འབའ་སྲས།
བོད་ཀྱི་ལ་རྒྱ་བརྗོད་པའི་རྩོམ་ཡིག་ཅིག །
ཕ་མ་ཕ་ཡུལ་དྲན་པའི་སྐྱོ་གླུ་ཞིག །
མཛའ་བརྩེ་དུང་བ་བརྗོད་པའི་སྙན་ངག་ཅིག །
ནན་གྱིས་བཙིར་ཀྱང་མ་ཡོང་ཆང་འདི་འཐུངས།།
བླ་མར་བྱམས་བརྩེ་དགོས་པའི་གསོལ་འདེབ་ཅིག །
དཔོན་པོར་དྲང་བདེན་དགོས་པའི་ཞུ་ཡིག་ཅིག །
གྲོགས་ལ་ཕྱི་ཐག་རིང་དགོས་ཁ་བརྡ་ཞིག །
འབྲི་དགོས་བསམས་ཀྱང་མ་བྲིས་ཆང་འདི་འཐུངས།།
གྲྭ་བ་སྡོམ་ཁྲིམས་གཙང་དགོས་བཀའ་ཆེམས་ཤིག །
དགོན་པར་ཆོག་ཤེས་དགོས་པའི་འགྲེལ་བཤད་ཅིག །
འཁོར་བར་སྙིང་བོ་མེད་པའི་ཡིད་ཆད་ཅིག །
བསམས་ཤིང་བརྩོན་ཀྱང་མ་དྲན་ཆང་འདི་འཐུངས།།
དགེ་རྒན་ཡོན་ཏན་མང་དགོས་རེ་བ་ཞིག །
སློབ་མར་བརྩོན་འགྲུས་ལྡན་དགོས་སློབ་གསོ་ཞིག །
ཤེས་ཡོན་ཀུན་ལ་ཕན་དགོས་རེ་བ་ཞིག །
ཇི་ལྟར་འབྲི་དགོས་མ་ཤེས་ཆང་འདི་འཐུངས།།
མཁས་པས་རང་ལུགས་མི་གསུངས་སྤྱི་བཤད་ཅིག །
ཆབ་སྲིད་ལྟ་གྲུབ་མི་གཙོ་གཅིག་གྱུར་ཞིག །
སུ་གང་མགོ་ཉོག་མེད་པའི་གསལ་གསལ་ཞིག །
འབྲི་དགོས་བསམས་ཀྱང་མ་འཁྱོངས་ཆང་འདི་འཐུངས།།
ཆོལ་གསུམ་གཅིག་ཏུ་སྒྲིལ་བའི་རྡོག་རྩ་ཞིག །
ཆོས་ལུགས་ཕན་ཚུན་མཐུན་པའི་གྲུབ་མཐའ་ཞིག །
གསར་འབྱོར་རྙིང་འབྱོར་མེད་པའི་མཛའ་བརྩེ་ཞིག །
ཇི་ལྟར་བཤད་དགོས་མ་ཤེས་ཆང་འདི་འཐུངས།།
བཙན་པོས་གཉའ་གནོན་མེད་པའི་བདེ་སྐྱིད་ཅིག །
དབུལ་ཕྱུག་ཁྱད་པར་མེད་པའི་འཚོ་བ་ཞིག །
རྒྱལ་ཁབ་དམག་འཁྲུག་མེད་པའི་ཞི་བདེ་ཞིག །
བསམ་ཞིང་བསམས་ཤིང་མ་བྲིས་ཆང་འདི་འཐུངས།།
མི་རིགས་དབྱེ་འབྱེད་མི་ཆོག་རྩ་ཁྲིམས་ཤིག །
ཕོ་མོ་འདྲ་མཉམ་ཡིན་པའི་ཐོབ་ཐང་ཞིག །
ལོ་ན་རྒན་གཞོན་བར་ན་མཐོ་དམའ་ཞིག །
ཡོད་དགོས་འབྲི་ཤེས་མ་ཐུབ་ཆང་འདི་འཐུངས།།
ཕ་མས་བརྩེ་བས་བསྐྱངས་ལ་དྲིན་ལན་ཞིག །
དགེན་གྱིས་རིག་གནས་བསླབས་ལ་གྲུབ་འབྲས་ཤིག །
མི་ཟས་ཁ་ལ་རོལ་བའི་ཟས་རིན་ཞིག །
ཆད་ཡོད་འབྲི་ལ་རྨོངས་པས་ཆང་འདི་འཐུངས།།
མདུན་ལ་ཡོད་དུས་ལྷ་ཡི་འཛུམ་མདངས་ཤིག །
རྒྱབ་ཏུ་ཕྱོགས་ཚེ་གདོན་གྱི་ཁྲོ་གཉེར་ཞིག །
རྒྱབ་མདུན་གཉིས་ལ་མི་གཅིག་ངོ་གདོང་གཉིས།།
མི་དགོས་འབྲི་ཐབས་མ་ཤེས་ཆང་འདི་འཐུངས།།
ཆུང་མ་བཟང་མོ་དགོས་པའི་ཁ་བརྡ་ཞིག །
བུ་ཕྲུག་ཡ་རབས་དགོས་པའི་སློབ་གསོ་ཞིག །
ཁྱིམ་ཚང་དགོད་སྒྲས་ཁེངས་པའི་འཚོ་བ་ཞིག །
ལྡན་དགོས་བརྗོད་ལ་ལྐུག་པས་ཆང་འདི་འཐུངས།།
མདོར་ན་ཕ་ཡུལ་གང་ཡིན་ས་ཆ་ཞིག །
རང་ཉིད་སུ་ཞིག་ཡིན་པའི་ངོ་གདོང་ཞིག །
ཚེ་སྲོག་གང་ནས་བླངས་པའི་རིགས་རྒྱུད་ཅིག །
ཅིས་ཀྱང་འབྲི་དགོས་མ་ཤེས་ཆང་འདི་འཐུངས།།
༢༨/༠༥/༢༠༡༣
གྲོགས་པོ་ཞིག་གི་ཚབ་མཚོན་གྱི་མཆན།
མཐོ་བ་གངས་རིའི་རྩེ་ནས་བྱ་ཞིག་བསད། །
དམའ་བ་གཙང་ཆུའི་འགྲམ་ནས་ཉ་རེ་བླང་། །
བྱིས་པའི་རྩེད་འཇོ་སྤང་རིའི་གཞུང་ནས་ཟད། །
ཆང་ཞིག་མེད་པའི་དཀའ་ངལ་མ་རེག་ཐལ། །
སྨན་ཤར་བུ་མོའི་མིག་ཟུང་རྒྱབ་ཏུ་བསྐྱུར། །
འཕྲལ་རྐྱེན་ལས་ཀྱི་ལྕགས་ཐག་སྐེ་ལ་བསྐོན། །
དབེན་པའི་གནས་སུ་ཞི་བདེའི་རླུང་བུ་རྔུབ། །
ཆང་ཞིག་མེད་པའི་དཀའ་ངལ་མ་རེག་ཐལ། །
མདོ་རྒྱུད་ཚད་གསུམ་ཀློང་དུ་དྷི་སྒྲས་མྱོས། །
གསང་སྔགས་རིག་པའི་མེ་དྲོད་སྙིང་ཁར་འཁྱིལ། །
སྣང་སེམས་གཅིག་ཏུ་དྲིལ་བའི་དགའ་བདེ་ཐོབ། །
ཆང་ཞིག་མེད་པའི་དཀའ་ངལ་མ་རེག་ཐལ། །
གང་སྣང་དབྱངས་ལ་གྱེར་བའི་རྩོམ་རེ་བྲིས། །
གནའ་དེང་ཤེས་རིག་གླེང་བའི་གཞི་རེ་བཙུགས། །
འཛམ་གླིང་འགྲིམས་པའི་ལྟད་མོ་འདི་ན་འདུག
ཆང་ཞིག་མེད་པའི་དཀའ་ངལ་མ་རེག་ཐལ། ། ཧཧཧ
དགེན་གྱིས་རིག་གནས་བསླབས་ལ་གྲུབ་འབྲས་ཤིག །
འདི་དང་།
༼དགེ་༽རྒན་གྱིས་རིག་གནས་བསླབས་ལ་གྲུབ་འབྲས་ཤིག །
འདི་གཉིས་ལས་གང་དག་གམ།
སྙན་ཐལ། དགེ་བཤེས་བྱ་འཕུར་ཚང་གི་རྩོམ་དེ་ལྷག་ཏུ་སྙན་ཐལ།
རྟ་འདོ་བ་མེད་ན་སྡུག་གི་ཟེར།།
འདང་བརྒྱབ་ན་དེ་ལ་ཅི་ཞིག་སྡུག །
སྟོད་རི་སྤྱང་སྔོན་མོར་རྟ་མེད་ཀི།།
གན་ཡན་ན་མགྱོགས་པ་གཞན་མེད་ཀི།།
རོགས་ཆུང་ལོ་མེད་ན་སྡུག་གི་ཟེར།།
འདང་བརྒྱབ་ན་དེ་ལ་ཅི་ཞིག་སྡུག །
སྟོད་རི་ཁྲོད་མཚམས་པར་རོགས་མེད་ཀི།།
གན་ཡན་ན་སྐྱིད་པོ་གཞན་མེད་ཀི།།
ཆང་བདུད་རྩི་མེད་ན་ལྐུག་གི་ཟེར།།
འདང་བརྒྱབ་ན་དེ་ལ་ཅི་ཞིག་ལྐུག །
དགེན་བྱ་འཕུར་ཚང་ལ་ཆང་མེད་ཀི།།
གན་ཡན་ན་སྙན་ངག་མཁན་མེད་ཀི།།
ཆང་ཁང་ནང་དུ་འབྱོར་རོགས་བྱས་ན། །
ཤར་ལྷོ་ནུབ་བྱང་གང་ཡིན་྄ཁྱད་མེད།།
ས་དགེ་བཀའ་རྙིང་གང་ཡན་྄ཁྱད་མེད།།
ཆོལ་གསུམ་གང་ཡིན་བོད་རིགས་སྤུན་ཟླ།།
གང་ནས་བལྟས་ཀྱང་སྙིང་པོ་མིན་འདུག །
དེ་ལས་ཆང་ཞིག་འཐུང་ན་ཞིམ་པ།།
ཆང་ཁང་ཆུང་བ་རྩ་སྤྱིལ་ཡིན་རུང་།།
ཆང་མའི་བརྩེ་སེམས་ཡིད་དབང་འཕྲོགས་སོང་།།
བྱ་འཕུར་ལྷུན་གྲུབ་རྒྱ་མཚོ་ཚང་དགེ་བཤེས་ཆེན་པོ་ཞིག་ཡིན་ན། མ་རེག་ཐལ་གྱི་རེག་དེ་རྦད་དེ་ནོར་འདུག་པར་འདོད། མགོ་མགོ་གཙོ་གཙོ་ཚོས་འདི་འདྲ་གནང་ན། ང་ཚོ་ལ་ཡར་རྒྱས་འགྲོ་སའི་ལམ་ཁ་མི་འདུག།