དགའ་བ་མཇེ་ཕྲུག
འཇིག་རྟེན་ངོ་མཚར་ཡིན་པའི་སྐབས་ཤིག་བྱུང་།།
སྲིད་པ་སུན་གཙེར་གྱུར་བའི་དུས་ཤིག་ཚེས།།
སེམས་ཀྱི་མཚོ་རླབས་མཐོ་དམན་འཕྱོ་ཚུལ་ཁྲོད།།
སྣང་བས་བསླུས་པ་གྲངས་ཀྱིས་འདང་བ་དཀའ།།
དེ་རིང་འཆི་ན་སྔ་སོང་བསམ་པ་མེད།།
སང་ཉིན་གསོན་རུང་དགའ་བ་མི་སྐྱེ་བ།།
རིན་ཆེན་སྲོག་ལ་རིན་ཐང་མི་ཚོར་བའི།།
སེམས་ཀྱི་འཁོར་ཕྱོགས་འདི་ལ་ཀྱེ་མ་ཧུད།།
མི་ཞིག་འགྲོ་མ་འདུག་གི་བར་ལ་འཚང་།།
སེམས་འདི་ཡ་མ་གཟུགས་ཀྱི་དབྱིངས་ལ་འཁྱམ།།
འ་ཆད་འུ་ལ་ཐུག་པའི་གྲུ་ཁ་ནས།།
མི་སེམས་རྗེན་པ་མེ་ལ་སྲེག་པ་འདྲ།།
སུ་ཞིག་འཇིག་རྟེན་འདི་ནས་བུད་ཀྱང་ཆོག །
གང་ཞིག་གླིང་ཕྲན་འདི་ལ་གནས་ཀྱང་རུང་།།
འཆི་གསོན་རླུང་གི་དབུགས་རྒྱུན་མ་ཆད་བར།།
དྲན་པའི་མྱི་དེར་དགའ་བ་གཡོ་མེད་ཡིན།།
ཨོང་དོ་ས་ལ་ཚུགས་པའི་དུས་མ་མཆིས།།
སྙིང་ཁ་འཕར་ལྡིང་བཙན་པ་མཚམས་མ་ཆད།།
ཡོད་ཚད་སྐྱོ་བའི་མྱ་ངན་ཐང་ཆེན་ལ།།
མགོ་བོ་དུད་དེ་འགྲོ་བའི་སྣང་བརྙན་མངོན།།
ཁུ་བྱུག་ངག་ལ་ད་ནས་སྙན་རྒྱུ་མེད།།
གསར་བཞད་མེེ་ཏོག་མིག་གི་དགྲ་རུ་འཛིན།།
སུ་དང་གང་ལའང་ཡིད་གཏད་མི་འདུན་པ།།
སེམས་ཀྱི་འཇིག་རྟེན་དེ་ལ་ཞེད་སྣང་སྐྱེས།།
དམར་ཆུང་སེམས་འདི་སྡུག་གི་ཁོག་མར་གྱུར།།
ཁ་ངོ་མི་དྭངས་ལུས་ཤེད་རིད་ཅིང་རིད།།
ཟས་ཀྱི་ཡི་ག་གཉིད་ཀྱི་བདེ་བ་རེ།།
ད་སང་དུས་ལ་ཅི་ནས་ཚོར་བ་དབེན།།
སེམས་པ་སྨག་རུམ་མུན་པའི་ར་བར་ཚུད།།
འཚོ་བ་གཡང་བཀྱགས་མཁར་རྩེན་འདབ་ལོ་བཞིན།།
འདི་དང་དེ་ཞེས་གང་ལའང་མི་བརྟན་པའི།།
སྣང་བའི་ཡོ་ལང་འདི་ཀོས་སྙིང་ཁ་གཙུབས།།
མལ་ཁྲི་བདེ་ཡང་ལུས་སེམས་མི་ལྷོད་པ།།
མལ་ཆས་དྲོ་ཡང་སེམས་པ་འཁྱག་པས་བསྡམས།།
ཆུ་འཁྱག་སྙིང་ལ་བརྫངས་བའི་ཚོར་བ་དེས།།
གསོན་བཞིན་ལེན་མང་འཆི་བའི་གདུང་བ་སྟེར།།
མྱི་ཞིག་དུང་ཚུལ་གྲངས་ཀྱི་ངོས་སུ་གནས།།
དགའ་བ་ཚིག་གིས་རི་མོ་འབྲི་རྒྱུ་ཡོད།།
སེམས་ཤིག་རྡོ་ལ་བརྒྱབ་ནས་ཆག་འཇུག་ན།།
མྱི་ཚེ་འདི་ལ་སྙིང་པོ་ཅི་མཆིས་ཨང་།།
ཞེན་ཆགས་ལྭ་བ་དྲོན་མོ་བསྐྱུར་དགོས་ཚེ།།
དགུན་གཞུང་འདི་ལ་ང་རང་འཆི་རྒྱུ་ཡིན།།
མཛེས་པའི་ན་ཁ་ཇི་ཙམ་དབྱར་རྒྱས་པ།།
མི་བལྟ་མིག་ལ་ཐལ་བ་འདེབས་རྒྱུ་ཡིན།།
འགོ་ཞིག་བཙུགས་ན་མཇུག་ཅིག་ངང་གིས་འོང་།།
རེ་ཞིག་མཉམ་པ་ནམ་ཞིག་གྱེས་པའི་ཆེད།།
འཇིག་རྟེན་མི་དབང་སེམས་ཀྱི་སྣང་འཕྲུལ་ནང་།།
སུ་དང་གང་ཞིག་མི་འཐོམས་སད་ནས་གདའ།།
༢༠༡༩/༡༠/༡༤