སྤྱི་འཐུས་ཚོ། ལམ་ནོར་ལྡོག་ཤེས་བྱུང་བ་ལ་དགའ་བསུ་ཞུ།

རིག་འཛིན།

ཁྲིམས་འགལ་གྱི་གྲོས་ཆོད་བཞག་པ། ཁྲིམས་ཀྱི་དབང་བསྒྱུར་ལས་ལྡོག་ཕྱོགས་སུ་བསྐྱོད་རྩིས་བྱས་པ། ཁྲིམས་ལ་ལོག་འགྲེལ་བྱས་པ། མང་ཚོགས་མགོ་སྐོར་བསླུ་བྲིད་ཀྱི་ཐབས་ཤེས་བྱས་པ་བཅས་མདོར་ན་དོན་མེད་མཁྲེགས་བཟུང་བྱས་ཏེ། ༸གོང་ས་མཆོག་ལ་ཐུགས་ཕམ་དང་གཞིས་བཞུགས་བོད་མིའི་ནང་བློ་ཕམ་ཡིད་ཆད་འབྱུང་གཞི་མང་དག་ཅིག་བརྩམས་པའི་འཐེན་འཁྱེར་བྱུས་ངན་མཐའ་དག་རྦད་དེ་ཕམ་ཉེས་ཕྱིན་ནས་འགྲོ་ལམ་མེད་པར་གྱུར་པའི་ཚེ། ད་གཟོད་ལམ་ཁ་ནོར་བ་དང་། གོམ་པ་སྤོ་སྟངས་ནོར་བ་ཤེས་ནས། ལམ་ནོར་ལྡོག་ཤེས་བྱུང་བ་ལ་དགའ་བསུ་ཞུ།

ཇི་ལྟར་༸གོང་ས་མཆོག་གིས་ལམ་སྟོན་གནང་བའི་ནང་། “དཀའ་རྙོག་འདི་དག་སེལ་ཐབས་ཀྱང་བཅའ་ཁྲིམས་སུ་གསལ་ཡོད་པ་ལྟར་ཁྲིམས་ཀྱི་དབང་བསྒྱུར་ངོས་ལེན་བྱས་ན་དཀའ་རྙོག་ཡོང་གཞི་མ་མཆིས། བཅའ་ཁྲིམས་ཀྱི་འབྲུ་དོན་ལག་བསྟར་དཀའ་རིགས་ཡོད་ཚེ་ཁྲིམས་ལུགས་གཞིར་བཟུང་བཅའ་ཁྲིམས་བསྐྱར་བཅོས་ཀྱི་ཐབས་ལམ་ཡོད་བཞིན་པ་དང་། འབྲུ་དོན་འགྲེལ་བརྗོད་བྱེད་སྟངས་ལ་ཐེ་ཚོམ་བྱུང་ན་ཁྲིམས་ལུགས་ལྟར་ཆེས་མཐོའི་ཁྲིམས་ཞིབ་ཁང་ལ་ཞུ་གཏུགས་ཀྱི་ལམ་ནས་བསལ་དགོས། བཅའ་ཁྲིམས་འགྲེལ་བརྗོད་ཀྱི་མཐའ་མའི་འགན་དབང་ཆེས་མཐོའི་ཁྲིམས་ཞིབ་ཁང་ཁོ་ནར་ཡོད།” ཅེས་གསལ་བ་ལྟར། མ་འོངས་པར། དོན་མེད་མཁྲེགས་བཟུང་དང་། ཁྲིམས་ཀྱི་དབང་བསྒྱུར་ལས་ལོགས་སུ་ཐོན་ནས་བོད་མིའི་སྒྲིག་འཛུགས་གཏོར་ཐབས་ཀྱི་བྱ་སྤྱོད་ཉི་ཚེ་བའི་རིགས་མི་སྤེལ་བ་དང་། དོན་མེད་ཧམ་བཤད་དང་མང་ཚོགས་མགོ་སྐོར་བསླུ་བྲིད་རིགས་མི་བྱེད་པར། ཁྲིམས་ལུགས་གཙུག་ཏུ་བཀུར་ཞིང་། ཁྲིམས་ཀྱི་དབང་བསྒྱུར་གྱི་ལམ་དུ་ཤར་བསྐྱོད་བྱེད་པའི་རེ་བ་ཞུ།

སླད་ཕྱིན། “ད་ནས་བཟུང་སྟེ་སྤྱི་འཐུས་རྒྱུན་ལས་ནས་ཀྱང་བོད་མི་མང་སྤྱི་འཐུས་ལྷན་ཚོགས་ཀྱིས་བཙན་བྱོལ་བོད་མིའི་བཅའ་ཁྲིམས་ཀྱི་དགོངས་དོན་བཞིན་གཏན་འབེབས་གནང་བའི་གྲོས་ཆོད་ཡིག་ཆ་ཨང་ 39 པའི་དགོངས་དོན་མཇུག་སྐྱོང་བྱ་ཐབས་གང་ཡང་མི་འདུག་” ཞེས་ཁྲིམས་འགལ་གྲོས་ཆོད་འཇོག་མཁན་སྤྱི་འཐུས་སྐབས་བཅུ་དྲུག་པའི་སྐུ་ཚབ་རྒྱུན་ལས་ཚོས་ཁྲིམས་འགལ་གྲོས་ཆོད་དེར་མཇུག་སྐྱོང་གི་རིན་ཐང་མེད་པའམ་ནུས་པ་མེད་པའི་གསལ་བསྒྲགས་བསྐྱངས་ཟིན་པ་ལྟར། མ་འོངས་པར་ཁྲིམས་འགལ་མི་བྱེད་པ་དང་། དགོས་མེད་ཨུ་ཚུགས་མི་བྱེད་པ། དོན་མེད་མཁྲེགས་བཟུང་མི་བྱེད་པ། ལོག་འགྲེལ་མི་བྱེད་པ་གལ་ཆེན་ཆགས་ཡོད། གལ་སྲིད། ཁྲིམས་དང་འགལ་བ་ཆགས་ན། ཆེས་མཐོའི་ཁྲིམས་ཞིབ་ཁང་གི་ལམ་སྟོན་དང་བཀའ་ཁྱབ་ལ་ཉན་ཞིང་དེར་གནས་ཐུབ་དགོས་པ་ཐུགས་ལ་འཛིན་རོགས་ཞུ།