སྟག་སྒྲ་ཀླུ་ཁོང་རྗེས་སུ་དྲན་པ།(ཞར་བཀོད་གཅིག)

རས་པ།

 
ལོ་རྒྱུས་ཀྱི་ལམ་ཐིག་ནི
ཕ་གིའི་རི་མགོར་འཁོར་བའི་སྨུག་པའི་དར་དཀར་ཞིག་ཨེ་རེད
ང་རང་གོལ་ལམ་དེ་རུ་ཞུགས་ཤིང
འབྱམས་ཀླས་པའི་ཚོར་བར་འཐིམས

 
ཟླ་འོད་ཀྱི་ཞུན་མ་འཐུང་བའི་སྦྲིད་ཤེས་ཀྱི་བདེ་སྣང་ཞིག
ང་རྒྱལ་དང་བཅས་ཏེ་བདག་གི་མཁའ་དབྱིངས་ན་འཆར

 
སུ་ལས་ཀྱང་ར་བཟི་ཟིན་པ་ནི་སྟག་སྒྲ་ཡིན་དགོས
ཁོས་གད་མོ་དགོད་ཞོར་སྡུག་གཏམ་གླེང་ཞིང
རལ་གྲིའི་རྩུབ་བརྡར་གྱི་སྒྲ་སྙན་བརྗེད་ཐབས་དཀའ

 
སྤྲོ་སྐྱིད་ཀྱི་རྗེས་ནས་བཟུང
སྟག་སྒྲ་ངུས་ཤིང
བློས་ཐུབ་ཀྱི་རྟ་མཆོག་ཀྱང་ངུས
ཐ་ན་ཁོའི་རལ་གྲི་ཡང་ངུ་བཞིན་ཡོད
སུ་ཞིག་གིས་ཁྱོད་ལ་རྒྱ་སེ་མེ་ཏོག་ནག་པོ་དེ་ཕུལ་བ་རེད་དམ
སྟག་སྒྲ

༢༠༡༥།༡༠།༦ཉིན།

ཆག་པ།

བོད    ཡལ་དཀའ་བའི་རི་མགོའི་སྨུག་པ
རླུང་བུས་དེད་དེ་དུམ་བུར་བགོས
ང་རང་དུམ་བུ་དེའི་ཆ་ཤས་སུ་རླུང་གི་ལག་པ་བྱས
ལག་པ་གང་ལ་འགྱོག་དགོས
ང་རང་ད་དུང་དུམ་བུ་མང་པོར་འཐོར་སྲིད

 
གནའ་གནའ་ཞིག་ལ
པོ་ཏ་ལའི་མདུན་ཐང་དུ
ང་རྒྱལ་གྱི་མིག་ཆུ་སེམས་ལ་བཞུར
ད་ལྟ་མགོ་རུ་བབས་ཏེ་ལུས་སེམས་གཉིས་ཀ་རློན་པར་བྱས
ཡལ་དཀའ་བའི་སྒྲུང་རིང་ནི་ཆར་ཤུལ་གྱི་རི་མོ་ཞིག
རི་མོ ཚོས་གཞི་ཡལ་བཞིན་པའི་ཤོག་ལྷེ

 
པེ་ཅིང་དུའང་རྟ་མཆོག་གི་རྨིག་སྒྲ་ཐོས་ཐུབ
སྦྲ་ནག་གི་ཁ་ཚུབ་ལས་མེ་ལྕེ་ཞིག་ལྷོག་ལྷོག་འབར
མེ་ལྕེ བལྟས་ཀྱིན་བལྟས་ཀྱིན
རས་ཡུག་ཟད་པོ་ཞིག་རླུང་གིས་གཡོ་བ་འདྲ

 
བོད      བོད་ཟེར་ན་སུ་རེད

2015།8།17 ཕྱི་དྲོ་བྲིས།