ཤར་ཕྱོགས་པ།
སྐྱ་མིན་སེར་མིན་རིགས་ང་དང་ང་འདྲ་ཚོས།།
རང་གི་སྡིག་མགོ་ཙམ་ཐོན་ན་ཆོག་པ་ལས།།
ཆོས་ལུགས་ཆོས་བརྒྱུུད་ཀྱི་ཚོགས་འདུ་མི་འཛའ་བ།།
ཡ་གའི་སྟོན་པ་ཡིས་མཐོང་ན་བཞད་གད་རེད།།
ཉེ་རིང་ཆགས་སྡང་དང་བྲལ་ནས་གནས་པ་ལ།།
རྟོགས་པ་རང་རྒྱུད་ལ་སྦྱར་ནས་ཡོང་དགོས་ཀྱང།།
ཚིག་སྐམ་འདྲ་ཆགས་རེ་ཤར་ཤར་གཡུག་པ་དེས།།
བཏང་སྙོམས་གནས་པ་ལ་བདེན་དཔང་མི་བྱེད་དོ།།
ཆོས་བརྒྱུད་རིས་མེད་ཀྱི་སྦྱར་བྱང་བཀལ་ཙམ་དང།།
ཆོས་གྲོགས་ཕན་ཚུན་ལ་མཐུན་སྒྲིལ་དགོས་རབ་ཙམ།།
འཇམ་པོ་ངག་སྒོ་ནས་སྨྲ་རྒྱུ་འཁྱོངས་ནའང།།
བཞེད་མཚམས་རང་སྟེང་གི་རྣམ་དཔྱོད་མ་རྫོགས་དུས།།
རིས་མེད་རིས་མེད་འདི་ཚིག་སྐམ་ཡིན་ནོ་ལོ།།
བཞུགས་ས་དབེན་དགོན་ལ་མ་འཁྲེང་འདུ་འཛིས་གཡེངས།།
འདུལ་བའི་བཅོས་ཁྲིམས་ལ་མ་སྐྲག་ཁྱིམ་སུན་འབྱིན།།
སྐྲ་སེར་མིག་ལྗང་ཚོར་རྫུན་འཁོར་བསྐོར་བ་ལས།།
དཀོར་གཤགས་སྡིག་སྦྱངས་ལ་འབད་ལ་ཕྱི་མ་བདེ།།
མི་རྟག་འཕྱོན་མ་ཡི་འོབས་སུ་ཚུད་བཞིན་དུ།།
ཕྱི་མའི་སྒོ་ཆེན་ལ་གོམ་པ་འཇོག་བཞིན་དུ།།
སྣང་བ་ཟ་ཟི་ཡི་ཀློང་ན་འཁྱམས་བསྡད་པའི།།
ང་འདྲའི་ཆོས་གཟུགས་ཚོ་བསམས་ན་སྙིང་རྩ་འགུལ།།
དམར་སེར་ཁ་དོག་ཙམ་ལུས་ཀྱིས་མ་ནོན་པར།།
སྤྲུལ་སྐུའི་མཚན་གནས་འདི་གང་སར་འཁྱེར་འཁྱེར་པ།།
ལག་གཉིས་ཐལ་སྦྱར་གྱི་རྣམ་འགྱུར་ཡ་མ་བརླ།།
མཐོང་ན་སྙིང་དབུས་སུ་ཙག་ཤད་ལྡིང་གི་འདུག།
བཅོམ་ལྡན་ཐུབ་པ་ལ་ངོ་ཚ་སྐྱེས་ཀི་འདུག།
ཁོ་བོའི་དོན་མཐུན་གྱི་ཚིགས་སུ་བཅད་པ་འདིར།།
མཚོན་ཆ་རྩུབ་མོ་ལ་མེ་ཏོག་ལན་བྱིན་ལྟར།།
ཉེ་རིང་ཆགས་སྡང་གི་གཉེན་པོ་བསྒོམ་དགོས་ན།།
རང་རྒྱུད་མ་དུལ་བའི་རང་རྟགས་མངོན་འདུག་གོ །
དེང་སང་བོད་ཀྱི་སྤྱི་ཚོགས་ནང་ལ་མི་ཁ་ཤས་ཀྱིས་རང་མཐོང་དང་རང་རྩིས་ཆེན་པོ་བཟུང་ནས། ཉིན་མཚན་ཀུན་ཏུ་མི་གཞན་པར་དམའ་འབེབས་དང་སྐུར་འདེབས་བྱེད་སྟངས་ཁོ་ནར་བསམ་བློ་གཏོང་མཁན་ཞིག་དང་། ཡང་མི་གཞན་པ་འཇོན་ཐང་ཅན་མཐོང་ཚེ་ཕྲག་དོག་གི་ཟུག་ངུ་མ་བཟོད་པར་ངན་སྨྲས་བྱེད་མཁན་གཉིས་འདུག །ང་ཚོ་བོད་ཀྱི་སྤྱི་ཚོགས་འདི་རྙོག་དྲྭས་ཁེངས་པའི་འཇིག་རྟེན་ཡིད་སྐྱོ་འོས་པ་ཞིག་ཏུ་མཐོང་།