བསྟན་འཛིན་ཤེས་རབ།
སེམས་ཀྱི་ལྷ་མོར་མིག་གིས་འཚོས་ཡོད། །
སྙན་མོའི་ངག་དེར་རྣ་བ་བླགས་ཡོད། །
སྒྱུ་འཕྲུལ་ལུས་ཀྱི་གར་སྟབས་མཉེན་མོས། །
ཚོར་བའི་གཏིང་སར་སིམ་པ་སྩོལ་དང་། །
སྣང་བ་ཞིག་གིས་མཁའ་ལམ་སྙེག་ཡོད། །
སྟོང་བའི་དབྱིངས་ལ་དཔྱངས་ཟམ་བཙུགས་ཡོད། །
རྟོགས་པའི་གཏམ་རྒྱུད་སེམས་ལ་འབྲི་བཞིན། །
གློག་གི་སྒྱུ་མའི་ཕོ་བྲང་བརྩིགས་ཡོད། །
དུས་ཀྱི་ཆུ་བོ་ཕྱི་རུ་ཕུད་ཡོད། །
མདུན་གྱི་ལམ་བུར་ལྟག་རྒྱབ་སློག་ཡོད། །
གར་སླེབས་རྐང་བའི་ཕྱི་རྟིང་སྙེག་བཞིན། །
སེམས་དང་ཚོར་བའི་བྲོ་ཞིག་འཁྲབ་ཡོད། །
ཐོག་མའི་བག་ཆགས་བག་ལ་གཞའ་རོགས། །
དུང་བའི་མེ་སྟག་དབྱིངས་སུ་གཟིམས་རོགས། །
སེམས་དང་དངོས་ཀྱི་འཇིག་རྟེན་གཉིས་ཀ །
ད་ལྟ་རྫ་རིའི་ཕ་རོལ་ཚུར་རོལ། །
ལས་ཀྱི་སྲས་མོས་ཀུ་རེ་རྩེད་ངེས། །
སྣང་བའི་འཇིག་རྟེན་འཕྲུལ་གྱིས་བསྒྱུར་ངེས། །
མཛེས་པའི་དབང་གཞུ་ཨ་ཅག་ལྷ་མོས། །
ཁྱོད་ལ་གོ་སྐོན་བསླབ་བྱ་གནང་ངེས། །
ཕྱི་རོལ་ཡངས་པའི་འཇིག་རྟེན་ཁམས་ན། །
ཨ་མཚར་སྲིད་པའི་གབ་རྩེད་དགུ་སྐོར། །
ཡང་མཚར་སྒྱུ་མའི་ལྟད་མོ་སྣ་དགུ། །
ཡ་མཚན་མི་ཕོའི་རྡོག་བྲོ་སྐོར་འཁྲབ། །
ཟ་ཟིའི་སེམས་ཀྱི་ཟུར་ངོས་ཤིག་ནས། །
རིང་ལ་ཐུང་བའི་ལམ་ཞིག་དེད་དེ། །
ཡོད་ལ་མེད་པའི་མཁའ་འགྲོའི་ཞིང་དེར། །
དུས་ཀྱི་རྟ་ཕོ་བང་གིས་ལྷོད་ཡོད། །
ཁ་བའི་འདབ་མ་དབྱིངས་ནས་ཞུ་སོང་། །
སེམས་ཀྱི་ཕོ་བྲང་རྨང་ནས་བཤིག་སོང་། །
རྟོགས་པས་བཟོས་པའི་ཁང་གཞིས་ཕྲ་མོ། །
ཕ་གའི་རི་བོའི་རྩེ་མོར་སྤོར་སོང་། །
དྲོད་ཀྱི་ཕུང་བོ་ལུས་ལ་གླན་རོགས། །
སེམས་ཀྱི་སྐོམ་པ་བདུད་རྩིས་གསོ་རོགས། །
ཞེ་རྩ་འཁྱག་པའི་འཇིག་རྟེན་འདི་ནས། །
དགུན་གྱི་ནམ་ཟླ་ཕུད་ཐབས་མི་འདུག
གཤོག་པ་ཅན་དག་མཁའ་ལ་འཕུར་སོང་། །
སྡེར་མོ་ཅན་ཚོ་ས་རུ་འཛུལ་སོང་། །
ས་དང་གནམ་གྱི་བར་མཚམས་ཤིག་ནས། །
སེམས་ཀྱི་བུ་ཆུང་འདི་ལྟར་འགྲེང་འདུག །
སྙན་མོ་ཞིག་བྲིས་འདུག