—-
@བྱམས་ཕྲུག
པད་མ་ཚེ་བརྟན།
ཁྱོད་ནི་འགྲམ་ཆང་གི་གཉེན་པོར་བཞད་པའི་བ་ཀུ་ལ།
མེ་ལྕེའི་ལག་ངར་གྱིས་བཏེགས་པའི་སྡུག་གིས་བཟུང་བའི་གངས་རི།
ཁ་བ་མེད་པའི་དགུན་ཁར་སྤུངས་པའི་རྩྭ་ཐང་གི་མ་ཎི་རྡོ་འབུམ།
ཨམ་གཙིགས་དང་མིག་ཆུ།
ཁེར་རྐྱང་དང་སྨྲེང་སྐྱོས་གྲུབ་པའི་ཡུལ་གྱར་བ་ཆེས་རྗེས་མ།
ཤོག་དཀར་ངོས་ཀྱི་རྡོའི་སེང་གེ་ལས་གསེར་ནག་དང་བླ་གཡུ་འབྲུ་མཁན།
དེབ་གོག་དང་འོད་སྡེར་གྱི་གྱང་ངོས་སུ་སྦྱར་བའི་གསོལ་རས་དཀར་པོ།
གངས་རིའི་ཕྱི་ནང་ལ་བརྡབས་པའི་གྲིབ་རིས་རིང་མོ།
ཡུལ་གྱར་རྡུང་ལེན་པ་ཞིག་ལྟར།
ཁྱོད་ཀྱིས་རྟག་ཏུ འཚོལ འཚོལ འཚོལ
མེ་ལྕེའི་སྒལ་གཞུང་ལ་འཐམས་པའི་ཁྲག་གི་དཔུང་རྡང་དག
གློ་གྲི་ངར་མས་གཏོར་ཏེ་མཚོ་མཇིངས་སུ་བསྐུངས་མཁན།
ཡུལ་གྱར་བའི་མེ་ལོང་ལས་བཙགས་པའི་ཐ་སྙད། སྐད་གདངས། ཧི་མདེའུ།
དཀར་པོ་དང་ནག་པོ། ཡོད་ཚད་ཀྱི་ཡོད་ཚད།
དྲི་མེད་ཀུན་ལྡན་གྱིས་མིག་ཕྱེས་པ་བཞིན།
ཁྱོད་ནི་ཁྱི་རྒན་བསྒག་གསོད་གཏོང་མཁན།
སྙན་ངག་པ་དུར་ཁྲོད་རྗེས་སུ་དྲན་མཁན།
གཏམ་རྒྱུད་ཀྱི་སྦུག་ཁང་དུ་འཛུལ་བའི་རོ་དངོས་གྲུབ་ཅན།
དེ་རིང་གི་ངའི་སྙན་ངག་འདིའི་བརྗོད་བྱ་དང་རྗོད་བྱེད།
༢༠༡༡ ༧
པད་མ་ཚེ་བརྟན་འཚོལ་བ།
@ནག་པོ།
པད་མ་ཚེ་བརྟན་གྱིས་དྲི་མེད་ཀུན་ལྡན་བཙལ་ནས་རྙེད་རྗེས
ང་ཚོས་ཁོ་རང་འཚོལ་དགོས་བྱུང
ཐག་རིང་དུ་ཅི་ཙམ་བལྟས་ཀྱང
ཚད་མེད་པའི་མནར་གཅོད་ཁྲོད་ཀྱི་ཁྱོད
བརྩེ་དུང་གི་ཁྱོད ལས་དབང་གི་ཁྱོད
མཐོང་གི་མི་འདུག
མདོ་དབུས་ཁམས་གསུམ་གྱིས
གཟུགས་མེད་ཀྱི་ཆོམ་རྐུན་དེ་འཚོལ་གྱིན་འདུག
དབྱངས་གསལ་སོ་བཞིས་ཀྱང
མུན་ནག་འདིའི་བྲང་ཁོག་སྙོབ་ཀྱིན་འདུག
2016/7/7
འཚོལ།
@ཁ་བ་ལྷ་མོ།
རྡེའུ་དཀར་ཆུང་ཞིག་མཚོ་ཞབས་ཀྱི་མུན་དོང་དུ་ལྷུང
སྐད་ཆ་ནི་འཛམ་གླིང་སྒང་ལ་རླུང་གིས་ཁུར
དེ་ནས དེ་ནས
དེ་ནས་ཆུ་རིས་འགུལ་རྒྱུ་མ་བྱུང
རླབས་རིས་བསྐྱོམ་རྒྱུ་མ་བྱུང
བརྙན་རིས་ངོས་ན་ཁང་ཁྱིམ་ཆུ་ཡིས་ཁུར་ཚུལ་སྟོན་གྱི་འདུག
བརྙན་རིས་ངོས་ན་མེ་འཁོར་མེ་ཡིས་གཏོར་ཚུལ་གླེང་གི་འདུག
ཨ་ཇོ་ལགས་ཀྱི
ཨ་ཇོ་ལུག་རྫི་ལགས་ཀྱི་སྨྲ་ར་ཅན་གྱི་ཞལ་ཁྱིམ་སྒོར་མོ་དེ
མེ་དང་ཆུ་ཡི་བར་ཆད་གང་གི་ཁྲོད་ན་ཡོད་ཚུལ་གོ་རྒྱུ་མི་འདུག
ང་ལུང་བ་ཁ་རུབ་ན་ཡོད་པས་ཡིན་ནམ
ང་ལུང་གཞུང་དམར་པོ་ན་ཡོད་པས་ཡིན་ནམ
ང་ས་ཕུག་ཁ་བྱང་ལྟ་ན་ཡོད་པས་ཡིན་ནམ
2016/7/8
པད་ཚེ་འཚོལ་བ།
@ཉྭ་སྲིན་པོ།
གཤོག་པ་བྲག་ལ་བརྡར་བའི
རྒོད་པོའི་འཕུར་ལམ་གང་ན་ཡོད
ཁྲེལ་གཞུང་མེད་པའི་ནམ་མཁའ
གྲིབ་བསིལ་མེད་པའི་སྡོང་རྒན་འདིས
ཁྱེད་ཀྱི་མཐོང་ལམ་ལོས་སྒྲུབ
ང་ཡི་སྒེའུ་ཁུང་ཡང་བཀབ
ག་དུས་ཁྱིམ་ལ་ལོག་ཐུབ་བམ
འོ་ཇ་འཁྱག་གིན་འདུག
ཐབ་མེ་འཁྱག་གིན་འདུག
བརྩེ་དུང་གིས་རེག་ན་ཚོར་བའི་ཁྱོད
ཤ་ལ་འཇམ་རྩུབ་ལྡན་པའི་ཁྱོད
སྒོ་དེ་ཤིན་ཏུ་ཆུང་བས
ཁྱོད་རང་ཤོངས་ཀྱིན་མེད་པ་ཡིན་ནམ
ཡང་ན སྒོ་ཟྭ་བརྒྱབ་པ་དམ་དྲགས་སམ
རྒྱལ་སྲས་ལགས
གཞས་ཤིག་བཏང་ན་ཐོས་སམ
ངལ་དུབ་ལ་རོལ་དབྱངས་ལོས་མཁོ
ནང་དུ་ཚ་བ་ཆེའམ
ཁ་སྐོམ་དུས་ཆུ་འཁྱག་པ་འཐུང་རྒྱུ་ཡོད་དམ
ཁྲེལ་གཞུང་མེད་པའི་ནམ་མཁའ
རྒྱལ་སྲས ཕོ་བྲང་ལ་ལོག་ཏུ་ཆུགས
2016.7.8ཉིན།
སྙིང་ཉེ་བའི་ཁྱོད།
རྒྱག་བྲོ་རུམ་གང་ཁུར་སྟེ
ལམ་ལ་ཆས་ཟིན་པའི་ཐོ་རེངས་སྐར་ཆེན
ཁྱེད་ཀྱི་འོད་ཞགས་ཀྱིས་ཉི་མ་བཟུང་ཡོད་པར་བདེན་ན་
མུན་པའི་ཀློང་ན་ཁྱེད་ཀྱི་ལེགས་སྐྱེས་ལ་རེ་སྙེག་གིས་སྒུག་ཡོད
འོན་ཏེ་ཁྱོད་གང་དུ་སོང་ཡོད
དུས་རབས་ཀྱི་ཕོ་ཉ་ཡ།
རྔམ་གནག་པའི་མུན་དོང་ནས
དགྲ་གཅན་གྱི་མཆེ་སྡེར་བསྲིངས་སོང་ཟེར་བ་བདེན་ནམ
དབང་ཤེད་དང་བཙན་གཅུན་གྱི་ཁ་རླངས་རྒོད་པས
རྙེད་དུ་མེད་པའི་ཁྱེད་ཉིད།
ངུ་ངག་དང་འོ་དོད་ཀྱི་ཀློང་ན
མིག་ཆུ་དང་སྡུག་ཡུས་ཀྱི་ཁྲོད་ན
དམྱལ་བ་མནར་མེད་ཀྱི་སྡུག་བསྔལ་མྱོང་གིན་པ་འེ་རེད
་
བདེན་དོན་གྱིས་ས་ཆེན་འདེགས་པའི་ལེགས་བཤད་དེ
ནག་ཚོགས་ཀྱི་མདུན་ན
ཅི་འདྲའི་ཉམ་ཆུང་ཞིང་ནུས་མེད་ཅིག་ཨང་
མནར་གཅོད་མྱོང་གིན་པའི་ཁྱོད ཁྱོད་ཁོ་ན་མ་ཡིན
མི་རིགས་ཧྲིལ་བོ་ཞིག
བཙོན་དོང་གི་ཕྱི་ནང་མ་གཏོགས་
ང་ཚོ་ཐམས་ཅད་གཞི་གཅིག་ཏུ་ཡོད
སེམས་མ་ཕམ། སྙིང་ཉེ་བའི་ཁྱོད།