དགེ་འདུན་རབ་གསལ་གྱིས།
བོད་དུ་འདི་ལོའི་གྱེན་ལོག་ཆེན་མོ་བྱུང་བ་ནས་བརྩིས་ན་ཧ་ལམ་ཟླ་བ་གཉིས་ལྷག་ཕྱིན་ཡོད། དུས་ཚོད་འདིའི་ནང་བོད་མི་ཁྲི་ཕྲག་ནས་འབུམ་ཕྲག་སྐོར་གྱེན་ལོག་ནང་ཞུགས་ཏེ་དགོས་འདུན་དོན་ཚན་གསུམ་བཏོན་པ་རེད། དོན་ཚན་དེ་གསུམ་ནི། ༧རྒྱལ་བ་རིན་པོ་ཆེ་བོད་ལ་གདན་འདྲེན་ཞུ་དགོས་པ་དང་། བོད་རང་བཙན་ཡིན་པ། པཎ་ཆེན་རིན་པོ་ཆེ་གློད་བཀྲོལ་གཏོང་དགོས་པ་བཅས་རེད། ང་ཚོ་ཕྱི་ལོགས་ན་སྡོད་མཁན་ཚོས་བོད་མིའི་ངོ་རྒོལ་དང་རེ་འདུན་འདི་ཚོ་གསལ་ལེར་མཐོང་ཐུབ་ཡོད།
གྱེན་ལོག་བྱུང་རྗེས་ཀྱི་གནས་ཚུལ་རྣམས་གང་འདྲ་རེད། ང་ཚོ་གྲོགས་པོ་ནང་ཁུལ་དུ་སྐད་ཆ་བཤད་སྐབས་སུ་ཤེས་པའི་གནས་ཚུལ་ལྟར་ན། ད་ཆ་བོད་ཀྱི་གྲོང་ཁྱེར་ནས་གྲོང་གསེབ་བར་དུ་རྒྱ་གཞུང་གི་ལས་དོན་རུ་ཁག་བཏང་ནས་ཚ་ཚ་འུར་འུར་བྱེད་གིན་ཡོད། གྲོགས་པོ་མང་པོ་ལ་གཞིས་ལུས་ཀྱི་སྤུན་ཉེ་ཚོས། “ད་ལྟ་གནས་ཚུལ་ཛ་དྲག་འདུག གནས་སྐབས་རིང་ཁ་པར་མ་གཏོང་།” ཅེས་བཤད་ཡོད། ཡང་ལག་འཁྱེར་ཁ་པར་ཡོད་མཁན་ཚོར་འབྲེལ་བ་བྱས་སྐབས། “ཁ་པར་འདི་སྒོ་བརྒྱབ་འདུག རྗེས་ནས་འབྲེལ་བ་བྱེད་རོགས།”ཞེས་པའི་ལན་འདི་རྒྱ་སྐད་དང་དབྱིན་སྐད་གཉིས་ཀྱི་ཐོག་ནས་ཐོས་པར་འགྱུར་བ་མ་གཏོགས། ཁ་པར་ཐོག་སྐད་ཆ་བཤད་མི་ཐུབ། སྐབས་རེ་ལན་རེར་ང་ཚོ་ལ་གནས་ཚུལ་ཟུར་ཙམ་རེ་འབྱོར་སྐབས་༼འདི་ཨ་མདོ་ནས་ཡིན།༽འདི་ལྟར། “ད་ཆ་བོད་མི་ཚོས་ ང་བརྒྱད་ལོ་སླར་ཡང་སླེབས་སོང་ཟེར་གིན་འདུག་”ཅེས་པ་ལྟ་བུ་ཡིན། དེ་ལྟར་ང་ཚོས་འདས་པའི་ལོ་ངོ་བཅུ་ཙམ་རིང་ལོངས་སྤྱད་པའི་ཁ་པར་གྱི་འབྲེལ་ལམ་དེ་ད་ཆ་ཧ་ལམ་ཆད་པར་གྱུར།
རྒྱ་གར་ན་ཡོད་པའི་ངེད་ཀྱི་གྲོགས་པོ་ཅིག་གིས་ང་ལ་ཁ་པར་བཏང་ནས། “ད་ཆ་བོད་ནང་དུ་བོད་མི་འཛིན་བཟུང་བྱས་པ་དེ་ཚོར་ལག་ལྕགས་རྒྱག་རྒྱུའི་ཚབ་ཏུ་ལྕགས་སྐུད་ཀྱིས་ལག་པ་གཉིས་རྒྱབ་ཏུ་བཀྱིགས་ཤིང་། དེ་ནས་སྐམ་པས་ལྕགས་སྐུད་དམ་པོར་གཅུས། རྐང་ལག་དེ་ལྟར་བསྡམས་རྗེས། མགོ་ས་ལ་བརླན་ནས་དེའི་སྟེང་དུ་ལས་བྱེད་པས་རྐང་བརྫིས་གཏོང་གིན་འདུག” ཅེས་གསུངས་བྱུང་། འདི་འདྲའི་མནར་གཅོད་ཀྱི་ལག་ལེན་ནི་གང་སར་ཁྱབ་ཡོད་པ་ནི་ཚོད་དཔག་ཐུབ་པ་ཡིན།
འཛམ་གླིང་གི་ཐད་ནས་བཤད་ན། གྱེན་ལོག་བྱུང་རྗེས་ནས་ད་བར་དུ་ཕྱི་རྒྱལ་གྱི་གསར་འགོད་པ་ཐེངས་གཉིས་གསུམ་ཞིག་ལས་འགྲོ་ཐུབ་མེད་ལ། ཕྱིན་པ་དེ་ཚོ་ཡང་ས་ཁུལ་རེ་ཟུང་ཞིག་ལས་སླེབས་མེད། ཨེ་ཤ་ཡ་རང་དབང་རླུང་འཕྲིན་ཁང་ལྟ་བུ་གསར་འགྱུར་སྡེ་ཚན་གྱིས་ཁྱད་དུ་ཐོན་པའི་གསར་འགྱུར་སྤེལ་ཐུབ་པ་བྱུང་ན་ཡང་། དེ་ཚོ་གྲོང་གསེབ་ནས་གྲོང་གསེབ་བར་དུ་ཁྱབ་པའི་ད་ལྟའི་གནས་ཚུལ་རྣམས་ལ་ཁྱབ་ཚད་ཆུང་བར་མངོན། འདི་ལྟར་བསམ་བློ་བཏང་སྐབས་ད་ཆ་ང་ཚོའི་ཕ་ཡུལ་བོད་ནི། སྦས་ཡུལ་བོད་ཅིག་སྟེ། འཛམ་གླིང་ཕྱི་ལོགས་ཀྱིས་ཅི་བྱུང་གི་གནས་ཚུལ་ཤེས་ཀྱི་མེད་ལ། ཧ་ལམ་རྒྱ་ནག་གཞུང་གིས་གདུག་རྩུབ་མནར་གཅོད་གང་བཏང་ཡང་རང་འདོད་ལྟར་བྱེད་ཆོག་པའི་ཁོར་ཡུག་ཅིག་ཏུ་གྱུར་ཡོད།
བཙན་བྱོལ་བོད་མིས་ཅི་ཞིག་བྱེད་ཐུབ་བམ། ང་ཚོས་གདུང་སེམས་མཉམ་བསྐྱེད་བྱས་ཡོད། ང་ཚོས་ཤི་གསོན་གཉིས་ཀ་ལ་སྨོན་ལམ་བརྒྱབ་ཡོད། དེ་ལས་བརྒལ་ཏེ་ད་ལྟའི་མནར་གཅོད་འོག་གི་བོད་མི་ཚོའི་དཀའ་སྡུག་ཇེ་ཡངས་སུ་གཏོང་བ་དང་། གཞིས་ལུས་བོད་མི་ཚོའི་རེ་འདུན་རྣམས་འགྲུབ་ཐབས་བྱེད་པ་ལ་ནུས་པ་ཐོན་མེད་ལ། སྐུ་ཚབ་ཚོ་རྒྱ་ནག་ལ་ཕེབས་ནས་དེ་འདྲའི་གནས་སྟངས་ལ་ནུས་པའི་ཐོན་པའི་སྐད་ཆ་ཡང་མི་འདུག འདི་ལྟར་བསམ་བློ་བཏང་སྐབས། ང་ཚོ་བྱེས་སྡོད་བོད་མི་ཚོའི་གནས་སྟངས་ནི་ངོ་མ་ཅི་བྱ་གཏོལ་བྲལ་གྱི་གནས་སྟངས་ཤིག་ཆགས་འདུག