རྒྱ་ཤོད་བུ་དར་པས།
མཐོ་རང་གི་ནངས་སྔ་མོར།
ཉི་འོད་མེད་པའི་སྔ་རོལ་ན།
གནམ་གཤིས་གྲང་ངར་མ་ཆེ་འང་།
ཁྱེད་ཀྱི་སེམས་པ་སྡུག་གིས་གྲང་ཤུར་ཤུར།
གཞིས་ནས་གཏམ་ངན་ཐོས་པས་སེམས་དེ་སྐྱོ་ལྷང་ལྷང་།
མ་ཡུམ་དྲིན་ཅན་གཤེགས་ནས་བདུན་ཚིགས་ཟིན་སོང་།
ཁྱེད་ཀྱི་འཇིག་རྟེན་སྟོང་པའི་ཚོར་ཤུགས་དེ་ཞི་རོགས།
བར་དོའི་མཚམས་ཀྱི་མ་ཡི་རྣམ་ཤེས་ཆེད།
དགོན་པ་དགེ་རྩར་བསྔོ་སྨོན་ལེགས་གྲུབ་ཀྱང་།
ད་ཐེངས་འཕགས་ཡུལ་བཞུགས་སྒར་རྡ་ས་རུ།
དགེ་བའི་ཕྱག་དང་སྐོར་བའི་གོ་སྐབས་དབེན།
ལྷ་ཁང་ཐམས་ཅད་སྒོ་རྒྱབ།
གླིང་སྐོར་ནང་སྐོར་ལམ་བཀག
སྐོར་མཁན་དད་ལྡན་གཉིད་ཡུལ།
རྒྱ་ནད་བཙན་པོར་མགོ་བཏགས།
རྒྱུན་ལྡན་མིན་པའི་གནས་སྐབས་འདིར།
ཁྱེད་ལ་སེམས་གསོ་ཇི་ལྟར་འོངས་།
ཟླ་འོད་དང་ཞོགས་པའི་མཚམས་སྤྲིན་འདྲེས་དུུས།
འུ་གཉིས་མཁའ་རླུང་རྔུབས་བཞིན་གོམ་འགྲོས་སོང་།
ཞི་ཞིང་ལྷིང་ལ་འཇགས་པའི་རྡ་སའི་ཤོད་དུ།
ཁྱེད་ཀྱིས་མ་ཎི་གསོགས་པའི་འུར་སྒྲ་དང་།
གོམ་པའི་རྡོག་སྒྲ་ཙམ་ལས་ཁ་ཁུ་སིམ་སིམ།
མཁའ་དབུགས་གཙང་བའི་གཞོགས་དུས་ལ།
བྱ་ཕོའི་སྐད་ཀྱིས་ཞོགས་བརྡ་གཏོང་ལ་ཁད་ཚེ།
ཁྱོད་ཀྱིས་ཡང་ཡང་བཏབ་པའི་ཤུ་རིང་དེའི་མཚོན་དོན་ནི།
མ་ཡུམ་དང་གཏན་དུ་བྲལ་བའི་སྐྱོ་གདུང་ལྕི་མོ་དེ་ཡིན་ལ།
ཕུ་ནུ་མིང་སྲིང་དང་ལྷན་འཛོམས་རེ་བས་བལྟས་ཡོད།
མི་རིགས་འདི་ཁ་མདོག་དང་སྤྱི་སྒེར་བའི་ལྟ་སྤྱོད་ལའང་སུན་མོད།
དུས་རྒྱུན་གཞན་གྱིས་ཡིད་སྨོན་དང་སྔགས་པར་འོས་པའི་ཚེ་རོགས་མ།
མི་ཚེ་ལ་འགོག་རྐྱེན་འབྱུང་བའི་གནས་ལུགས་ལ་རྒྱུས་མངའ་ལོས་ ཡོད།
མི་ཡུལ་ལ་ཅི་ཡང་མེད་པའི་སྣང་བ་དེ་ཅིས་ཀྱང་དོར་ནས།
ཡུལ་འཁྱམ་པའི་ལས་དབང་སྐྱུར་མོར་འཁང་ར་མེད་པར།
འཇིག་རྟེན་གྱི་ཆོས་ཉིད་ལ་ངེས་གཏན་གྱི་ངེས་ཤེས་འཚོལ་ཏེ།
འཁོར་བ་མི་རྟག་པའི་གཤིས་ལ་དང་ལེན་དང་སྦྲགས།
ཉི་མ་གསར་པའི་ནངས་སྔ་འདིར་བློ་རྒྱ་ཡངས་མོའི་སྒོ་ཕྱེ་ན།
ཁྱོ་བོ་དང་གཅེས་ཕྲུག་མའི་ཡོད་ཚད་ཁྱེད་ཉིད་ཁོ་ན་འོ།
སྙིང་སྡུག་མ། སེམས་མ་སྡུག དགའ་དགའ།
རྒྱ་ཤོད་བུ་དར་པས། 05/02་/2021 རྡ་ཤོད་ལ་ཞོགས་པའི་གོམ་འགྲོས་སྐབས་ཀྱི་འཆར་སྣང་དང་འབྲེལ།