ཀླུ་སྨྱོན།
སྣག་ཚ་བུམ་པ་གང་མི་རིགས་ཤིག་གི་ཟུངས་ཁྲག་དང་བསྲེས་ཏེ།
ལོ་རྒྱུས་ཀྱི་ལྡེབས་རིས་ཆེན་པོ་ཞིག་བཞེང་དུས།
བཙན་པོའི་དུས་ཀྱི་རྟ་དམག་གི་རྨིག་རྡུལ་ཡང་སྐྱར་འཐིབས་བྱུང་ལ།
མཐའ་བཞིའི་རྒྱལ་ཕྲན་ཚོར་སྤྲིངས་པའི་བཀའ་ཤོག་གི་གཟི་བརྗིད་ཀྱང་ཡང་སྐྱར་འབར་བྱུང་།
བཙན་པོའི་རྒྱལ་རབས་ཀྱི་དེབ་ཐེར་མཐུག་པོ་དེའི་བམ་ཁ་སྔོགས་དུས།
སུམ་གཉིས་ས་ལ་སླར་ཡང་དམག་དར་དང་རལ་གྲི་གཡུགས་སོང་།
གངས་སེང་དཀར་མོས་སླར་ཡང་གཡུ་རལ་དང་སྡེར་བཞི་གཟེངས་སོང་།
པོ་ཏ་ལའི་རྡོ་སྐས་ཀྱི་ཚ་དྲོད་མཐོ་རུ་ཕྱིན་ཅིང་།
བར་སྐོར་གྱི་བསང་དུད་དགུང་སྔོན་མཐོན་པོར་འཕྱུར་དུས།
ངས་ཡང་སྐྱར་ལོ་རྒྱུས་ཀྱི་དམུ་ཐག་དཀར་པོ་ཞིག་རྙེད་ཅིང་།
དེ་ལ་འཇུས་ནས་བཙན་པོ་རིམ་བྱོན་ལ་མཇལ་བར་འགྲོ་འདོད་ཅིང་།
ཁོ་ཚོའི་དཔའ་མཛངས་དང་བློན་ཆེན་ཚོའི་དམག་ཇུས་སོགས་ལ་ཡང་བློ་སྦྱོང་རེ་བྱེད་པར་མོས།