གཞུང་པ་ཚེ་དབང་བསོད་ནམས།
སྤྱི་ཚོགས་འཕེལ་རིམ་གྱིས་བརྒྱུད་ནས་སྤྱི་ཚོགས་ཡར་རྒྱས་འགྲོ་དགོས་པ་དང་སྤྱི་ཚོགས་ཡར་རྒྱས་བརྒྱུད་ནས་ཡ་རབས་དང་བཟང་སྤྱོད་ལ་འགན་འཁུར་ནས་སྤྱི་ཚོགས་ཀྱིས་འཚོ་བ་དང་སྒྲིག་འཛུགས་ལ་འགན་འཁུར་དགོས་པ་ནི་དུས་རབས་ཀྱི་ཁ་ཕྱོགས་དང་མ་ནོར་བ་ཞིག་དགོས་པ་ནས་དུས་རབས་ཉི་ཤུ་རྩ་གཅིག་འདི་འཆམ་མཐུན་དང་ཞི་བདེ་མཉམ་གནས་ཀྱིས་འཛམ་གླིང་ཞིག་བཟོ་དགོས་པའི་འགན་དེ་འཛམ་གླིང་འདིའི་སྟེང་འཚོ་བཞིན་པའི་ང་ཚོ་མི་ཚང་མ་ལ་ལས་འགན་ཡོད་པ་ནས་རང་རེ་བཙན་བྱོལ་བོད་མི་ཚོ་སྤྱི་ཚོགས་དྲ་རྒྱ་ལ་འགན་འཁུར་ནས་ཕྱོགས་གཏོགས་ཆབ་སྲིད་ལ་དུས་ནམ་ཡང་ཁ་ཕྱོགས་མི་ཉན་པ་དང་། དྲ་རྒྱའི་དུས་རབས་ནང་མི་ཚང་མས་དྲ་རྒྱ་བཀོལ་སྤྱོད་བྱེད་ཆོག་པའི་གཞི་རིམ་གྱི་ཐོབ་ཐང་ཡོད་པ་ནས་ཡ་རབས་བཟང་སྤྱོད་དང་ཁ་མ་བྲལ་བའི་ཐོག་ནས་དྲ་རྒྱ་བེད་སྤྱོད་གཏོང་དགོས་པ་ལས་དྲ་རྒྱའི་སྟེང་ཕྱོགས་གཏོགས་ཆབ་སྲིད་ལ་འགན་འཁུར་ནས་བཙན་བྱོལ་བོད་མིའི་ཆིག་སྒྲིལ་ལ་གནོད་གཞིའི་ཟུར་ཟའི་ཚིག་དུས་ནམ་ཡང་བཀོད་མི་ཉན་པ་ནི་ཉེ་ལམ་འདི་ག་ཀོ་ལི་གྷལ་དོན་ལྡན་གླིང་གཞིས་ཆགས་དབུ་བརྙེས་ནས་ལོ་ལྔ་བཅུ་འཁོར་བའི་དུས་དྲན་སྲུང་བརྩིའི་ཐོག་༧ གོང་ས་༧ སྐྱབས་མགོན་ཆེན་པོས་གསུང་འཕྲིན་ཕེབས་པའི་ནང་འདི་ལྟར། ༼ ༄༄ ཀོ་ལི་གྷལ་དོན་ལྡན་གླིང་གཞིས་ཆགས་ཚུགས་ནས་མི་ལོ་ལྔ་བཅུ་འཁོར་བའི་དུས་དྲན་བསྲུང་བརྩི་བྱེད་བཞིན་ཡོད་པར་གཞིས་མི་ཡོངས་དང་ཕྱི་ནང་གི་སྐུ་མགྲོན་བཅས་པར་མཛའ་བརྩེའི་འཚམས་འདྲི་ཡོད། རང་ཅག་བཙན་བྱོལ་དུ་འབྱོར་རྗེས་གཞིས་ཆགས་ཟུར་འཛུགས་དགོས་པའི་དམིགས་དོན་ནི། མི་འབོར་ཆེ་ཞིང་ས་རྒྱ་ཆེ་བའི་རྒྱ་གར་གྱི་ཡུལ་གྲུ་ཁག་ནང་རིམ་གྱིས་སིམ་སྟེ་ཁ་འཐོར་དུ་མི་འགྲོ་བ་དང་། བོད་ཀྱི་ཆོས་དང་རིག་གཞུང་། སྐད་ཡིག ཡུལ་གོམས་གཤིས་ལུགས་བཅས་པ་མི་ཉམས་རྒྱུན་འཛིན། ངེས་བརྟན་མེད་པའི་འཚོ་བའི་དཀའ་ངལ་སེལ་ཐབས་བཅས་ཀྱི་ཆེད་དུ་ཡིན་པ་ལྟར་ཕྱོགས་ཚང་མ་ནས་ངལ་ཁུར་དང་ལེན་ཕྱར་གྲུ་མཉམ་འདེགས་བྱས་པའི་འབྲས་བུ་རང་རེའི་མིག་གི་སྤྱོད་ཡུལ་དུ་གྱུར་པ་འདི་ཡིན། སླད་གཞིས་ཆགས་ཁག་ནང་རྒན་རྒོན་ནད་གཅོང་ཉམ་ཐག་ཧྲེང་པོ་ཡོད་རིགས་ཀྱི་འཚོ་བའི་གནས་སྟངས་ཐོག་དམིགས་བསལ་དོ་སྣང་ལྟ་རྟོག་རོགས་རམ་དང་འབྲེལ། ནང་དོན་རིག་པ་སེམས་ཀྱི་འཕྲོད་བསྟེན་དང་། གསོ་བ་རིག་པ་ལུས་ཀྱི་འཕྲོད་བསྟེན་ཡིན་ལུགས་བཤད་སྲོལ་ཡོད་པ་ལྟར་རྒན་རྒོན་དེ་དག་གི་ཟས་སྤྱོད་འཕྲོད་བསྟེན་ཐོག་ལའང་ལྟ་ཞིབ་མི་ལྷོད་པ་དགོས་གལ། བོད་གཞིས་ལུས་མི་མང་རྣམས་གཞན་དབང་འོག་ཏུ་ཚུད་ཡོད་ཀྱང་མཐུན་སྒྲིལ་རྡོག་རྩ་གཅིག་སྒྲིལ་གྱིས་ཆོལ་གསུམ་ཁ་བྲལ་གཏོང་ཐུབ་མེད། འོན་ཀྱང་འདི་ཕྱོགས་རང་རེ་བཙན་བྱོལ་ནང་སྤྱི་སེམས་ཀྱིས་ཕོངས་པའི་ཅོལ་ཆུང་ཁག་གཅིག་གིས་ཕྱོགས་རིས་འཐེན་འཁྱེར་གྱི་བྱ་བ་སྤེལ་བ་དེ་ནི་ཞབས་འདྲེན་བློ་ཕམ་གྱི་གནས་ཡིན་པས་སེར་སྐྱ་འགོ་དམངས་ཚང་མས་ཅིས་ཀྱང་ཡིད་གཟབ་དགོས་གལ་བློ་འཇགས་གྱིས། རྗེས་འཛིན་སྨོན་ལམ་བཅས། ཤཱཀྱའི་དགེ་སྦྱོང་ཆོས་སྨྲ་བ། ཏཱ་ལའི་བླ་མས། རབ་བྱུང་བཅུ་བདུན་པའི་ཆུ་ཡོས་ཟླ་ ༡༢ ཚེས་ ༢༧ ཕྱི་ལོ་ ༢༠༢༤ ཟླ་ ༢ ཚེས་ ༧ ལ། ༽ ཞེས་བཀའ་ནན་ཕེབས་པའི་ནང་དོན་གཙོ་བོ་འདི་ལྟར་ ༼ འོན་ཀྱང་འདི་ཕྱོགས་རང་རེ་བཙན་བྱོལ་ནང་སྤྱི་སེམས་ཀྱིས་ཕོངས་པའི་ཅོལ་ཆུང་ཁག་གཅིག་གིས་ཕྱོགས་རིས་འཐེན་འཁྱེར་གྱི་བྱ་བ་སྤེལ་བ་དེ་ནི་ཞབས་འདྲེན་བློ་ཕམ་གྱི་གནས་ཡིན་པས་སེར་སྐྱ་འགོ་དམངས་ཚང་མས་ཅིས་ཀྱང་ཡིད་གཟབ་དགོས་གལ་བློ་འཇགས་གྱིས༽ ཅེས་གསལ་བ་ནས་དབུས་བོད་མིའི་སྒྲིག་འཛུགས་ཀྱིས་མང་གཙོའི་ཀ་བ་གསུམ་གྱིས་མཛད་གཙོ་རྣམ་པས་དབུ་ཁྲིད་འོག་གཞུང་འབྲེལ་དང་གཞུང་འབྲེལ་མ་ཡིན་པའི་ཚོགས་སྐྱིད་ཁག་དང་། རྒྱ་བལ་འབྲུག་གསུམ་ནང་ཡོད་པའི་བོད་མིའི་ཆོས་གཞིས་ཁག་དང་བཟོ་གཞིས་ཁག ཕྱིའི་རྒྱལ་ཁབ་ཁག་ནང་ཡོད་པའི་བོད་མི་རྣམས་བཅས་བོད་མི་བཙན་བྱོལ་བ་ཚང་མས་༧ གོང་ས་༧ སྐྱབས་མགོན་ཆེན་པོ་མཆོག་ལ་ཐུགས་དམ་འགལ་རྐྱེན་མི་འབྱུང་ཆེད་བརྟན་བཞུགས་འབུལ་དགོས་པ་དང་། དམ་ཚིག་རྡོ་རྗེའི་གཟུངས་སྔགས་བཙན་བྱོལ་བོད་མི་རང་ལོ་བཅོ་བརྒྱད་ཟིན་པ་ཡན་དང་རང་ལོ་བརྒྱད་བཅུ་མན་ཚང་མས་མི་རེ་ནས་འབུམ་རེ་གྲངས་བསོགས་དགོས་པ་ནི་ད་ལམ་གྱིས་གསུང་འཕྲིན་ལ་ང་ཚོའི་ངེས་པར་དུ་དུས་ཐོག་འགན་འཁུར་དགོས་པ་དེ་གལ་ཆེན་དོན་ཆེན་ཞིག་ལ་ངོས་འཛིན་ཞུ་གི་ཡོད་ལ་ང་ཚོ་བཙན་བྱོལ་ནང་ཡོད་པའི་བོད་མི་བརྒྱ་ཆ་དགུ་ཅུ་དགུ་དགུ་གིས་༧ གོང་ས་མཆོག་གིས་བཀའ་དགོངས་དང་བཙན་བྱོལ་བོད་མིའི་བཅའ་ཁྲིམས་ལ་ཡིད་ཆེས་དང་། བློ་གཏད། བརྩི་བཀུར། ཉམས་ལེན་ཞུས་ནས་ཆོལ་གསུམ་བོད་མིའི་ཆིག་སྒྲིལ་ལ་ནུས་པ་མཉམ་སྤུངས་བྱེད་མཁན་ཤ་སྟག་ཡིན་པ་དང་། བརྒྱ་ཆ་གཅིག་ཙམ་ནས་སྤྱི་སེམས་ཀྱིས་ཕོངས་པའི་བསམ་མེད་ཅོལ་ཆུང་དོན་མ་གོ་བཙན་བྱོལ་སྤྱི་ཚོགས་དཀྲུགས་རྒྱུའི་ཕྱོགས་གཏོགས་ཆབ་སྲིད་ལ་འགན་འཁུར་ནས་ཟུར་ཟའི་ཚིག་དྲ་སྟེང་སྤེལ་མཁན་ཚོའི་ངོས་ནས་༧ གོང་ས་མཆོག་གི་གསུང་འཕྲིན་ལ་འགན་འཁུར་ནས་ཆོལ་གསུམ་བོད་མིའི་ཆིག་སྒྲིལ་སྔར་ལས་སྲ་བརྟན་དང་ནང་ཁུལ་མཐུན་ལམ་དམ་གཙང་འགྱུར་མེད་ལྕགས་ཀྱིས་གོང་བུ་བཞིན་དུ་གནས་ཐུབ་པའི་འགན་བཞེས་ནས་སྔར་བྱས་ལ་འགྱོད་སེམས་ཀྱིས་བཤགས་པ་དང་ཕྱིན་ཆད་སྡོམ་སེམས་ཀྱིས་ནམ་ཡང་མི་བྱ་བའི་ཁས་ལེན་དམ་བཅའ་ཕུལ་དགོས་པ་དང་།
༧ གོང་ས་མཆོག་གིས་དུས་གསུམ་གསལ་གཟིགས་ཀྱིས་བཀའ་སློབ་ལམ་སྟོན་ཕེབས་པ་རྣམས་ང་ཚོ་བོད་མི་ཚང་མས་སྙིང་ལ་བཅང་ནས་བོད་དོན་བདེན་མཐའ་སེལ་ཐུབ་པའི་ནུས་པ་མཉམ་སྤུངས་ཐུབ་པ་ལ་མེད་དུ་མི་རུང་བ་དེ་ཆོལ་གསུམ་བོད་མིའི་ཆིག་སྒྲིལ་དང་། དམ་གཙང་། ངོ་ལྐོག་དངརྒྱབ་མདུན་མེད་པ་བོད་ཀྱིས་རྩ་དོན་ལ་ལྷག་བསམ་ཆེན་པོའི་མདུན་མཆོང་གནང་རྒྱུ་དེ་ཁ་ཚ་དགོས་གཏུགས་ཀྱིས་དུས་ལ་སླེབས་མི་འདུག་གམ།