གཞུང་པ་ཚེ་དབང་བསོད་ནམས།
ལོ་གསུམ་སྙལ་བའི་ཆང་དེ་ཞིམ་པོ་མེད་ཀྱང་ད་ལོ་ཐུང་རྒྱུ་ཁེལ་སོང་ཟེར་བའི་དཔེ་ལྟར་སྤྱི་འཐུས་སྐབས་བཅུ་བདུན་གྱི་གྲོས་ཚོགས་ཚོགས་དུས་རིམ་པའི་ནང་འགྲོ་མ་ཐུབ་པའི་བཅའ་ཁྲིམས་བསྐྱར་བཅོས་ཀྱི་ཁྲིམས་འཆར་བཅའ་ཁྲིམས་དོན་ཚན་དྲུག་ཅུ་རེ་གསུམ་པའི་ནང་གསེས་གཉིས་པའི། ༼ ག ༽ པར་བསྐྱར་བཅོས་གནང་ནས་གནས་སྐབས་ལོ་བཅུ་གི་དཀའ་ངལ་སེལ་ཐུབ་པ་ཙམ་ལས་མཐར་ཐུག་གིས་དཀའ་ངལ་སེལ་ཐུབ་མི་འདུག བཅའ་ཁྲིམས་དོན་ཚན་དྲུག་ཅུ་རེ་གསུམ་པའི་ནང་གསེས་གཉིས་པའི། ༼ ག ༽ པའི་ནངགསལ་བའི་ཚིག་བརྗོད། ༼ ཁྲིམས་ཁང་ཞིག་ནང་ལོ་ལྔའི་རིང་མུ་མཐུད་ཁྲིམས་དཔོན་གྱི་ལས་འཁུར་བྱས་མྱོང་བ་འམ། ཡང་ན་ཉུང་མཐར་ལོ་བཅུའི་རིང་ཁྲིམས་རྩོད་མཁས་པའི་གྲས་སུ་ཚུད་པ་བཅས་ལ་མ་གཏོགས་འོས་བབ་ཡོད་མ་ཡིན། ཅེས་གསལ་བའི་ཆ་རྐྱེན་དེ་གཉིས་བཙན་བྱོལ་སྤྱི་ཚོགས་ནང་རག་རྒྱུ་མེད་པའི་རི་བོང་གི་ར་ལྟབུ་མ་རེད་དམ། ཁྲིམས་ཁང་ཞིག་ནང་ཟེར་བ་ནས་ང་ཚོར་ཁྲིམས་ཁང་མེད་པ་ཁྲིམས་ཞིབ་ཁང་ཡིན་པ་དང་། རྒྱལ་ཁབ་གཞན་གྱི་ཁྲིམས་ཁང་ནང་ལོ་ལྔ་རིང་མུ་མཐུད་ནས་ཁྲིམས་དཔོན་བྱས་མྱོང་བའི་མི་ཞིག་ང་ཚོའི་ཁྲིམས་ཞིབ་པར་བསྐོ་རྒྱུ་དེ་བཅའ་ཁྲིམས་འདིའི་དོན་ཚན་དྲུག་ཅུ་རེ་གསུམ་པའི་ནང་གསེས་གཉིས་པའི། ༼ ཀ ༽ པ ༼ བོད་ཀྱི་ཡུ་མི་ཡིན་པ་དང་། ༽ ཟེར་བའི་ཆ་རྐྱེན་ཚང་བའི་མི་ཞིག་ང་ཚོར་རག་རྒྱུ་ཧ་ཅང་དཀའ་བ་ནས་གོང་གི། ༼ ཁྲིམས་ཁང་ཞིག་ནང་ལོ་ལྔའི་རིང་མུ་མཐུད་ནས་ཁྲིམས་དཔོན་བྱས་མྱོང་བ་འམ། ཡང་ན་ཉུང་མཐར་ལོ་བཅུའི་རིང་ཁྲིམས་རྩོད་མཁས་པའི་གྲས་སུ་ཚུད་པ་བཅས་ལ་མ་གཏོགས་འོས་བབ་ཡོད་མ་ཡིན། ༽ཟེར་བའི་གོང་གི་ཆ་རྐྱེན་གཉིས་དེ་ཕྱི་འཐེན་གནང་ན་ཆེས་མཐོའི་ཁྲིམས་ཞིབ་པ་ཚོའི་འོས་མིའི་ཐད་ང་ཚོར་དཀའ་ངལ་གང་ཡང་འཕྲད་ཀྱི་མ་རེད་ལ་ད་ལྟའི་བཅའ་ཁྲིམས་བསྐྱར་བཅོས་ལོ་ཉི་ཤུ་ནས་སུམ་ཅུ་བཟོ་རྒྱུ་དང་། ལོ་སུམ་ཅུ་ནས་བཞི་ཅུ་བཟོ་རྒྱུ་དེ་ཚོ་འུ་ཐུག་ནས་ཐབས་ལམ་གཞན་མ་རྙེད་པར་སྤྱི་འཐུས་ཚོའི་སོ་སོའི་མདུན་དུ་ལྷག་པའི་དཀའ་ངལ་གཅིག་པོ་སེལ་རྒྱུའི་དགོངས་པ་ཙམ་ལས་ཕུགས་འགྱངས་རིང་པོའི་སྤྱི་ཚོགས་དང་སྒྲིག་འཛུགས་ལ་འགན་འཁུར་བའི་ཁྲིམས་བཟོའི་ལས་དོན་ཡང་དག་པ་ཞིག་ཡིན་པར་དུས་ནམ་ཡང་ངོས་འཛིན་ཞུ་ཐུབ་མ་སོང་། གོང་གི་ཆ་རྐྱེན་གཉིས་དེ་ཕྱི་འཐེན་གནང་ན་ཆེས་མཐོའི་ཁྲིམས་ཞིབ་པ་ཆེ་བ་དང་ཁྲིམས་ཞིབ་པ་གཞན་གཉིས་བཅས་ལ་མི་འགྲོ་བཙན་བྱོལ་སྤྱི་ཚོགས་ནང་འབོལ་འབོལ་ལྷུག་ལྷུག་ག་ནས་འདམས་འདམས་ཡོང་རྒྱུ་བཅས་གང་ཟག་ལ་མ་ལྟོས་པར་སྤྱི་ཚོགས་ཀྱི་སྒྲིགས་འཛུགས་ལ་གཟིགས་ནས་ཁྲིམས་སྒྲིག་བཟོ་དགོས་པ་དེ་ཁྲིམས་བཟོའི་འགན་དབང་ཆེ་ཤོས་དེ་ཡིན་པའི་ངོས་འཛིན་ཡང་ཞུ་གི་ཡོད། ༼ གཉིས་པ་ཇོ་ནང་ཆོས་རྒྱུད་ལ་ཆོས་ལུགས་སྤྱི་མཚུངས་ཀྱི་སྤྱི་འཐུས་ཀྱི་ས་མིག་སྐོར་ལོ་མང་སྔོན་ནས་བཙན་བྱོལ་སྤྱི་ཚོགས་ནང་དང་སྤྱི་འཐུས་གྲོས་ཚོགས་སྐབས་བཅུ་བཞི་ཙམ་ནས་གྲོས་ཚོགས་ལ་ཇོ་ནང་ཆོས་རྒྱུད་ནས་ཞུ་སྙན་རིམ་པར་ཕུལ་བའི་གནས་ཚུལ་དང་། སྤྱི་འཐུས་གྲོས་ཚོགས་མདུན་ཞི་བའི་ལས་འགུལ་སྤེལ་བའི་ལོ་རྒྱུས་སོགས་མང་པོ་བྱུང་བ་མ་ཟད་ད་ལམ་འཛིན་སྐྱོང་ནས་ཇོ་ནང་ཆོས་རྒྱུད་ལ་ཆོས་ལུགས་སྤྱི་མཚུངས་ཀྱི་ས་མིག་སྐོར་ཁྲིམས་སྒྲིག་བསྐྱར་བཅོས་གྲོས་ཚོགས་ནང་ཕུལ་བར་གྲོས་ཚོགས་ནས་རྒྱུ་ཚན་ཡང་དག་གི་འབྲེལ་བཤད་གསལ་ཁ་དོད་པ་འདི་ཡིན་མེད་པར་གསང་བའི་འོས་བསྡུའི་ལམ་ནས་ཁྲིམས་སྒྲིག་བསྐྱར་བཅོས་དེ་འགྲོ་མ་ཐུབ་པ་ནི་ཇོ་ནང་ཆོས་ལུགས་དེ་བོད་ཀྱི་ཆོས་རྒྱུད་ཆེན་པོ་བཞི་དང་གཡུ་དྲུང་བོན་དང་བཅས་པར་འབྲེལ་བ་མེད་པར་ཇོ་ནང་ཆོས་རྒྱུད་དེ་བོད་ཀྱི་ཆོས་རྒྱུད་ཞིག་ཡིན་པ་ཆོས་རིག་ལྷན་ཁང་ནས་ངོས་བཞེས་གནང་གི་ཡོད་ན་བཅའ་ཁྲིམས་དོན་ཚན་གསུམ་པའི་ནང་གསལ་བའི་ཆོས་ལུགས་རིས་མེད་ཟེར་བའི་ཐ་སྙད་དེའི་འོག་ཏུ་གྲོས་ཚོགས་ཀྱི་འཐུས་མི་ཚོའི་འགན་འཁུར་ནས་ཇོ་ནང་ཆོས་རྒྱུད་ལ་བོད་ཀྱི་ཆོས་ལུགས་སྤྱི་མཚུངས་ཀྱི་ས་མིག་ཕུལ་དགོས་པ་ནི་མང་གཙོ་དང་། འདྲ་མཉམ། དྲང་བདེན། ཁྲིམས་ཀྱི་དབང་བསྒྱུར་ཟེར་བའི་ཐ་སྙད་ལ་ང་ཚོའི་འགན་འཁུར་དགོས་པ་མ་རེད་དམ།