སྲིད་དོན་གཏན་ཚིགས་རིག་པའི་ངོས་ནས་རང་བཙན་འཐབ་རྩོད་པ་རྣལ་མ་ཞིག་ཡིན་ནམ།

གཡུ་ཐོག

 
དེང་གི་བོད་པའི་བཙན་བྱོལ་སྤྱི་ཚོགས་ཁྲོད་ཀླུ་མཁར་བྱམས་ངོ་མི་ཤེས་མཁན་ཕལ་ཆེར་མེད་པ་ལྟ་བུ་རེད། དེ་ནི་རྒྱུ་མཚན་བཟང་ངན་དང་བྱ་བ་དགེ་སྡིག་འདྲ་མིན་དབང་གིས་འགའ་རེས་སྲིད་དོན་ཉམས་ཞིབ་པ་དང་ལ་རེས་རང་བཙན་འཐབ་རྩོད་པ་ཞེས་འབོད་བཞིན་ཡོད། ད་རེས་དེའི་ཐོག་མནོ་བསམ་ཞིག་གཏོང་བའི་དུས་ཚོད་ཡང་བྱུང་། སྤྱིར་རྒྱལ་ཁབ་ཞིག་གིས་རང་དབང་བསྐྱར་བཟོའི་ལོ་རྒྱུས་ནང་རང་བཙན་འཐབ་རྩོད་པ་ཞེས་པའི་གང་ཟག་དེ་རིག་པ་བཀྲ་བའི་གསར་བརྗེའི་ལམ་དུ་བཀྲི་ནས་རྒྱལ་ཁབ་དང་མི་རིགས་ཀྱི་རང་དབང་བསྐྱར་བཟོ་ཐུབ་པའི་ཆེད་ལས་འགུལ་དང་འཐབ་རྩོད་འདྲ་མིན་གྱིས་མདོར་ན་ལུས་ངག་ཡིད་གསུམ་གྱིས་བློས་གཏང་བྱེད་མཁན་གྱི་གང་ཟག་ཞིག་ལ་བརྗོད།
དཔེར་ན། རྒྱ་གར་གྱི་རང་བཙན་བསྐྱར་བཟོའི་ལོ་རྒྱུས་ནང་ཤིན་ཏུ་སྙན་གྲགས་ཅན་གྱི་དཔའ་བོ་བྷ་གྷད་སིངྒ་ལྟ་བུ་ཡིན་ལ་མདོར་ན་ཁོང་རང་ཉིད་ལྟ་བུར་མཚོན་ན། སྒེར་གྱི་འཚོ་བ་དང་། མདུན་ལམ། ཁྱིམ་ཚང་སོགས་ཡོངས་སུ་རྒྱལ་ཁབ་ཀྱི་རང་དབང་བསྐྱར་བཟོ་ཆེད་བློས་བཏང་ཡོད་ལ་མཐའ་མ་གཅེས་པའི་རང་སྲོག་ཀྱང་རྒྱལ་ཁབ་ཀྱི་རང་དབང་འཐབ་རྩོད་ཆེད་བློས་བཏང་བའི་རྒྱ་གར་རང་དབང་བསྐྱར་བཟོའི་ལོ་རྒྱུས་ནང་བརྗེད་དུ་མེད་པའི་ཕོ་རྒོད་ཀྱི་དཔའ་བོ་ཞིག་ལ་ངོས་འཛིན་བྱ། དཔའ་བོ་རང་ཉིད་ནས་རང་དབང་འཐབ་རྩོད་བྱ་བཞིན་པའི་བརྒྱུད་རིམ་ནང་རང་ཉིད་རང་བཙན་འཐབ་རྩོད་པ་ཞིག་ཡིན་ལུགས་ནམ་ཡང་བརྗོད་མེད་ཡིན་ཡང་རྒྱ་གར་སྤྱི་ཚོགས་ཀྱིས་དཔའ་བོ་ཁོང་རང་དབང་འཐབ་རྩོད་པ་རྣལ་མ་ཞིག་ཡིན་པ་ངོས་འཛིན་དང་གདེངས་འཇོག་བྱ་བཞིན་ཡོད།

ཡིན་ཡང་ང་ཚོའི་བཙན་བྱོལ་སྤྱི་ཚོགས་ནང་རང་དབང་འཐབ་རྩོད་པ་དང་དེ་འབྲེལ་གྱི་ལས་འགུལ་འདྲ་མིན་སྤེལ་མཁན་རྣམས་དབྱེར་མེད་ལྟ་བུར་འགྱུར་ཡོད། སོ་སོས་རང་ཉིད་རང་དབང་འཐབ་རྩོད་པ་ཞིག་ཡིན་ལུགས་བརྗོད་པ་མ་ཏོག་དེ་འབྲེལ་གྱི་ལུས་ངག་ཡིད་གསུམ་གྱི་བློས་གོཏང་ཇི་ལྟར་བྱ་ཡོད་མེད་གསལ་པོ་རེད། སྤྱི་ཚོགས་ཁྲོད་དུ་རང་དབང་འཐབ་རྩོད་པ་རྣལ་མ་ཞིག་ཡིན་ཚེ་ལུས་ངག་ཡིད་གསུམ་ཀྱི་ལྟ་སྤྱོད་ཇི་ལྟར་དགོས་མིན་ཤེས་མཁན་ཡང་ཤིན་ཏུ་དཀོན། ཧ་ལམ་གསུམ་བཅུ་དུས་དྲན་སྐབས་རྒྱ་ནག་གཞུང་ཚབས་མདུན་དུ་སྐད་འབོད་བྱེད་པ་དང་། ཟས་བཅད་ངོ་རྒོལ་བྱེད་པ། ཡང་ན་རང་བཙན་གྱི་ལོ་རྒྱུས་དང་འབྲེལ་བའི་རྩོམ་ཡིག་འདྲ་མིན་སྤེལ་བ། ངག་གིས་དམངས་ཁྲོད་གཏམ་བཤད་བྱེད་པ་སོགས་རང་དབང་འཐབ་རྩོད་པ་རྣལ་མ་ཞིག་ཡིན་མིན་བརྗོད་དཀའ། ཡིན་ཡང་རང་ཉིད་ཀྱི་མཚན་བྱང་ཐོག་རང་བཙན་འཐབ་རྩོད་པ་ཞེས་འབྲི་བཞིན་ཡོད།

ང་ཚོའི་བཙན་བྱོལ་སྤྱི་ཚོགས་ཁྲོད་ཀླུ་མཁར་བྱམས་ནི་རང་བཙན་འཐབ་རྩོད་པ་ཞིག་ཡིན་ལུགས་ཁོ་བོས་བརྗོད་བཞིན་ཡོད་ལ་མང་ཚོགས་ནས་ཀྱང་དེ་ལྟར་ཡིན་པར་སྣང་མེད་ངོས་འཛིན་བྱ་བཞིན་ཡོད། ཡིན་ཡང་ཀླུ་བྱམས་རང་བཙན་འཐབ་རྩོད་པ་རྣལ་མ་ཞིག་ཇི་ལྟར་རེད་དམ། རང་དབང་འཐབ་རྩོད་ཆེད་གསར་བརྗེའི་ལས་འགུལ་ག་རེ་སྤེལ་ཡོད་དམ། ལུས་ངག་ཡིད་གསུམ་གྱི་བློས་གཏོང་ག་རེ་བྱས་ཡོད་དམ། ཁོ་རང་བཙན་བྱོལ་དུ་ཡོངས་ནས་ད་བར་བློས་གཏོང་ག་རེ་བྱེད་ཡོད་དམ། མ་འོངས་འཐབ་རྩོད་ཀྱི་གསར་བརྗེའི་ལྟ་སྤྱོད་ཇི་ལྟར་ཡིན་ལ་དེ་འབྲེལ་གྱི་བློས་གཏང་ག་རེ་བྱེད་ཡོད། མ་འོངས་རང་བཙན་འཐབ་རྩོད་ཇི་ལྟར་བྱེད་དམ། སྒེར་གྱི་འཚོ་བ་དང་། མདུན་ལམ། ཁྱིམ་ཚང་། བུ་ཕྲུག་སོགས་རང་བཙན་འཐབ་རྩོད་ཆེད་བློས་གཏོང་ཡོད་དམ།

རྩོམ་ཡིག་བྲིས་པ་རང་བཙན་འཐབ་རྩོད་ཡིན་ནམ། ཡང་རང་བཙན་འཐབ་རྩོད་ཀྱི་ལས་འགུལ་ག་རེ་སྤེལ་ཡོད་དམ། གཞུང་འབྲེལ་མིན་པའི་ཚོགས་པ་ཁག་དང་མང་ཚོགས་ཁྲོད་རང་བཙན་གྱི་གཏམ་བཤད་འདྲ་མིན་བྱེད་པ་རང་བཙན་འཐབ་རྩོད་རེད་དམ། སྲིད་སྐྱོང་ལ་ལངས་པ་དེ་རང་བཙན་འཐབ་རྩོད་ཡིན་ནམ། དགུ་བཅུ་གསུམ་གྱི་ཚོགས་གཙོ་བྱས་པ་རང་བཙན་འཐབ་རྩོད་ཡིན་ནམ། ཡང་ན་རྒྱ་ནག་གཞུང་ཚབ་ཁང་གི་སྒོ་འགྲམ་ནས་སྐད་འབོད་བྱས་པ་དེ་རང་བཙན་འཐབ་རྩོད་པ་ཞིག་ལ་གོ་དགོས་སམ། དེ་དག་ནི་བཙན་བྱོལ་གྱི་ཆབ་སྲིད་ཁྲོད་བོད་མི་ཕལ་མོ་ཆེས་བསྒྲུབས་དང་སྒྲུབ་བཞིན་པའི་གནད་དོན་ཞིག་ཡིན་པ་ལས་ཀླུ་བྱམས་ཀྱི་དམིགས་བསལ་བྱས་པ་ཞིག་གང་ཡང་མི་མཐོང་། བཙན་བྱོལ་ནང་རང་དབང་བསྐྱར་བཟོའི་བརྒྱུད་རིམ་ཁྲོད་བཙན་བྱོལ་མི་མང་དང་མི་འདྲ་བའི་འཐབ་རྩོད་གཟེངས་སུ་ཐོན་པ་གང་འདུག བོད་ཀྱི་རང་དབང་འཐབ་རྩོད་ཁྲོད་ད་བར་རང་བཙན་ཐབ་རྩོད་ཀྱི་ལས་འགུལ་དང་འཆར་གཞི་ག་རེ་སྤེལ་ཡོད། ༸རྒྱལ་བར་མཚན་སྨད་ཞུ་བ་དང་། ཟུར་ཟ་བྱེད་པ། རྒྱལ་ཚོང་པའི་ཕྱོགས་སུ་འགྲོ་ཡི་རེད་བཅས་གཞི་མེད་སྐྱོན་བརྗོད་བྱེད་པ་རྣམས་རང་བཙན་འཐབ་རྩོད་རེད་དམ། དེ་མིན་ན་སྲིད་དོན་གཏན་ཚིག་རིག་པའི་ངོས་ནས་ཀླུ་མཁར་བྱམས་རང་བཙན་འཐབ་རྩོད་པ་རྣལ་མ་ཞིག་མིན་པའི་ཕྱོགས་སུ་འགྲོ་མོད་ཀྱང་མདོར་ན་རང་ཉིད་ཀྱི་ཉིན་རེའི་ལྟོ་གོས་གཏམ་གསུམ་ཡང་རང་བཙན་འཐབ་རྩོད་པ་ཞིག་ཡིན་ཁུལ་གྱིས་འཚོ་བཞིན་ཡོད།

འོ་ན་བཙན་བྱོལ་སྤྱི་ཚོགས་ཀྱི་རང་དབང་བསྐྱར་བཟོའི་ལོ་རྒྱུས་ནང་རང་བཙན་འཐབ་རྩོད་པ་མེད་པ་ཡིན་ནམ། དེ་ནི་མ་ཡིན། དཔེར་ན་དཔའ་བོ་འཇམ་དཔལ་ཡི་ཤེས་ལགས་ལྟ་བུ་རང་བཙན་འཐབ་རྩོད་པ་རེད་ཅེས་བརྗོད་ཆོག ཁོང་གི་མདོར་ན་རང་ཉིད་ཀྱི་མདུན་ལམ་དང་། ཕ་མ་སྤུན་མཆེད། གཅེས་པའི་ལུས་སྲོག་ཀྱང་བོད་ཀྱི་རང་དབང་འཐབ་རྩོད་ཆེད་བློས་བཏང་ཡོད། དེ་མིན་སྤྱི་ཚོགས་ཁྲོད་སྨྲ་མཁས་པའི་མཁས་མིང་འཛིན་པ་དང་། ལོ་རེར་སྐད་འབོད་བྱེད་པ། གཞི་མེད་གཏུམ་པའི་རང་བཙན་རྩོམ་ཡིག་འགའ་རེ་སྤེལ་བ། ཚོགས་པ་སྐྱིད་སྡུག་བྱེ་བྲག་གི་ཚོགས་མི་ཚོགས་གཙོ་བྱེད་པ་ལ་སོགས་རང་བཙན་འཐབ་རྩོད་པ་ཡིན་མིན་མི་ཤེས་ཀྱང་ཀླུ་བྱམས་ཀྱི་ལྟ་སྤྱོད་དེ་དག་རང་བཙན་འཐབ་རྩོད་པ་ཞིག་མིན་པ་གསལ་པོ་བརྗོད་ཐུབ་མོས། ཁོ་རང་ཉིད་དོན་དམ་གྱི་རང་བཙན་འཐབ་རྩོད་པ་ཞིག་ཡིན་ཚེ་སྲིད་དོན་གྱི་ལངས་ཕྱོགས་བརྟན་ཞིང་ཁ་གཏད་ཀྱི་འཐབ་རྩོད་དགྲ་བོ་སུ་ཡིན་མིན་གསལ་པོ་ངོས་འཛིན་དགོས། དོན་དངོས་བོད་དོན་རང་བཙན་འཐབ་རྩོད་པ་ཞིག་ཡིན་ཚེ་དགྲ་རྒྱ་མིར་ཁ་གཏད་ནས་འཐབ་རྩོད་བྱེད་དགོས་པ་ཡིན་ཀྱང་ད་བར་ཁོང་གིས་རང་དབང་འཐབ་རྩོད་ཀྱི་ཁ་ཕྱོགས་དེ་༸རྒྱལ་བར་ཁ་གཏད་ནས་འཐབ་རྩོད་འབའ་ཞིག་བྱེད་དང་བྱེད་མུས་ཡིན། དེ་ནི་རང་བཙན་འཐབ་རྩོད་པ་རྣལ་མ་ཞིག་མིན་པ་སྲིད་དོན་གཏན་ཚིག་རིག་པས་ལེགས་པར་སྒྲུབ།