སྙིགས་དོར་བཅུད་ལེན།

གཙང་བ་དང་བཟང་བར་བསྒྲགས་ཤིང་།    དམངས་རིགས་སོགས་ངལ་རྩོལ་གྱི་ལས་ལ་བརྟེན་ནས་འཚོ་བ་སྒྲུབ་པའི་མི་རྣམས་ནི།  ལྷ་ཆེན་པོའི་དམའ་བའི་གནས་སྤུས་མོ་རྐང་པ་དག་ལས་བྱུང་བས་བཙོག་པ་དང་ངན་པར་བསྒྲགས་ཏེ།   རྟག་ཏུ་དམན་ས་བཟུང་ནས་གནས་རིམ་མཐོ་བའི་རིགས་རྒྱུད་རྣམས་ལ་བཀུར་སྟི་རིམ་གྲོ་བྱས་ནས་འོས་ཤིང་འཚམ་པའི་ཡ་རབས་ཀྱི་མིའི་ཆོས་སུ་བཤད།   མཆོག་དམན་གྱི་རིགས་རྒྱུད་གང་ཞིག་ཡིན་ཀྱང་རང་རང་གི་རིགས་ཀྱི་

གོ་ས་ལ་གནས་ཏེ།  ཕ་མེས་དག་གི་ལས་དང་བྱ་བ་གང་ཡིན་ལ་འཇུག་དགོས་ཤིང་། གལ་ཏེ་དེ་ལྟར་མ་བྱས་ན་རིགས་དང་མཐུན་པའི་ལས་མི་བརྩམས་པ་ཡིན་པས་ཕ་མེས་དག་ལ་གུས་བཀུར་མི་ཞུ་བའི་མ་རབས་ཐ་ཤལ་དུ་འགྱུར་ཞིང་།      དེ་ལ་ཐམས་ཅད་ཀྱི་བྱེད་པོ་དཀོན་མཆོག་གིས་བཀའ་ཆད་ཉེས་ཁྲིམས་གཅོད་པར་བཤད་དེ།  ཚང་པ་དང་དབང་ཕྱུག་ཁྱབ་འཇུག་སོགས་ཀྱི་མཐུ་རྩལ་གྱིས་བྱ་བ་བྱེད་ཚུལ་བླུན་པོའི་བ་སྤུ་སྒུལ་ནུས་པའི་གཡོ་གཏམ་རིང་མོའི་གླེག་

བམ་དག་བརྩེགས་ནས་མི་རྣམས་ཀྱི་མགོ་བོ་གདུགས་ལྟར་བསྐོར་ཡོད་པ་རེད །    གདོད་མའི་བྲམ་ཟེ་ཚོས་ཡུལ་གྱི་བཙན་པོ་རྣམས་དང་ངན་སྡེབ་ཀྱིས་འདི་ལྟར་འབྲི་བའི་དམིགས་ཡུལ་ནས་གསལ་པོ་ཡིན་པ་སྟེ།   ཁོ་ཚོའི་རིགས་བརྒྱུད་དང་བཅས་པ་ལ་རྙེད་བཀུར་ལོངས་སྤྱོད་ཐོབ་ཕྱིར་དང་ཉམ་ཆུང་རྣམས་རང་གི་བྲན་དུ་དབང་བསྒྱུར་ཡུན་གནས་ཆེད་དུ་ཡིན་པ་རེད།      ཡིད་སྐྱོ་བ་ཞིག་ལ་ཁོ་ཚོའི་འདོད་པ་ལྟར་གྱི་གཡོ་བྱུས་དག་ལམ་དུ་ཕྱིན་ཏེ་མི་རབས་ནས་མི་

རབས་བརྒྱུད་རྨོངས་ཞེན་སྒྲོ་བཏགས་ཀྱི་ས་བོན་བཏབ་ཡོད་ཅིང་།    རིགས་རྒྱུད་ཕྱི་མ་རྣམས་ཀྱིས་རྨོངས་དད་ཨ་འཐས་དང་གཡོ་བྱུས་གཉིས་ཐ་གུ་དཀར་ནག་ལྟར་སྦྲེལ་ཏེ་རྟ་མོག་རོ་སྤུ་དང་འདྲ་བའི་གྲུབ་མཐའ་སྣ་ཚོགས་ཀྱིས་རྒྱལ་ཁམས་བཀང་ཞིང་།    འཕགས་པའི་ཡུལ་ཞེས་འབོད་པའི་རྒྱ་གར་གྱི་གནའ་བོའི་སྤྱི་ཚོགས་ཁྲོད་མི་རྣམས་ཀྱི་སེམས་ཁམས་སུ་བགྲུབ་མཐའ་འདི་དག་གིས་ས་བོན་བཏབ་པ་ལས་སྨིན་པའི་ལུག་སྲོལ་འདྲ་མིན་དང་ཆོས་ལུགས་སྣ་ཚོགས་

བརྡོལ་ཞིང་།   ལ་ལས་རང་གི་འདོད་ཕྱོགས་ལ་འཐེན་ཁྱེར་གྱིས་དགག་སྒྲུབ་ཀྱི་རྩོད་རིགས་ཀྱང་དུ་མ་སྤེལ་བ་བྱུང་ཡོད་མོད།        དེ་དག་ལས་ལ་ལ་དག་ཕྱེད་ཙམ་རིགས་པ་དང་ལྡན་ལ།        ལ་ལ་དག་གཅུང་ཟད་རིགས་པ་དང་ལྡན་ཞིང་ཕལ་ཆེ་བ་ནས་ཁུང་ལུང་མེད་པའི་རྟོག་བཟོས་ཤ་སྟག་ཏུ་སྣང་མོད།  འོན་ཀྱང་ཁོ་ཚོས་སྒྱུ་རྩལ་ཐབས་འཕྲུལ་གྱི་ལམ་ནས་གཞུང་ལུགས་རི་མོའི་སྟག་དང་འདྲ་བ་རྫིག་ལ་སྲོག་སྙིང་མེད་པ་དག་བསྐྲུན་པའི་འབྲས་བུར་མི་ཤེས་པའི་སྐྱེ་བོ་རྣམས་ཀྱི་ཡིད་བསླུས་ཡོད་པ་ནི་སྐབས་དེའི་མི་རྣམས་མ་ཟད་རིག་རྩལ་དཔལ་ཡོན་དར་བའི་དེང་གི་དུས་ཀྱི་སྐྱེ་བོ་ཕལ་ཆེ་བས་ཀྱང་མགོ་རུལ་པ་སྣ་ཡི་མ་ཚོར་པ་ལྟར་ལྷགས་ཡོད་པ་རེད།  བྲམ་ཟེའི་གཡོ་ཆོས་དང་རྒྱ་གར་ཡུལ་ཆོས་ཀྱི་དྲི་མས་ཕྱི་ནང་ཀུན་ཏུ་སྦགས་པའི་ནང་བསྟན་ཆོས་ལུགས་དེ་བོད་དུ་དར་ཁྱབ་བྱུང་བ་ནས་བཟུང་།    ག་ལེར་བོད་ཀྱིས་ཡུལ་གོམ་གཤིས་ལུགས་ལ་འགྱུར་བ་བྱུང་ནས་ནང་བསྟན་གྲུབ་མཐའི་སྲོག་ཤིང་བྱས་པའི་བོད་ཀྱི་ཆོས་རིག་དང་ཡུལ་གོམ་ལམ་ལུགས་དག་གི་རྩ་བ་སྲ་བརྟན་ངང་ཚུགས་པ་མ་ཟད་མཐར་བོད་མིའི་སེམས་ཁམས་ཡོངས་སུ་དབང་བསྒྱུར་བྱས་པ་དེས་འབྲས་བུ་བཟང་ངན་གཉིས་ཐོན་ཡོད་པ་རེད། མ་གཞི་གྲུབ་མཐའ་ཡོངས་སུ་རྫོགས་པའི་གྲུབ་ཆ་གཙོ་བོ་དེ་འཆར་ཡན་སྒྲོ་བཏགས་ཀྱིས་བསླད་ཡོད་པ་ལྟར་ནང་བསྟན་གྲུབ་མཐའ་ལ་ཡང་རྨོངས་དད་དང་སྒྲོ་བཏགས་གཡོ་གཏམ་སོགས་ཀྱི་སླད་པའི་ཞན་ཆ་མི་ཉུང་བ་ཞིག་ཡོད་ཀྱང་།   ཆོས་ལུགས་གྲུབ་མཐའ་གཞན་རྣམས་དང་བསྡུར་ན་དངོས་ཡོད་རྒྱུ་

མཚན་དང་ལྡན་པའི་ལེགས་བཤད་མང་བ་དང་།  མི་གཙོ་བོར་གྱུར་པའི་འགྲོ་བ་ཡོངས་ལ་ཕན་བདེ་སྐྲུན་པའི་ཐབས་ལམ་དང་བླ་མེད་ཀུན་སྤྱོད་ཀྱི་རྒྱུ་ཚོགས་དུ་མས་ཕྱུག་ཡོད་པ་རེད།    འོན་ཀྱང་ནང་བསྟན་གྲུབ་མཐས་ཆོས་ལུགས་མི་སྣ་ལ་ལྟ་ཚུལ་དེས་མི་དང་མིའི་བར་དུ་འདྲ་མཉམ་མིན་པའི་རྨང་གཞི་བཏིང་ཞིང་།   མཛེས་ལ་སྙིང་པོས་དབེན་པའི་གཏམ་དག་གིས་མང་ཚོགས་རྣམས་ཆོས་ལུགས་དང་ཆོས་བྱེད་མི་སྣའི་དྲན་དུ་བཀོལ་སྤྱོད་དང་དངོས་བརྒྱུད་ཅི་རིགས་

ནས་ཆེད་དུ་དང་ཆེད་དུ་མ་ཡིན་པས་སྒོ་ནས་ཚད་ལས་འདས་པའི་བཤུ་གཞོག་བཏང་ཡོད་པ་རེད། ཆོས་པར་གྲགས་པའི་མི་སྣ་དེ་དག་ཕལ་ཆེ་བས་སངས་རྒྱས་པའི་གཞུང་ལུགས་ནས་བཤད་པའི་ཆོས་རྣལ་མ་དག་ཉམས་སུ་ལེན་པ་ལྟ་ཅི་ཐོས་བསམ་ཀྱིས་ས་ཆོད་པ་ཞིག་ཀྱང་མེད་མོད་ཁོ་ཚོས་འཇོན་པ་ནི་སྒྲོ་བཏགས་ཀྱི་ལྷ་འདྲེ་ཀླུ་གསུམ་ལ་བསྟོད་སྨད་དམོད་པ་སྣ་ཚོགས་བྲིས་པ་དག་བོན་དང་དབྱངས་སུ་གྱེར་ཞིང་།   རྨོངས་ཞན་བག་ཆགས་ཐུག་པའི་ཆ་ཡོད་ཡོན་བདག་རྣམས་ཀྱིས་ཁྱིམ་ཕུག་ཏུ་རྭ་ལྤགས་གཡོག་པའི་ཤིང་གོག་བརྡུངས་ནས་དཔལ་འབྱོར་ཆུད་གཟོན་གཏོང་བ་དང་།    ཡོན་བདག་གི་ལག་ནས་ནོར་རྫས་ལེན་གང་ཐུབ་བྱེད་པ་འདི་རེད། རྐུན་མ་ལ་དཔའ་དར་སྤྲད་ཟེར་བ་ལྟར་ད་དུང་ཁོང་ཚོ་ལ་ཨ་མཆོད་ཞེས་པའི་མི་བྱང་སྙན་པོ་ཞིག་ཀྱང་ཐོབ་ཡོད་ཅིང་།   མཆོད་ཡོན་གཉིས་ཀར་རི་བོང་ཅལ་འདྲོགས་ཀྱི་ངང་ཚུལ་ལས་རང་སྟོབས་ཀྱིས་རྟོག་དཔྱོད་བརྟག་ཞིབ་བྱེད་པའི་བསམ་པ་མེད་པ་འདིས་ལེགས་པར་བརྟག་ལ་ང་ཡི་བཀའ་ཞེས་པའི་ཤཱཀྱ་ཐུབ་པའི་ཞལ་ཆེམ་དེ་ཡང་རྡོག་བརྫིས་བཏང་ཡོད།    ནང་བསྟན་གྲུབ་མཐའི་ཁྲོད་དུ་ཧིན་དུའི་རིག་བྱེད་གཏམ་རྒྱུད་དང་བྲམ་ཟེའི་གཡོ་ཆོས་སོགས་ཀྱིས་བསླད་པ་དང་། ཚུལ་ཁྲིམས་བརྟུལ་བཞུགས་མཆོག་འཛིན་ལྟ་བུའི་དགོས་མེད་དཀའ་སྡུག་སྤྲོད་པའི་ཞན་ཆ་ཡང་དུ་མ་ཞིག་ཡོད་ལ།    བྱམས་དང་སྙིང་རྗེ་ལྷ་བསམ་དང་བཟོད་པ་དང་སྦྱིན་སོགས་ཕར་ཕྱིན་དྲུག་ལྟ་བུའི་རིན་ཐང་ཅན་ཡང་སྔ་མས་ལས་ལྡབ་དགུ་འགྱུར་གྱི་མང་བ་ཡོད་པ་རེད།    ལྷག་པར་དུ་བརྟན་འབྱུང་ལྟོས་གྲུབ་ཀྱི་ལྟ་བའི་རྨང་གཞི་ཐོག་རང་བརྒྱུད་ཀྱི་ཆགས་སྡང་ཁྲོ་འཁྲུགས་སོགས་བསམ་པ་ངན་པའི་རིགས་ཡོངས་སུ་བཏུལ་ནས་རང་གི་ལུས་ལ་དཔེ་ལྟས་ཏེ།    གཞན་ལ་གནོད་པ་བྱ་མི་རུང་བར་མ་ཟད་རང་གི་ལུས་དང་ལོངས་སྤྱོད་ཚུན་བཏང་ནས་གཞན་ལ་ཕན་བདེ་སྒྲུབ་དགོས་པའི་རྩ་་ཁྲིམས་འོག་རྒྱུ་འབྲས་འཇུག་རིམ་ཕྱིན་ཅི་མ་ལོག་པ་ངོས་ཟིན་པའི་སྒོ་ནས་ལས་འབྲས་སྤང་བླངས་ཚུལ་བཞིན་སྤྱོད་དགོས་ཅེས་པ་འདིས་བླ་མེད་བྱང་ཆུབ་དང་བདེ་ཆེན་

ཐར་པ་སྐྱེ་བ་སྔ་ཕྱི་སོགས་ཡོད་མེད་ལ་མ་ལྟོས་པར་སྲོག་ལྡན་ཀུན་གྱི་བདེ་སྐྱིད་སྒྲུབ་པའི་ཐབས་རྨད་དུ་བྱུང་བ་ཞིག་ཡིན་པར་རྭ་འཕྲོད་ནུས་པ་ཡིན་ཞིང་སངས་རྒྱས་པའི་ཆོས་བྱེད་ཟེར་བ་ཡང་དོན་བསྡུས་ན་འདི་འདྲ་ཞིག་ལ་གོ་

དགོས་ཀྱི་ཡོད།  འོན་ཀྱང་རང་ལྕག་འགྲོ་བ་མི་རྣམས་ཀྱི་མ་བཅོས་པའི་གཤིས་ངོ་མ་ནི་གཟུགས་སོགས་འདོད་ཡོན་ལྔ་ལ་ངང་གིས་ཞེན་ཅིང་འཇུག་ལ་སྲིད་པའི་དཔལ་ཡོན་ཀུན་གྱི་ཕྱུག་པའི་དར་རྒྱས་ཕུན་ཚོགས་ཀྱི་ཁྱིམ་གཞིས་དང་། རིགས་བརྒྱུད་གཉེན་ཉེ་སོགས་འདོད་ཀྱི་ཡོད་མོད།    སངས་རྒྱས་པའི་ཆོས་ཀྱིས་ནི་སྲིད་པའི་ལོངས་སྤྱོད་མཐའ་དག་སྙིང་པོ་མེད་པའི་ཆུ་ཤིང་ལྟ་བུའི་ལྟ་ཚུལ་གྱི་སྒོ་ནས་ལྷན་སྐྱེས་ཀྱི་གཤིས་མ་བཅོས་པ་འདི་ལ་བཙན་ཐབས་ཀྱིས་ལྡོག་རོལ་གཏང་སྟེ་འཇིག་རྟེན་གྱི་ཕུན་ཚོགས་ཀུན་བསྐྱུར་ནས་ཞི་བ་མྱང་འདས་ཀྱི་གོ་འཕང་ཟེར་བའི་གཏན་བདེ་ཞིག་བསྒྲུབ་དགོས་པར་འདོད་ཀྱིན་ཡོད །       མེ་ཆུ་ལྟ་བུའི་འགལ་བ་ཅན་གྱི་ལྟ་ཚུལ་འདི་གཉིས་མི་མཐུན་རྟ་གཡག་མགོ་སྦྲེལ་བྱས་ཏེ།  ཆོས་སྲིད་ཟུང་སྦྲེལ་ཟེར་བའི་ལམ་ལུགས་ཞིག་དགོས་ཞེས་རང་ལྕག་པ་རྣམས་ཀྱིས་གྱ་ཚོམ་དུ་སྒྲོག་གིན་འདུག་པས་ཉོན་རེ་མོངས།  ང་ཚོས་ངེས་པར་དུ་བྱ་དངོས་ཀྱི་ཆོས་ཉིད་ལ་ཞིབ་འཇུག་དང་རྒྱུ་འབྲས་ཀྱི་རིམ་པ་མ་འཆོལ་བ་ཤེས་དགོས་པར་མ་ཟད། ཆེས་ཤིན་ཏུ་གལ་འགངས་ཆེ་བ་ཞིག་ནི་རྒྱུ་གང་ཞིག་ལས་འབྲས་བུ་གང་ཞིག་འབྱུང་ཤེས་དགོས་པ་དེ་ཡིན།  དགྲ་ཡིས་རང་ཉིད་ལ་དམེ་མཚོན་དཔུང་དང་བཅས་པས་ཚེ་སྲོག་ལ་རྒོལ་ཞིང་།  ཕ་གཞིས་ནོར་རྫས་འཕྲོག་བཅོམ་

བྱེད་ཀྱིན་ཡོང་ནའང་དེའི་ལན་དུ་ཇི་ལྟར་ཚུར་ལ་རྒོལ་བ་ལྟར་གྱི་དཔའ་བོ་རང་གཤིས་ཀྱིས་གཡུལ་འཁྲུགས་རྔམ་བརྗེད་ཆེ་བ་ཞིག་གི་སྟ་གོན་བྱ་རྒྱུ་ལྟ་ཅི།  མི་མངོན་པའི་དབྱིངས་དང་རི་རབ་བྲག་རྡོའི་རྩེ་མོ་ནས་ལྷ་དང་སྲུང་མས་ཟེར་བའི་སྟོང་གསུམ་ན་མཐུ་བརྩལ་འགྲན་ཟླ་མེད་པའི་མགོན་སྐྱོབ་ཞིག་ལ་དགྲ་སྲོག་གཅོད་པའི་ལས་བཅོལ་ཏེ་མར་དང་ཚོན་རྩིས་རྒྱན་པའི་ཟན་གོང་འགའ་མེ་ལ་བཏབ་ནས་དམོད་ངན་སྐད་ཅོར་བྱས་རྗེས་ད་ཟོད་ཡིད་ཚིམ་པའི་རྣམ་འགྱུར་དང་བཅས་རེ་སྟོང་ནམ་མཁའ་ལས་ཆེ་བ་ཞིག་བརྒྱབས་ཀྱང་།  གྲུབ་མཐའ་སྔོན་པོ་དང་བག་ཆགས་ལྗང་ཁུ་ལམ་ལུགས་ནག་པོ་གསུམ་གྱིས་རྒྱུ་འབྲས་གནས་ལུགས་མཐོང་བའི་བློ་མིག་བཀབ་པས་ཞིང་ལ་འབྲུ་འདོད་ནས་རྡོ་ལ་རི་མོ་བྲིས་པས་འབྲས་བུ་མི་འབྱུང་བ་ལྟར་བྱིས་པའི་བྱ་སྤྱོད་ལྟ་བུའི་རྨོངས་དད་ཀྱི་རྣམ་འགྱུར་དེ་དག་གིས་རང་སྲུང་ཙམ་ཡང་ཐུབ་ཀྱི་མེད་པ་དེ་མངོན་སུམ་མྱོང་མཐོང་ཡོད་བཞིན་དུ་ད་དུང་འདི་ནས་རང་གི་ལས་ཟེར་བ་ཞིག་ལ་ཐུག་པ་ལས་དུས་གཏན་དུ་མཆོད་མཆོད་གསོ་གསོ་ཟེར་ཡུལ་ལྷ་ཀླུ་ཆོས་སྲུང་ཟེར་བ་དེ་དག་གིས་སྐྱོབས་མཁན་མེད་པ་འམ་ཡང་ན་སྐྱོབས་མི་ནུས་པ་མཁས་ལེན་གྱི་མེད།   ད་དུང་དེ་ལས་ལྡོག་སྟེ་འདི་དང་འདི་འདྲའི་རིགས་ལ་བསམ་ཚུལ་གྱི་དཔྱད་རྩོམ་ཐུང་ངུ་ཞིག་སྤེལ་མཁན་བྱུང་ནའང་འདི་དག་ནི་ལྟ་ལོག་དང་བལྟས་ངན་དུ་བསྒྲགས་ཏེ། ཐ་ན་སྲོག་ལའང་རྒོལ་བའི་ཚད་དུ་བྱེད།།  དེ་ལྟར་བླུན་པོའི་ལོག་རྟོག་གིས་མཁས་པར་དགྲར་འཛིན་བྱུང་ཞིང་རྨོངས་པས་ས་མཐོ་ཁེངས་པས་མང་བ་དབང་

བཙན་དུ་ཤོར་ཏེ་ཤེས་ལྡན་པ་རེ་ཟུང་ཡོད་པ་དེ་དག་གིས་ཀྱང་།  རང་གི་ཚེ་ཐུང་འདིའི་གཏམ་དང་ལོངས་སྤྱོད་ཁོ་ནར་གཙིགས་འཛིན་གྱིས་རྨོངས་པའི་བློ་དང་མཐུན་པའི་གཏམ་དག་སྨྲ་བ་ལས།   མ་འོངས་པའི་བུ་རབས་ཚ་བརྒྱུད་ཀྱི་མདུན་དུ་ལྷག་པའི་ལམ་བུ་དང་།     འབྱུང་འགྱུར་གྱི་ཕ་ཡུལ་དར་རྒུད་ཆེད་གཏམ་བཤད་པར་མི་ནུས་ཤིང་རང་ཁོ་ན་ལ་བསམ་པ་ཤུགས་ཆེ་དྲགས་སྟབས་རྨོངས་པའི་ངོ་སྲུང་བྱས་ཏེ།  སྒྲོ་བཏགས་ལྷ་འདྲེ་དང་ཆོས་ལུགས་་མི་སྣ་དག་ལ་ཆེས་འུད་སྒྲོག་གིས་བསྟོད་པ་བརྩམས་ནས་རང་ལ་ཁེ་གྲགས་རེག་ཐབས་བྱེད་ཀྱིན་ཡོད་པ་དང་ཆོས་ལུགས་པ་སེར་མོ་དག་ཆེས་བྱང་གོམས་ཆེ་བའི་འཚུལ་ཆོས་དང་མི་རབས་མང་པོར་བརྒྱུད་འཛིན་བྱས་པའི་རྨོངས་པའི་ལམ་ལུགས་ཀྱི་གླེགས་བམ་དག་ཤ་འཐིམ་རུས་འཐིམ་སུ་གྱུར་ནས་སྐྱེ་བོ་མཐའ་དག་ལམ་དེ་ལ་དཀྲི་བར་བརྩོན་པས་སྐྱ་རེ་གཡའ།     ཁོ་ཚོས་ལས་བཟང་བསྒྲུབས་ན་འབྲས་བཟང་འབྱུང་བའི་རྣམ་བཞག་རགས་པ་འདི་ཙམ་ལ་ཡང་མགོ་བོ་རྨོངས་སྟེ་བྱ་གཞག་ལས་དོན་འགྲུབ་པའི་ཆེད་རས་ལ་ཡི་གེ་བྲིས་པའི་སྟེང་དུ་དུད་འགྲོའི་གཟུགས་བརྙན་བྲིས་སྟེ་རི་བོ་དང་ཁང་ཐོག་སོགས་གནས་མཐོ་བ་རྣམས་ལ་བཏགས་ཏེ་འཕྱར་ན།   ད་གཟོད་རླུང་རྟ་དར་བའི་དགྲ་ལྷ་ཞེས་པ་དུང་སེང་གཡུ་ཡི་རལ་པ་ཅན་དང་།  གཡུ་འབྲུག་ཟང་གི་ཟེ་བ་ཅན།   ཁྱུང་ཆེན་ནོར་བུ་ཐོར་ཚུགས་ཅན།   རྒྱ་སྟག་ཚལ་གྱི་ཐིག་ལེ་ཅན།  སོགས་དུད་འགྲོ་འདི་དག་གིས་རང་གི་ལས་དོན་རྣམས་འབད་མེད་དུ་འགྲུབ་པའི་དངོས་གྲུབ་བསྩོལ་བའི་ཡིད་ཆེས་བྱེད་པར་དགོད་རེ་བྲོ།   དོན་དངོས་སུ་སྟག་གཅིག་པུ་མ་གཏོགས་དུད་འགྲོ་དེ་དག་ཀྱང་སྒྲོ་བཏགས་རྟོག་བཟོས་ཀྱི་ལྷ་སྒྲུང་བཤད་གཡམ་རང་ཡིན་པ་ལས་དེ་དག་གི་བྱུང་བའི་རྗེས་ཤུལ་ཙམ་ཡང་རྙེད་དུ་མེད་པ་རེད།   གང་ལྟར་ཀྱང་ཁོ་ཚོས་འདི་ལྟར་དོན་མེད་དུ་ནོར་རྫས་ཆུད་གཟོན་གཏོང་གིན་ཡོད།    དཔེ་ན་མདོ་དབུས་ཁམས་གསུམ་ཁྱོན་ལ་རླུང་རྟ་དར་ལྕོག་རིའི་མགོ་གཡོག་པ་གཅིག་པུས་འགྲོ་གྲོན་གྱིས་མི་འབོར་ཁྲི་ལྔ་ནས་བདུན་ཙམ་ཡོད་པའི་རྫོང་གཅིག་གི་ནོར་སྲིད་ཀྱི་འགྲོན་གྲོན་ཡོངས་རྫོགས་འདང་བའི་ཚད་དུ་ཡོད་པ་རེད།  ཡོད་པའི་གསེར་དངུལ་གཡུ་བྱུར་རྣམས་དུམ་བུར་བཅག་སྟེ་བེད་མེད་དུ་བསྒྱུར་ནས་བུམ་ནང་དུ་བླུགས་རྗེས་གཡང་དང་ཕྱྭ་ཁུག་ཟེར་ནས་སྐད་ཅོར་ལོ་ངོ་རྒྱ་ཕྲག་མང་

པོའི་རིང་གྱེར་ཡང་འབྱོར་མེད་རྗེས་ལུས་ཀྱི་ཡུལ་ལུང་ཞིག་ལས་འབྱོར་ཕྱུག་དར་རྒྱས་ཀྱི་ཕ་ཡུལ་ཞིག་དུས་ད་ལྟའི་བར་དུ་ང་ཚོ་ལ་བྱུང་མྱོང་མེད་པ་རེད།    དེ་ལས་ལྡོག་སྟེ་གཡང་འགུག་དང་ནོར་ལྷ་ཟེར་བ་དེ་དག་རྣ་བས་གོ་མ་མྱོང་ཞིང་ཡིད་ལ་འཆར་མ་མྱོང་བའི་ནུབ་ཕྱོགས་པ་དག་གིས་རང་གིས་ངལ་རྩོལ་འབད་སྒྲུབ་ལ་བརྟེན་ནས་རྒྱུ་འབྲས་ཚུལ་བཞིན་ལག་བསྟར་བྱས་པས་ད་ཆ་ཁོ་ཚོ་སྲིད་པའི་ཕུན་ཚོགས་ཀུན་གྱིས་མ་ཕོངས་པའི་སྟོབས་ལྡན་རང་བདག་གི་རྒྱལ་སྲིད་སྐྱོང་བཞིན་པ་ཤ་སྟག་ཏུ་གྱུར་ཡོད།     གཏམ་འདི་ལྟ་བཤད་སྐབས་མི་ཁ་ཅིག་གིས་ཁོ་ནི་ནུབ་ལུགས་ལ་དགའ་བ་ཞིག་རེད་ཅེས་ཟེར་སྲིད་མོད།  དོན་དངོས་ཐོག་ཤར་ནུབ་ཀྱི་ལམ་ལུགས་དང་རིག་གནས་གང་ཞིག་ཡིན་ཀྱང་དགེ་སྐྱོན་གཉིས་ལྡན་འབའ་ཞིག་ལས་མཐའ་དག་དགེ་མཚན་གྱིས་ཕྱུག་པ་ཞིག་རྙེད་དུ་མེད་པ་རེད།   དེས་ཕྱིར་ང་ཚོས་བྱེད་དགོས་པ་ངོ་མ་དེ་ཧོལ་རྒྱུགས་ཅལ་འདྲོགས་དང་ཆུ་སྣ་གར་ཁྲིད་སྤངས་ནས་བྱ་དངོས་ཀྱི་ཆོས་ཉིད་ལ་ཞིབ་འཇུག་

གིས་སྙིགས་དོར་བཅུད་ལན་བྱེད་རྒྱུ་དེ་ཡིན། ཤེས་ལྡན་པ་དང་རྩོམ་པ་པོ་ཁས་ཆེས་པ་དག་གིས་ཀྱང་།  འབྱུང་འགྱུར་གྱི་མི་རབས་དང་ཕ་ཡུལ་གྱི་དར་རྒུད་ལ་འགན་ཁུར་གྱིས་རང་གིས་བསམ་ཚུལ་རྣལ་མ་དག་འབྲི་དགོས་པ་ལས། རྨོངས་པའི་ངོ་སྲུང་དང་།  གླེན་པའི་བསྔགས་བརྗོད །  སྤྱི་ཚོགས་ཀྱིས་གནོན་ཤུགས།  འཇིགས་ཞུམས་བག་ཁུམ།  རྨོངས་དད་ཨ་འཐས། ཟོག་རྫུན་ཚུལ་འཆོས་སོགས་ཀྱིས་དབང་དུ་ཅིས་ནས་ཀྱང་མི་འགྲོ་བ་ཞིག་གལ་ཆེ་བ་ཡིན།།  ཤེས་རིག་མ་དར་བའི་སྐབས་ཀྱི་གདོད་མའི་གནའ་མི་ཚོས་ཀྱང་འགྲོ་བ་མིའི་ལྷན་སྐྱེས་རྣམ་དཔྱོད་ཀྱི་ནུས་པ་སྤྱད་ནས་རང་སྟོབས་ཀྱིས་བྱ་དངོས་ལ་འགྱུར་ལྡོག་གཏོང་གི་ཡོད་ན། རིག་རྩལ་དཔལ་ཡོན་དར་བའི་དེང་གི་མི་རབས་ང་ཚོས་གཞན་ཟེར་རྗེས་འབྲངས་བྱས་ཏེ་བྲམ་ཟེ་སྨྲ་ར་ཅན་དེ་དག་གི་བཤད་ཚད་ལ་ཅིའི་ཕྱིར་ཚད་མ་འཛིན་དགོས་སམ།   ཕ་མེས་ཀྱི་དད་མོས་བྱས་པའང་རྒྱུ་མཚན་དུ་བགྲངས་མི་རུང་སྟེ།   ཕ་ཆང་རག་ལ་དགའ་བར་རྒྱུ་མཚན་དུ་བཟུང་ནས་བུ་སྐྱུར་དད་ཅན་ཞིག་དགོས་ཟེར་ན་ཁྱིམ་ཚང་རྒུད་པའི་སྔ་ལྟས་ལས་མ་འདས་སོ།།  དེས་ན་བསྐོར་གསུམ་རུ་བཞི་སྒང་དྲུག་གི་ཁམས་ལ་གནས་བཅས་ཤིང་།  ཤ་དང་རུས་པ་གཅིག་ཏུ་འབྲེལ་བའི་གདོང་དམར་གྱི་རིགས་བརྒྱུད་རྣམས་ཀྱིས་རང་གི་རྣམ་དཔྱོད་ཀྱི་རྩལ་སྤྲུགས་ནས་བླངས་དོར་གྱི་གནད་མ་འཕྱུག་པའི་ལམ་བུ་ཞིག་རང་གིས་འབད་ཐབས་གནང་བར་འཚལ།།།།     

                                       སྨྲས་པ།།

                                  

                                 ལྷུ་ཆེན་བཅུ་གཉིས་ཚིགས་ཡོད་ཀྱང་།།

                                 རང་སྐྱ་ཐུབ་པའི་སྒལ་ཚིགས་མེད།།

                                  དགྱེ་མ་སྒུར་གྱི་གོག་པོ་ལུས།།

                                བྲམ་ཟེའི་འཁར་བ་ལ་བརྟེན་འཁྱོར།།

                                འདི་ལྟར་བདེན་པའི་སྐད་སྒྲོག་ན།།

                               རྨོངས་པས་སྲོག་ལའང་རྒོལ་བར་བྱེད།

                               ཀྱི་ཧུད་རིགས་རྒྱུད་རྒུད་པའི་ལྟས                

                              མཐོང་བས་མཆི་མ་དབང་མེད་བཀུ།།

                           སྲོག་ལ་གཅེས་པ་ཀུན་ཀྱང་ཡིན།།

                           བདེ་དང་སྙན་གྲགས་ལོས་དགོས་ཀྱང་།།

                            རིགས་དང་བདེ་པའི་ཆེད་དུ་ནི།།

                          འདི་ཡང་འདོར་བ་འོས་པར་བསམ།།

                           ཐམས་ཅད་ཧྲིལ་གྱིས་ལེན་པ་མིན།།

                          ཐམས་ཅད་ཧྲིལ་གྱིས་དོར་བའང་མིན།། 

                           བཟང་ངན་འདྲེས་པ་བླངས་བྱ་མིན།།

                            སྐྱོན་དོར་ཡོན་ཏན་ལེན་པར་བྱོས།།

                           འདི་ལྟར་དཔྱད་པའི་ས་བོན་གཏམ།།   

                            ཕྱི་རབས་བུ་ཚའི་ཆེད་དུ་ལས།།

                         རྒན་རབས་མི་བཀུར་རྒོལ་མིན་ཡང་།།

                           བྲམ་ཟེའི་གཡོ་ལ་ཞེ་ནས་སྡང་།།