སྤྲུལ་རྫུན་གྱི་གཤིས་ཀ་མེ་ལོང་ཕུང་པོ།

ཨེ་མ་ཧོ།
 
ཀྱེ་མ་ཧོ།།
ཁ་ནས་ཆོས་བཤད་ཟེར་ཀྱང་སྒེར་དོན་ལ་རེ་ནས།།
ལུས་ལ་ཆོས་གོས་གྱོན་རུང་ཆགས་སྡང་ལ་རྨོངས་ཞིང་།།
གདན་ལ་གསེར་ཁྲི་བཟང་ཡང་ཕྲག་དྭོགས་ཀྱིས་བཟི་བའི།།
ང་རྒྱལ་འགོང་བོའི་ཆོ་འཕྲུལ་སྤྲུལ་རྫུན་ལ་གཟབ་དགོས།།
ཉམ་ཆུང་བྱིས་པའི་མགོ་ལ་རྡོག་བརྫིས་ལ་འབད་ཅིང་།།
ཁ་ནས་རིས་མེད་ཟེར་ཅིང་རིས་ཅན་ལ་རྔམས་ཞིང་།།
ཁོག་ན་དགེ་སེམས་མེད་པའི་ངན་སེམས་ལ་གོམས་པའི།།
ངན་འཁྱམ་སྤྲུལ་རྫུན་རིགས་ལ་བག་ཡོད་ཅིག་མཛོད་རེན།།
འཛམ་གླིང་ཞི་བདེ་དགོས་ཞེས་མ་ཎི་བཞིན་བསྒྲངས་ཀྱང་།།
ནང་ཁུལ་ཁྲག་བཞིན་དཀྲུག་པའི་ཏེ་བོ་དག་མཐོང་ཚེ།།
ཁ་བཤད་ལག་ལེན་དབེན་པའི་གཡོ་ཁྲམ་གྱི་མི་ལ།།
ཆོས་ལོངས་སྤྲུལ་གསུམ་བཏགས་ཀྱང་གཡོ་རྫུན་དུ་ཤེས་དགོས།།
རྡོ་རྗེ་འཆང་ཆེན་གསུམ་པའི་ངོས་འཛིན་དང་རྟགས་ཡིག།
སི་ཏུས་རྒྱ་བོད་བསླུས་པའི་ལུང་རྫུན་གྱི་ཀརྨ།།
ཀཿརྫོགས་སྤྲུལ་བཟོ་བརྗེ་ལེན་སྒེར་སྤྱོད་དག་དཔྱོད་ན།།
འཇིག་རྟེན་མི་ཡུལ་སྤྲུལ་བསྟན་ཉམས་པ་འདི་སྐྱོ་བ།།
མི་གསོད་ལག་དམར་དགོན་བདག་དཔོན་པོ་རུ་བཀུར་ཅིང་།།
ལུགས་གཉིས་ཁྲེལ་མེད་ཆོས་ལོངས་སྤྲུལ་གསུམ་དུ་བཟོས་ན།།
རྒྱལ་བསྟན་ནང་ནས་བཤིག་པའི་སྟྭ་གྲི་རང་ཡིན་ཕྱིར།།
དྲན་ཤེས་བག་ཡོད་ངང་ནས་རྒྱང་རིང་ལ་དོར་དགོས།།
བཤད་པ་ལུང་གི་བསྟན་པ་སྣང་མེད་དུ་གཡུགས་ནས།།
སྒྲུབ་པ་རྟོགས་པའི་བསྟན་པ་ཏིལ་འབྲུ་ཙམ་དབེན་ཀྱང་།།
རྒྱུ་ནོར་དཔུང་གིས་དགོན་སྡེའི་དབང་ཆ་ལ་སྤྱོད་པའི།།
ཆོས་མེད་འཇིག་རྟེན་ལས་ཀི་གཡོ་འཕྲུལ་དེ་སྐྱུར་ཤོགས།།
རྒྱལ་བསྟན་བཤད་སྒྲུབ་སྙིང་པོ་སྲོག་རྩ་ལ་བཟུང་ནས།།
དྲང་བདེན་རིགས་ཀྱི་བུ་ལ་བླ་མ་བཞིན་བཀུར་སྟེ།།
ལས་འབྲས་བསླུ་མེད་གནས་ལ་བདེན་དཔུང་དུ་མཛོད་དང་།།
འདི་ཕྱིའི་ཕན་བདེ་མཛད་པའི་ཕྱག་ལས་རེ་རེམ་རེམས།།
ཅེས་པ་འདི་ཡང་རབ་གནས་མེ་བྱའི་ལྷ་བབས་ཟླ་བའི་དཀར་ཕྱོགས་སྟོང་བ་གཉིས་པར་སུན་སྣང་ཞིག་དང་ལས་ཧྲི་ཤོང་ངོར་ཤྲཱིས་སོ།།