སྙིང་སྡུག

སྐྱོ་བྲག་དགའ་དབང་།

བྱམས་བརྩེའི་རླབས་ཀྱིས་བསྐུལ་བ། །
དགའ་བའི་འཛུམ་ཆུང་ཁྲ་མོ། །
མེ་ཏོག་ལས་ཀྱང་མཛེས་པས། །
སེམས་པ་ཁྱོད་ལ་ཤོར་སོང་། །

སྙན་འགྱུར་ངག་གི་རོལ་མོ། །
རྣ་བའི་ལམ་ནས་སིམ་པ། །
ཡིད་ལ་ཤིན་ཏུ་མཛའ་བས། །
སྲོག་གི་ཟུངས་སུ་གྲུབ་ཐལ། །

བརྩེ་དུངས་ཡིད་ཀྱི་བདུད་རྩི། །
འགྲམ་ཆུ་མངར་མོའི་ཟོལ་གྱིས། །
བདག་ལ་སིམ་པའི་བདེ་བ། །
ནམ་ཡང་བརྗེད་པ་མ་བྱུང་། །

བྱམས་པའི་ཞལ་རས་ཟླ་བ། །
མངོན་སུམ་གཟུགས་གྲུབ་བཞིན་དུ། །
ཡིད་ཀྱི་མཁའ་ལ་འཁོར་བ། །
མི་ཚེའི་རིང་དུ་གནས་ཡོད། །

སྙིང་སྡུག་ཆ་ཤས་རེ་རེ། །
ང་ཡི་བདེ་སྐྱིད་གཞི་མ། །
ཁྱོད་དང་བྲལ་བའི་མི་ཚེ། །
ང་ལ་དགོས་པ་མི་འདུག །