སྐྱིད:གངས་སྤྱན།
སྨག་ནག་གིས་ཟོས་ཚར་བའི་མཚན་ལྗོངས་འདིར
ངས་རང་ཉིད་ལ་དབང་མི་འོས་བའི་རྡོག་ཁྲེས་ཤིག་འཁུར་ནས
ཕྱིར་དྲན་གྱི་སྒོ་གླེགས་བར་ནས
དྲན་པ་འདིའི་ལྟག་རྒྱབ་ཀྱི་བདེན་པ་བརྡར་གྱིན་ཡོད
དོ་དགོང་ངས་རྨི་ལམ་རྨི་སྲིད་དམ
རང་ཉིད་ལ་མི་དབང་བའི་རྨི་ལམ་རྨི་སྲིད་དམ
རོལ་དབྱངས་ལ་བརྒྱུས་བའི་སྙན་ངག་འདི
རྨ་ཁ་ལས་བཞུར་བའི་ཁྲག་གི་སྙན་ངག་ཡིན་པས
སྒྲོལ་མ་ལ་བསྟན་པའི་སེམས་ཀྱི་ཁ་དོག་ལོས་ཡིན
རོལ་དབྱངས་ནི་སྨྱོན་པ་བཞིན
སྙན་ངག་རྐུན་མ་བཞིན
སྒྲོལ་མའི་མཛེས་སྡུག་ལ་ལྐོག་བལྟ་བྱེད་དུས
ངས་ད་གཟོད་ཤོག་བུ་དང་སྨྱུག་རྩེ་གཉིས་ཀྱི་བར་ཐག་ཤེས
ཨ་མའི་སེམས་ན་དགུ་ཆུ་ནི་རིང་མོ་ཞིག
ཨ་ཕའི་ངག་ན་ཙོང་ཆུ་ནི་དྭངས་མོ་ཞིག
དགུན་ཁའི་ཟི་ལིང་དང་འདྲ་བའི་ངའི་སེམས་པ
ནམ་མཁའ་ཐེད་པོ་འདིའི་འོག་ན
ས་གཞི་རྡིབ་པོ་འདིའི་སྟེང་ན
ཁེར་རྐྱང་གིས་འདར་ཞིང་ཁེར་རྐྱང་གིས་ངུ་
ངས་ནམ་རྒྱུན་སྒྲོལ་མ་ཟེར་བའི་བུ་མོ་ཞིག་རྨི་ལམ་དུ་རྨི
རྨི་ལམ་གྱི་སྒྲོལ་མ་ལ་རྨི་ལམ་མང་།༱
ཕལ་ཆེར་ང་ཡང་ཁོ་མོའི་རྨི་ལམ་ཞིག་ཡིན་འདུག
རྨི་ལམ་ལ་ཉན་ན……
རྒྱུད་སྐུད་ཀྱི་འདར་སྐྱོམ་བར་ནས
སྨྱུག་ཤོག་གི་གཙུབ་བརྡར་ཁྲོད་ནས
སྒྲོལ་མའི་མཛེས་སྡུག་ཡང་བསྐྱར་ཚར་གཅིག་ཀློག་དུས
ང་ལ་ཐོབ་པ་ནི་ཁ་སང་ཟེར་བའི་ལོ་རྒྱུས་ཤི་བོ་ཞིག་དང
མིག་ཆུ་མང་བའི་སྙན་ངག་ཅིག
བདག་ལ་གློ་བུར་དུ་ངེས་ཤེས་འདི་འདྲ་ཞིག་འཁྲུངས
ངས་སྙན་ངག་ལ་བཀའ་དྲིན་ཆེ་ཞུ་དགོས
སྙན་ངག་གིས་ང་ལ་སྒྲོལ་མར་དགའ་རོགས་དང
སྒྲོལ་མ་དྲན་རོགས། སྒྲོལ་མར་སྒུག་རོགས
ཐ་ན་སྒྲོལ་མ་བརྗེད་རོགས་ཀྱང་བྱས་མྱོང
བཀའ་དྲིན་ཆེ།
སྙན་ངག
༱འབྲོང་ཕྲུག་གི་ཚིག་གཡར་བ །
༢༠༡༢.༡༢.༢༩ཉིན་གྱི་མཚན་མོར་མལ་ཤག་དུ་སྦྱར།
སྐྱིད་གངས་ཅན་ལགས་ད་ཁྱེད་སྡུག་གཏམ་དེ་འདྲ་གནང་མ་གནང་ཡོད་མ་རེད་ངས་ལྟས་ན་ད་ཞག་ཁྱེད་ལ་འགྲེན་མི་ནུས་བའི་སྟག་རྒོད་ཅིག་གམ་གཤག་མི་ཐུབ་པའི་རྒྱ་མཚོ་ཞིག་འཕྲད་ཡོད་པ་འདྲ། ཡིན་ཡང་ཐུགས་ཕམ་གནང་དགོས་མ་རེད་འཇིག་རྟེན་འདིར་སྟོབས་ཆེ་ཆུང་ངམ་རྣམ་དཔྱོད་ཀྱི་རྩལ་གྲངས་མུ་མཐའ་མེད་ཕྱིར་དེ་ལ་སེམས་ཕྲེང་ས་ཡོད་མ་རེད།