ཚེ་རིང་བསམ་འགྲུབ།
སྤྱི་འཐུས་ཤར་གླིང་བསྟན་འཛིན་ཟླ་སྒྲོན་གྱིས་སྐབས་བཅོ་ལྔ་བའི་སྤྱི་འཐུས་ནང་བུད་མེད་དགུ་མ་གཏོགས་མེད་པ་དེ་བོད་པའི་སྤྱི་ཚོགས་ཀྱི་ཞབས་འདྲེན་རེད་ཟེར། ཁོང་གི་བཀའ་མོལ་དེར་བསམ་བློ་ཡག་པོ་ཞིག་བཏང་དུས། ཞབས་འདྲེན་ཞུ་མཁན་དེ་གསལ་པོ་ཞིག་གསུངས་མི་འདུག དེར་བརྟེན་ངས་ཚོད་དཔག་བྱས་ནས་ཞབས་འདྲེན་ཞུ་མཁན་དེ་སུ་ཡིན་མིན་ལ་དཔྱད་པ་ཞིག་བྱས་ན། དེ་ནི་བོད་པའི་བུད་མེད་རང་ཉིད་ཡིན་པ་ལས། གཞན་སུ་ལའང་མཛུབ་མོ་བཙུགས་ས་མི་འདུག
རྒྱུ་མཚན་ནི། དང་པོ། སྤྱི་འཐུས་ཀྱི་འོས་མིའི་ཁོངས་སུ་ཕལ་ཆེ་བ་སྐྱེས་པ་ཡིན་པ་ལས། བུད་མེད་ནི་ཉུང་ཤས་ལས་མེད། དེ་བཞིན་དང་བླངས་ཐོག་བཞེངས་མཁན་ཡང་ཕལ་ཆེ་བ་སྐྱེས་པ་ཡིན་པ་ནི་མངོན་སུམ་བསྙོན་མེད་རེད། འོས་མིའི་ཁོངས་སུ་བུད་མེད་དེ་ཙམ་ལས་མེད་ན། སྤྱི་འཐུས་སྐབས་སུ་བུད་མེད་མང་བ་ཞིག་ཇི་ལྟར་བྱས་ནས་ཡོང་ཐུབ།
གཉིས་པ། སྤྱི་འཐུས་སུ་བཞེངས་མཁན་བུད་མེད་ལ་ང་ཚོའི་སྤྱི་ཚོགས་ནང་བསྔགས་བརྗོད་ཀྱི་ཡུལ་དུ་བཀུར་གྱི་ཡོད་པ་ནི་སྤྱི་འཐུས་ཤར་གླིང་ཟླ་སྒྲོན་རང་ཉིད་ཀྱིས་མཁྱེན་ཚོད་རེད། འོན་ཀྱང་བོད་པའི་བུ་མོ་རྣམས་རྒྱུ་མཚན་ཅི་ཞིག་དབང་གིས་སྤྱི་འཐུས་རྐུབ་སྟེགས་ལ་འགྲན་རྩོད་བྱ་རྒྱུའི་ཆོད་སེམས་མེད་པ་ཡིན་ནམ། རང་ཉིད་ལ་ཆོད་སེམས་མེད་པ་དེ་རང་ཉིད་ཀྱི་སྐྱོན་མིན་པར་སྤྱི་ཚོགས་ཀྱི་སྐྱོན་ཡིན་པར་སྒྲོ་བཏགས་ན། སྒྲོ་བཏགས་མཁན་གྱི་བསམ་བློར་སྐྱོན་ཡོད་སྲིད།
གསུམ་པ། བཙན་བྱོལ་བོད་མིའི་གྲོས་ཚོགས་ནང་དུ་ལྷག་བསམ་ཤེས་འཇོན་ཡོད་པའི་ཐོག གདེང་སྤོབས་ཆེན་པོའི་ཐོག་ནས་གཏམ་བཤད་བརྒལ་ལན་ཡག་པོ་བྱེད་ཐུབ་མཁན་ཉུང་དྲགས་པའི་སྐྱོན་ཡོད་པ་ལས། མང་དྲགས་པའི་སྐྱོན་མེད། དེར་བརྟེན་བུད་མེད་ཀྱི་ཆེད་དམིགས་རྐུབ་སྟེགས་ཀྱི་གྲངས་ཚད་མང་དུ་གཏང་དགོས་ན། གསུང་རྩ་བ་ནས་འབྱོན་རྒྱུ་མེད་མཁན་གྱི་ཉིན་བཅུའི་སྤྱི་འཐུས་རྡོ་སྐུ་མ་མང་དུ་མི་འགྲོ་བའི་རེ་བ་ཡོད།
བཞི་པ། ཤར་གླིང་བསྟན་འཛིན་ཟླ་སྒྲོན་རང་ཉིད་ནས་དུས་དང་རྣམ་པ་ཀུན་ཏུ་བུད་མེད་སྤྱི་འཐུས་ཉུང་དྲགས་པའི་སྐོར་ལ་གཏམ་བཤད་མང་པོ་བྱེད་ཀྱི་ཡོད། འོན་ཀྱང་ཤར་གླིང་ཟླ་སྒྲོན་རང་ཉིད་ནས་བོད་པའི་བུད་མེད་སུ་གཅིག་ཀྱང་སྤྱི་འཐུས་འོས་མིར་འཚམས་སྦྱོར་བྱས་པ་ནི་གོ་ཐོས་མ་བྱུང་། ཉུང་དྲགས་པའི་ཚོར་སྣང་ཡོད་ན། ཤེས་འཇོན་ལྷག་བསམ་ཅན་གྱི་བོད་ཀྱི་བུད་མེད་རྣམས་སྤྱི་ཚོགས་ཀྱིས་ངོ་མ་འཕྲོད་པ་རྣམས་འཕྲོད་པར་བྱེད་དགོས་ལ། གལ་ཏེ་ངོ་འཕྲོད་ནས་མི་མང་གིས་འོས་མ་བླུགས་ན། གཞི་ནས་མཛུབ་མོ་གཞན་ལ་ཀེར་ཆོག
སྤྱི་འཐུས་ཤར་གླིང་ཟླ་སྒྲོན་ལགས་གྲགས་ཅན་བུད་མེད་ཅིག་གནང་འདོད་སྔ་ས་ནས་ཡོད་པ་རེད། ཁོང་གིས་གིས་དེ་སྔོན་གླིང་ཆེན་ཨེ་ཤ་ཡའི་ནང་གི་བུད་མེད་གྲགས་ཅན་དེ་ཚོ་བུད་མེད་ཀྱི་ཐོབ་ཐང་རྩོད་ལེན་གནང་ནས་ཐོན་ཡོད་པ་ཤེས་མ་ཐག་བོད་པའི་སྤྱི་ཚོགས་ནང་བུད་མེད་ཀྱི་ཐོབ་ཐང་རྩོད་ཡོད་ཀྱང་། བོད་པའི་སྤྱི་ཚོགས་ནང་བུད་མེད་ཐོག་དམན་པར་ལྟ་བའི་གོམས་གཤིས་ཙམ་ལས་སྡུག་རྩུབ་ཅན་གྱི་སྲིད་བྱུས་དང་བྱེད་སྟངས་དེ་འདྲ་མཐོང་རྒྱུ་མེད་པས་ཁོང་གི་གྲགས་ཅན་མི་སྣའི་ལམ་ལ་ཕེབས་ས་དེ་འགག་པ་རེད། ཁོང་བྱ་ཐབས་མེད་དུས་ད་ཆ་བུད་མེད་ཀྱི་དོན་དུ་བོད་ཀྱི་སྐྱེས་པ་ཚོ་མགོ་སྒུར་དགོས་ཅེས་བཀའ་བཏང་ཡོང་གི་འདུག ། ཁོང་དངོས་གནས་ཆབ་སྲིད་པ་གྲགས་ཅན་ཞིག་ཆགས་ཐུབ་ཀྱི་རེད། དབུས་ཙང་སྤྱི་འཐུས་ཀརྨ་ཡེ་ཤེས་དང་། ཤར་གླིང་ཟླ་སྒྲོན་གཉིས་ལ་གྲོས་ཚོགས་འཐུས་མི་འགའ་ཤས་ནས་ཁྱེད་རང་གཉིས་སྒྲོལ་མ་ཚེ་རིང་དང་། པདྨ་འབྱུང་གནས་ཁོང་ཚོའི་རྗེས་སུ་མ་ཕྱིན་པར་ཕྱི་ཚུལ་ཙམ་གྱི་དབུས་གཙང་སྤྱི་འཐུས་བྱས་ནས་བསྡད་ན་ང་ཚོས་ཁྱེད་རང་གཉིས་ཚོགས་གཙོ་ཚོགས་གཞོན་ལ་འདེམས་རྐྱང་ཡིས་ལབ་པར་བརྟེན་ད་ཆ་ཁོང་གཉིས་དངོས་གནས་རེད་སྙམ་གནས་ག་ཚོད་ཐུབ་ཐུབ་ཀྱིས་ཞབས་ཞུ་སྒྲུབ་ཀྱི་ཡོད་པ་འདྲ།།
ཟླ་སྒྲོན་ལགས། རྩ་བ་དེ་བག་ཆགས་དང་འདུ་ཤེས། གྲུབ་མཐའ་དང་ལམ་ལུགས་སོགས། མི་མངོན་པའི་འཆིང་ཐག་འགའ་ཤས་ལ་ཐུག་ཡོད། བུད་མེད་ཚོས་ཚུལ་ཆོས་དང་བག་འཁུམས་ཀྱི་རྩ་བ་དེ་གཏོར་མ་ཐུབ་བར་དུ་ངོ་མ་ཁག་ཙམ་རེད།
ཤར་གླིང་ཟླ་སྒྲོན་ཟེར་བའི་སྤྱི་འཐུས་མིང་འཛིན་པ་དེར་ཞིབ་པར་བལྟ་ཉན་བྱེད་སྐབས། ཕྱི་གླིང་པའི་བྱེད་སྟངས་ལས་སྟངས་ཚང་མ་བཟང་བར་རྩིས་ནས་རང་ལུགས་ལ་དམན་པར་བརྩི་མཁན་ཞིག་རེད་འདུག དཔེར་ན། མོས་སྐབས་བཅོ་ལྔ་པའི་གྲོས་ཚོགས་ཚོགས་དུས་བཅུ་པའི་ཐོག་ཤེས་ཡོན་སྙན་ཐོའི་ཐོག་བགྲོ་གླེང་གནང་སྐབས་ཡ་རབས་བཟང་སྤྱོད་བྱས་ན་གྱོང་མ་གཏོགས་ཁེ་ཕན་མེད་པ་དང་། མདུན་བསྐྱོད་མི་ཐུབ་པར་རྟག་ཏུ་རྗེས་སུ་ལུས་རྒྱུ་ཡིན་པ། སྲིད་སྐྱོང་དང་སྤྱི་འཐུས་རྐུབ་སྟེགས་ཐོག་སླེབས་པ་རྣམས་ཀྱང་ཡ་རབས་བཟང་སྤྱོད་བྱས་ནས་སླེབས་མེད་པ་སོགས་མདོར་ན། ༸གོང་ས་མཆཽག་དང་ཤེས་ཡོན་སྲིད་བྱུས་ནང་ལ་བཟང་རབས་བཟང་སྤྱོད་བྱེད་དགོས་པའི་ལམ་སྟོན་རྣམས་བེད་མེད་ཡིན་པར་བརྗོད་སོང་། མོས་བརྗོད་པའི་སྐད་ཆ་ལས་ང་ཚོས་ཤེས་ཐུབ་པ་ནི་མོ་ནི་ཡ་རབས་བཟང་སྤྱོད་དང་བྲལ་བའི་མི་ཞིག་ཡིན་པས་སྤྱི་འཐུས་འོས་བླུག་འོས་སམ་བསམ་བློ་ཞིབཔར་མཐོང་།
ཤར་གླིང་ཟླ་སྒྲོན་གྱིས་བོད་ཀྱི་བུད་མེད་ལ་ཞབས་འདྲེན་ཟེར་རྒྱུའི་ཐོབ་ཐང་མེད། xx