ཙཱ་རྐང་དྲུག
སྦྲ་ནག་ལགས།
ཁ་སང་མཁའ་ན་རྒྱུ་བའི་སྤྲིན་དཀར་ཞིག་ལ་ཁྱེད་ཀྱི་བདེ་སྡུག་དྲིས་པའི་ལན་དུ།
རྩྭ་ཐང་དོག་དྲགས་པས་འདོ་རིགས་རྟ་བོའི་བང་རྩལ་ངོམ་ས་མི་འདུག་པར་སྐད།
རྩྭ་ས་སྐམ་ལ་ཉེ་བས་གཡང་དཀར་ལུ་གུའི་མཆོང་ལྡིང་གི་རྩེད་འཇོ་ཡང་མཚམས་བཞག་སོང་བར་སྐད།
རྩྭ་ཐང་འགྱུར་སོང་བས་སྦྲ་ནག་གི་ཆོན་ཐག་བརྐྱངས་ས་ཡང་དབེན་སོང་བར་སྐད།
རྒྱུ་མཚན་དེའི་ཕྱིར་ན་སྦྲ་ནག་ལགས།
ཁྱེད་ཉིད་འཇིག་རྟེན་གཞན་ཞིག་ལ་ལམ་ཏུ་ཆས་བཞིན་པར་སྐད།
སྦྲ་ནག་ལགས།
དེ་རིང་ཕྱོགས་འགྲོའི་རླུང་བུ་ཞིག་ལ་སེམས་འཕྲིན་ཞིག་བསྐུར་ཡོད།
ངའི་ཤ་གསེང་རུས་གསེང་ན་ཡལ་མེད་པའི་སྦྲ་ནག་ལགས།
དུས་མཚམས་ཤིག་ནས་ཁྱེད་ཉིད་ཁེར་རྐྱང་དུ་ལུས་སོང་བས་ངས་དགོངས་དག་ཞུ།
ཁྱེད་ནི་ས་མཐའི་བུ་ཆུང་ངའི་སེམས་ཀྱི་དྲོད་ཐིགས་ཡིན་ལ་སྙིང་གི་དཔའ་རྩལ་ཡང་ཡིན།
ཁྱེད་ནི་ལོ་རྒྱུས་ཀྱི་རྡོ་རིང་གསོན་པོ་དེ་ཡིན་ལ་མི་རིགས་ཤིག་གི་ཁྱིམ་གཞི་དངོས་མ་དེའང་ཡིན།
དེའི་དབང་གིས་སྦྲ་ནག་ལགས་ད་དུང་ཅུང་ཙམ་སྒུག་དང་།
ཁྱེད་ཀྱི་ཐུ་འོག་ནས་བོར་ཟིན་པའི་ས་མཐའི་ཡུལ་གྱར་བ་ང་ཚོས།
ཡུལ་མི་ཚོའི་རེ་སྒུག་གི་སེམས་པ་དྲག་ཏུ་གཡོ་བའི་རམ་འདེགས་ལ་བརྟེན་ནས།
ཨ་ཕའི་མངའ་ཐང་གི་གསེར་ཁྲི་མཐོན་པོ་དེ་གཉའ་བར་འཁུར་བཞིན།
གཙང་བོའི་རླབས་སྒྲ་དང་བསྟུན་ནས་རྒྱལ་ཁའི་གླུ་དབྱངས་ལེན་ཞོར།
ཞི་བདེའི་དར་ཆ་མཁའ་རུ་ཕྱར་ཏེ་ཡོང་བར་ངེས།
ངའི་ཕ་གཞིས་ཀྱི་ངོ་བོ་མཚོན་པའི་སྦྲ་ནག་ལགས།
རྩྭ་ཐང་དུ་ཁྱེད་ཉིད་མེད་དུ་མི་རུང་བས།
ད་དུང་ཅུང་ཙམ་སྒུག་རོགས།
ཁྱེད་མེད་ན་སྤང་རྒྱན་མེ་ཏོག་གི་འཛུམ་མདངས་སུ་ལ་ངོམ།
ཁྱེད་མེད་ན་ཐུལ་དཀར་འབྲི་མོའི་ཚེ་སྲོག་ཇི་ལྟར་འཚོ།
ཁྱེད་མེད་ན་གངས་རིའི་གཟི་བརྗིད་ཀྱི་མིང་བྱང་དེ་གང་ལ་འདོགས།
སྦྲ་ནག་ལགས་ད་དུང་ཅུང་ཙམ་སྒུག་རོགས།