—–ས་འཛིན་དཀར་པོ།
གངས་ཅན་བོད་མིའི་རེ་སྒུག་བདེ་སྐྱིད་ཀྱི་ཉི་མ།།
མདང་གི་རྨི་ལམ་བཞིན་དུ་ནུབ་ལ་ནི་ཁད་རན།།
གཞིས་ཀྱིས་བྱེས་ལ་རྟོན་པའི་མ་འོངས་ཀྱི་རེ་བ།།
ཁ་སང་ཆར་གྱིས་བཅོམ་པའི་མེ་ཏོག་དེར་འདྲ་ལ།།
དད་པ་ལོག་སྤྱོད་ཀུན་གྱི་རུལ་སུངས་ཀྱི་དྲི་མས།།
བླ་མས་བོད་ལ་སྟོན་པའི་དབུ་ལམ་དེ་འཛད་ཐལ།།
གཞིས་བྱེས་རེ་སྒུག་བཅོམ་པའི་མི་ངན་ནི་དེ་ཚོ།།
ན་ནིང་རྒྱ་ཡིས་སྟོན་པའི་སྲིད་བྱུས་དང་འདྲ་ལ།།
བླ་མའི་རྐང་འོག་ཉུལ་བའི་སྲིན་འབུ་ནི་དེ་ཚོས།།
རང་དབང་བོད་ཀྱི་བླ་སྲོག་མུ་མེད་དེ་ཟོས་སོང་།།
ད་ལོ་གཞོན་ནུ་ནུབ་པའི་བྱུས་ངན་དེ་ཚེས་དུས།།
ལྔ་དགུ་སླར་གསོ་བྱས་པའི་སྣང་བ་ཞིག་འདྲ་ལ།།
ཞྭ་ལ་བླ་མའི་མཚན་བྱང་རིས་མོ་དེ་མཛེས་ཀྱང་།།
སེམས་ན་མ་ཧཱ་ཙི་ནའི་རིང་ལུགས་དེ་མི་མཛའ།།
ཕྱི་ནང་མི་གཅིག་རིས་མོའི་ལྟ་བ་དེ་མཐོང་དུས།།
ཁ་སང་གྲོང་ལ་འགྲོ་བའི་གསང་ཉུལ་དེ་འདྲ་ལ།།
ངག་ནས་བླ་མའི་བཀའ་ལ་དུང་པ་དེ་ཤོད་ཀྱང་།།
ལག་གིས་ནང་དམེ་སྦྱོར་བའི་རལ་གྲི་དེ་སྟོན་དུས།།
ལུས་ངག་མི་གཅིག་སྣང་བའི་བྱ་སྤྱོད་ཀྱི་རིག་པས།།
ཁ་སང་དམར་གཞུང་ཚང་གིས་སྒོ་སྲུང་དེ་འདྲ་ལ།།
རུས་པ་བོད་རིཊ་ཡིན་པའི་སྙན་ངག་དེ་སྐྱོར་ཀྱང་།།
བོད་ལ་སྨན་པའི་དུང་སེམས་བློ་དཀར་དེ་བྲལ་ལ།།
རུས་པ་རྒྱལ་འགལ་ཤོར་བའི་ཉི་མ་ཞིག་ཡིན་དུས།།
རྣམ་ཀུན་སྒོར་ཟས་ཉུལ་བའི་རི་སྤྱང་དང་འདྲ་ལ།།
རང་ཉིད་སྙན་འདོད་གྲགས་པས་ཕུ་ནུ་དེ་སྡང་ལ།།
རང་རིགས་དུང་ཞེན་མེད་པས་བླ་མ་དེ་བཙོང་ལ།།
རང་གིས་སྒོར་མོ་ཆེད་དུ་རྒྱལ་ཁབ་ཀྱང་དོར་བས།།
རང་ལ་རུས་པ་མེད་དུས་དབུ་ལམ་དེ་འཛད་སོང་།།
ཡབ་མེས་བཙན་པོ་ཚང་གི་སྙིང་སྟོབས་རེ་ཡོད་ན།།
རུས་གཅིག་བོད་ལ་སྨན་པའི་གུ་ཡངས་དེ་བྱོས་དཱ།།
གཞིས་ལུས་བོད་མིས་རེ་བའི་མིག་ཆུ་དེ་མ་བརྗེད།།
བོད་ལ་རང་དབང་ཞི་བདེ་ཉི་མ་ཞིག་བསྐྲུན་རན།།
01-01-2016
སྙན་ངག་པ་ས་འཛིན་དཀར་པོའི་གནད་འཁེལ་བའི་སྙན་རྩོམ་འདིས་ད་ལྟའི་ང་ཚོའི་བཙན་བྱོལ་སྤྱི་ཚོགས་ཁྲོད་ཀྱི་སྐྱུག་བྲོ་བའི་ཞན་ཆ་ཁག་ཅིག་གསལ་སྟོན་གནང་འདུག བཀའ་དྲིན་ཆེ། དབུ་རང་གཉིས་ཀྱི་དགོས་མེད་ཀྱི་རྙོག་རྩོད་ཀྱིས། ང་ནི་སྦད་དེ་མགོ་ན་ནས་བསྡད་ཡོད།