་མཚོ་ནི། རྔ་བ་རྫོང་རྨེའུ་རུ་མའི་དགེ་ཚང་གི་ཡིན་ཞིང་། ཕ་དགེ་རིག་དང་མ་དོན་ཁོ་གཉིས་ཡིན་འདུག ཁོང་མོ་ལ་ལོ་ ༡༤ ཅན་གྱི་བུ་མོ་ཚུལ་ཁྲིམས་སྒྲོལ་མ་ཟེར་བ་ཞིག་ཡོད་འདུག
༅༅། སྒྲོལ་མ་མཚོ་བཀྲིས་བདེ་ལེགས་ཡོད། ཁྱོད་སེམས་མ་སྐྱོ་། ཁྱོད་ཀྱི་གནས་ཚུལ་ཚང་མ་ང་ཚོའི་ཤེས།
ང་ཚོའི་ལས་དབང་རེད།
ཁྱོད་སེམས་ལྷོད་དུ་བསྡད་ནས་གཟུགས་པོར་བདག་པོ་ཡག་པོ་གྱིས།
རྒྱ་ནག་པོ་ཆོས་མེད་ཀླ་ཀློའི་ཉེས་མེད་བོད་མི་ཚོར་བཙན་པོ་དབང་ཡོད་བཤད་ནས་སྡུག་པོ་
ཇི་ཙམ་བཏང་ཡང་སེམས་ནང་གི་སེམས་ཤུགས་དང། མི་རིགས་གི་རྒྱལ་ཞེན་དེ་ནམ་ཡང་མི་འགྱུར།
ལུས་བདེ་ཞིང་སེམས་སྐྱིད་པར་སྨོན།
རང་གཞན་ཀུན་ཕན་གྱི་དོན་ཆེན་འགྲུབ་པར་ཤོག
ལྷག་བསམ་གདུང་གི་ཟླ་བ་སྒྲོལ་མ་མཚོ་།
ལྷག་བསམ་རྒྱལ་ཞེན་ཆེ་ནས་བརྩོན་ནང་ཚུད་།
ལྷག་བསམ་སྒོ་ཆ་བརྟན་པོའི་བརྩོན་ནས་མཐར་།
ལྷག་བསམ་ཅན་ལ་དགའ་བསུའི་འཚམས་འདྲི་ཞུ་།