གངས་ལྷ།
ང་རང་ཆུང་དུས་ཨ་ཞང་དང་མཉམ་དུ་རྫིའུར་འགྲོ་རྒྱུར་དགའ། མཚམས་རེར་རི་ནས་རྟའི་རྨིག་ལྕགས་ཟད་པོ་རེ་རྙེད་པ་ན་གྲི་བརྡུང་ལོ་ཡོང་བསམ་པའི་དགའ་ཚོར་གྱིས་ཨ་ཞང་ལ་སྟོན་དུས་ཁོང་གིས་དབུགས་རིང་འདོན་བཞིན་འདི་ཟིང་འཁྲུག་སྐབས་རྒྱ་དམག་གི་རེད་ཟེར། ཡང་གདོང་ལ་སྐྱོ་ཉམས་དང་བཅས་ངའི་ཕ་འདས་པོ་གཅིག་གཅིག་དང་། ཕའི་ནུ་བོ་གཅིག་གཅིག་ཅིག་ཟེར་ནས་མ་ཎི་རེ་འདོན་པ་དང་། དེ་མ་ཐག་ཅི་ཞིག་དྲན་པ་ལྟར་ཕྱོགས་ཕྱོགས་སུ་བལྟ་ཞོར་ཁོས་མ་ཎི་བཏོན་པ་གཞན་ལ་སྨྲ་མི་ཉན། གལ་སྲིད་སྨྲས་ན་ཁོས་ཁྱོད་རྫི་བོར་མི་འཁྲིད་སོགས་ཟེར། ང་རང་ཆེས་སྐྲག་པ་ནི་ཨ་ཞང་གིས་ངའི་དྲི་བ་ལ་ལན་མི་འདེབས་པ་དེ་རེད། ངས་ཀྱང་ཨ་ཞང་ལ་ཕྲེང་བ་ཞིག་སྦས་རྒྱུ་ཡོད་པ་དང་། ང་ལ་དྲིས་ལན་མི་དགོས་ཚེ་ཁོང་གི་ཁ་ནས་ཅི་ཞིག་འདོན་གྱི་ཡོད་པ་གཞན་ལ་བཤད་མི་སྲིད། ངས་ཁོང་ལ་རྒྱུན་དུ་སྟག་དང་གཟིག་གཉིས་སུ་ངར། ལ་འདིའི་ཕར་ནང་ན་གནམ་ཨེ་ཡོད། རི་འདི་ཚོ་མེད་ན་ང་ཚོའི་མགོ་ཐོག་ཏུ་གནམ་འདི་ལྷུང་ཨེ་ཡོང་། ཁྱོད་ཀྱི་སྲིང་ཆུང་དང་ཡུལ་ཚོའི་མི་མང་པོ་མུག་གེས་ཤི་སོང་སྐད་པ་དེ་ཚོས་རྩམ་པ་མ་ཟོས་པ་ཅི་ཡིན་སོགས་ཆད་མེད་དུ་འདྲི། ཨ་ཞང་གིས་ངའི་དྲི་བ་ལ་སུན་སྣང་མེད་པར་ལན་རེ་རེ་བཞིན་འདེབས་པ་མ་ཚད། ང་ལ་ས་མིང་དང་རི་རྩིས་སྤྲོད་པ། རྩི་ཤིང་དང་། རི་དྭགས་ཀྱི་མིང་སློབ་པ་སོགས་ཀྱིས་ངས་ཁོང་ལས་མཁས་པའི་མི་ཞིག་གནམ་འོག་ཏུ་མེད་པའི་ཐག་གཅོད་མྱོང་།
དཔེར་ན། ངས་ཁོང་གི་མདུན་ནས་དབྱར་ས་ནས་དགུན་འཚེར། སོས་སླས་དང་སྟོན་མལ་གྱི་རི་ལུང་ཐང་གསུམ་ཚང་མར་མིང་ཡོད་ལ། དེ་ཡང་རྒྱུ་མཚན་རེ་ལ་བརྟེན་ནས་བཏགས་ཚུལ་ཡང་རིམ་གྱིས་ཤེས།
སོས་ཀ་ཞིག་ངེད་ཚང་གི་རུ་བ་འོ་ཁ་རུ་སྤོས་སོང་། དེ་ནི་ཕྱོགས་བཞི་བྲག་རིས་བསྐོར་བ། ཤིང་སྣ་མང་ཞིང་རྩྭ་ཆུ་འཛོམས་པ། རྒྱུས་མངའ་ཡོད་པའི་མི་ཟོག་མ་གཏོགས་གཞན་པས་དེར་འགྲོ་བའི་ལམ་མི་རྙེད་ས་ཞིག་འདུག །འོ་ཁ་ཟེར་དོན་ཡང་སོས་ཀ་གནས་འདིར་རྩི་ཤིང་དང་སྔོ་རྩེ་འབུས་སྔ་བས་ར་ལུག་གི་བདག་པོ་འོ་མ་དང་ཁ་ཐུག་པ་སླ་བས་མིང་དེ་ལྟར་ཐོག་སྐད། འོ་ཁའི་སོས་འཚེར་གྱི་རྒྱབ་རིའི་གཡོན་ཕྱོགས་མདའ་རྒྱང་ཙམ་གྱི་བྲག་ངོས་ནས་ཤུགས་ཀྱིས་བཞུར་བའི་ཆུ་མིག་ཕྱུག་པ་ཞིག་འདུག་པའི་འགྲམ་དུ་འདི་ཕྱོགས་ན་མཐོང་དཀོན་པའི་ཤུག་སྡོང་ཆེན་པོ་རྩེ་མོ་སྐམ་པ་རྩ་བ་ཅུང་རུལ་བ་བཞི་གཤིབ་ཅིག་འགྲེང་འདུག
ཨ་ཞང་གིས་བཤད་ན། འདིར་ངག་རྒྱུན་དུ་ཀླུ་སྤུན་བཞི་གནས་པར་སྔར་སོག་པོ་རྟ་ཁྲབ་ཅན་ཟེར་བའི་དམག་དཔུང་ཡུལ་འདིར་འོངས་ནས་བསྟན་དགོན་བཅོམ་བསྒྱུར་དང་། ས་གནད་དང་། ཆུ་མིག་དག་ངན་དུ་བཅོས་སྐབས་ཤིང་སྡོང་འདི་རྣམས་ལ་ཡང་ཁྲིམས་ཆད་ཕོག་སྟེ་མེ་བརྒྱབས་པ་རེད་ཟེར། ད་སྐབས་ནི་གཅིག་ཐང་དུ་འགྲིལ་ནས་རུལ་བ་དང་། གཞན་གསུམ་སྐམ་པོར་གྱུར་འདུག །ཁྱད་མཚར་བའི་བྲག་ཁུང་གི་ཆུ་དེ་ཡང་ཤུགས་ཉམས་ཏེ་མ་ཆད་ཙམ་ལས་མི་འདུག །སྔར་འདི་ནས་མཚན་མོ་ནོར་ལུག་སླས་ར་ནས་གསའ་གཟིག་ལ་འཆོར་བ་དང་། ཉིན་མོ་ཡང་རྫི་བོ་མཉམ་འགྲོ་མ་བྱས་ན་གཅན་གཟན་གྱིས་ཟ་འགྲོ། རི་དྭགས་གླ་བ་དང་། གནའ་བ། བྱ་གག་སོགས་རི་སྐྱེས་སྲོག་ཆགས་རིགས་གཅན་གཟན་གྱིས་ཟོས་པ་ཉིན་བཞིན་དུ་མཐོང་རྒྱུ་ཡོད། འོན་ཀྱང་མི་ལོ་བཅུ་ཕྲག་ཕྱེད་བཞིའི་རྗེས་ཀྱི་དེ་རིང་ནི་གཅན་གཟན་གྱི་རྗེས་དང་རི་དྭགས་ཀྱི་སྤུ་གཉིས་ཀ་མཐོང་ལམ་དུ་མེད་པར་རྩྭ་གསེང་ན་གཡུ་མདོག་གངས་ཆུའི་འགྱིག་སྦུག་སྟོང་པ་རེ་དང་། ཤིང་རྩེ་ན་འགྱོགས་ཐུག་གི་ཤུབས་སྟོང་རེ་སྤུར་གྱིན་འདུག །ཤིང་སྡོང་སྐམ་པོ་དེ་དང་ཆུ་མིག་ཟད་པོ་འདི་མིན་ན་ངས་ཡུལ་ངོ་ཙམ་ཡང་ཆོད་དཀའ་བར་གདའ་འོ། །
ཁྱེད་ཀྱི་སྒྲུང་གཏམ་འདིར་རྔ་མ་མི་འདུག མཐར་ཐུག་མི་འདུག