ཆབ་མདོ་ངག་ཕུན།
ཀྱི་ཧུད།
འཛམ་གླིང་གི་ཡང་རྩེ་ཇོ་མོ་བླ་མ།
ཁྱོད་ཀྱང་འབྱུང་བས་ཡོལ་འགུལ་བཏང་ཞིང་།
ལོ་ངོ་སྟོང་ཕྲག་གནས་པའི་གངས་རི་ཡང་ཐར་ཐོར་བཏང་།
འབྱུང་བ་ནི་དེ་འདྲ་འཇིགས་སུ་རུང་བ་ཞིག་མ་རེད་དམ།
དངོས་གནས་་་་་་་་
གངས་རིའི་ཕ་རོལ་ལ་ཡོད་པའི་སྤུན་ཟླ་ཚོ།
འབྱུང་བས་གནོད་འཚེའི་ཕ་ཁང་ས་ལ་འགྱེལ།
དྲག་ཆར་དང་རླུང་ནག་འཚུབ་པའི་ཁྲོད་ལ་དཀའ་སྡུག་གིས་མནར།
དངོས་གནས་ཡིད་ཕམ་པ་ལ་ཨང་།
མི་ཚེ་འབད་སྤུངས་བྱས་ཏེ་བསྐྲུན་པའི་ཕ་ཁང་དྲོད་མོ་དེ།
ས་འགུལ་རྒྱབ་ཐེངས་གཅིག་གིས་ཐམས་ཅད་ཐལ་རྡུལ་བཏང་ཞིང་།
གཅེས་པའི་ལུས་ཕུང་ཕྱི་མའི་ལམ་དུ་བརྫངས།
གཡས་གཡོན་ནས་སྤུན་ཉེ་འབྲེལ་གྱི་མཐའ་ནས་བསྐོར་ཞིང་།
ངུ་ངག་གིས་རི་ལུང་འུར་གྱིས་བརྒྱངས།
སྡུག་བསྔལ་གྱི་རྒྱ་མཚོའི་ནང་དུ་ལྷུང་།
དེ་འདྲ་ཡིད་ཕམ་པ་ལ་ཨང་།
ང་ཚོ་དང་ལེ་དབར་བརྒྱ་ཕྲག་གནས་ཀྱང་རྟག་ཏུ་ཁྱོད་ཚོའི་སེམས་དབུས་སུ་གནས།
འཛམ་གླིང་གི་སྤུན་ཟླ་རྣམ་པ།
ཆེས་གཏོང་ཕོད་ཡང་པའི་རྒྱལ་ཁབ་དང་མི་དམངས།
དཀའ་སྡུག་འོག་ཏུ་ཚུད་པའི་གངས་ལྗོངས་མི་དམངས་ལ།
རོགས་མགོན་རྒྱ་མི་ཆུང་བ་གནང་བའི་རེ་སྐུལ་སྙིང་དབུས་ནས་ཞུ།
སེམས་སྐྱོ་བ་དང་ཡིད་ཕམ་པའི་གངས་ལྗོངས་མི་མང་།
ལོ་གཅིག་གི་ཟ་འབྲུ་ཚང་མ་ས་རྡོའི་འོག་ལ་འདྲེས།
གཟུགས་ཕུང་ཁེར་རྐྱང་ལས་མེད་པར་ཐམས་ཅད་འབྱུང་བས་འཇིག།
དེརིང་གི་ཁ་ལག་དེ་རིང་འཚོལ་ཐབས་བྱ་དགོས་པའི་དཀའ་སྡུག་གི་འོག་ཏུ་ཚུད།
དེ་འདྲའི་ཡིད་ཕམ་པ་ཨང་།
འོན་ཀྱང་ས་གཞི་ཇི་སྲིད་བར་དུ་གནས་པ་དང་དེ་སྲིད་བར་དུ་ང་ཚོ་ཡང་འཚོ་དགོས།
དེར་བརྟེན་སྔ་རྒྱུན་ཇི་བཞིན་ཡོང་བའི་རེ་བ་དང་སྨོན་ལམ་འདེབས་ཀྱི་ཡོད།
ཆབ་མདོ་ངག་ཕུན་ནམ་ཨ་ཚོགས་ཀྱིས། ༢༠༡༥/༤/༢༨
སྡུག་སྐད་གནམ་ལ་ཤོར།
སྡུག་སེམས་ཐང་ལ་ལྷུང་།
ས་འགུལ་བ་ལས་ཀྱིས་སྒུལ་བ་མིན།
སྲོག་ཤོར་བ་ལས་ཀྱིས་བསྐོས་བ་མིན།
མཐའ་ཡས་རྒྱ་མཚོ་འཕྲེད་དུ་གཅོད་དུས།
ང་ཚོ་གཉིད་བསྡད་ཡོད།
ས་ཆེན་གོ་ལ་ཕྱོགས་ནས་འགུལ་དུས།
ང་ཚོ་ཧད་བསྡད་ཡོད།
ཉི་མ་དམར་པོ་སྒང་ལ་ཤར་དུས།
ང་ཚོ་ནི་ང་ཚོས་བདག་པོ་མ་བྱས་བའི་ཚེ་སྲོག་རྩ་མེད་ཞིག།
འབྱུང་བཞི་ཟློག་པའི་ལྷ་སྲུང་ཞིག་མེད་ན།
ང་ཚོ་ནི། ས་འོག་ལ་ནན་ཆོག་ཆོག་གི།
མི་རབས་རྒྱུད་པ་ཞིག།
ཡོད་ཚད་ལ་ལག་པ་སྲིང་ནས།
ཤེས་ཚད་ལ་སྟོང་ཉིད་བཤད་ན།
ས་ཆུ་མེ་རླུང་།
སྔར་ལྟར།
ཁྱོད་དང་ང་ཚོས་མཉམ་དུ།
མ་ཎི་རེ་དོན་ན་ཚིམས་ནི་བྱེད་དམ།
ཨོཾམཎིཔདྨེཧཱོུཾ།