སྙན་བཟང་གཡུང་དྲུང་ཚེ་རིང་།
དེ་རིང་བདག་ལ་གློ་བུར་ཉིད་དུ་སྐྱོ་གདུང་དྲག་པོས་རབ་ཏུ་མནར་བ་ཡིད་ཀྱིས་མ་བཟོད་གླིང་ག་ཞིག་ཏུ་དབུགས་རིང་འབྱིན་པར་ཕྱིན་པའི་ཚེ། །
སྟོན་གྱི་རླུང་བུས་ཆེར་སྐྱེས་ལྗོན་པའི་ཡལ་གར་མཛེས་པའི་དམར་སེར་མདངས་ལྡན་ལོ་མའི་ཕུང་པོ་དལ་བུར་སྤྲུགས་པས་ཉིལ་ཉིལ་ས་ལ་ཟགས་པར་རྩོམ། །
ཆུ་ཡི་ངོགས་སུ་དལ་བུར་གཤེགས་པའི་ངང་མོའི་རྗེས་སུ་གཤོག་རྩལ་གཉོམ་པའི་ངང་ཕྲུག་དག་ནི་ཕྲེང་བར་བསྒྲིག་ནས་རྩོལ་བ་ཆེན་པོས་དལ་གྱིས་བགྲོད། །
ལྡེམ་མྱུར་ཆེ་བའི་ཐང་ལི་འགའ་ཡིས་ས་ལ་ལྷུང་བའི་ཤིང་འབྲས་འཁུར་བཞིན་སྐྲག་པའི་ཉམས་ཀྱི་འཇིགས་པ་དང་བཅས་མིག་གཉིས་ཧྲིག་ཧྲིག་གཡོ་བ་མཐོང་། །
ཤིན་ཏུ་སྐྱོ་བའི་སྦྲང་མ་ཞིག་གིས་རྙིད་པར་གྱུར་པའི་ཉི་ཧོང་རྒྱ་སེའི་ཟེའུ་འབྲུའི་ཕོན་པོར་དྲག་ཏུ་འཐམ་ནས་ཟ་ཟིའི་གདུང་དབྱངས་སྒྲོག་པར་བྱེད། །
རི་དྭགས་ཤྭ་བ་མ་སྨད་གཉིས་ནི་ད་དུང་མི་ཡི་དྲི་ལ་མ་ལོབས་འདྲོགས་པའི་ཟོལ་གྱིས་མགོ་བོ་འདེགས་བཞིན་འཇིགས་པ་ཞིག་ལ་སྒུག་དང་མཚུངས། །
རབ་ཏུ་གདུངས་གྱུར་གྲོག་མའི་སྡེ་ཞིག་བདེ་བའི་ཆེད་དུ་གང་སར་རྒྱུག་ཀྱང་དམིགས་པ་མ་རྙེད་ལུས་ཟུངས་ཟད་པས་འཆི་བའི་གནས་ལ་ཐག་མི་རིང་། །
རྒས་ཤིང་འཁོགས་པའི་ཉམ་ཐག་རྒད་པོ་འཁར་བར་བསྙེས་ཏེ་སྟེགས་བུར་སྡོད་ཅིང་ཁེར་ལབ་རྒྱག་བཞིན་ངུ་མ་དགོད་ཀྱིས་ལས་ཀྱི་རྒྱལ་མོར་ལེ་བདའ་གཏོང་། །
ལྗོན་པའི་རྩེ་ནས་ཤིང་འབྲས་ལྷུང་བའི་སྒྲ་ལ་འཇིགས་པའི་རི་བོང་སྐོར་ཞིག་སྲོག་བསྡོས་བྱེད་པར་ཤིན་ཏུ་སྐྲག་ནས་ཁུང་བུ་ཆུང་ངུར་འཚང་ཁ་རྒྱག །
ཁེ་ཉིན་བབས་པའི་ཆར་ཆུས་ཡིན་ནམ་ཤ་མོ་སུལ་ཅན་དཀར་སེར་སྐོར་ཞིག་སྤང་དང་ནགས་སུ་སྐྱེས་པར་འདུག་ཀྱང་ལ་ལ་རྙིད་ཅིང་ལ་ལ་གསོན། །
དབྱར་དགུན་གང་དུ་འགྱུར་ལྡོག་མེད་པའི་ཤུག་སྡོང་ཚོགས་ཀྱིས་སྡོང་ལོ་སེར་ཞིང་ལོ་མ་དམར་པོའི་ལྗོན་པའི་གསེང་ན་སྔོ་ལྗང་ལང་ཚོའི་རྣམ་འགྱུར་སྟོན། །
སྡོང་ལོ་དག་གིས་བཀབ་པར་གྱུར་པའི་ལམ་ཕྲན་ཟུར་དུ་མེ་ཏོག་རྐང་གཅིག་སྐྱེ་བོ་ཡིད་ཀྱི་འདོད་པ་འཕེལ་བར་བཞད་པའི་བཀྲག་མདངས་སྙིང་དུ་སྡུག །
ཤིན་ཏུ་སྲེད་པའི་འདོད་ལྡན་གཞོན་ནུས་སྒེག་ཅིང་སྙེམས་པའི་གཞོན་ནུ་མ་ཞིག་པང་དུ་བཟུང་སྟེ་མགྲིན་པར་འཁྱུད་ཅིང་འོ་སོགས་འདོད་པའི་གནས་ལ་རོལ། །
དབྱར་དུས་ཕ་གིའི་ལྗོན་རྩེར་གནས་པའི་བྱ་ཁྱུ་དག་གིས་གནས་སྐབས་བདེ་བའི་ཡུལ་ཞིག་འཚོལ་ཆེད་རྒྱང་རིང་གནས་ལ་གཤོག་པ་བརྐྱངས་ནས་འཕུར་བར་དེངས། །
ལུས་པོ་དྲང་ཞིང་ཞལ་ཁྱིམ་མཛེས་པའི་བགྲེས་མོ་དེ་ཡིས་ཁྱུ་གུ་ཞིག་ལ་ཧ་ཅང་གཅེས་པའི་མིང་གིས་འབོད་ཀྱིན་ས་ཡི་སྡོང་ལོ་བསྒུལ་བཞིན་འགྲོ །
དེ་ཚེ་ཤར་གྱི་འཐོར་སྤྲིན་ལེབ་མོ་ལྷོ་རུ་རྒྱུ་བའི་སྤྲིན་པར་འདྲེས་པས་སྟོང་བའི་ནམ་མཁའ་དལ་བ་དལ་བུར་ཆར་སྤྲིན་ནག་པོས་གཡོག་པར་གྱུར། །
སྨུག་པ་ཞིག་ཀྱང་གློ་བུར་ཉིད་དུ་ཆར་གྱིས་བརླན་ལ་ཉེ་བར་འགྱུར་བའི་གླིང་གར་འཐིབས་པས་ཕྱི་རོལ་ཡུལ་ལྗོངས་མིག་སྟོང་སྤྲུལ་ཀྱང་མཐོང་རེ་བྲལ། །
༢༠༡༥ལོའི་ཟླ་༡༠པའི་ཚེས་༢༣ཉིན།
མཚོ་འགྲམ་གྱི་མཚན་མོ།
དགོང་ཁའི་ཉི་མ་ནུབ་རིར་དཔྱངས་པས་རི་ལུང་ཁང་ཁྱིམ་དལ་བའི་འགྲོས་ཀྱིས་རབ་རིབ་མུན་པའི་ཀློང་དུ་ཉལ། །
ཟླ་བའི་འོད་སྣང་མཚོ་འགྲམ་ལ་ཕོག་གྲོང་ཁྱེར་གཟུགས་བརྙན་ཆུ་ཡི་ངོས་སུ་གཉེར་མ་ཤིག་ཤིག་འདར་ཞིང་འགུལ། །
སྲང་ལམ་ཉུལ་བའི་མི་ཚོགས་དག་ཀྱང་ཁྱིམ་དུ་ལོག་པས་ལྷིང་འཇགས་རིང་མོ་རྒྱང་ནས་རྒྱང་ལ་འཕྲེད་དུ་བསྲིངས། །
གློ་བུར་ཡེ་ཤུའི་ལྷ་ཁང་ཅོང་སྒྲ་སྙན་པའི་ཟོལ་གྱིས་གཅིག་འཕྲོར་གཅིག་ཏུ་ལྷང་ལྷང་ཐེངས་འགའ་གྲག་པའི་ཚེ། །
ཉ་པ་དག་གིས་གྲུ་ཐག་གློད་དེ་རེ་སྙེག་དང་བཅས་རྒྱ་མཚོའི་ཀློང་དུ་འཕྱོ་ཞིང་ཉུལ་བཞིན་ཡོམ་ཡོམ་བགྲོད། །
ཨེ་མ་སྟོན་ཁའི་མཚན་མོ་བསིལ་བས་རླུང་བུ་འཇམ་པོས་ཟིལ་བ་ཁྲོམ་ཁྲོམ་ཆུ་ཡི་པད་མོ་གཡོ་སྙམ་བྱེད། །
དེ་ཚེ་ང་ཡིས་རྒུན་ཆང་དམར་པོ་མགྲོན་པོར་བཏེགས་ཤིང་དགོད་སྒྲ་རེ་རེ་སྙན་པའི་ངག་གི་ཟོལ་གྱིས་བབས། །
རེ་ཞིག་བོད་ཀྱི་བདེ་སྡུག་གླེང་བས་སྐྱོ་སྣང་འཕྱུར་བའི་ན་ཟུག་མེ་ཡིས་སྙིང་ཁུང་བསྲེགས་པའི་ཚོར་བ་བརྡོལ། །
གོས་རྐྱང་གསེང་ན་འོ་འཛིན་འདར་བའི་གཞོན་ནུ་མ་ཡིས་སྙན་ངག་གྱེར་པ་སེམས་རྩ་འཁོལ་བའི་གྲོགས་སུ་གྱུར། །
ད་དུང་ཤར་དང་ནུབ་ཀྱི་སྲོལ་རྒྱུན་ཕན་ཚུན་གཏམ་དུ་ཡང་ཡང་བཤད་པས་དགའ་སྤྲོ་སྣང་བའི་སྤྲིན་དཀར་ལྡང་། །
མཚན་གུང་ཡོལ་བས་མགྲོན་པོ་ལོག་མཚམས་ཅི་འདི་མེད་པར་སེམས་ཀྱི་རྟ་ཕོ་ཕྱིར་དྲན་ཀློང་དུ་བརྒྱུགས་པའི་ཚེ། །
མཚན་མོར་འཕུར་བའི་སྒྲོན་འབུ་སྐོར་ཞིག་སྒུག་བཟོད་མེད་པར་གློག་ལ་ལྕེབས་པའི་ངང་ཚུལ་མཐོང་བས་ཤིན་ཏུ་སྐྱོ། །
ག་ཤེད་ཅིག་ཏུ་འདོད་ལྡན་སྐྱེས་བུའི་ཤུགས་དང་ལྷན་ལྡེམ་བུད་མེད་ཅིག་གི་ཆགས་པའི་སྐད་ཀྱང་རྣ་བར་འཛུལ། །
འོན་ཀྱང་བར་སྣང་སྤྲིན་ནག་འཁྱོམས་པས་གློག་དམར་དང་བཅས་འབྲུག་གི་སྒྲ་ཡིས་མཚན་མོའི་ཟ་ཟི་མནན་པར་བྱས། །
ནམ་མཁའི་རུམ་ནས་བཞུར་བའི་ཆར་དང་སེར་བ་ནག་པོ་མཚམས་མི་ཆད་པར་ཤག་ཤག་དྲག་ཏུ་བྱོ་གྱུར་པས། །
བརྩེ་བ་འཁྱིལ་བའི་མལ་ས་དྲོན་མོར་དལ་བུར་འཛུལ་ཀྱང་ཅི་ཞིག་བརྗེད་པའི་སྟོང་སྣང་ཞིག་གིས་སེམས་པ་གཟིར། །
དེ་བས་འོག་འགྱུའི་རྟོག་པ་སྤྱད་དེ་ཚིག་ཕྲེང་འདི་དག་ཤར་མར་བྲིས་ཀྱང་ད་དུང་སྙིང་ཁ་ལྡིང་བ་ཅི། །
༢༠༡༦/༩/༡༧ མཚན་མོར།