ཚངས་སྲས
ཡ་གའི་ནཊ་ཀྱི་ལྗོན་ཤིང་རྩེ་ནས་ཁུ་བྱུག་གསུང་ལས་འདི་སྐད་ཐོས།།
རྟག་ཅིང་བརྟན་པའི་གཤིས་སུ་མ་གྲུབ་འདུ་བྱས་རྒྱུ་མའི་གར་དང་འདྲ།།
ལོངས་སྤྱོད་འབྱོར་བའི་ཕུན་ཚོཊ་རྒྱས་ཀྱང་སྤྲིན་རིམ་གློག་གི་ངང་ཚུལ་འཛིན།།
དུས་བཞིའི་མཛེས་སྡུག་རི་ལུང་ཁེབས་ཀྱང་ཟློས་གར་མཁན་པོའི་ཉམས་འགྱུར་བཞིན།།
ལྷན་འཛོམས་སྐྱིད་པའི་དགའ་སྟོན་དེ་ཡང་འབྲལ་བ་ལས་ཀྱི་ཆོས་ཉིད་ཟེར།།
ལྗང་མདོག་ལོ་མར་སེར་མདའ་ལྷུང་སྟེ་འཛིན་མར་ཁ་བ་བཞིན་དུ་འབབ།།
སྣུམ་ཞིང་བརྗིད་པའི་ནཊ་ཚལ་སྟུག་པོ་སྡུག་གིས་བཟད་པའི་སྐྲ་ལོ་གྱུར།།
དལ་འབབ་ཆུ་བོའི་བཞུར་སྒྲ་དེ་ཡང་ཟུངས་ཟད་འཆི་ཁའི་ཁ་ཆེམས་བཞིན།།
བསམ་གྱིན་བསམ་གྱིན་སྐྱོ་བ་འཕེལ་བའི་སྟོན་མཇུག་འདི་ལ་རེ་ཐག་ཆད།།
སྙན་ཅིང་འཇེབས་པའི་ཁུ་བྱུག་གསུང་དབྱངས་རྣ་བའི་ལམ་ནས་རིང་དུ་གྱུར།།
མཛེས་སྡུག་སྟོང་གི་ཁོར་ཡུག་རི་ལུང་མིག་གི་ལམ་ནས་མཐོང་མ་གྱུར།།
སྤང་སྔོན་ཐང་ལ་འགྲེ་ལྡོག་རྒྱབ་ཅིང་མེ་ཏོག་འཐུ་བའི་ངང་ཚུལ་དེ་།།
ཡང་ཡང་དྲན་ཅིང་དྲན་པའི་མིག་ཆུ་དབང་མེད་འཆོར་བའི་ཤེའུ་ཕྲུག་ང་།།
ཨུ་ཐུག་ཐབས་ཟད་སྐྱོ་སྡུག་གདུང་བ་སྨག་རིམ་བཞིན་དུ་འཐིབས་ནས་འོང་།།
དབྱར་གསུམ་ཟླ་དང་བྲལ་ཁའི་གྱེས་ཕྱག་ནུབ་རིའི་ཕྲག་གི་ཉི་མར་བསྡོས།།
སླར་མཇལ་རེ་བའི་སྨོན་པ་དེ་ཡང་མཚམས་སྤྲིན་དམར་བོའི་ཟླ་ལ་བཏབས།།
དུས་བཞི་འགྱུར་བའི་སོ་ཚིགས་འདི་ཡང་ཡིད་བརྟན་མེད་པའི་ངེས་པ་འབྱུང་།།
ཕྱི་ལོ་༢༠༡༡ཟླ་༧ཚེས༣ལ་བྲིས