གཞུང་པ་ཚེ་དབང་བསོད་ནམས།
བོད་མི་མང་སྤྱི་འཐུས་ལྷན་ཚོགས་ནས་འགྲེམས་སྤེལ་བྱས། བོད་རྒྱལ་ལོ་ ༢༡༤༩ ཕྱི་ལོ་ ༢༠༢༢། ཟེར་བའི་དེབ་དེའི་ནང་དོན་ཆ་ཚང་ཀློག་སྐབས་ང་ལ་མཐོང་ཚུལ་དང་བསམ་ཚུལ་གོ་རྟོགས་སོགས་གང་བྱུང་བ་དེ་མང་གཙོ་དང་ཁྲིམས་ཀྱི་དབང་བསྒྱུར་ལ་འགན་འཁུར་ནས་བཅའ་ཁྲིམས་དོན་ཚན་བཅུ་གསུམ་ནང་གསལ་བའི་བོད་ཀྱི་ཡུལ་མིའི་ལས་འགན་སྒྲུབ་ནས་གང་ཟག་སྒེར་གྱི་བསམ་ཚུལ་འདིར་ཞུ་འདོད་བྱུང་།
༡༽གྲོས་ཆོད་ཡིག་ཆ་ཨང་༣༩པ་དེ་ཁྲིམས་མཐུན་ཡིན་དང་ཁྲིམས་འགལ་ཡིན་གཤམ་གསལ་བཅའ་ཁྲིམས་ཀྱིས་དོན་ཚན་ཁག་ནས་ངོ་སྤྲོད་ཐུབ་རྒྱུ།
བཅའ་ཁྲིམས་དོན་ཚན་༦༣པའི་ནང་གསེས་བཞི་པའི་འོག་ཁྲིམས་ཞིབ་པ་ཆ་ཚང་འཕོ་འགྱུར་བཏང་བ་དེ་ཁྲིམས་མཐུན་རེད་དམ། ཁྲིམས་འགལ་རེད་གཤམས་འོག་བཅའ་ཁྲིམས་ཀྱིས་དོན་ཚན་ཁག་ལ་གཟིགས་ན་མཁྱེན་ཐུབ།༼བཅའ་ཁྲིམས་དོན་ཚན་༦༣པའི་ནང་གསེས་བཞི་པ་འདི་ལྟར།
སྤྱི་འཐུས་ལྷན་ཚོགས་ཀྱི་སྤྱི་འཐུས་རྩ་འབོར་གྱི་གསུམ་ཆ་གཉིས་ཡན་གྱིས་ཁྲིམས་ཞིབ་ཆེ་བ་དང་། ཁྲིམས་ཞིབ་པ་གཞན་གཉིས་བཅས་སུ་རུང་འཕོ་འགྱུར་དགོས་པའི་གྲོས་ཆོད་བཞག་སྟེ་འཕོ་འགྱུར་བྱེད་དགོས་བྱུང་ན་ལས་དེ་མིན་ཁྲིམས་ཞིབ་པ་ཆེ་བའི་ལས་རྒྱུན་ལོ་ལྔ་འམ་རང་ལོ་དྲུག་བཅུ་རེ་ལྔ་ཧྲིལ་པོ་ལོན་པ་གང་སྔའི་བར་ཡིན།ཁྲིམས་ཞིབ་པ་གཞན་གཉིས་རང་ལོ་དྲུག་ཅུ་རེ་ལྔ་ཧྲིལ་པོ་མ་ལོན་བར་ལས་འཁུར་རྒྱུན་འཛིན་བྱ་རྒྱུ།༽ཅེས་འཁོད་པ་ནས་དོན་མཚན་འདིའི་གོ་དོན་ནི་ཁྲིམས་ཞིབ་པ་ཆེ་བ་དང་ཁྲིམས་ཞིབ་པ་གཞན་གཉིས་བཅས་ཁྲིམས་ཞིབ་པ་ཚོའི་ལས་ཡུན་ཞབས་ལོ་དང་རང་ལོའི་སྐོར་ཡིན་པ་ལས་ཁྲིམས་ཞིབ་ཚོ་འཕོ་འགྱུར་གཏོང་རྒྱུའི་དོན་ཚན་་དེ་བཅའ་ཁྲིམས་དོན་ཚན་༥༤ཡིན་པ་འདི་ལྟར།༼བཅའ་ཁྲིམས་དོན་ཚན་ང་བཞི་པ། གྲོས་བསྡུར་བཀག་སྡོམ།ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བ་དང་། ཁྲིམས་ཞིབ་པ་གཞན་གཉིས་གང་རུང་འཕོ་འགྱུར་བྱ་རྒྱུའི་སྐོར་དང་།སྤྱི་འཐུས་ལྷན་ཚོགས་ནས་ཚོགས་ཆུང་ཟུར་འཛུགས་ཀྱིས་རྟོག་ཞིབ་ཐོག་སྤྱི་འཐུས་ལྷན་ཚོགས་སུ་སྙན་མཐོ་འབྱོར་བའི་སྐབས་སུ་མ་གཏོགས་དེ་མིན་ཁྲིམས་ཞིབ་པའི་ལས་དོན་བྱེད་ཕྱོགས་སྐོར་སྤྱི་འཐུས་ལྷན་ཚོགས་སུ་གླེང་སློང་དང་།གྲོས་བསྡུར་མི་ཆོག༽ཅེས་གསལ་བ་ནས་བཅའ་ཁྲིམས་ཀྱི་དོན་ཚན་ནོར་ནས་སྤྱི་འཐུས་རྒྱུན་ལས་ནས་བཅའ་ཁྲིམས་དོན་ཚན་༦༣གི་ནང་གསེས་བཞི་པའི་འོག་ཁྲིམས་ཞིབ་པ་ཆ་ཚང་འཕོ་འགྱུར་གཏོང་རྒྱུའི་གྲོས་འཆར་སྟོན་པ་ནི་གྲོས་འཆར་གྱི་ངོ་གདོང་རང་ནས་ཁྲིམས་འགལ་ཡིན་པ་ནས་ཁྲིམས་བཟོ་སྤྱི་འཐུས་གྲོས་ཚོགས་འཐུས་མིའི་སྤུས་ཚད་དེ་འོས་འཕེན་རྒྱ་ཆེ་མི་མང་གི་མདུན་དུ་འཐོན་ནས་སྔོ་ལོ་ལུང་པ་གང་ཕྱར་ནས་མ་འོངས་བོད་ཀྱི་མང་གཙོའི་འཕེལ་རིམ་གྱི་ལོ་རྒྱུས་ནང་སྲུབ་ནས་ཟུབ་རྒྱུ་མེད་པའི་ལོ་རྒྱུས་ཀྱི་ནག་ཐིག་ཆེན་པོ་ཞིག་བཀོད་པ་མ་རེད་དམ།མང་གཙོའི་རྒྱལ་ཁབ་ག་འདྲ་ཞིག་གི་རྩ་ཁྲིམས་ལ་བལྟ་ཀློག་དང་བརྒྱུས་ལོན་བྱ་མཁན་ཞིག་ཡོད་ན་ཁྲིམས་ཁང་གི་ཁྲིམས་དཔོན་ཆ་ཚང་སྡེབས་གཅིག་ལ་འོས་བསྡུའི་ལམ་ནས་གྲོས་ཚོགས་འཐུས་མི་ནས་འཕོ་འགྱུར་གཏོང་རྒྱུའི་ཆ་རྐྱེན་རྩ་ཁྲིམས་ནང་རྙེད་རྒྱུ་མེད་པ་དང་།ང་ཚོའི་ཁྲིམས་ཞིབ་པ་ཆ་ཚང་འོས་བསྡུའི་ལམ་ནས་སྡེབས་གཅིག་ལ་གྲོས་ཚོགས་ནས་འཕོ་འགྱུར་བཏང་བ་དེ་བཅའ་ཁྲིམས་དོན་ཚན་༥༤ནང་གསལ་བའི་གང་རུང་ཟེར་བའི་ཐ་སྙད་དེ་དང་བཅའ་ཁྲིམས་དོན་ཚན་༦༣གི་ནང་གསེས་བཞི་པའི་ནང་གསལ་བའི་སུ་རུང་ཟེར་བའི་ཐ་སྙད་དེ་དག་དང་ཕྱོགས་མཐུན་བྱུང་མེད་པ་ནས་ཁྲིམས་འགལ་རང་ལ་ངོས་འཛིན་ཞུ་གི་ཡོད་ལ་ཁྲིམས་ཞིབ་ཚོ་འཕོ་འགྱུར་གཏོང་རྒྱུའི་དོན་ཚན་དེ་༥༤ཡིན་པ་མ་ཟད་སྤྱི་འཐུས་ལྷན་ཚོགས་ནས་ཚོགས་ཆུང་ཟུར་འཛུགས་ཀྱིས་རྟོགས་ཞིབ་ཐོོག་སྤྱི་འཐུས་ལྷན་ཚོགས་སུ་རྟོགས་ཞིབ་ཚོགས་ཆུང་གིས་སྙན་ཐོ་འབྱོར་བའི་སྐབས་སུ་མ་གཏོགས་དེ་མིན་ཁྲིམས་ཞིབ་པའི་ལས་དོན་བྱེད་ཕྱོགས་སྐོར་སྤྱི་འཐུས་ལྷན་ཚོགས་སུ་གླེང་སླེང་དང་གྲོས་བསྡུར་ཙམ་ཡང་བྱེད་མི་ཆོག་པ་གསལ་བ་ནས་སྤྱི་འཐུས་གྲོས་ཚོགས་ནས་གྲོས་ཆོད་ཀྱི་ལམ་ནས་ཆེས་མཐོའི་ཁྲིམས་ཞིབ་པ་ཆ་ཚང་འཕོ་འགྱུར་བཏང་བ་དེ་་ཁྲིམས་ཞིབ་གསར་པ་ཚོ་དམ་བཅའ་སུ་ལ་འབུལ་དགོས་མིན་དེ་ཡང་ཁ་གསལ་མེད་པ་ནས་དྲི་བ་ཆེན་པོ་ཞིག་ཁྲིམས་བཟོ་སྤྱི་འཐུས་གྲོས་ཚོགས་ཀྱི་འཐུས་མི་ཚོའི་མདུན་དུ་ལྷག་མི་འདུག་གམ།
ཆེས་མཐོའི་ཁྲིམས་ཞིབ་ཁང་ནས་སྤྱི་འཐུས་རྒྱུན་ལས་ལ་བཀོད་ཁྱབ་བཏང་བ་དེ་བཅའ་ཁྲིམས་དོན་ཚན་ང་བརྒྱད་དང་འགལ་བ་ཟེར་བ་དེ་བདེན་པ་མིན་པ་འདི་ལྟར།
༼བཅའ་ཁྲིམས་དོན་ཚན་ང་བརྒྱད་པ།སྤྱི་འཐུས་ལྷན་ཚོགས་ཀྱི་ལས་དོན་ལ་ཁྲིམས་ཞིབ་རྩད་གཅོད་མི་ཆོག།༡སྤྱི་འཐུས་ལྷན་ཚོགས་ཀྱི་ལས་དོན་གང་ཞིག་ཚད་ལྡན་ཡིན་མིན་དང་།ཐག་གཅོད་བྱེད་ཕྱོགས་ལྷན་ཚོགས་ཀྱི་སྒྲིག་གཞི་དང་མཐུན་མིན་ལ་བསྙད་དེ་ཁྲིམས་ཞིབ་ཁང་ནས་རྩད་གཅོད་མི་ཆོག།༢ལྷན་ཚོགས་ཀྱི་འགྲོ་ལུགས་དང་སྒྲིག་གཞི་བཟོ་འགོད་བཅས་ཀྱི་ཆེད་བཅའ་ཁྲིམས་འདིའི་ཐོག་ནས་སྤྲད་པའི་དབང་ཚད་ལག་ལྟར་བསྟར་བྱེད་ཕྱོགས་ལ་སྤྱི་འཐུས་ལྷན་ཚོགས་ཀྱི་ཚོགས་མི་སུ་ཡང་ཁྲིམས་ཞིབ་ཁང་གང་གིའང་ཁྱབ་ཁོངས་སུ་མེད།༽ཅེས་གསལ་བ་ནས་སྤྱི་འཐུས་ལྷན་ཚོགས་ཀྱི་ལས་དོན་ལ་ཁྲིམས་ཞིབ་རྩད་གཅོད་མི་ཆོག་ཟེར་པ་ལས་སྤྱི་འཐུས་ལྷན་ཚོགས་ནས་བཅའ་ཁྲིམས་དང་འགལ་ན་རྩད་གཅོད་མི་ཆོག་ཟེར་བའི་ཐ་སྙད་དེ་འཁོད་མེད་པ་དང་སྤྱི་འཐུས་ལྷན་ཚོགས་ཀྱི་སྒྲིག་གཞི་དང་མཐུན་མིན་སྐོར་གསལ་བ་ལས་བཅའ་ཁྲིམས་དང་འགལ་མིན་སྐོར་གསལ་མེད་པ་ནས་ཆེས་མཐོའི་ཁྲིམས་ཞིབ་ཁང་ནས་སྤྱི་འཐུས་རྒྱུན་ལས་ཀྱིས་བཅའ་ཁྲིམས་དང་འགལ་བའི་སྐོར་རྩལ་དུ་སྟོན་ནས་བཀའ་ཁྱབ་བཏང་བ་ལས་སྒྲིག་གཞི་དང་འགལ་བའི་སྐོར་རྩལ་དུ་སྟོན་ནས་བཀའ་ཁྱབ་བཏང་མི་འདུག་ན་སྤྱི་འཐུས་ལྷན་ཚོགས་དང་སྤྱི་འཐུས་རྒྱུན་ལས་གཉིས་དོན་གཅིག་མིང་གི་རྣམ་གྲངས་ལ་ངོས་འཛིན་གནང་ན་འགྲིག་གི་ཨ་ཡོད་ལ་བཅའ་ཁྲིམས་དང་སྒྲིག་གཞི་གཉིས་དོན་གཅིག་མིང་གི་རྣམས་གྲངས་ལ་ངོས་འཛིན་གནང་ན་དེ་བས་ཀྱང་འགྲིག་གི་ཨ་ཡོད།༼བཅའ་ཁྲིམས་དོན་ཚན་ཞེ་གཉིས་པ།སྤྱི་འཐུས་ཀྱི་རྒྱུན་ལས་༽ཟེར་བའི་ནང་སྤྱི་འཐུས་རྒྱུན་ལས་འཁོད་པ་ལས་རྒྱུན་ལས་ལྷན་ཚོགས་འཁོད་མི་འདུག་ལ་སྤྱི་འཐུས་རྒྱུན་ལས་ཀྱི་སྒྲིག་གཞི་དོན་ཚན་བཅུ་གཉིས་ཅན་དེའི་ནང་དུ་ཡང་སྤྱི་འཐུས་རྒྱུན་ལས་འཁོད་པ་ལས་༼སྤྱི་འཐུས་རྒྱུན་ལས་ལྷན་ཚོགས་༽ཟེར་བའི་ཐ་སྙད་དེ་འཁོད་མི་འདུག་ན་སྤྱི་འཐུས་རྒྱུན་ལས་ལ་༼སྤྱི་འཐུས་ལྷན་ཚོགས་༽ཟེར་བའི་ཐ་སྙད་དེ་ག་འདྲ་བྱས་ནས་ཐོབ་ཀྱི་རེད་དེ་ཡང་ཁྲིམས་འགལ་མ་རེད་དམ།༼བཅའ་ཁྲིམས་དོན་ཚན་ཞེ་གཉིས་པ།སྤྱི་འཐུས་ཀྱི་རྒྱུན་ལས།ནང་གསེས་གཉིས་པ།རྒྱུན་ལས་ཀྱི་ལས་དོན་བྱེད་ཕྱོགས་དང་དབང་ཚད་སྤྱི་འཐུས་ལྷན་ཚོགས་ནས་གཏན་འབེབས་བྱས་པའི་ཁྲིམས་ལུགས་སམ་སྒྲིག་གཞི་ལྟར་ལག་ལེན་བསྟར་རྒྱུ།༽སྤྱི་འཐུས་ལྷན་ཚོགས་ནས་གཏན་འབེབས་གནང་བའི་སྤྱི་འཐུས་རྒྱུན་ལས་ཀྱི་སྒྲིག་གཞི་དོན་ཚན་བཅུ་གཉིས་ཅན་དེའི་ནང་སྤྱི་འཐུས་རྒྱུན་ལས་ཀྱི་ཐག་གཅོད་གང་གནང་བ་རྣམས་སྤྱི་འཐུས་ལྷན་ཚོགས་ཀྱི་ཐག་གཅོད་ཡིན་པ་ཚིག་གཅིག་སྒྲིག་གཞི་དོན་ཚན་གང་གི་ནང་དུའང་འཁོད་མི་འདུག་པ་མ་ཟད་བཅའ་ཁྲིམས་ཀྱི་དོན་ཚན་གང་གི་ནང་དུ་ཡང་སྤྱི་འཐུས་རྒྱུན་ལས་ཀྱི་ཐག་གཅོད་གང་གནང་བ་རྣམས་སྤྱི་འཐུས་ལྷན་ཚོགས་ཀྱི་ཐག་གཅོད་ཡིན་པ་ཚིག་གཅིག་འཁོད་མི་འདུག་ན་སྤྱི་འཐུས་རྒྱུན་ལས་དང་སྤྱི་འཐུས་ལྷན་ཚོགས་གཉིས་དོན་གཅིག་མིང་གི་རྣམ་གྲངས་ལ་ངོས་འཛིན་གནང་གི་ཡོད་པ་ཡིན་ནམ།
༼བཅའ་ཁྲིམས་དོན་ཚན་ཞེ་དགུ་པ།སྤྱི་འཐུས་ལྷན་ཚོགས་སུ་སྤྱི་འཐུས་ཀྱི་ཉུང་ཚད།ཟེར་བའི་ནང་གསེས་གཉིས་པའི་ནང་།སྤྱི་འཐུས་ཉུང་མཐའི་གྲངས་ཚད་མ་ལོངས་པར་ཚོགས་འདུ་ཉིན་གྲངས་བདུན་ལྷག་འཕར་འགྱངས་བྱེད་དགོས་བྱུང་ན་ཚོགས་གཙོ་སྦྲེལ་པོས་ཚོགས་འདུ་འཕར་འགྱངས་ཀྱི་ཐག་གཅོད་བྱ་རྒྱུ།༽ཟེར་བའི་དོན་ཚན་འདིའི་གོ་དོན་ནི་སྤྱི་འཐུས་གྲོས་ཚོགས་འཚོགས་ནས་ཉུང་མཐའི་གྲངས་ཚད་ལོངས་མེད་ན་ཚོགས་གཙོ་སྦྲེལ་པོར་ཚོགས་འདུ་ཉིན་གྲངོས་བདུན་ལྷག་འཕར་འགྱངས་བྱ་རྒྱུའི་དབང་ཚད་བཀུར་བའི་དོན་ཚན་ཞིག་ཡིན་པ་ལས་གྲོས་ཚོགས་མ་འཚོགས་སྔོན་དུ་འཕར་འགྱངས་བྱ་རྒྱུའི་དོན་ཚན་ཞིག་མིན་པ་ལོང་བས་བལྟས་ཀྱང་ཁམས་གསུམ་གྱི་དཔེ་ལྟར་དང་འོན་པས་ཉན་ཡང་རྒྱལ་ཁམས་ཀྱི་སྒྲ་ལྟར་མ་རེད་དམ།ཉིན་གྲངས་བདུན་ལྷག་ཟེར་བ་ནས་ཟླ་བ་གཅིག་ལ་ཉིན་གྲངས་སུམ་བཅུ་ཡོད་པ་ནས་ཟླ་བ་གཅིག་གི་ནང་ཚུད་ལ་གོ་དགོས་པ་ལས་ཟླ་གྲངས་དྲུག་ལྷག་འཕར་འགྱངས་བྱ་རྒྱུའི་དོན་ཚན་ཞིག་མིན་པ་དབང་པོ་ནུས་ལྡན་ཚང་མས་ཤེས་ཐུབ་པ་དང་མཐོང་ཐུབ་པ་ཞིག་མ་རེད་དམ།༼སྤྱི་འཐུས་རྒྱུན་ལས་ནས་ཆེས་མཐོའི་ཁྲིམས་ཞིབ་ཁང་ནས་སྤྱི་དམངས་གཏུག་བཤེར་ཁྲིམས་ཡིག་གི་དོན་ཚན་༦༩༼ཏ༽པའི་ནང་ཁྲིམས་ཀྱི་ངོས་བཞེས་ཟེར་བ་གསར་འཇུག་གནང་བ་དེ་བཅའ་ཁྲིམས་དང་འགལ་ལུགས་ཟེར་བའི་ཐད།༼བཅའ་ཁྲིམས་དོན་ཚན་རེ་བདུན་པ།ཆེས་མཐོའི་ཁྲིམས་ཞིབ་ཁང་གི་རྩ་འཛིན་ཁྲིམས་ཡིག་དང་།སྒྲིག་གཞི།བཅའ་ཁྲིམས་འདི་དང་།སྤྱི་འཐུས་ལྷན་ཚོགས་ནས་གཏན་ལ་ཕབ་པའི་ཁྲིམས་ལུགས་གང་རུང་གི་དོན་ཚན་ཁག་གཞིར་བཟུང་ཐོག་ཆེས་མཐོའི་ཁྲིམས་ཞིབ་ཁང་ནས་ཁྲིམས་ཞིབ་ཁང་གི་རྩ་འཛིན་ཁྲིམས་ཡིག་དང་།འགྲོ་ལུགས་སྒྲིགས་གཞི་བཅས་ཁྲིམས་ཞིབ་པ་ཆེ་བ་དང་ཁྲིམས་ཞིབ་པ་གཞན་གཉིས་བཅས་སྤྱི་མོས་ཀྱིས་བཟོ་འགོད་གཏན་འབེབས་ལྟར་རྩ་འཛིན་ལག་ལྟར་བྱ་རྒྱུ།༽ཅེས་གསལ་བ་ནས་ཆེས་མཐོའི་ཁྲིམས་ཞིབ་ཁང་གི་རྩ་འཛིན་ཁྲིམས་ཡིག་དང་འགྲོ་ལུགས་སྒྲིག་གཞི་བཅས་ཆེས་མཐོའི་ཁྲིམས་ཞིབ་ཁང་རང་ནས་བཟོ་ཆོག་པ་དེ་བཅའ་ཁྲིམས་དོན་ཚན་༦༧ནས་ངོ་སྤྲོད་གནང་འདུག་ན་བཅའ་ཁྲིམས་དང་འགལ་ཡོད་མེད་བཅའ་ཁྲིམས་ལ་བལྟ་ཀློག་དང་བརྩི་བཀུར།བློ་གཏད་དང་ཡིད་ཆེས།ཉམས་ལེན་ཞུ་མཁན་གྱིས་ཟུར་གནས་རྒྱ་ཆེ་མི་མང་ཚོའི་གསལ་པོ་མཁྱེན་ཐུབ་པ་དང་ཤེས་ཐུབ་པ་དང་རྟོགས་ཐུབ་པ་དང་གོ་ཐུབ་པ་དང་བསམ་ཐུབ་པ་་ཞིག་མ་རེད་དམ།བཅས་བཙན་བྱོལ་བོད་མིའི་བཅའ་ཁྲིམས་དོན་ཚན་བཅུ་གསུམ་ནང་གསལ་བའི་བོད་ཀྱིས་ཡུལ་མིའི་ལས་འགན་སྒྲུབ་ནས་གང་ཟག་སྒེར་གྱི་བསམ་ཚུལ་གླེང་པ་འདིའི་ཀྱང་མ་འོངས་བོད་ཀྱི་མང་གཙོའི་འཕེལ་རིམ་ནང་དྲང་བདེན་དང་འདྲ་མཉམ།མང་གཙོ།ཁྲིམས་ཀྱི་དབང་བསྒྱུར་འོག་གཞི་རིམ་མི་མང་འཚོ་ཐུབ་པའི་སྨོན་པ་བཟང་པོའི་རྒྱན་སྟེ་རེ་ཞིག་འདིར་འཇུག་བསྡུས་སོ།།
ཀོ་ལི་གྷལ་གཞིས་ཆགས་གཞུང་པ་ཚེ་དབང་བསོད་ནམས་ནས་སྤྱི་ལོ་ ༢༠༢༢/༡༠/༣༠ ཉིན་རང་ཁྱིམ་དུ་ཟིན་བྲིས་སུ་བཏབ།