རི་སྤྱང་ཁེར་འགྲོ
………………………….
ཀ།
མཁའ་དབྱིངས་ཀྱིས་བདག་ལ་སྒོ་ཆེན་ཕྱེས།
ས་ཆེན་གྱིས་བདག་ལ་ཞབས་སྟེགས་བསྩལ།
འཕུར་སྟངས་འདི་ཐང་དཀར་རྒོད་པོ་ཞིག་འདྲ་ལ།
འགྱིང་ཚུགས་འདི་གངས་སེང་ངར་མ་ཞིག་ལྟར།།
ཁ།
བྲང་ཁོག་ནང་ལྟེམས་ལྟེམས་བྱེད་པ།
ཞི་བདེ་རྒྱ་མཚོར་འགྲན་སློང་བ་རེད་དམ།
རྩ་ལམ་ན་ཤུར་ཤུར་ལྡང་བ།།
ཐུ་བྷོད་བྱང་ཐང་ལ་ཐོ་འཚམས་པ་ཡིན་ནམ།
ག
བུ་ཆུང་སྐྲག་པའི་ངུ་འབོད་ཀྱིས།
ཨ་མ་མཚན་གུང་གཉིད་ལས་དཀྲོགས།
རྒྱ་མཚོའི་དྲག་རླབས་འཕྱོམ་པ་ཡིས།
ཉ་མོ་ཁེར་འགྲོ་སྐམ་སར་གཡུག།
ང་།
ཁ་བ་གཙང་མའི་འབབ་རྒྱུན་དེས།
ནགས་ཀླུང་སྟུག་པོ་ཚིམ་པར་བྱས།།
ཅ།
མེ་འཁོར་གྱི་རྒྱུ་བ་སྐར་མདའ་སྙེག་པའི་འགྲོས།
རྒྱང་འགྲུལ་བའི་སེམས་པ་རླུང་ཆེན་ནང་སྤྲིན་ནག་བསྐྱོད་པའི་རླབས།།
ཆ།
ཆང་ཕོར་གང་ཧུབ་འཐུང་བྱས་བར།
རིག་པ་ཡི་རྩ་མདུད་ཁྲིགས་སེ་གྲོལ།
སྙན་ངག་འདི་འགོག་ཏུ་མི་བཏུབ་བས།
སྣག་ཤོག་གི་སྟ་གོན་ད་བྱོས་ཤིག
ཇ།
བྱ་བཏང་བའི་འཚོ་བ་གུ་ཡངས་པོ།
བསིལ་རླུང་གི་རེག་བྱ་ཁམས་དངས་པོ།
ཆུ་ཕྲན་གྱི་ལྗོངས་རྒྱུ་ཉམས་སྤྲོ་བོ།
ལྗོན་ཤིང་གི་བསིལ་གྲིབ་ཡིད་དྲངས་པོ།
སྙན་ངག་གི་སྲོག་ལ་ད་ཞུགས་ཤིག།།
ཉ།
རི་དགས་རྒྱུ་བའི་འབྲོག་དགོན་ན།།
ངོ་ཚ་སྨིན་པའི་ཁོ་མོས།
ཆུ་མིག་ཅིག་མེ་ལོང་ལ་བསྟེན་ཏེ།
ཞལ་རས་ལ་གཙང་དག་བྱེད།
ནགས་བྱེའུ་མཁའ་ལ་འཕུར།
ཤིང་ལོ་རླུང་གིས་འཁྱེར།
དབེན་ཐིང་ཐིང་གི་རྫ་སུལ་ནས་འབུད་ཤིང་འཐུ་བཞིན།
སྔོ་སེང་སེང་གི་མཁའ་ལ་ལ་གཞས་ལེན།
ཏ
ཉ་/ གསེར་འོད་ཆེམས་ཆེམས་ཆུ་མོའི་ངོགས་ན།
ཕྱེད་/གཅེར་ཧྲེང་མ་ཞིག་ཁྲུས་ལ་ཞུགས་འདུག།
བྲག་/ རྒོད་སྙིང་ འདར་བའི་ཡ་ཐོད་ནས།
བུའུ་/ཕྲག་འཁུར་ཞིག་གིས་རྒྱང་བལྟ་བྱེད།
ཐ
འཁོར་བའི་སྲོག་ཤིང་གཅེར་ཧྲེང་མ།
ཡིག་འབྲུ་བཅུ་བདུན་གྱི་བདག་མོ།
བདག་གི་བག་མར་བྱོན་དང་།
ད
སྔོན་ཚེ་རྨི་ལམ་ཞིག་ནང་།
ཁ་བ་དམར་ཧྲེང་བབས་པ།
ད་དུང་སེམས་ལ་ཆགས་འདུག
ན
ན་ལེན་དྲ་ཡི་གྲ་རྒོད།
རྡོ་རྗེ་ཕུར་བའི་བདག་པོ།
མདང་དགོང་དྲ་རྒྱའི་ངོས་ན།
འཁྲལ་འཁྲུལ་རྩེད་མོ་རྩེ་ཀི།
པ
ཁ་ཏའི་བེམ་རོ་ཞིག
བྱ་ཚང་བཤིག་རོ་ཞིག་དང་ལྷན།།
སྡོང་རྩེ་ན་ལྩེབས་འདུག
སེང་གེ་ཤི་བོ་ཞིག
ཁྱི་རོ་ཞིག་དང་མཉམ།
གངས་ཁྲོད་ན་རུལ་འདུག
ཕ
ཨ་ཕའི་གཙུག་གཡུ།
སྙིང་ཁ་ལ་བཙུགས་ཡོད།
ཨ་མའི་བྱུ་རུ།
ལྟེ་ཁྲག་ལ་འཕོས་སོང་།
བ
མདའ་ཞིག་བོར་དེ་ཚེ་གང་སྐྱོ་སྡུག
མདུང་ཞིག་སྟོར་བར་ཕྱིར་ཕྱིར་འཕྲེང་འདུག
སྒྱུ་རྩལ་བྱང་མ་ཉི་ཧོང་སུམ་རྐང་།
སྐྱོ་བསལ་གར་ལ་ཚར་གཅིག་ཞུགས་དང་།
སེམས་གསོ་རྒྱུད་མང་ལན་གཅིག་དཀྲོལ་དང་།
མ
སླར་ཡང་།
བྱིས་པ་བཙས་མ་ཞིག་ལྟར།
ངག་ལྐུགས་སོང་།
ཙ
སྐབས་རེར་སྨྱོན་པ་ཞིག་ལྟར་རྒྱུ་མཚན་མེད་པར་ཧ་ཧ་ཧ།
ལན་རེར་ནམ་གུང་གྲིམ་སེ་ལངས་ཏེ་མདོ་གདུགས་སྒྲོལ་གསུམ་དི་རི་རི།
མཚམས་རེར་ཅི་ཡིན་འདི་ཡིན་མེད་པར་རང་བྱུང་འབོད་སྐད་ཀི་ཧེ་ཧེ།།
གདོན་གྱིས་ཟིན་འདུག་ཟེར་ནས་ཁོང་ཚོས་ང་ལ་ཕཊ་ཕཊ་ཕཊ
ཚ
མི་རབས་ནས་མི་རབས།
བུ་རབས་ནས་བུ་རབས།
བོས་བོས་ནས་ངག་ཀྱང་བོར་སོང་།
འབོད་པ་ལ་ལན་མེད་པ།
གསོན་དགོས་པའི་སྤོབས་པ་རེད་འདུག
ཛ
ལྟ་གྲུབ་ཀྱི་གྲོག་རོང་ནས་ངལ་ཞིང་།
ཡིག་ཚོགས་ཀྱི་ཚང་ཚིང་ནས་བོར་ཏེ།
མི་གཤིས་ཤོར་བའི་རྫུན་མ་ཞེས།
རང་གིས་རང་ལ་གཤེ་བ་འདི་ཅི་ཞིག་ལགས།
ཝ
ཁ་སང་དེ་རིང་གི་རྒུད་པ་འདི།
ཝ་སྐད་ཤོར་བཞིན།
ཝ་རྔ་འདྲུད་པ་དང་ཀུན་ནས་མཚུངས།
ཞ
མཚམས་འདིར་སླེབས་ནས།
ངག་གི་ང་རོ་ཤི་སོང་།
… … …
དམར་ཧྲེང་མ་སྒོམ་རྒྱུ་མང་ན།
སེམས་ཧྲེང་པོ་རི་ལ་ཤོར་ཡོང་།
ནག་ཧྲེང་ངེར་འཁོར་བར་འཕྱན་ན།
སྐྱ་ཧྲེང་ངེར་མི་ཚེ་སྟོང་ཡོང་།
མི་ཧྲེང་ཧྲེང་གཉིད་ལམ་ནང་དུ།
མོ་ཧྲེང་ཧྲེང་གར་ལ་རོལ་བ།
སྐྱ་ཧྲེང་ཧྲེང་བྱང་ཐང་ལུང་པར།
རྩ་ཧྲེང་ཧྲེང་རླུང་གིས་བསྐྱོད་འདྲ།
ཕོ་ཧྲེང་དང་མོ་ཧྲེང་ཐག་རིང་བསྡད་ན་ཉེ། །
མོ་ཧྲེང་དང་མོ་ཧྲེང་མཉམ་འདྲིས་བྱུང་ན་འཇམ། །
ཕོ་ཧྲེང་དང་ཕོ་ཧྲེང་འགྲོགས་ནས་འགྲོ་ན་བདེ། །
ཕོ་ཧྲེང་དང་མོ་ཧྲེང་གཉེན་སྒྲིག་བྱས་ན་མཛེས། །
༡༽ ་་་་་་་་་་་་་་་་་་་་་་་་་་་་་་་བསྡད་ན་འཆམས། །སུ་བཅོས་ན་ལེགས།