ཤིས་ཚང་ལྗང་མྱུག
———————-
དོ་དགོང་ནི་སྟོང་ལོ་བརྒྱད་པའི་ཆེས་མཐའ་མཇུག་གི་དགུང་མོ་རེད་ལ། མིག་འཛུམ་ཙམ་གྱི་སྐད་ཅིག་གི་སྣང་བས་ལོ་ཡི་འཁོར་མོ་གཅིག་འདི་ལྟར་རྫོགས་སོང་བའི་སྟོང་ལྷང་ལྷང་གི་སྣང་བ་ཞིག་ཀྱང་འགོག་མེད་དུ་ཤར། བསམ་གཞིགས་ཤིག་དང་ལྷན་མལ་དུ་ཉལ་རྗེས་ཕྱི་རོལ་ཏུ་ལོ་གསར་བསུ་བའི་ཤོག་སྦག་གི་འགས་སྒྲ་གཅིག་རྗེས་གཉིས་མཐུད་ཀྱིས་རྣ་ལམ་དུ་གྲགས་འོང་ལ། ཚུལ་དེས་དོ་དགོང་གི་གཉིད་ཐེབས་འདི་དང་ལྷན་དུ་ལོ་ཡི་འཁོར་མོ་གཅིག་གི་མཇུག་བསྡུ་བཞིན་པར་གསལ་བརྡ་ཡང་ཡང་བྱེད་པ་དང་འདྲ། ང་དེ་རིང་གི་ཆམ་ནད་འདིའི་དབང་གིས་སམ་རྒྱུ་རྐྱེན་གང་ཡིན་མ་ངེས་མོད། གློག་སྒྲོན་སོགས་གཟིམ་ནས་ཡུད་ཙམ་འགོར་ཡང་ད་དུང་གཉིད་དུ་ཁུགས་རྒྱུའི་རེ་བ་གཏན་ནས་མེད་པར་དེ་ལས་ལྡོག་སྟེ་ཕྱི་རོལ་གྱི་ཤོག་སྦག་གི་འགས་སྒྲ་རེ་རེ་དང་ངའི་རྣམ་རིག་ཀྱང་ཇེ་གསལ་ནས་ཇེ་གསལ་དུ་གྱུར། སྐབས་འདིར་ངས་སྟོང་སྣང་དང་རེ་སྒུག་གི་ཁྲོད་ནས་བཞུད་ཟིན་པའི་སྟོང་ལོ་བརྒྱད་པར་ཕངས་སེམས་དང་བཅས་འདི་ལྟར་ཕྱི་མིག་ལྟ་བཞིན་ཡོད།
ནམ་རྒྱུན་སྐབས་བབ་སློབ་གཉེར་གྱི་ཞར་ཞོར་དུ་དཔེ་དེབ་འདྲ་མིན་ཀློག་རྒྱུ་དང་། རྩོམ་ཡིག་ཐར་ཐོར་འབྲི་བ། གཞན་ཨམ་ཕྲག་གི་གནས་བབ་ལ་བལྟས་ཏེ་དྲ་ཐོག་ཏུ་འཁོར་རྒྱུ་སོགས་ནི་ངའི་དུས་ཚོད་གཏོང་ཡུལ་གཙོ་བོ་དག་ཡིན་ཞེས་བཤད་ཀྱང་ཆོག སྟོང་ལོ་བརྒྱད་པའང་ང་ལ་མཚོན་ན་དམིགས་བསལ་འཐོབ་བྱ་གང་ཡང་མེད་པར་མ་འཐོབ་མ་རྙེད་པའི་སྡུག་ཡུས་སྤྱིར་བཏང་བ་ཞིག་གི་ཁྲོད་ནས་དེ་ལྟར་རྫོགས་སོང་མོད། ལོ་འདིར་ཁོ་བོའི་སྙན་དེབ་གཉིས་པ་༼ཀ་ཁའི་ང་རོ་༽དཔར་སྐྲུན་འགྲེམས་སྤེལ་བྱས་པ་ནི་ཅུང་གླེང་རིན་ཡོད་པ་ཞིག་ཏུ་ངོས་འཛིན་ཆོག་ལ། ད་དུང་ལོ་འདིའི་ནང་དུ་ཁོ་བོས་སྙན་ངག་ལས་འབོལ་རྩོམ་བྲིས་པའི་ཁ་གྲངས་མང་བ་འདི་ཡང་ཁོ་བོ་རྩོམ་རིག་ལམ་ཁར་ཞུགས་པའི་ཐོད་བརྒལ་བའི་འཕེལ་རིམ་ཞིག་ཏུ་གླེང་ཀྱང་ཆོག་པར་འདོད།
ཕྱོགས་གཞན་ཞིག་ནས་གླེང་ན། སྟོང་ལོ་བརྒྱད་པ་ནི་སྒང་བ་རིས་སུ་གཏོགས་པའི་བོད་མི་སུས་ཀྱང་བརྗེད་མི་རུང་བའི་ལོ་ཞིག་རེད་ལ། མ་འོངས་ལོ་རྒྱུས་ཁྲོད་དུ་ཡང་ཡང་དྲན་གསོ་བྱེད་འོས་པའི་སྟོང་ལོ་དམིགས་བསལ་བ་ཞིག་ཀྱང་ཡིན། དེ་རིང་སྟོང་ལོ་བརྒྱད་པ་འདི་ལྟར་འདས་པའི་སང་ཉིན་ནས་བོད་པ་ཁ་འཐོར་དུ་སོང་སྟེ་མི་ལོ་ལྔ་བཅུ་ཧྲིལ་བོ་འཁོར་བ་རེད་ལ། ད་དུང་ཡང་སྐྱོ་སྡུག་གི་གནས་བབ་འདིའི་འོག་ནས་མི་ལོ་ག་ཚོད་བགྲོད་དགོས་པར་བསམ་ན་ངོ་མ་ལུས་སེམས་གཉིས་ཀ་གྲང་ཤུར་ཤུར་ཞིག་རེད་ཨང་། ཡིན་ནའང་། དོ་དགོང་གི་གྲང་ཤུར་ཤུར་གྱི་ཚོར་བ་འདི་བཏེགས་ཏེ་སང་ཉིན་ནས་སླར་ཡང་སྡུག་ཡུས་ཀྱི་ནམ་ཟླ་ཞིག་འགོ་རྩོམ་དགོས་པར་ཅིས་ཀྱང་གཡོལ་ཐབས་མེད་པས། ”ཆིག་སྒྲིལ་ནི་སྟོབས་ཤུགས་ཡིན་”པའི་ཡང་དག་པའི་བསམ་བློའི་མན་ངག་འདིའི་ཁྲོད་སྟོང་ལོ་གསར་བ་འདིའི་ནང་ང་ཚོས་སྔར་ལས་ལྷག་པའི་ནུས་ཤུགས་ཡོད་ཚད་གཅིག་སྒྲིལ་གྱིས་བོད་པ་མགོ་ལུས་ཚང་བ་ཞིག་བཟོ་རྒྱུའི་རེ་བ་དང་ཡིད་ཆེས་གདེང་སྤོབས་ཆེན་པོས་བྱེད་ཆོག་པར་འདོད།
༢༠༠༨།༡༢།༣༡དགོང་མོར་བྲིས།