ཏཱ་ནི་ལྷ་རྒོད།
ཉེ་སྔོན་དགེན་ལྷམ་ཀོག་ལགས་ཀྱི་བཀའ་དྲིན་ལ་བདག་སྙན་ངག་གིཕ་ཁྱིམ་ཞེས་བའི་ཚོགས་པ་ཞིག་གི་ནང་དུ་ནང་བྱེད་ཐུབ་པ་བྱུང་བས་དགེན་ལྷམ་ཀོག་ལ་སེམས་གཏིང་ནས་བཀའ་དྲིན་ཆེ་ཞུས་བ་ཡིན། ཚོགས་པ་དེ་ན་བོད་ཡུལ་མདོ་དབུས་ཁམས་གསུམ་ན་དགའ་བསུ་ཐོབ་པའི་བོད་ཀྱི་མཁས་དབང་ཆེན་མོ་རྒན་པད་མ་འབུམ་དང་། སྙན་ངག་པ་ཧོར་གཙང་འཇིགས་མེད། རོང་བོ་དགེ་འདུན་ལྷུན་གྲུབ། དགེ་འདུན་རབ་གསལ་སོགས་ཤེས་ཡོན་པ་མང་པོ་ཞིག་ཡོད་པས་དངོས་ནས་རིག་གཞུང་བགྲོ་གླེང་གི་སྟེགས་བུ་ཡག་པོ་ཞིག་ཆགས་ཡོད། ཁོང་ཚོའི་མཁྱེན་རྒྱ་ཡངས་བའི་གཏམ་བཤད་དག་ལས་བདག་ལ་བློ་བསྐྱེད་དང་ཤེས་བྱ་ཧ་ཅང་མང་པོ་ཞིག་ཐོབ་བྱུང་། ཚོགས་པ་འདིའི་ཁ་ཕྱོགས་སམ་བརྗོད་བྱ་གཙོ་བོ་ཡིན་ན་བོད་ཀྱི་སྙན་ངག་གི་སྐོར་རེད། དེ་ཡང་ང་ཚོ་མི་བུ་སོ་སོའི་ཤེས་ཡོན་གྱི་ཆུ་ཚད་ཀྱི་དབང་གིས་སྙན་ངག་ཟེར་བ་འདི་ལ་ཡང་གོ་བ་ལེན་སྟངས་ཅི་རིགས་ཤིག་ཆགས་ཡོད། སྒྱུ་རྩལ་རང་བཞིན་གྱི་སྐད་ཆའི་སྒྲོམ་གཞི་ཞིག་གམ་བརྡ་དང་ཐ་སྙད་ཀྱི་སྦྱོར་སྟངས་ཁྱད་པར་བ་ལ་སྙན་ངག་ཟེར་བ་མ་ཟད། ནང་སེམས་ཀྱི་དགའ་སྐྱོ་ཆགས་སྡང་མཚོན་བྱེད་ཀྱི་ཚིག་སྦྱོར་དམིགས་བསལ་བ་ཞིག་ཡིན་ན་སྙན་ངག་ཏུ་གོ་ཆོག་གི་སྙམ་པའི་ལྟ་ཚུལ་ཞིག་སྐྱེས་བྱུང་། ང་ཚོ་བོད་མི་རིགས་ཡིན་ན་རིག་གནས་ཀྱི་རྔམས་ཁ་མཐུག་པའི་མི་རིགས་ཤིག་ཡིན་པ་ཀུན་གྱིས་ཤེས་གསལ་ལྟར་རེད། ཡིན་ན་ཡང་ང་ཚོར་ཤེས་རིག་གི་ལྡིང་ཁང་ན་ཅུང་ཆ་མི་ཚང་བ་དང་སྟོང་ཆ་ལྟ་བུ་ཞིག་ཤོར་ཡོད་པ་ནི་མི་རིགས་རྩོམ་རིག་ཀྱི་ཕྱོགས་རེད། མཁས་དབང་དོན་འགྲུབ་རྒྱལ་ཡར་སྔོན་དུ་བོད་ཀྱི་རྩོམ་རིག་གི་ཁྱབ་ཁོངས་་ཆོས་ལུགས་ལས་ཐར་ཐུབ་མེད་པ་དང་། ཆོས་ལུགས་པས་དབང་བསྒྱུར་བྱས་འདུག་པ་ལྟ་བུའི་ཚོར་སྣང་ཞིག་སྟེར་ཡོང་། ཆོས་ལུགས་པའི་ཁྲོད་ཀྱི་རྣམ་ཐར་དང་རྟོགས་བརྗོད། མགུར་གླུ་སོགས་མཛད་པའི་རྩོམ་པ་པོ་དེ་དག་ལ་ཡང་རྩོམ་རིག་གི་ཆུ་ཚད་ངེས་ཅན་ཞིག་ལྡན་པ་བསྙོན་དུ་མེད་མོད། ཁོ་ཚོའི་སྙན་ངག་དང་བོད་ཀྱི་སྤྱི་ཚོགས་གཉིས་བར་ན་འབྲེལ་བ་སྤུ་ཙམ་མེད་པའམ་ཁ་ཐག་ཧ་ཅང་རིང་བ་སོགས་ཀྱི་སྣང་ཚུལ་ཡོད་འདུག. དེའི་རྐྱེན་གྱིས་དེ་དག་མི་རིགས་ཀྱི་ཚབ་མཚོན་རང་བཞིན་ལྡན་པའི་སྙན་ངག་པའམ་རྩོམ་རིག་པ་རུ་གྱུར་མེད། ང་ཚོས་འཛམ་གླིང་རྩོམ་རིག་གི་ལོ་རྒྱུས་བཤུལ་ལམ་ལ་ཕྱིར་ལྟ་ཞིག་བྱས་ན་དེ་དག་རང་རང་གི་མི་རིགས་སམ་རྒྱལ་ཁབ་གང་དེའི་སྤྱི་ཚོགས་འཚོ་བ་ལ་ཧ་ཅང་འབྲེལ་ཡོད་པ་མ་ཟད། སྤྱི་ཚོགས་ཀྱི་འགྱུར་ལྡོག་སོགས་ཀྱིས་རྩོམ་རིག་འཕེལ་རྒྱས་ལ་སྒུལ་ཤུགས་ཧ་ཅང་ཆེན་པོ་ཐེབས་ཡོད། དཔེར་ན་རྒྱ་མི་རིགས་རྩོམ་རིག་དེ་ལྔ་བཞིའི་ལས་འགུལ་སྐབས་སུ་ཧ་ལས་བའི་འཕེལ་རྒྱས་ཆེན་པོ་བྱུང་ཡོད་པ་ལྟ་བུ། དེ་ལྟར་རྩོམ་རིག་གི་ཁྱབ་ཁོངས་ནས་བཤད་ན་སྙན་ངག་འདིས་གོ་གནས་གལ་ཆེན་ཟིན་ཡོད། ང་ཚོ་གཞོན་རབས་པ་ཚོས་རང་ཉིད་ཀྱི་ལམ་ཁ་མ་ནོར་བའི་སྒོ་ནས་བད་ཀྱི་རིག་གནས་ཐོས་བརྩོན་སྒོམ་གསུམ་བྱེད་རྒྱུ་ཧ་ཅང་གལ་ཆེ་བ་རེད། ང་ཚོས་ཐོག་མར་སྲོལ་རྒྱུན་སྙན་ངག་ལ་རྨང་གཞི་ཡག་པོ་ཞིག་སྦྱང་བའི་རྗེས་དེང་རབས་སྙན་ངག་སྦྱང་ན་ད་གཟོད་གོ་རིམ་ཡང་དག་པོ་ཞིག་བསམ་པའི་འདོད་བློ་སྐྱེས་བྱུང་། རྫ་དཔལ་སྤྲུལ། ཚངས་དབྱངས་རྒྱ་མཚོ། ཞང་ཞུང་ཆོས་དབང་། རྗེ་ཙོང་ཁ་པ། འཇུ་མི་ཕམ་ལྟ་བུ་སྙན་ངག་སྨྲ་བའི་དབང་བོ་དག་གི་སྙན་རྩོམ་དྲི་ཟའི་རོལ་དབྱངས་ལྟ་བུ་དག་ལོངས་སུ་སྤྱོད་བཞིན་ནང་སེམས་ཀྱི་མཚོན་ཐབས་དེ་སྐད་ཆའི་སྒྱུ་རྩལ་ཡང་པོ་ཞིག་སྦྱང་རྒྱུ་ནི་རང་ཉིད་སྙན་ངག་པ་བཟང་ཤོས་ཤིག་ཏུ་འགྱུར་ཐུབ་པའི་སློབ་སྦྱོང་གི་གོ་རིམ་རེད་ལྟ་བུའི་ལྟ་ཚུལ་བཏོན་པ་ཡིན། མཇུག་མཐར་ཁྱེད་ཅག་ལ་ཞུ་རྒྱུ་ཞིག་ལ་བོད་ཀྱི་སྙན་ངག་པའམ་རྩོམ་པ་པོ་ཡིན་ན་བོད་རང་གི་བྲོ་བ་ལྡན་རྒྱུ་ནི་ཐོག་མའི་ཆ་རྐྱེན་ཡིན་ནོ།།
ཁྱོས་མི་དབང་རྟོགས་བརྗོད་ལྟ་བུ་བཀླགས་ཡོད་ས་མ་རེད།