སྨྱུག་སྡེའི་སྙན་ངག་ཚགས་ཤོག་འགྲེམ་སྤེལ་བྱས་པ།

Comments (3) on “སྨྱུག་སྡེའི་སྙན་ངག་ཚགས་ཤོག་འགྲེམ་སྤེལ་བྱས་པ།”

1. སྤྱི་ཚེས་ ༠༤/༠༧/༢༠༡༣ ཉིན་ང་ཚོ་སྨྱུག་སྡེའི་སྙན་ངག་ཚགས་ཤོག་མི་ཡུལ་དུ་ཐོག་མར་བལྟམས་པའི་དབུ་འབྱེད་མཛད་སྒོ་སྟབས་བདེ་ཞིག་འཚོགས་ཡོད་ལ། མཛད་སྒོར་གདན་ཞུས་ཀྱི་སྐུ་མགྲོན་གཙོ་བོ་ནི་སྔ་འགྱུར་མཐོ་སློབ་ཆེན་མོའི་དགེ་བའི་བཤེས་གཉེན་མཁན་བཀྲ་ཤིས་རྣམ་རྒྱལ་དང་མཁན་ཡ་མ་འཆི་མེད་གཉིས་ཡིན།
   འཇུ་མི་ཕམ་གྱིས་མཛད་པའི་བཀྲ་ཤིས་བརྒྱད་པས་མཛད་སྒོའི་སྣེ་དྲངས་པའི་ཐོག མདོ་འཛིན་པ་བཀྲ་ཤིས་དོན་འགྲུབ་ཀྱིས་མཛད་སྒོ་མདུན་བསུ་བའི་སྐད་ཆ་ཚིག་འགའ་བཤད་པ་འདི་ལྟར་“དེ་སྔ་ཟླ་བ་འགའི་ཡར་སྔོན་ནས་སློབ་དཔོན་ཚེ་དབང་རིག་འཛིན་དང་སྤྲུལ་སྐུ་སངས་རྒྱས་བསྟན་འཛིན་འགྱུར་མེད་ང་རང་བཅས་ནས། སྨྱུག་སྡེའི་ཁ་བྱང་ཐོག་སྙན་ངག་ཚགས་ཤོག་ཅིག་འདོན་སྤེལ་བྱ་རྒྱུའི་སྐད་ཆ་བྱུང་བ་ལྟར། དེ་རིང་ནི་ཚགས་ཤོག་དང་འབྲེལ་བའི་ལས་དོན་དག་ལས་འགྲེམས་སྤེལ་བྱ་རྒྱུ་ཙམ་མ་གཏོགས་ལས་ཀ་གཞན་དག་ཧ་ལམ་ལམ་ལྷོངས་བྱུང་ཟིན་པ་རེད་ཅེས་བཤད་ཆོག
   ང་ཚོའི་ཚགས་ཤོག་དེ་སྤྱི་ཚོགས་ཁྲོད་འགྲེམས་སྤེལ་བྱེད་ལ་ཉེ་བའི་ཉིན་ཤས་སྔོན་ནས། འཆམ་ར་བ་སློབ་དཔོན་དྲི་མེད་རྒྱལ་མཚན་གྱིས་ང་ཚོར་ལམ་སྟོན་གྱི་ཚུལ་དུ་སྟབས་བདེའི་དབུ་འབྱེད་མཛད་སྒོ་ཞིག་བྱས་ན་བཟང་རབས་ཀྱི་དགོངས་འཆར་གསུངས་པ་ནང་བཞིན། ང་ཚོས་ཀྱང་དེར་དྲང་ཕྱོགས་ཀྱི་ལྟ་ཚུལ་བཟུང་སྟེ། དེ་རིང་གི་མཛད་སྒོ་མདོར་བསྡུས་འདི་བསྐངས་པ་ཡིན། དེར་ཡང་རྒྱུ་མཚན་མེད་པ་མིན་ཏེ། སྨྱུག་སྡེའི་ཚགས་ཤོག་འདི་ནི་ད་རེས་ཙམ་མིན་པར་ལོ་ལྟར་༧གོང་ས་མཆོག་གི་འཁྲུངས་སྐར་དང་མཉམ་དུ་སྤྱི་ཚོགས་ཀྱི་གར་སྟེགས་སྟེང་ཐོན་དགོས་པར་སོང་ཙང་། སྨྱུག་སྡེར་ཡང་རང་ཉིད་ལ་དཔག་པའི་སྐྱེས་སྐར་ཞིག་བརྩི་རྒྱུ་ཅིས་ཀྱང་ཡོད་དགོས་སྟབས་ང་ཚོས་གནད་དོན་འདི་ཐག་གཅོད་བྱས་པ་ཡིན།
   གཤམ་ནས་ང་ཚོ་སྨྱུག་སྡེའི་གཙོ་སྒྲིག་པ་སློབ་དཔོན་ཚེ་དབང་རིག་འཛིན་མཆོག་གིས། སྨྱུག་སྡེའི་འདས་མ་ད་གསུམ་གྱི་གནས་བབས་དང་འབྲེལ་བའི་སྐད་ཆ་ཚིག་གསུམ་གསུང་རྒྱུའི་རེ་བ་ཞུ་བཞིན་ཡོད།”

   གཙོ་སྒྲིག་པ་སློབ་དཔོན་ཚེ་དབང་རིག་འཛིན་གྱིས་གསུངས་དོན། “སྨྱུག་སྡེ་ནི་ངེད་ཅག་རྩོམ་རིག་ལ་དགའ་བའི་གྲོགས་པོ་ཚོས་ཆིག་སྒྲིལ་གྱིས་གསར་བཟོ་བྱས་པའི་ངོ་དེབ་ཀྱི་ཟུར་ཆུང་ངུ་ཞིག་ཡིན་མོད། ང་ཚོའི་དམིགས་ཡུལ་དང་ཁ་ཕྱོགས་སྔར་ལས་རྒྱ་ཆེ་རུ་དང་གཏིང་ཟབ་ཏུ་ཕྱིན་ཡོད་པའི་རྒྱུ་མཚན་གྱིས། ད་ཆ་ངད་ཚོས་སྙན་ངག་གི་ཚགས་ཤོག་པར་སྐྲུན་བྱེད་ཐུབ་སོང་བར་མ་ཟད། ང་ཚོའི་སྨྱུག་སྡེ་འདི་འབྱུང་འགྱུར་གྱི་ཆ་ལ་ཡང་། ངོ་དེབ་ཀྱི་ངོས་དེ་དྲ་ཚིགས་ཀྱི་ངོས་སུ་བསྒྱུར་ཐུབ་པ་དང་། སྙན་ངག་གི་གླེང་སྟེགས་ཙམ་ནས་སྒྱུ་རྩལ་རྩོམ་རིག་ཁྱབ་ཁོངས་ཡོངས་རྫོགས་ལ་ས་མིག་བསྐྲུན་རྒྱུའི་རྨི་ལམ་སྙིང་རྗེ་མོ་དེ་འདྲ་ད་ལྟ་ནས་རྨི་བཞིན་ཡོད། འོན་ཀྱང་རྨི་ལམ་དེ་དངོས་ཡོད་ལ་འགྱུར་ཐུབ་མིན་ནི་ད་དུང་བརྗོད་ཚོད་ཐིགས་མ་སོང་ཡང་། ང་ཚོས་སྨོན་པ་དེ་ལྟར་བྱེད་ཀྱིན་ཡོད།
   དེ་ལྟར་བྱེད་དགོས་པའི་རྒྱུ་མཚན་ཡང་། གཅིག་ནས་ང་ཚོ་རྩོམ་རིག་ལ་དགའ་བའི་རྒྱུ་མཚན་དང་། གཉིས་ནས་འཆི་ལ་ཉེ་བའི་བོད་ཀྱི་སྐད་ཡིག་འདི་ལ་ཞེ་དུང་དྲགས་པས་ཡིན་པ་ལས། དམིགས་ཡུལ་གསུམ་པ་དང་བཞི་པ་དེ་འདྲ་གང་ཡང་མེད། དེ་བས་སྨྱུག་སྡེའི་འཕེལ་འགྲིབ་ཀྱི་གནས་བབས་གང་ཡང་མཐའ་གཅིག་ཏུ་ཕུགས་བསམ་གཅིག་པའི་རྩོམ་པ་པོ་དང་ཀློག་པ་པོ་ཚོའི་ལག་ཏུ་ཡོད་པར་མ་ཟད། སྨྱུག་སྡེས་ནམ་དུ་ཡང་སྤོབས་པ་ཆེན་པོས་བློ་མཐུན་རྩོམ་པ་པོ་དང་ཀློག་པ་པོ་རྣམ་པ་མགོན་དཔུང་དུ་སྒོམ་བཞིན་ཡོད་པས། ཇི་སྲིད་བློ་མཐུན་ཁྱེད་ཅག་ཡོད་པའི་དུས་དེ་སྲིད་དུ་སྨྱུག་སྡེ་ནམ་ཡང་ཉམ་ཐག་མི་སྲིད་སྟབས། དེ་རིང་ང་ཚོས་དྲིན་ཅན་ཚོར་ཐུགས་རྗེ་ཆེ་ཞུ་བ་དང་སྦྲགས་ཁྱེད་ཅག་ནམ་དུ་ཡང་སྨྱུག་སྡེའི་མགོན་དཔུང་དུ་བཞུགས་སུ་གསོལ་ཞེས་ང་ཚོས་རེ་འབོད་བྱེད་བཞིན་ཡོད་ལགས།”

   གཏམ་བཤད་ཐུང་ངུ་དེ་མཇུག་གྲུབ་མ་ཐག་གདན་ཞུས་ཀྱི་སྐུ་མགྲོན་གཙོ་བོ་མཁན་བཀྲ་ཤིས་རྣམ་རྒྱལ་མཆོག་གིས་དབུ་འབྱེད་དངོས་གཞི་བྱས་པ་དང་། དེ་མཚམས་མདོ་འཛིན་པ་བཀྲ་ཤིས་དོན་འགྲུབ་ཀྱིས་ཐུགས་རྗེ་ཆེ་ཞུ་དང་འབྲེལ་བའི་སྐད་ཆ་ཚིག་འགའ་བཤད་དོན།
   “འདི་ནས་གསལ་བཤད་ཞུ་དགོས་པ་ཞིག་ལ། ང་ཚོའི་སྨྱུག་སྡེ་སྤྱི་ཚོགས་སྟེང་འགྲེམས་སྤེལ་བྱ་རྒྱུའི་དུས་ཚོད་དངོས་གཞི་ནི་༧གོང་ས་མཆོག་གི་འཁྲུངས་སྐར་གྱི་ཉིན་ཡིན་མོད། དེ་རིང་མཛད་སྒོ་སྟབས་བདེ་འདི་བྱེད་དགོས་ཐུག་པ་ནི་འཁྲུངས་སྐར་དངོས་གཞིའི་ཉིན་དུས་ཚོད་ཀྱི་ཁོམ་པ་བྱུང་དཀའ་བས་ཡིན་པ་མ་གཏོགས། ཚགས་ཤོག་འདིའི་སྐྱེས་སྐར་དངོས་གཞི་ནི་༧བླ་ན་མེད་པའི་ཞི་བདེའི་དེད་དཔོན་གང་དེའི་འཁྲུངས་སྐར་དང་དང་མེད་ན་མི་འབྱུང་གི་འབྲེལ་བ་གྲུབ་ཡོད་པས། གང་བདེའི་བྱམས་བརྩེའི་འཛུམ་མདངས་དྲོན་མོ་དང་ནམ་ཡང་ཁ་འབྲལ་ཐབས་མེད།
   མཐའ་དོན་ང་ཚོའི་སྟབས་བདེའི་མཛད་སྒོ་འདིར་ཕེབས་པའི་དགེ་བའི་བཤེས་གཉེན་རྣམ་པ་གཉིས་དང་ཞེ་མཐུན་གྲོགས་པོ་ཡོངས་ལ་སྙིང་ནས་ཐུགས་རྗེ་ཆེ་ཞུས་པ་ཡིན་ལགས།”
   དེ་ལྟར་དབུ་འབྱེད་ཀྱི་མཛད་སྒོ་མཐའ་གྲུབ་པ་ལགས།
   འདྲེན་ཁུངས། https://www.facebook.com/notes/pen-group-%E0%BD%A6%E0%BE%A8%E0%BE%B1%E0%BD%B4%E0%BD%82%E0%BD%A6%E0%BE%A1%E0%BD%BA/%E0%BD%A6%E0%BE%A8%E0%BE%B1%E0%BD%B4%E0%BD%82%E0%BD%A6%E0%BE%A1%E0%BD%BA%E0%BD%A6%E0%BD%82%E0%BD%A2%E0%BD%BA%E0%BD%A3%E0%BD%96%E0%BD%80%E0%BE%B1%E0%BD%B2%E0%BD%93%E0%BD%A0%E0%BD%91%E0%BD%B4%E0%BD%82%E0%BD%82%E0%BD%98/140726512793920

2. བདེ་ཆེན་རྒྱལ་མོ་ལགས་ལ་ཐུགས་རྗེ་ཆེ་ཞུས་པ་ཡིན།

3. བཀྲ་ཤིས་བདེ་ལེགས།