རས་པ།
༡
གངས་ཀྱི་རི་ལ་ཞབས་རྗེས་གནང་ཡོད།།
ཞབས་རྗེས་ཞི་བདེའི་འགྲུལ་བཞུད་དཀར་པོ།།
གངས་དཀར་ཉི་ཟླའི་འོད་ཟེར་གྱིས་བཏེགས།།
ཐུགས་ཀྱི་ཞུན་མ་འགྲོ་བར་གནང་བ།།
ཐུགས་བཞེད་མཚན་ལ་ཀུན་ཁྱབ་སེམས་འཁུར།།
བཀའ་བསྟན་བསྲུབས་པའི་གསེར་གྱི་དབྱུག་པ།།
རྒྱ་མཚོའི་དཀྱིལ་སྙིང་དེ་དང་འདྲ་བ།།
༢
རིགས་ལམ་གསེར་སྐུད་གྲིམ་ལྷོད་རན་པ།།
གསུང་དབྱངས་ཆུ་བོའི་སྙན་ཆ་མཛེས་པ།།
ལེགས་བཤད་བདུད་རྩའི་དངོས་གྲུབ་འདི་ཀོ།
སྨན་ཤར་བུ་མོའི་འཛུམ་མདངས་བསུ་བ།།
སྟག་ཤར་གཞོན་ནུའི་བློ་སྟོབས་སྲུང་བ།།
བཞད་འཛུམ་འདི་ཀོ་བསིལ་རླུང་ཁམས་གཙང་།།
སྐྱེ་ཡག་གཞོན་གསར་དགའ་སྤྲོ་སྤེལ་བ།།
༣
འགྱུར་མེད་སྐུ་ལུས་གངས་དཀར་རི་བོ།།
དྭངས་གཙང་ཁ་བའི་རྡུལ་མང་བརྩེགས་པ།།
ཞི་བདེ་སྣང་བའི་མཚན་མ་འདི་ཀོ།
སྤང་ཁའི་དཀྱིལ་གྱི་གངས་ལྷ་མེ་ཏོག།
ངོམས་མེད་མཇལ་འདོད་གུས་པོ་རས་པ།།
སྤང་ཐང་ཆེན་པོའི་མཐའ་ནས་འགྲེང་འདྲ།།
རབ་མེད་རྒྱ་མཚོའི་ཕ་རོལ་ཕྱིན་འདྲ།།
༢༠༡༢།༤།༩ ཉིན།