ཆུ་རླངས་འབྲུག་བྱམས།
མི་སུ་འདྲ་ཞིག་ཡིན་རུང་སྐྱོན་མེད་མཁན་ཞིག་མེད་མོད། འོན་ཀྱང། སྐྱོན་ལ་ཚད་མེད་ན་བཟང་སྤྱོད་དང་ཡུལ་ཁྲིམས་ལ་འགལ་ནས་མཐའ་མར་བཙོན་དུ་འཇུག་སྲིད། ཨ་རིའི་སྲིད་འཛིན་ཊོམ་ཕུ་༼Donald Trump༽ལགས་ལ་ཡང་སྐྱོན་ཡོད་ལ་ཡོན་ཏན་ཡང་ཡོད། ༢༠༡༦ ལོ་ནས་བཟུང་ཁོང་མི་དཀྱུས་མ་ཞིག་དང་སྒེར་བ་ཞིག་མིན་པས་ཁོང་ལ་སྐྱོན་བརྗོད་བྱེད་མཁན་ཧ་ཅང་མང་པོ་རེད། དེའི་ཐད་ཧང་སང་དགོས་པ་དེ་འདྲ་གང་ཡང་མ་རེད། ཡིན་ནའང། ཁོང་གི་རྒྱལ་ནང་དང་ཕྱི་འབྲེལ་གྱི་སྲིད་ཇུས་མང་པོ་ཞིག་དེ་སྔོན་གྱི་སྲིད་འཛིན་ཚོ་དང་བསྡུར་ན་དམིགས་བསལ་མ་འདྲ་བ་རེད། རྒྱུ་མཚན་དེ་ལ་བརྟེན་ནས་རྒྱལ་ནང་དང་ཕྱི་རྒྱལ་ཁག་ཏུ་ཁོང་གི་ལས་ཀ་བྱེད་སྟངས་ཐད་ངོ་རྒོལ་དང་དགག་པ་རྒྱག་མཁན་ཧ་ཅང་མང་པོ་འབྱུང་བཞིན་ཡོད། འདས་པའི་ལོ་ངོ་གཉིས་དང་ཕྱེད་ཀའི་རིང་ལ་སྲིད་འཛིན་ལ་ངོ་རྒོལ་གྱི་ཆེད་དུ་གསར་འགྱུར་དང་དཔྱད་རྩོམ་སྤེལ་མཁན་ཉིན་གཅིག་ལའང་ཆད་མྱོང་མེད་ཟེར་ན་མི་འགྲིག་པ་མེད་པ་དང་། དེའི་གྲས་ཀྱི་གནད་དོན་མང་ཆེ་བ་ཞིག་ཁོང་རང་སྒེར་གྱི་གནད་དོན་རྐྱང་རེད། དཔེར་ན། སྲིད་འཛིན་དང་སྨད་འཚོང་མའི་འབྲེལ་བ། བུད་མེད་ལ་མཐོང་ཆུང་བྱས་པའི་སྐོར། ༢༠༡༦ ལོའི་འོས་བསྡུའི་ཐད་ཨུ་རུ་སིའི་གཞུང་དང་ངན་པ་ལག་འབྲེལ་བྱས་ཡོད་དང་མེད་ལ་སོགས་པ་རེད།
གོང་གི་གནད་དོན་འདི་དག་གི་སྐོར་ཅི་ལྟར་གླེང་རུང་བཤད་ཚར་བ་ཞིག་དང་ཐག་གིས་ཆོད་པ་ཞིག་ཡོང་དཀའ། དེ་བས་འདིར་ཊོམ་ཕུ་སྲིད་འཛིན་ཆགས་ནས་བོད་དོན་ཐད་ལས་ཀ་ག་རེ་བྱས་ཡོད་མེད་ལ་བསམ་བློ་བཏང་ཚེ་ཕལ་ཆེར་ལས་ཀ་གཅིག་ཀྱང་བྱས་ཡོད་པ་མ་རེད་ཟེར་ན་མི་ཆོག་པ་མི་འདུག འོན་ཀྱང། གླེང་རྒྱུ་ཡོད་པ་ཞིག་ནི་ཨ་རི་དང་རྒྱ་ནག་གཉིས་བར་གྱི་ཚོང་དམག་ཐད་གྱི་གནས་ཚུལ་རེད། ཚོང་དམག་གི་མཇུག་འབྲས་གང་འདྲ་བྱས་ནས་མཇུག་བསྡུ་ཐུབ་མིན་ད་ལྟ་བཤད་དཀའ་ཡང། ཨ་རི་དང་རྒྱ་ནག་གཉིས་བར་འབྲེལ་བ་སྡུག་དུ་སོང་ན་བོད་དོན་ལ་ཕན་གི་རེད་བསམ་མཁན་མང་པོ་ཡོད་པ་རེད་ལ་ཕྲན་ཡང་དེ་ལྟར་བསམ་མཁན་ཞིག་ཡིན། གལ་ཏེ། ཨ་རི་དང་རྒྱ་ནག་གཉིས་བར་གྱི་ཚོང་དམག་མུ་མཐུད་པ་དང་འབྲེལ་བ་སྡུག་དུ་སོང་ན། ཨ་རི་དང་རྒྱ་ནག་གཉིས་ཕར་ཞོག་རྒྱལ་ཁབ་མང་པོ་ཞིག་ལ་དཔལ་འབྱོར་གྱི་དཀའ་ངལ་འཕྲད་རྒྱུ་ཡིན་པ་དཔལ་འབྱོར་རིག་པའི་མཁས་པ་དང་ཚོང་པ་དག་གིས་ད་ལྟ་ནས་ཚོད་དཔག་བྱེད་ཀྱི་འདུག ཐ་ན་ཨ་རིའི་ནང་དུ་དཔལ་འབྱོར་སྐྱོ་རུ་འགྲོ་རྒྱུ་དང་མི་མང་པོའི་ལག་ནས་ལས་ཀ་ཤོར་སྲིད། དེ་ལྟར་སོང་ཚེ། སྲིད་འཛིན་ཊོམ་ཕུ་ལགས་ཀྱིས་མུ་མཐུད་ནས་རྒྱ་ནག་དང་མཉམ་དུ་ཚོང་དམག་རྒྱག་ཐུབ་བམ། གང་ལ་ཟེར་ན། སྲིད་འཛིན་ཊོམ་ཕུ་ལོ་རྗེས་མ་བསྐྱར་དུ་སྲིད་འཛིན་ལ་ལངས་རྒྱུ་ཡིན་པ་དང། དཔལ་འབྱོར་གྱི་གནས་སྟངས་སྐྱོ་རུ་སོང་ཚེ། བསྐྱར་དུ་སྲིད་འཛིན་ལ་ཐོབ་རྒྱུ་ཤིན་ཏུ་ནས་ཁག་པོ་ཡིན་པས་རེད།
ཡང་དབྱེ་ཞིབ་པ་ཁག་གཅིག་གི་བཤད་པ་ལྟར་ན། གལ་ཏེ་ཨ་རྒྱ་གཉིས་བར་ཚོང་དམག་མུ་མཐུད་ནས་སོང་ཚེ། ཨ་རིའི་ནང་དཔལ་འབྱོར་སྐྱོ་རུ་འགྲོ་སྲིད་ པ་དང་ལས་མེད་གྱི་གྲངས་ཀ་མང་རུ་འཕར་ངེས་རེད། གལ་ཏེ་དཔལ་འབྱོར་སྐྱོ་རུ་དང་མིའི་ལག་ནས་ལས་ཀ་ཤོར་ཚེ། སྲིད་འཛིན་ཊོམ་ཕུ་སྲིད་གཞུང་ནས་དཔལ་འབྱོར་གྱི་གནས་སྟངས་ལས་སྐྱོབ་རྒྱུ་དང་རང་ཉིད་བསྐྱར་དུ་འོས་ཐོབ་ཆེད་ཨེ་རན་དང་མཉམ་དུ་དམག་འཁྲུག་རྒྱག་སྲིད། དེ་ལྟར་བྱས་ཚེ། ཊོམ་ཕུ་ལགས་ལོ་རྗེས་མརབསྐྱར་དུ་སྲིད་འཛིན་ལ་ཐོབ་རྒྱུ་ཡིན་པ་དང་དཔལ་འབྱོར་ཉམ་ཆག་དང་ལས་མེད་གྲངས་ཀ་འགོག་ཐུབ་རྒྱུ་རེད། ཨེ་རན་དང་མཉམ་དུ་དམག་རྒྱག་སྲིད་པ་འདི་ནི་སྲིད་འཛིན་ཊོམ་ཕུ་ལགས་ལོ་རྗེས་མ་བསྐྱར་དུ་འོས་ཐོབ་ཆེད་ཀྱི་ཆབ་སྲིད་གྱི་ཁེ་ཕན་ཁོ་ནའི་ཆེད་དུ་རེད།
འདས་པའི་ལོ་ངོ་གཉིས་དང་ཕྱེད་ཀའི་རིང་ཨ་རིའི་ཕྱི་སྲིད་གྱི་འབྲེལ་ལམ་ནི་ལམ་ཁ་ཀྱག་ཀྱོག་ཞིག་ཏུ་སྐྱོད་ཡོད་ལ། ཊོམ་ཕུ་སྲིད་འཛིན་ཆགས་པ་ནས་བཟུང་མི་མང་པོས་སེམས་ཁྲེལ་བྱེད་བཞིན་པ་ནི་ཁོང་ལ་ཆབ་སྲིད་དང་ཕྱི་འབྲེལ་གྱི་ཉམས་མྱོང་མེད་པས་རེད། ཨ་རིའི་མཐུན་གྲོགས་རྒྱལ་ཁབ་མང་པོ་ཞིག་འབྲེལ་ལམ་རྒྱང་རིང་དུ་བཏང། དགྲ་སུ་ཡིན་གཉེན་སུ་ཡིན་གྱི་ངོ་ཐག་གསལ་པོ་ཞིག་ཆོད་མེད། དེའི་ཐད་ཨ་རི་ལ་ཤ་ཚ་བྱེད་མཁན་མང་པོ་ཞིག་གིས་མ་འོངས་པར་ཨ་རིའི་འཛམ་གླིང་གི་སྣེ་ཁྲིད་ཐུབ་མིན་ལ་བསམ་ཚུལ་འདོན་མཁན་མང་པོ་བྱུང་ཡོད།
ཨ་རིའི་ཕྱི་འབྲེལ་གྱི་སྲིད་ཇུས་ཨེ་ཤ་ཡའི་ནང་དུ་དེ་ཙམ་གྱི་ཤུགས་ཆེན་པོ་མེད་རུང། འཛམ་གླིང་དམག་ཆེན་གཉིས་པའི་རྗེས་ནས་ཨ་རི་དང་མཉམ་དུ་མཐུན་གྲོགས་ཡིན་མཁན་རྒྱལ་ཁབ་གཉིས་ནི་འཇར་པེན་དང་ལྷོ་ཀོ་རེ་ཡ་གཉིས་རེད། སྲིད་འཛིན་ཊོམ་ཕུ་ལགས་ཀྱི་ལྷོ་ཀོ་རེ་ཡའི་ཐད་གྱི་སྲིད་ཇུས་ནི་བྱིས་པ་བསམ་མེད་ཞིག་གི་ལས་ཀ་ལས་མ་འདས། ཉེ་ཆར་གསར་དུ་ཐོན་པའི་སྲིད་འཛིན་ཊོམ་ཕུ་སྐོར་གྱི་དཔེ་དེབ་གསར་བ་འཇིགས་སྣང༼fear༽ འབྲི་མཁན་ཆབ་སྲིད་དཔྱད་བརྗོད་པ་༼Bob Woodward༽ ལགས་ཀྱི་དཔེ་དེབ་ནང་དུ། ལྷོ་ཀོ་རེ་ཡའི་སྲིད་འཛིན་ཕྱི་ལོ་༢༠༡༧་ཟླ་༩ཚེས་༥ ཉིན་ཨ་རིའི་ནང་གཟིགས་སྐོར་དུ་ཕེབས་རྒྱུ་ཡིན་པ་གཏན་ཁེལ་ཡོད། ཨ་རིའི་སྲིད་འཛིན་ཊོམ་ཕུ་ལགས་ཀྱིས་ཉིན་༡༨༠ ནང་ཚད་ལ་ཨ་རི་དང་ལྷོ་ཀོ་རེ་ཡ་གཉིས་བར་ཕྱི་ལོ་༡༩༥༠ གྲངས་ལ་བཞག་པའི་གྲོས་ཆོད་རྣམས་ཕྱིར་འཐེན་བྱེད་ཀྱི་ཡིན། ལོ་ངོ་བདུན་བཅུ་རིང་ལྷོ་ཀོ་རེ་ཡི་ལ་འགྲོ་སོང་མ་གཏོགས་ཁེ་ཕན་མི་འདུག་ཟེར་ནས་ཡིག་ཆ་གཏན་འབེབས་བཟོས། ཕོ་བྲང་དཀར་པོའི་ལས་བྱེད་༼Gary Cohn༽ ལགས་ཀྱི་སྲིད་འཛིན་ཡར་ཞུ་བྱས་ཀྱང་ཉན་འཇོག་བྱས་མེད། མཐར་རྒྱལ་སྲུང་བློན་ཆེན༼James Mattis༽ ལགས་སུ་ཡར་ཞུ་བྱས། རྒྱལ་སྲུང་བློན་ཆེན་ཕོ་བྲང་དཀར་པོར་བཅར་ནས་སྲིད་འཛིན་ལ་ཡར་ཞུ་རྒྱུ། ཨ་རིའི་དམག་མི་ལྷོ་ཀོ་རེ་ཡར་རྟེན་གཞི་བྱས་པ་དེ་ཨ་རི་ལ་ཁེ་ཕན་མ་གཏོགས་ལྷོ་ཀོ་རེ་ཡ་ལ་དེ་ཙམ་ཁེ་ཕན་མེད་ཅེས་ཊོམ་ཕུ་ལགས་སུ་ཡར་ཞུ་བྱས་ཀྱང་ཉན་འཇོག་དེ་ཙམ་བྱས་མེད། མཐའ་མ་རྒྱལ་སྲུང་བློན་ཆེན་དང་ལས་བྱེད་ཁག་ཅིག་ཁ་མཐུན་གྱི་ཡིག་ཆ་སྦས་སྐོང་བྱས་ནས་སྲིད་འཛིན་གྱི་མཚན་རྟགས་འགོད་དུ་བཅུག་མེད།
གོང་གི་འདིའི་ཐད་ལ་བསམ་བློ་ཞིག་གཏོང་དུས་ངོ་མདོག་ཚ་ལི་མའི་མདོག་ཅན་གྱི་ཨ་རིའི་སྲིད་འཛིན་ཊོམ་ཕུ་ལགས་ཀྱི་ཕྱི་འབྲེལ་ཐད་གྱི་སྲིད་ཇུས་ནི་བྱིས་པ་བསམ་མེད་ཞིག་གི་ལག་ཏུ་གྲི་བཞག་ཡོད་པ་དང་གཅིག་མཚུངས་རེད། རྒྱ་ནག་དམར་པོ་ཆགས་ནས་ད་བར་ཨ་རིའི་སྒང་ལ་ལྟ་ཚུལ་དང་ཞེ་སྣང་ཚ་ཤས་དེ་ཨ་རིའི་དམག་མི་ལྷོ་ཀོ་རེ་ཡའི་ནང་རྟེན་གཞི་བྱས་ཡོད་པ་འདི་རེད། གལ་ཏེ་ཨ་རིའི་དམག་རྣམས་ལྷོ་ཀོ་རེ་ཡ་ནས་ཕྱིར་འཐེན་བྱས་ཚེ་རྒྱ་ནག་ལ་མཚོན་ན་ཕྱི་འབྲེད་ཐད་རྒྱལ་ཁ་ཆེན་པོ་རེད་ལ། ཨ་རིའི་ཕྱི་འབྲེལ་གྱི་ནུས་པ་ཤར་ཨེ་ཤ་ཡའི་ནང་དུ་ཉམས་རྒུད་དུ་འགྲོ་བའི་འགོ་བཙུགས་པ་རེད།
ཨ་རིའི་རིན་ཐང་ནི་དམག་ཤུགས་དང་དཔལ་འབྱོར། ཆབ་སྲིད་བཅས་ལ་བརྟེན་ནས་བྱུང་བ་ཞིག་མིན། ཨ་རིའི་རིན་ཐང་ནི། རང་དབང། དམངས་གཙོ། ཐོབ་ཐང། འདྲ་མཉམ་བཅས་ལ་བརྟེན་ནས་བྱུང་པ་ཞིག་ཡིན། འདི་དག་མཐར་གཏུག་ན་ཡངས་དག་པའི་ཁྲིམས་དང་སྒྲིག་གཞི་རེད། བྱས་ཙང། ད་ལྟའི་སྲིད་འཛིན་ཊོམ་ཕུ་ལགས་ཀྱི་ཆེས་རིན་ཐང་ཆེ་བའི་ཁྲིམས་དང་སྒྲིག་གཞི་ལ་ཁྱད་གསོད༼undermines༽ བྱེད་ཀྱིན་ཡོད་པ་འདི་རེད། སྲིད་འཛིན་ཊོམ་ཕུ་ལགས་ཀྱི་མི་སྒེེར་བ་ཁྱད་གསོད་དང་མཐོང་ཆུང་བཏང་པ་ནི་ཉུང་ཉུང་མིན། དཔེར་ན། གསར་འགྱུར་ལས་ཁང་ཁག་གི་གསར་འགྱུར་རྫུན་མ་རེད་ཟེར་བ་དང། གསར་འགོད་པ་ལ་མཐོང་ཆུང་བྱས་པ་འདི་དག་ནི་དམར་པོའི་སྲིད་གཞུང་གྱི་བྱ་སྤྱོད་ལས་མ་འདས། དམངས་གཙོའི་རྒྱལ་ཁབ་ནང་དུ་གསར་འགོད་པ་ནི་གཞུང་དང་མི་དམངས་བར་གྱི་ཟམ་པ་ལྟ་བུ་རེད། སྲིད་འཛིན་ཊོམ་ཕུ་ལགས་ནི་ཨ་རིའི་སྲིད་འཛིན་གྱི་ལོ་རྒྱུས་ནང་ནས་གསར་འགོད་པ་དང་མི་སྒེར་བ་ལ་མཐོང་ཆུང་དང་དམའ་འབེབ་བྱེད་མཁན་གྱི་སྲིད་འཛིན་ཐོག་མ་དེ་རེད།
སྤྱིར་བཏང་རྫུན་བཤད་བཤད་ཚང་མ་རང་ཉིད་གྱི་ཆེད་དུ་མིན་མོད་། སྲིད་འཛིན་ཊོམ་ཕུ་ལགས་ཀྱི་རྫུན་གཏམ་རྣམས་རང་ཉིད་ཁོ་ནའི་ཆེད་དུ་ཡིན། ཆབ་སྲིད་པ་ཚང་མས་རྫུན་དང་ཧམ་པ་བཤད་པ་ནི་རང་བཞིན་ཞིག་རེད། འོན་ཀྱང། ཆབ་སྲིད་པ་ཚང་མའི་རང་ཉིད་ཁོ་ནའི་ཆེད་དུ་རྫུན་བཤད་པ་དེ་འདྲ་མིན། ཨ་རིའི་སྲིད་འཛིན་རིམ་པའི་ནང་རྫུན་མ་བཤད་མཁན་གཅིག་ཀྱང་མེད། ཚང་མས་རྫུན་བཤད་ཡོད་རེད། ཡིན་ནའང། རྫུན་བཤད་པ་དེ་དག་རྒྱལ་ཁབ་དང་མི་རིགས་ཀྱི་བདེ་འཇགས་ཀྱི་ཆེད་དུ་ཡིན་པ་ལས་རང་ཉིད་གྱི་ཆེད་དུ་མིན། དཔེར་ན། སྲིད་འཛིན་ཐེངས་༤༣པ་༼George W. Bush༽ ལྟ་བུ་ཡིན་ན། ཨ་རིའི་གཞུང་དང་མི་དམངས་ལ་རྫུན་བཤད་ནས་ཨེ་རག་༼Iraq༽ ལ་དམག་རྒྱབ་པ་རེད། དམག་རྒྱག་དགོས་པའི་དམིགས་ཡུལ་ཨ་རིའི་བདེ་འཇགས་ཀྱི་ཆེད་དུ་རེད། དེ་ལས་ལྡོག་དེ་སྲིད་འཛིན་ཊོམ་ཕུ་ལགས་ནི་འདས་པའི་ལོ་ངོ་གཉིས་དང་ཕྱེད་ཀའི་རིང་རང་ཉིད་གྱི་ལས་པའི་རྫུན་འགོ་མ་ཁེབས་པར་སྡོད་གྱིན་ཡོད། སྲིད་འཛིན་ཊོམ་ཕུ་ལགས་ཀྱི་མཐའ་འཁོར་ན་ཡོད་མཁན་མི་མང་པོ་ཞིག་བཙོན་དུ་བཅུག། འདི་དག་ལ་བལྟས་ཚེ་སྲིད་འཛིན་ཊོམ་ཕུ་ལགས་ཀྱི་མི་གཤིས་ལ་སྡོམ་རྒྱག་ཐུབ།
ཨུ་རུ་སའི་གཞུང་གིས་༢༠༡༦ ལོའི་འོས་བསྡུའི་ཐད་ངན་པ་ལག་འབྲེལ་བྱས་པ་ཁུངས་སྐྱེལ་བྱེད་ཐུབ་མེད་མོད། འོན་ཀྱང། སྲིད་འཛིན་ཊོམ་ཕུ་ལགས་ཀྱི་ལོ་མང་རིང་གཞུང་ལ་ཁྲལ་འཇལ་ཡོད་མེད་སྐོར་ལ་གནས་ཚུལ་འགྲོ་བཞིན་པ་རེད། གལ་ཏེ་གཞུང་ལ་ཁྲལ་མཇལ་མེད་ཚེ་འདིིའི་སྐོར་ལ་བགྲོ་གླེང་ཡོང་རྒྱུ་དང་ལོ་རྗེས་མའི་ལོས་བསྡུའི་ཐད་ཤུགས་རྐྱེན་ཐེབས་སྲིད།
ཊོམ་ཕུ་ལགས་ལ་རྒྱབ་སྐྱོར་བྱེད་མཁན་མང་ཆེ་བ་མི་རིགས་དཀར་པོ་ཡིན། དཀར་པོའི་ནང་ནས་སྐེ་དམར་པོ༼Redneck༽ ཟེར་བ་དག་ཡིན། ཁོང་ཚོ་མང་ཆེ་བ་མི་རིགས་དཀར་པོའི་ལྟ་བ་དང་ཆོས་ལུགས་ཀྱི་ལྟ་བ་ཤུགས་ཆེན་པོ་འཁྱེར་མཁན་དག་རེད། སྐེ་དམར་༼Redneck༽ ཟེར་བའི་དོན་ངོ་མ་ཅི་ཡིན་མ་ཤེས་ནས་ལོ་མང་འགོར། ཁོང་ཚོ་མི་རིགས་དཀར་པོའི་ནང་ནས་རིགས་གཞན་ཞིག་རེད་བསམ་ནས་བསྡད་ཡོད། འོན་ཀྱང། ཉིན་འགའི་སྔོན་ལ་འདིའི་སྐོར་ལ་གསལ་པོ་ཤེས་པ་ནི། སྐེ་དམར་ཞེས་པའི་གོ་དོན་ནི་མི་རིགས་དཀར་པོའི་ནང་ནས་སློབ་སྦྱོང་གི་གོ་སྐབས་མ་རག་མཁན་དང་ཡང་ན་སློབ་སྦྱོང་མེད་མཁན་༼uneducated people༽ ལ་གོ། སྐེ་དམར་ཚོ་གནས་ས་མང་ཆེ་བ་གྲོང་ཁྱེར་གྱི་མཐའ་དང་གྲོང་གསེབ་ཁག་ཏུ་ཡོད། ཁོང་ཚོ་ནི་མི་རིགས་དབྱེ་འབྱེད་བྱེད་མཁན༼ White Supremacism༽ ལ་གོ། སྐེ་དམར་ཚོས་བསམ་པར་མི་རིགས་དཀར་པོ་ནི་མི་རིགས་གཞན་དག་ལས་ཡག་པ་དང་འཇོན་པ། གྲུང་པོ་བཅས་ཡིན་བསམ་མཁན་དག་རེད། སྲིད་འཛིན་ཊོམ་ཕུ་ལགས་ཁོང་ཚོ་དང་བསམ་བློའི་མཐུན་གྲོགས་ཡིན་ནོ།
སྐེ་དམར་ཚོ་ཨ་རིའི་ཞིང་འབྲོག་མང་ཚོགས་རེད།
ཡག་པོ་བྲིས་འདུག འོན་ཀྱང་དགྲ་གནོན་ཁྲོམ་ཕུར་གྱི་ཕྱི་འབྲེལ་སོགས་ཕྲུ་གུའི་རྩེ་མོ་ནང་བཞིན་ཟེར་བ་དེར་མོས་མཐུན་མེད། གང་ཡིན་ཞེས་ན། ད་ལྟའི་སྲིད་འཛིན་འདི་ཕྱིའི་རྣམ་པ་ཕྱི་འབྲེལ་སྲིད་ཇུས་གོ་རིམ་མེད་པ་ལྟ་བུ་མཐོང་མོད། དོན་ལ་ད་ལྟའི་སྲིད་འཛིན་འདི་ཧ་ཅང་གི་སྤྱང་གྲུང་འཛོམས་པ་སུ་གཅིག་ལ་མི་བསྟུན་མཁན་ཞིག་རེད་འདུག། དང་པོ། དཔེར་ན་ཁོང་སྲིད་འཛིན་ལ་བཞེངས་མ་ཐག་ཐད་ཀར་ཐེ་བན་གྱི་སྲིད་འཛིན་ལ་ཁ་བརྡ་བྱས་པས་འཛམ་གླིང་ཧ་ལས་སུ་གྱུར་ཡོད། དེ་སྔོན་ཆད་སྲིད་འཛིན་སུ་ཞིག་གིས་བྱས་མེད་པ་རེད། དེ་ནི་ཁོང་གིས་བསམ་བཞིན་དུ་རྒྱ་ནག་ལ་ཉེན་བརྡ་བཏང་བ་ལས་གཞན་ཅང་མ་རེད། གཉིས་པ། ཨེ་གཟུ་རལ་དང་དེའི་ཁྱིམ་མཚེས་རྒྱལ་ཁབ་གཉིས་གྱིས་རྩོད་བཞིན་པའི་ས་དེ་རྒྱལ་ས་ངོས་འཛིན་བྱས་པ་སོགས་སྔོན་ཆད་སྲིད་འཛིན་སུས་འདི་འདྲ་བྱས་མེད་པ་རེད། གསུམ། རྒྱ་ནག་གཙོ་བྱས་རྒྱལ་ཁབ་དུ་མར་བྱ་འཁྲལ་སྤར་བ་དེ་ཕྱི་འབྲེལ་གྱི་དོ་ཕོགས་གཙོ་བོར་མ་བཟུང་བར་ཨ་རིའི་དཔལ་འབྱོར་གཙོ་བོར་བཟུང་བ་རེད།
ཁྱེད་ཀྱིས༼ཨ་རིའི་རིན་ཐང་ནི་དམག་ཤུགས་དང་དཔལ་འབྱོར། ཆབ་སྲིད་བཅས་ལ་བརྟེན་ནས་བྱུང་བ་ཞིག་མིན། ཨ་རིའི་རིན་ཐང་ནི། རང་དབང། དམངས་གཙོ། ཐོབ་ཐང། འདྲ་མཉམ་བཅས་ལ་བརྟེན་ནས་བྱུང་པ་ཞིག་ཡིན།༽ཟེར་བ་དེ་བདེན་ན། རྒྱ་གར་ནི་ཨ་རི་དང་མཉམ་པའི་དམངས་གཙོ་ལུང་པ་ཞིག་རེད། ཅི་ཕྱིར་ཨ་རི་ལྟར་རིན་ཐང་མེད་པ་རེད། བྱང་ཀོ་རི་ཡ་ནི་ཧ་ཅང་ཆུང་ཆུང་གི་རྒྱལ་ཁབ་གཅིག་རེད། ཅི་ཕྱིར་ཨ་རི་གཙོས་ཁྱིམ་མཚེས་རྒྱལ་ཁབ་སྐྲག་གི་ཡོད་པ་རེད། རྒྱ་ནག་ནི་སྲིད་དབང་སྒེར་འཛིན་ཆེས་སྡུག་པའི་རྒྱལ་ཁབ་དེ་རེད་མོད། རྒྱུ་མཚན་ཅི་ཕྱིར་རིན་ཐང་ཡོད་པ་རེད། འདི་ཚང་མ་དཔལ་འབྱོར་དང་དམག་ཤུགས་ལ་བརྟེན་ནས་བྱུང་བ་རེད། ངེད་ཀྱི་ཨ་རིའི་གྲོགས་པོ་ཡོད་ཚད་ཀྱིས་ད་ལྟའི་སྲིད་འཛིན་འདི་ནི་དགྲ་བོ་ལྟ་བུའི་འདུ་ཤེས་འཇོག་གི་འདུག་མོད། ངས་ནི་ད་ལྟའི་སྲིད་འཛིན་འདིས་ལས་སྟངས་ལ་ཧ་ཅང་གི་དགའ་བོ་བྱེད་ཀྱིན་ཡོད། རེད་ཡ་ཁོང་ལ་སྐྱོན་ལོས་ཡོད། ཡིན་ཡང་སྲིད་འཛིན་གཞན་དང་བསྡུར་ན་ཁོང་ནི་ཁ་རུ་ཁ་ཐུག་རེད། དེའི་སྐྱོན་གྱིས་གཞན་ལ་ཕོགས་ཐུག་འགྲོ་ཡི་ཡོད་པ་འདྲ། འོན་ཀྱང་ཁོང་ནི་མི་ཚེ་ཧྲིལ་བོར་གཞན་གྱི་འགོ་ནས་བསྡད་པ་ལས་མི་སུ་ཞིག་གི་འོག་ནས་ལས་དཀའ་བྱས་མེད་སྟབས་ངན་གོམས་སུ་སོང་ཡོད་པ་སྨོས་མེད་རེད། །
༄༅། རེད་ཡ།
སྲིད་འཛིན་ཀྲོམ་མ་གཏོགས་རྒྱ་དམར་པོར་ཚོང་དམག་རྒྱག་མཁན་བྱུང་མེད།
ཀྲོམ་མ་གཏོགས་བྱང་ཀོ་རི་ཡ་ལ་བཀའ་མོན་གནང་མཁན་བྱུང་མེད།
ཀྲོམ་མ་གཏོགས་ཨི་ས་རེལ་འབུར་དུ་ཐོན་པའི་རྒྱལ་ས་ངོས་འཛིན་བྱེ་མཁན་བྱུང་མེད།
ང་ནི་ཁོ་པས་བཤད་པའི་སྐད་ཆ་ཁག་གཅིག་ལ་མོས་པ་ཡོད།
ཁོ་མ་ཁ་རེ་ཁ་ཐུག་བཤད་ཐུབ་མཁན་གྱི་སྲིད་འཛིན་གཅིག་རེད་འདུག།
ཁོ་པར་སྐྱོན་ཡང་ལོས་ཡོད། མི་ལ་སྐྱོན་་མེད་པ་དང། ཤིང་ལ་རྗེར་བ་མེད་པ་མེད།
ཨ་རིའི་སྲིད་འཛིན་ལས་ཐོག་པ་འདིས་ཨ་རི་རང་གི་དཔལ་འབྱོར་ཡར་རྒྱས་གཙོ་བོར་དམིགས་བཞིན་འདུག་པས་སྲིད་འཛིན་གཞན་དང་བསྡུར་ན་ཧ་ཅང་ལེགས། འོན་ཀྱང་དམངས་གཙོ་ཕྱོགས་གཏོགས་ཡོད་ཚད་ཀྱིས་ཁོང་དགྲ་ལྟར་འཛིན་གྱི་ཡོད། རྒྱུ་མཚན་ནི་ཁོང་སྲིད་འཛིན་གཞན་ལས་ཁྱད་དུ་འཕགས་པས་རེད། ཁོང་ནི་ཆབ་སྲིད་པ་མ་རེད། དེའི་རྐྱེན་གྱིས་ཟློས་གར་འཁྲབ་ཤེས་ཀྱིན་མེད། ཨ་རི་དམག་མི་ཕྱི་རྒྱལ་ཁག་ན་སྡོད་བཞིན་པ་དེ་ནི་རྒྱལ་ཁབ་དེ་དག་ལས་ཨ་རི་ཁེ་ཕན་ཡོད་ཟེར། འོན་ཀྱང་སྲིད་འཛིན་འདིས་དེ་ནི་ཨ་རིའི་གྱོང་གུད་ཅིག་ཡིན་པར་འདོད་ཀྱི་ཡོད། དོན་ལའང་དེ་ལྟར་རེད་མོད། བླུན་པོ་མང་པོ་ཞིག་གིས་དེ་ཤེས་ཀྱིན་མེད། དཔེར་ན་གལ་ཏེ་ལྷོ་ཀོ་རི་ཡ་ནས་ཨ་རིའི་དམག་མི་ཕྱིར་འཐེན་བྱས་ན་ཨ་སྒོར་ས་ཡ་མང་པོ་འགྲོ་སོང་གཏོང་དགོས་མ་རེད། ནམ་ཞིག་བྱང་ཀོ་རི་ཡ་དང་རྒྱ་ནག་སོགས་ཀྱིས་ལྷོ་ཀོ་རི་ཡ་ཐུབ་ཚོད་བཏང་བ་ཡིན་ན་དེ་དུས་སྐྱར་དུ་ཨ་རིའི་དམག་མི་གདན་འདྲེན་ཞུ་ཅི་ལ་མི་ཆོག སྲིད་འཛིན་འདིས་ཨ་རི་དམག་མི་མང་པོ་ཕྱི་རྒྱལ་ཁབ་ན་ཡོད་པ་དེ་ཨ་རི་གྱོང་གུད་ཅིག་ཡིན་པར་བསམ་གྱི་ཡོད་པ་འདྲ། དེ་ལྟར་ཀྱང་ལོས་ཡིན། ཨ་རི་མི་མང་གི་མངོན་འདོད་ཀྱང་འཛམ་གླིང་དབང་དུ་བསྒྱུར་རྒྱུ་ལས་ཨ་རི་ཡར་རྒྱས་སུ་གཏོང་རྒྱུ་དེ་རེད། །
ད་ལྟའི་ཨ་རིིའི་མཚན་མཐོང་དེ་རྒྱལ་སྤྱིའི་ཐོག་ཇེ་ཞན་ཇེ་སྡུག་ཏུ་ཕྱིན་ཡོད། གང་ཡིན་ཟེར་ན་ཊོམ་ཕུ་ཡིས་ཁོར་ཡུག་སྲུང་སྐྱོབས་དང་འགྲོ་བ་མི་ཡི་ཐོབ་ཐང་དང་རང་དབང་ལས་སོགསའཛམ་གླིང་རྒྱལ་སྤྱིའི་སྤྱི་ཚོགས་ལ་ཇུས་གཏོགས་དང་མཉམ་ཞུགས་མ་བྱས་པའི་རྐྱེན་གྱིས་རེད། དེ་ནི་རྒྱ་ནག་ལ་མཚོན་ན་གོ་སྐབས་ཡག་ཤོས་ཞིག་ཆགས་པ་རེད། ལྷོ་ཨབ་རི་ཁ་དང་ལྷོ་ཨ་མི་རི་ཁ་ལས་སོགས་ལ་རྒྱ་ནག་གིས་དབང་བསྒྱུར་བྱས་དང་བྱེད་བཞིན་པ་རེད། ཨ་རིའི་དཔལ་འབྱོར་སྔར་ལས་ཇེ་སྡུག་ཏུ་ཕྱིན་ཡོད། གལ་ཏེ་ཊོམ་ཕུས་ཕྱི་ཕྱོགས་སུ་ཡོད་པའི་ཨ་་རིའི་དམག་མི་རྣམས་ཚུར་བླངས་པ་ཡིན་ན་མ་འོངས་ོར་རྒྱལ་ཁབ་དེ་དག་ཏུ་ཨ་རིརི་དམག་མི་འཛུལ་ཞུགས་བྱེད་རྒྱུར་མི་མང་གིས་མོས་འདུན་བྱེད་ཀྱི་མ་རེད། དེས་ན་ཊོམ་ཕུས་སྲིད་དོན་པ་ཞིག་མ་རེད་ལ་ཚོང་པ་ཞིག་ཀྱང་ཡག་པོ་མ་རེད། ཁོ་ཡི་ཚོང་གི་མར་རྩ་བརྡིབ་ནའ་ཨ་རིརི་གཞུང་ལ་ལོ་མང་རིང་ཚོང་ཁྲལ་མ་སྤྲད་པར་ཁུ་སིམ་མེར་བསྡད་ཡོད། ད་དུང་ཁོས་སྒོ་ཁྲལ་མི་སྤྲོད་པ་དེ་ཁོ་སྤྱང་པོ་ཡིན་པའི་རྒྱུ་མཚན་བཤད་ཡོད། ངོ་མ་མི་ཁྲེལ་མེད་ཡ་མེད་ཞིག་རེད། ཁོས་སྲིད་མ་ཤེས་ནས་བྱང་ཀོར་རེའི་མགོ་ཁྲིད་དང་མཉམ་དུ་ཐུག་སྤྲད་གཉིས་བྱས་མོད་གྲུབ་འབྲས་གང་ཡང་ཐོན་མེད། དེ་ནི་དང་པོ་རང་ནས་གཞུང་འབྲེལ་གྱི་འབྲེལ་བ་ཡག་པོ་མ་བྱས་ནས་ཁ་ཐུག་མགོ་ཁྲིད་གཉིས་ཐུག་པར་གྲུབ་འབྲས་གང་ཡང་བྱུང་མེད། ཁོ་ནི་མི་ཡ་མེད་ཞིག་རེད། གྲོས་ཚོགས་ལ་བཀའ་བསྡུར་གང་ཡང་མེད་པར་རང་ཐག་རང་གཅོད་མང་པོ་བྱས་སོང། དམངས་གཙོའི་གཞུང་ཞིག་གི་འགྲོ་སྟངས་ཚང་མ་རྡོག་རོལ་བཏང་པ་རེད།
ཆུ་རླངས་འབྲུག་འབྱམས་ལ་ཆབ་སྲིད་ཀྱི་གོ་རྟོགས་ཆེན་པོ་འདུག མི་བུ་འདི་འདྲ་ང་ཚོ་བོད་པའི་སྤྱི་ཚོགས་ལ་དགོས་པ་ཅན་རེད། ལེགས་གསོལ་ཡོད།
མི་ཁ་ཅིག་ངོ་ཚ་ཤེས་ཀྱི་མི་འདུག མི་ཤེས་ཤེས་ཁུལ་བྱེད་ཀྱི་འདུག ཨ་རིའི་དཔལ་འབྱོར་ཡར་རྒྱས་སུ་སོང་ཡོད་པར་བདེན་པ་ར་སྤྲོད་ཟླ་སྔོན་མར་བྱས་སོང་། དེ་ནི་༡༩༦༩་ནས་ད་བར་དུ་ཨ་རིའི་ལས་མེད་ཉུང་ཤོས་ཏེ་རེད་ཟེར་ནས་གསར་འགྱུར་མང་པོས་བཤད་སོང་། སྲིད་འཛིན་དགྲ་གནོན་ལགས་ཚོང་པ་ཡག་པོ་ཡིན་མིན་ང་ཚོས་བཤད་དགོས་མ་རེད། ཁོང་གི་ཁང་བརྩེགས་ཅན་དེར་ལྟོས་དང་ལྐུག་པ་ཞིག་མིན་ན་དེ་ནས་ཤེས་སླ། Trump Tower ཟེར་བ་རེད། དེ་ནི་ནེའུ་ཡོག་གི་ས་བཟང་ས་ཞིག་ན་ཐོག་བརྩེགས་༥༨་ཡོད་པ་རེད། བན་ཏེ་མིང་ཅན་ཁྱོད་ལ་ཨ་སྒོར་འབུམ་གཅིག་ཀྱང་ཨེ་ཡོད་ན། ཕལ་ཆེར་ཅང་ཡོད་ཀྱི་མ་རེད་སྙམ། གཞན་གྱི་གདོང་ལ་བལྟ་བ་ལས་སོ་སོའི་གདོང་ལ་ཡག་པོ་ཞིག་བལྟ་རོགས་ཀྱིས། གཞན་གྱི་དངུལ་ཁང་ཅི་ཙམ་ཡོད་མེད་བལྟ་བ་ལས་རང་གི་དངུལ་ཁལ་བལྟ་རོགས་ཀྱིས། །
རང་བྱུང་ལགས་དེ་ལྟར་ན་ཁྱེད་རང་གིས་དེ་ལྟར་ཤོད་དུས་ཁྱེད་རང་ལ་ཁོ་འདྲ་བའི་ཆབ་སྲིད་ཀྱི་གོ་རྟོགས་ཡོད་དམ། མེད་ན་དེ་ལྟར་བཤད་དབང་མེད་པར་འགྱུར།
ད་ལྟའི་སྲིད་འཛིན་འདིའི་སྐབས་སུ་ཨ་རིའི་དཔལ་འབྱོར་སྐྱོ་རུ་འགྲོ་ཡི་འདུག་ཟེར་མཁན་ཚོས་འདི་ལ་བལྟ་རོགས་ཀྱིས། གཡམ་རྒྱུག་མ་བྱེད། །
https://www.whitehouse.gov/articles/unemployment-rate-falls-lowest-level-nearly-50-years-u-s-economy-adds-263000-new-jobs-april/
དགྲ་གནོན་ཁྲོ་ཕུར་འདི་ཆེས་ཕུལ་བྱུང་གི་ཨ་རིའི་སྲིད་འཛིན་དེ་ཡིན་པ་ལོ་རྒྱུས་ཀྱིས་ར་སྤྲོད་བྱེད་ཀི་རེད། རྒྱ་དམར་པོ་གཏོར་མཁན་དེ་ཁོང་ཆགས་ཀི་རེད། ཁྱེད་ཚོས་ལྟོས་སྡོད་ཨ། ད་ལྟ་ཁོང་ལ་སྐྱོན་བརྗོད་བྱེད་མཁན་དེ་དག་ལས་མང་པོ་ཞིག་ནི་ལན་ཅིན་ཧྥང་རེད། དེ་ཚོ་དུས་ཚོད་ཀྱི་སྔ་ཕྱི་ཙམ་རེད། ཚེ་མཇུག་ཨ་རིའི་བཙོན་དུ་སྐྱེལ་དགོས་འཁེལ་གི་རེད། ཧ་ཧ།
Trump གྱི་ཚོང་ཟོག་ཡོད་ན་མེད་ན་ Make America Great Again རེད་ དེའི་ཆེད་དུ་གང་ཡང་བྱེད་མཁན་ཞིག་རེད་ ཨ་རིའི་རྒྱལ་ཞེན་ཅན་ཚང་མ་ཁོ་ལ་དགའ་པོ་ཡོད་རེད་ ཁོ་རང་དང་པོ་ཚོང་པ་རེད་ དེ་ནས་སྲིད་དོན་པ་ཆག་པ་རེད་
ཚོང་པ་དང་སྲིད་དོན་པ་དང་བླ་མ་གསུམ་གྱིས་མཁེ་རག་ཐབས་སུ་གང་ཡང་བྱེད་ཀྱིས་ཡོད་པ་ནུབ་ཕྱོགས་པའི་བཤད་སྲོལ་ཡོད་རེད་ འདི་གསུམ་ཁྲིམས་ཐོག་ནས་དབང་ཆ་དང་མཁེ་རག་ཐབས་བྱེད་ཀྱིས་ཡོད་ criminal ཚོས་ཁྲིམས་འགལ་བྱས་ནས་དབང་ཆ་དང་མཁེ་རག་ཐབས་བྱེད་ཀྱིས་ཡོད་ ཚོང་ཟོག་དང་ཡུལ་ཁྲིམས་དང་མཐུན་མ་མཐུན་ཙམ་མ་གཏོགས་དོན་དུ་དབང་ཆ་དང་མཁེ་དགོས་མཁན་གཅིག་པ་རེད་དོ་
ཨ་རིའི་སྲིད་འཛིན་ཊོམ་ཕུའི་སྐོར་ལ
་
ཊོམ་ཕུ་དགྲ་གནོན་དཔའ་བོ་ཟེར། །
ལ་ལས་མོ་དད་ཆེ་ཞེས་ཟེར། །
ལ་ལས་སེམས་པ་ཐང་མེད་ཟེར། །
དོན་ལ་འོས་ཐོབ་སྲིད་འཛིན་རེད། །
་
བོད་པར་དམིགས་བསལ་འབད་མེད་ཀྱང་། །
ཕན་དགོས་མང་པོ་ཕན་བཞིན་འདུག །
སྡིག་ར་དགོས་སར་སྡིག་མོ་སྡིག །
དམག་འཁྲུགས་གསར་པ་མ་བླངས་པ། །
་
ཐོག་མར་ཨ་རི་དང་པོ་ཟེར། །
མེ་སི་ཀོ་མཚམས་རྭ་བརྩིགས་ཟེར། །
བྱང་ཕྱོགས་ཀོ་རི་ཡ་ལ་སྡིགས། །
ཐ་མར་ཀིམ་ཇོང་མཐལ་འཕྲད་བྱས། །
རྒྱ་དང་གྲ་ངར་ཚོང་དམག་བྱས། །
ཨ་རྒྱར་འགྲོ་འོང་འདྲ་མཉམ་བྱས། །
བོད་རིགས་ཨ་རི་བ་རྣམས་ཀྱང་། །
བོ་ད་ལ་འགྲོ་ཆོག་ལམ་ཆེན་བཙུགས། །
་
མོ་དད་ཆེ་ཡང་བཟའ་ཟླ་འཁྲིད་བགྱིད་འདུག
སེམས་ཐང་མེད་ཀྱང་འགོ་འཁྲིད་བྱེད་བགྱིད་འདུག །
ཚོང་པ་ཡིན་ཡང་ཆབ་སྲིད་འཁྲབ་བགྱིད་འདུག །
རྗེས་མའི་སྲིད་སྟེགས་རག་ཐབས་བྱེད་བགྱིད་འདུག །
་
གཞན་གྱིས་གང་བཤད་ཁར་མ་ལྟ། །
གཞན་གྱིས་གང་བྱས་ལས་ལ་ལྟོས། །
རང་ལ་དགོས་པའི་དེན་དེ་སྒྲུབས། །
རང་ལ་གནོད་པའི་སྐྱོན་བཤད་སྤོངས། །
ཀརྡོས།
གྲོགས་པོ་ཁ་ཅིག་དང་བསམ་ཚུལ་མཐུན་གྱི་མེད་པ་འདྲ། བསམ་ཚུལ་མ་མཐུན་པ་ནི་དགོས་གལ་ཆེན་པོ་རེད་སྙམ། ངས་འདིར་བཤད་ཐུབ་པ་ཞིག་ནི་ཨ་རིའི་མི་མང་གི་མངོན་འདོད་ནི་འཛམ་གླིང་དབང་བསྒྱུར་བསམ་བློ་རེད་མི་འདུག ཨ་རིའི་དཔལ་འབྱོར་ཡར་རྒྱས་འགྲོ་བར་རེད་སྙམ༏ ཕྱི་རྒྱལ་ཁག་ལ་འགྲོ་སོང་ཕོན་ཆེན་པོ་གཏོང་བཞིན་འདུག དེ་ནི་ཆབ་སྲིད་པ་ཚོ་ཁོ་ནས་ཁེ་ཕན་ཡིན་པ་ལས། ཨ་རི་མི་མང་ལ་ཁེ་ཕན་གང་ཡང་མེད་པ་གསལ་པོ་རེད། དེ་ནི་ད་ལྟའི་སྲིད་འཛིན་འདིས་མང་པོ་ཞིག་མེད་པ་བཟོས་པ་རེད། ང་ཚོའི་བོད་མིའི་བསྒྲིགས་འཛུགས་ཀྱི་ཡོང་སྒོའང་གཅོད་པར་བྱས་མོད། ས་གནས་འགོ་ཁྲིད་དང་བོད་མིའི་བསྒྲིག་འཛུགས་ཀྱིས་རེ་བ་ཡང་ཡང་རྒྱབ་པ་ལྟར་བཅད་མེད་པ་རེད། ཨ་རི་དམག་མི་ཕྱི་རྒྱལ་དག་གི་ནང་དུ་འཛུལ་གྱི་མ་བཞག་ན་ཡག་པོ་རེད། དེ་ནསའགྲོ་སོང་མེད་པ་ཆག་པ་རེད། །
གང་ལྟར་འཛམ་གླ྄ིང་འདིའི་ཐོག་ཏུ་ཨ་རི་ཟེར་བ་ཞིག་མེད་ན་སྒེར་གཅོད་པ་དག་གི་རླུང་རྟ་དར་ཚར་བ་རེད། དེ་བས་ཨ་རི་ཟེར་བའི་ལག་པོ་རིང་པོ་ཅན་ཞིག་ཡོད་པ་དེ་ང་ཚོ་ཉམས་ཆུང་གི་མི་རིགས་དག་གི་བསོད་ནམས་དང་རེ་བ་རེད།
ཊོམ་པུ་སྲིད་གཞུང་གིས་༧ གོང་ས་མཆོག་ཕོ་བྲང་དཀར་པོ་ནང་ལ་གདན་འདྲེན་མ་ཞུས།་ན། བོད་དེ་རྒྱ་ནག་གི་ཆ་ཤས་ཞིག་རེད་མ་ཟེར་ན། དེའི་ཆོག
ཨ་རྒྱ་གཉིས་ཀྱི་ཚོང་དམག་ལས་ལྷག་པ་ཞིག་ནི་དེང་སང་ཨ་རྒྱ་གཉིས་བར་ཚན་རྩལ་གྱིས་དམག་འཐབ་གཞི་ནས་འགོ་བཙུགས་པ་རེད། ཚན་རྩལ་འདིའི་འཇུག་འབྲས་རྒྱ་ནག་ཧ་ཅང་གི་ཉེན་ཁའི་གནས་སུ་ལྷག་པ་རེད། ཧ་ཧ་་་་
ཨ་རིའི་སྲིད་འཛིན་ཊོམ་གྱི་སྐོར་ལ་གཡམ་རྒྱུག་གི་སྐད་ཆ་མང་པོ་བྲིས་འདུག ངས་ཊོམ་རྒྱུས་ཡོད། ལོ་རྒྱུས་ཡག་པོ་ཤེས། ད་ལྟའི་གནས་སྟངས་ཡག་པོ་ཤེས།
ཊོམ་གྱི་དཔལ་འབྱོར་སྲིད་ཇུས་འགྲིག་ཡོད། ལོ་ལྟར་ཨ་རིའི་དཔལ་འབྱོར་ཇེ་སྡུག་དང་རྒྱ་ནག་གི་དཔལ་འབྱོར་ཇེ་བཟང་ལ་འགྲོ་བ་འདི་ཊོམ་གྱིས་བཀག་སོང་། འགྲིག་ཡོད།
རྒྱལ་ཁབ་ལ་རྒྱལ་སྒོ་བཟོ་བ་འདི་འགྲིག་ཡོད། ཨ་རིར་ལོ་ལྟར་ཁྱིམ་མཚེས་གྲོང་པ་མེག་སི་ཀོ་བརྒྱུད་ནས། རྒྱ་དང་། མེག་སི་ཀོ། དེ་བཞིན་ཨུ་རུ་སུ་དང་མི་ནག་མང་པོ་ཁྲིམས་འགལ་ཐོག་འཛུལ་བཞིན་ཡོད། ཊོམ་གྱིས་དེ་ཚོ་འགོག་ཐབས་བྱེད་ཀྱི་ཡོད། འགྲིག་ཡོད།
བྱང་ཀོ་རི་ཡག་དང་ཨི་རན་གྱིས་རྒྱ་ནག་དང་ཨུ་རུ་སུའི་རྒྱབ་སྐྱོར་འོག་ལ་རྡུལ་ཕྲན་མཚོན་ཆ་བཟོ་བཞིན་ཡོད། ཊོམ་གྱིས་དེ་ཚོ་མེད་པ་བཟོ་བཞིན་ཡོད། འགྲིག་ཡོད།
ད་གང་འགྲིག་མི་འདུག་གམ།
ད་དུང་རྒྱ་གར་དང་བོད་ནང་ལ་བོད་པ་མང་པོར་འཚོ་བ་དང་དཔལ་འབྱོར་ཐོག་དཀའ་ངལ་ཡོད་པ་དངོས་ཡོད་ཡིན་སྟབས། ཊོམ་གྱིས་ད་ལོ་ཨ་སྒོར་ས་ཡ་༡༧ཙམ་རོགས་དངུལ་སྤྲད་སོང་། འགྲིག་ཡོད།
སྲིད་འཛིན་སྔོན་མ་ཨོ་སྦར་མས་ཁ་ཆེའི་ལུང་པ་མང་པོ་དངུལ་འབོར་ཆེན་སྤྲད་རུང་ངོ་ཚ་རྒྱུ་མེད་པའི་རྒྱལ་ཁབ་དེ་ཚོས་རྟག་ཏུ་རྒྱ་དང་ཨུ་རུ་སུར་རྒྱབ་སྐྱོར་བྱེད་ཀྱི་ཡོད། ཊོམ་གྱི་རོགས་དངུལ་དེ་ཚོ་མེད་པ་བཟོས་སོང་། འགྲིག་ཡོད།
ད་གང་འགྲིག་མི་འདུག
མཆན་17་པས་བཤད་པ་བདེན་པ་རེད།
ཧཧཧཧཧ རྣམ་པ་ཚོས་ཨ་རའི་ཁྲོམ་རླིག་རྩོད་ཀི་འདུག ངས་ཁོང་ལ་ཁྲོམ་རླིག་མགོ་ཟེར་གིན་ཡོད། དེ་ནི་ང་རང་གི་འབོད་ཕྱོགས་ཤིག་ཡིན་པ་ལས་ཁོང་ལ་མ་དགའ་བ་དང་ཟུར་ཟ་སོགས་གང་ཡིན་མིན། དེ་ཡང་ངའི་ཉེ་འཁོར་གྱི་མི་མང་པོས་ཁྲོམཕི་ཟེར་བ་ལྕེས་མ་འཁྱོལ་ནས་ཁྲོམ་ཟེར་ནས་འབོད་སྐབས་ང་རང་གི་སེམས་ལ་ཤར་བ་དེ་ཁྲོམ་གྱི་རླིག་པ་རེད་དེ་བས་དེ་ལྟར་འབོད་པ་ཡིན། ང་ནི་གོང་གི་རང་བྱུང་རིག་རྡོར་གྱི་བཤད་པའི་ཁྲོམ་རླིག་གིས་ཨ་རའི་དཔལ་འབྱོར་གཙོ་ཅན་དུ་འཛིན་པ་དེ་འཐད་སའི་ཕྱོགས་ནི་དེ་ཡིན། རྒྱལ་ཁབ་ཞིག་སྟོབས་ཆེན་དུ་བསྒྱུར་བ་ནི་དཔལ་འབྱོར་དང་དམག་ཤུགས་རེད་ཆབ་སྲིད་ནི་གཞོག་འདེགས་ཀྱི་ཀ་བ་རེད་འདོད། ཤར་ནུབ་ཀྱི་འཕེལ་རྒྱས་ལོ་རྒྱུས་ལ་བསམ་ན་གཙོ་བོ་དཔལ་འབྱོར་དང་མདག་ཤུགས་གྱི་འཛམ་གླིང་གི་གོ་གནས་ཆེ་ཤོས་དེ་བཟུང་ནས་ཡོང་བ་རེད། ཆུ་རླུངས་ལགས་ཀྱིས་བྲིས་པ་ཤུན་ཏུ་ལེགས་ཡིན་ཡང་། ཨ་རིའི་རིན་ཐང་ནི་རང་དབང་། འདྲ་མཉམ་ཐོབ་ཐང་ཡིན་ཟེར་བ་དེ་ནི་ང་སྒེར་གྱི་བསམ་པར་སྐད་ཆ་དེ་ནི་ཨ་རི་བས་འུ་ཚོར་བོད་པ་ལྟ་བུའི་མགོ་སྨོངས་བ་དག་ལ་སྤྲད་པའི་honey སྦྲང་རྩི་རེད་འདོད། ཨ་རིའི་མི་སེར་གྱི་རང་དབང་དང་འདྲ་མཉམ་གྱི་ཐོབ་ཐང་རྫུན་པ་རེད་བཤད་པ་མིན་ལ་ནུབ་ཕྱོགས་པ་དག་ལ་མཚན་ན་དེའི་ཡོན་ཏན་ནི་ཨ་ཅང་ཅང་། འོན་ཀྱང་ཨ་རིས་ཁ་ལ་འདྲ་མཉམ་དང་ཐོབ་ཐང་ཁུར་ནས་བོད་པའི་མཚོན་པའི་ཉམ་ཆུང་གི་སྡེ་གང་མང་ཞིག་ལ་མངར་མོས་བྲིད་ནས་ཐོབ་འདོད་དང་ཉལ་སེམས་བྱས་པ་དེ་ཉུང་ཉུང་ག་ལ་ཡིན། མདག་ཆེན་གཉིས་པའི་རྗེས་ནས་ད་བར་དུ་གྱི་ཨ་རའི་གསང་ལས་དག་ལས་ཤེས་ཐུབ། དེང་གི་དུས་སུ་ཡང་ཁ་ཆེ་བའི་ཡུལ་ལུང་གང་མང་ལ་འཇིགས་སྐུལ་བར་གཏོར་བཅོམ་ལ་ཁ་གཡར་ནས་ས་དེའི་གཏེར་སྣུམ་དག་ལ་ཧམ་སེམས་ཀྱིས་རྔམས་པ་དག་རེད། འདི་ནི་སྐབས་བབ་མིན་ན་ཡང་ངས་བཤད་འདོད་པ་ནི་བོད་ཀྱི་འདས་དོན་དག་ལ་བསམ་ན་དྲིན་ཆེན་གྱི་རྒྱལ་ཁབ་རྒྱ་གར་དང་ཨ་རི་བ་དག་གིས་བཟང་མདོག་མདོག་བྱས་ཚད་ཀྱི་རྒྱབ་ལྗོངས་ག་རེ་ཡིན་པ་དང་། དོན་དངོས་སུ་ང་ཚོར་གྱོང་གུད་ག་ཙམ་བྱིན་ཡོད་པ་དག་གཞོན་གཞོན་དག་གིས་ཤེས་ཀྱིན་མེད་པ་དེ་ཡིན།