རེབ་ཐོག་མདའ།
སྔོ་བསང་ནམ་མཁའི་དྭངས་གཙང་བཞིན་ལ་ལྷོ་ཡི་སྤྲིན་པ་མགྲོན་དུ་སླེབས།།
ཉི་མའི་འོད་ཐིགས་ས་གཞིར་འཕྲོས་པས་ས་ཆེན་གོ་ལ་རྔུལ་ཆུས་བརླན།།
ཚ་སྨུག་ཀློང་གི་རི་དང་གཙང་པོ་ངལ་དུབ་ཀློང་ན་འགུལ་ཞིང་སྐྱོམ།།
གློ་བུར་ལྡིང་བའི་སྨིག་སྤྲིན་མཐུག་པོས་སུན་པའི་མགོ་བོ་དལ་གྱིས་དུད།།
སྨག་རིམ་སྟུག་པོ་ཁྲོས་པའི་ཉམས་ཀྱིས་ཉི་མའི་སེར་ཐིགས་སྤྲིན་ལ་འཐིམ།།
འབྲུག་སྒྲའི་ངར་སྐད་རྒྱང་ནས་མཆེད་པས་རི་བོའི་མགོ་འཕང་འདར་ཞིང་ཡོམ།།
ཤག་ཤག་འབབ་པའི་ཆར་ཆུའི་ཀློང་ན་རྐང་གཉིས་ཚོགས་རྣམས་ནང་དུ་འདུས།།
ལྗོན་པའི་ཚོགས་ཀྱི་མགོ་དང་ཡལ་ག་རང་ཚུགས་ཤོར་ནས་ས་ལ་ཟགས།།
ད་ནངས་རི་རྩེའི་འོད་ཐིགས་སེར་པོ་ད་ནི་སྨག་རུམ་གྱོན་དེ་འདུག།
ཁ་སང་རི་ལུང་སྐམ་པོའི་གཞུང་ན་རྒྱུག་ཆུའི་ཀུ་ཅོ་བྲག་ལ་མཆེད།།
དེ་རིང་ཆར་ཆུའི་ནམ་དུས་འདི་ལ་ཁང་ཁྱིམ་གྲུ་བཞིའི་སྦུག་དེ་ནས།།
མཛའ་མོའི་མགོ་བོ་བྲང་ལ་གླན་བཞིན་ཐེངས་གཅིག་ཉལ་ན་ཅིའི་མི་འདོད།།
སྤང་གི་མེ་ཏོག་འཛུམ་པའི་གདོང་ལ་རེ་ཞིག་མི་འདོད་མཆི་མས་བརླན།།
གཡུ་སྦྲང་སྐྱོ་བའི་ཕྱིར་མིག་གློད་བཞིན་རང་མལ་ཕྱོགས་ལ་འདབ་གཤོག་རྐྱང་།།
སྐད་སྙན་སྒྲོག་པའི་བྱིའུ་ཚོགས་དག་ཀྱང་ལྗོན་པ་དག་གི་ཁང་ཁྱིམ་འོག།།
ཆར་ཆུའི་ནམ་ཟླར་སུན་པའི་ཚུལ་གྱིས་ཁྱུ་དང་ཁྱུ་རུ་ཚོགས་ཏེ་གདའ།།
ལྗང་མདོག་ཁོར་ཡུག་མཛེས་པའི་བཞིན་རིས་ཆར་ཆུའི་རྗེས་ནས་དལ་གྱིས་མཐོང་།།
ཉི་མའི་མིག་ཟུང་དལ་གྱིས་ཕྱེས་པས་སླར་བཞད་མེ་ཏོག་འཛུམ་ཤིག་ཤིག།
ལམ་འགྲམ་གད་སྙིགས་རྒྱང་ལ་འཁུར་བའི་དྲི་ངན་རྣ་བས་མ་ཚོར་ཡང་།།
དབྱར་གྱི་ཆར་བའི་ནམ་ཟླའི་ཀློང་ནས་བདག་གི་སེམས་པ་གྲང་ཤུར་ཤུར།།
ཡག་གི
ཡིན་ན་ཡང་ཚིག་སྙན་པ་ལས་ཚོར་བ་ཡོད་པའི་བཟོ་མི་འདུག
ཤུགས་རྒྱོབས
སྙན་ངག་ལ་ཆགས་སྡང་གི་ཚོར་བ་ཡོད་དགོས་ཟེར།
སློབ་ཁྲིད་སྐབས་དགེ་རྒན་གྱིས་ཡང་ཡང་གསུངས་པ་ད་དུང་དྲན་ཡུལ་ན་འདུག
ཤུགས་རྒྱོབས
གཞན་ཞུ་ཡ་མེད
རེད། རེད། ཤུགས་རྒྱོབ། མུ་མཐུད་ནས་ཕྲིས།
དེ་སང་ཚང་མ་ཆབ་སྲིད་དང་དཔལ་འབྱོར་ཁོ་ནར་མགོ་འཁོར་ནས་སྙན་ངག་སྲུང་སྐྱོབ་བྱེད་རྒྱུ་བརྗེད་བཞིན་ཡོད་པ་འདྲ།
ཁོར་ཡུག་ཞིབ་འབྲི་བྱས་པའི་རྣམ་པ་ཧ་ཅང་བློར་བབས་སོང་ཟེར་རྒྱུ་ཡིན།