ཨེ་མ་ཧོ།
ན་མོ་གུ་རུ་པདྨ་ཀ་ར་ཡེ།།
རྣམ་རྒྱལ་ཁང་བཟང་འོད་གསལ་རིན་ཆེན་དཔལ།།
ནམ་མཁའི་དབྱིངས་སུ་བསྙེགས་པའི་དབུ་འཕང་མཐོ།།
ཡིད་འོད་རྨད་བྱུང་མཛེས་པའི་དཔའ་མཛངས་ཅན།།
སྲིད་རྒྱལ་སངས་རྒྱས་རྒྱལ་བའི་རྒྱལ་མཚན་བསྒྲེངས།།
གནའ་དེང་ཤེས་བྱ་ཟབ་རྒྱས་རྒྱ་མཚོའི་དཔལ།།
རྣམ་དཔྱོད་གསེར་མིག་ཟུང་གིས་མཁྱེན་རབ་ཅན།།
མྱུར་ཤུགས་རིག་གཞུང་གསེར་ཤོག་གཏིང་མཐའ་བརྒལ།།
སྲིད་རྒྱལ་སངས་རྒྱས་དོན་དམ་གསེར་ཉ་མཚུངས།།
ཚོགས་གཉིས་གཏེར་ཆེན་མི་བཟད་རིན་ཆེན་དཔལ།།
བསྡུ་དངོས་བཞི་ཡི་ནོར་བུའི་བང་མཛོད་གཏམས།།
གངས་ཅན་སྣོད་བཅུད་རྒུད་པ་ཀུན་སེལ་ཅན།།
སྲིད་རྒྱལ་སངས་རྒྱས་འདོད་འབྱུང་བུམ་བཟང་དངོས།།
སྲིད་ཞིའི་བདེ་སྐྱིད་དགའ་འཁྱིལ་རྫིང་བུའི་དཔལ།།
དྲི་མེད་ལྷག་བསམ་བརྩེ་དགའ་བཞད་པ་ལས།།
གཟུར་གནས་མཛའ་གྲོགས་ར་ཡིག་གཉིས་པར་འཁོར།།
སྲིད་རྒྱལ་སངས་རྒྱས་འདབ་སྟོང་པད་དཀར་རྒྱལ།།
ཀླུ་རྒྱལ་དགའ་བོའི་ཕ་ནོར་གཡས་འཁྱིལ་དཔལ།།
སྙན་ངག་ཚངས་པའི་གདངས་ལ་འགྲན་བཟོད་པ།།
བླུན་རྨོངས་གཉིད་སྟུག་དཀྲོག་པའི་སྒྲ་དབྱངས་ཅན།།
སྲིད་རྒྱལ་སངས་རྒྱས་ཆོས་དུང་དཀར་པོ་གྲགས།།
ཆོས་ཚན་མཁས་པའི་བདེན་གཏམ་རི་མོའི་དཔལ།།
ལུགས་གཉིས་འཛིན་སྐྱོང་བཀྲ་ཤིས་བདེ་ལེགས་གཟུགས།།
བརླབ་ཆེན་གཟི་བརྗིད་ལྷང་ངེ་མངོན་གསལ་ཅན།།
སྲིད་རྒྱལ་སསངས་རྒྱས་དཔལ་གྱི་བེའུ་ལེགས།།
གངས་རིའི་བསིལ་ཟེར་འཛམ་གླིང་རྒྱན་པའི་དཔལ།།
ནོར་འཛིན་དྭངས་པའི་དར་དཔྱངས་ཕན་བདེས་བཅིངས།།
མཁས་དབང་བརྒྱ་བྱིན་ལྷ་མིའི་གཙུག་རྒྱན་ཅན།།
སྲིད་རྒྱལ་སངས་རྒྱས་ཞི་བསིལ་གདུགས་དཀར་མཛེས།།
ཐུགས་སྟོབས་རྩིབ་སྟོང་འཁོར་ལོའི་བཀྲ་ཤིས་དཔལ།།
ཤེས་རིག་ཕྲ་རྒྱན་འབུམ་ཕྲག་འོད་མདངས་འབར།།
དོན་གཉིས་ཕན་བདེའི་ཕྲིན་ལས་དགེ་ལེགས་ཅན།།
སྲིད་རྒྱལ་སངས་རྒྱས་གསེར་གྱི་འཁོར་སྒྱུར་ལོ་རྒྱལ།།
རྒྱལ་ལོ་རྒྱལ་ལོ་དཀོན་མཆོག་རྩ་གསུམ་རྒྱལ།།
རྒྱལ་བསྟན་ཀུན་ཚང་གངས་ཅན་བོད་པ་རྒྱལ།།
རྒྱལ་དང་སྲས་བཅས་བཞེད་དོན་ལྷུན་གྲུབ་རྒྱལ།།
རྒྱལ་ཁམས་ཞི་བདེ་སྣང་བས་རྟག་ཁྱབ་སྨོན།།
ཞེས་པ་འདི་ཡང་རབ་གནས་མེ་སྤྲེལ་ཟླ་ཚེས་དགེ་བར་ནང་མཆེད་དམ་པས་སྐུལ་ངོར་དང་རྨི་ལམ་བཟང་པོའི་རྟེན་འབྲེལ་ལས་གང་ཤར་བདེན་པའི་རྒྱལ་གླུ་ཐོལ་བྱུང་དུ་དབྱིན་ཡུལ་གངས་ལྡན་རི་བོས་མགུལ་ནས་མཁས་དབང་དམ་པ་དྲི་མེད་ལྷག་བསམ་མཆོག་གིས་གནང་བའི་རྨི་ལམ་དབང་ཕྱུག་ཏུ་འབོད་པས་བླངས་པར་དགེའོ།། དགེའོ།། དགེའོ།།
འོས་མི་མང་གི་ཕུལ་ངོ་གསོ་ཕྱོགས་གཏོགས་ཚོའི་བསྟོད་སྲིད་སྐྱོང་བློ་བཟང་སེང་གེ་བསམ་མེད་བྱི་བ་ཞིག་ཨ་ཡིན་ཧཧཧ
དེ་ཁོའི་ཕྱོགས་གཏོགས་ཀྱི་བྱེད་ལས་རེད། གཞུང་པ་མངའ་རིས་པ་རྣམས་སྙིང་ནའང་ཡག་པོ་མགུ