སྤྱི་འཐུས་གྲོས་ཚོགས་ཀྱི་ལས་རིམ་ལ་བརྗོད་པའི་ཀ་བཤད།

ཀོ་ལི་གྷ་གཞུང་པ་ཚེ་དབང་བསོད་ནམས།

 
ཀ་མད་སུམ་བཅུའི་འགན་ཁུར་འོོག་གི་སྤྱི་འཐུས་གྲོས་ཚོགས་གཟི་བརྗིད་ཆེ།།
ཁ་བཤད་སྟོང་པའི་གྲོས་ཚོགས་ལས་རིམ་སྒེར་འཁོན་གླེང་གཞི་སྤྱི་སར་སྤུངས།།
ག་དུས་ཡིན་ཡང་སྤྱི་འཐུས་གྲོས་ཚོགས་ཚོགས་ལ་ཉེ་སྐབས་བློ་མ་བདེ།།
ང་རྒྱལ་རང་དོན་ཁོག་ཏུ་བཅངས་ནས་སྤྱི་སེམས་འགན་ཁུར་མདུན་དུ་འཕྱར།།
ཅ་ཅོ་འར་འུར་གླེང་རྒྱུ་མང་བའི་ཁྲིམས་བཟོའི་ལས་རིམ་གཞི་རྒྱ་ཆེ།།
ཆ་ཤས་བཞེས་མཁན་འཚང་ཁ་ཤིག་ཤིག་མི་མང་མངོན་འདོད་གླེང་མཁན་ཉུང་།།
ཇ་ཆང་མ་ཅང་ལོག་འཚོའི་བྱ་བ་དོན་དངོས་ཡ་རབས་བཟང་སྤྱོད་ཉམས།།
ཉ་ཕག་གོང་གསུམ་ནག་པོའི་ཁ་ཟས་བེད་སྤྱོད་མང་ཤོས་མཐོ་རིམ་མི།།
ཏ་ཐ་ག་ཏའི་བསྟན་པའི་རྗེས་འབྲངས་ང་རྒྱལ་ཕྱོགས་ལྷུང་སྤང་ན་དགའ།།
ཐ་དང་མུ་མེད་ཁྲིམས་བཟོའི་ལས་དོན་བཅའ་ཁྲིམས་བསྐྱར་བཅོས་ཕྱོགས་གཏོགས་འོག།
ད་ལམ་གྲོས་ཚོགས་ལས་རིམ་མཇལ་སྐབས་དགྲ་དགའ་གཉེན་སྡུག་ཡིད་རེ་མུག །
ན་རྒྱུ་ཚ་རྒྱུ་འཇིག་རྟེན་ཆོས་ཉིད་སྤྱི་འཐུས་ནང་འཁྲུག་ཁྲིམས་སྒྲིག་འགལ།།
དཔའ་ངར་ཆེ་བའི་སྤྱི་འཐུས་གྲོས་ཚོགས་ཁྲིམས་བཟོ་བཞག་ནས་ནང་འཁྲུག་མང་།།
ཕ་ཡུལ་བོད་དུ་གཅིག་མཇུག་གཉིས་ཕྱོངས་རང་བསྲེགས་བྱ་བ་རྒྱལ་ཁབ་དོན།།
བ་ཕྱུགས་དུད་འགྲོ་རྐང་གཉིས་འདྲ་བའི་ང་ཚོ་བྱེས་འབྱོར་ནང་འཁྲུག་མང་།།
མ་རབས་བྱ་བ་ཤེས་བྱར་ངོམ་ནས་ཁྲིམས་བཟོའི་ལས་དོན་སྒེར་རྩོད་གླེང་།།
རྩ་བ་རང་བཙན་ས་ཆའི་བདག་དབང་འཇིག་རྟེན་མི་ཡི་ལས་དབང་རེད།།
ཚ་གྲང་དཀའ་ཚེགས་སྲོག་ལ་ཐུག་ཀྱང་ས་ཆའི་བདག་དབང་གློད་མི་ཉན།།
ཛ་དྲག་བྱས་ནས་རང་བཙན་མ་གླེང་མི་རིགས་ས་གནས་རང་སྐྱོང་བདམས།།
ཝ་ལེར་སོམས་དང་ས་གནས་རང་སྐྱོང་གཡག་དང་མ་ཧེའི་ཁ་སྒྲུང་འདྲ།།
ཞྭ་མོའི་ནང་གི་ཆབ་སྲིད་འཐོམ་ཞྭ་བོད་མིའི་མགོ་ལ་བསྐོན་པ་འདྲ།།
ཟ་འཐུང་ལོངས་སྤྱོད་མི་ཡི་བསོད་ནམས་ཚད་དང་འགལ་ན་དུག་ལ་འགྱུར།།
འ་ཆད་འུ་ཐུག་གཞིས་སྡོད་བོད་མིའི་རེ་བའི་རྒྱང་བལྟ་ང་ཚོར་བཅོལ།།
ཡ་རབས་བྱ་བའི་འགན་ཁུར་ཉིན་སྐར་ནང་འཁྲུག་རྒྱག་ལ་སྤྱི་འཐུས་མཁས།།
ར་བ་གངས་ལྗོངས་ཀླ་ཀློས་ཁེངས་ཀྱང་བྱེས་འབྱོར་བོད་མི་ནུབ་ཕྱོགས་མྱུལ།།
ལ་ལུང་བགྲོད་ནས་ས་མཐར་འབྱོར་ཀྱང་ཕ་ཡུལ་གངས་ལྗོངས་ཡིད་ལ་འཁོར།།
ཤ་ཚའི་གཏམ་དང་ཕན་པའི་བསླབ་བྱ་གླེང་མཁན་མི་ལ་སྡང་ཟུག་མང་།།
ས་ཕྱོགས་འདི་ནི་གཞན་ཡུལ་ཡིན་པས་བུ་རབས་ཚ་བརྒྱུད་འཚར་ས་མིན།།
ཧ་ཅང་མ་ནོར་ཆབ་སྲིད་བརྟན་དང་མེས་དབོན་རྣམ་གསུམ་རིགས་རྒྱུད་ཚོ།།
ཨ་གསར་གཏམ་དང་གསར་རྙེད་གྲོགས་ལ་མགོ་བོ་མ་འཁོར་བོད་མི་ཚོ།།