ཡོང་ཁུངས། བོད་མིའི་སྒྲིག་འཛུགས་དྲ་རྒྱ
སྲིད་སྐྱོང་མཆོག་གིས་འཇིགས་སྐུལ་དྲག་སྤྱོད་པས་རྒྱལ་ས་པེ་རི་སིར་མི་གསོད་ཁྲག་སྦྱོར་གྱི་ལས་འགུལ་ལ་སྐྱོན་བརྗོད་དང་སྦྲགས་ཤུལ་ལུས་ནང་མི་རྣམས་ལ་སེམས་གསོ་གནང་བ།
༄༅། །ཕྱི་ལོ་༢༠༡༥ ཟླ་༡༡ ཚེས་༡༣ ཉིན་གྱི་དགོང་མོར་ཕ་རན་སི་རྒྱལ་ས་པེ་རི་སིར་འཇིགས་སྐུལ་དྲག་སྤྱོད་པས་འབར་རྫས་དང་མེ་མདའ་བརྒྱབ་ནས་མི་གྲངས་ ༡༢༩ རྐྱེན་ལམ་དུ་བཏང་བ་མ་ཟད། མི་གྲངས་ ༣༥༢ ལ་རྨས་སྐྱོན་བཏང་བར་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེངྒེ་མཆོག་གིས་ཐུགས་གསོ་དང་སྦྲགས། གདུང་སེམས་མཉམ་སྐྱེ་ཞུས་ཐོག་ཀླ་ཀློའི་བྱ་སྤྱོད་དེར་མཐའ་གཅིག་ཏུ་སྐྱོན་བརྗོད་གནང་དོན། ངོས་ཀྱིས་ད་རེས་འཇིགས་སྐུལ་དྲག་སྤྱོད་པས་གནོད་འཚེ་འོག་འདས་གྲོངས་སུ་ཕྱིན་པའི་ཤུལ་ལུས་ནང་མི་དང་རྨས་སྐྱོན་ཕོག་པ་རྣམས་ལ་གདུང་སེམས་མཉམ་སྐྱེ་དང་མྱ་ངན་གུས་འདུད་ཞུ་རྒྱུ་མ་ཟད། ལོག་ལམ་དུ་འཆོལ་བཞིན་པའི་རྨོངས་ཞེན་ཅན་གྱི་མི་སྣ་ཐ་ཤལ་བ་ཁག་གཅིག་གིས་འཚེ་བའི་བྱ་སྤྱོད་སྤེལ་བ་དེར་མཐའ་གཅིག་ཏུ་སྐྱོན་བརྗོད་བྱ་རྒྱུ་ཡིན།
འཇིགས་སྐུལ་རིང་ལུགས་ཀྱི་བྱ་སྤྱོད་དེ་ནི་འགྲོ་བ་མི་རིགས་སྤྱི་ལ་རྒོལ་བརྡུང་བཏང་བ་ཞིག་ཡིན་པ་དང་། བྱ་སྤྱོད་སྤེལ་མཁན་དེ་དག་གིས་སྤྱི་ཚོགས་དང་ཆོས་ལུགས་གང་ཡང་མཚོན་མི་ཐུབ་པ་མ་ཟད། ཐ་ཤལ་ཅན་གྱི་བྱ་སྤྱོད་དེ་དག་འགྲོ་བ་མིའི་རིགས་ལ་རྙོག་གྲ་བཟོ་རྒྱུ་ལས་བཟང་སྤྱོད་དང་ཆབ་སྲིད། ཆོས་ཕྱོགས་སོགས་གང་ཅིར་འབྲེལ་བ་རྩ་བ་ནས་མེད།
ཐེངས་འདིར་འཇིག་སྐུལ་དྲག་སྤྱོད་པས་ཕ་རན་སིར་རྒོལ་བརྡུང་བཏང་བར་རྒྱལ་སྤྱིའི་སྤྱི་ཚོགས་ཁྱོན་ཡོངས་ཀྱིས་མཉམ་རུབ་ཐོག་འཇིགས་སྐུལ་རིང་ལུགས་པར་གདོང་ལེན་གནང་སྟེ་བརྟན་ལྷིང་དང་བདེ་འཇགས་བསྐྱར་གསོ་ཐུབ་དགོས་པ་དྲན་སྐུལ་བཏང་ཡོད། དཀའ་ཚེགས་ཆེ་བའི་དུས་སྐབས་འདིར་བོད་མི་རྣམས་ཀྱིས་ཕ་རན་སི་མི་མང་ཡོངས་ལ་གདུང་སེམས་མཉམ་སྐྱེའི་རྒྱབ་སྐྱོར་ཞུ་རྒྱུ་ཡིན། ཞེས་འཁོད་ཡོད།།
སྲིད་སྐྱོང་མཆོག་གིས།
་་་་་་་་་ དཀའ་ཚེགས་ཆེ་བའི་དུས་སྐབས་འདིར་བོད་མི་རྣམས་ཀྱིས་ཕ་རན་སི་མི་མང་ཡོངས་ལ་གདུང་སེམས་མཉམ་སྐྱེའི་རྒྱབ་སྐྱོར་ཞུ་རྒྱུ་ཡིན། ་་་་་་་་
དུས་ནམ་ཞིག་ཡིན་ཡང་བོད་ལ་བཙན་གནོན་དང་འཇིགས་སྐུལ་དྲག་སྤྱོད་བྱེད་མཁན་རྒྱ་གཞུང་ལ་ཅི་ཡང་བསྒྲགས་མི་ཐུབ་པར། གཞན་ལ་བོད་མི་མང་གི་མིང་ཐོག་ནས་གང་བྱུང་མིན་བྱུང་མ་བསྒྲགས་ན་ལེགས་པར་མཐོང་།
དྲང་པོ་བཤད་ན། ཏཱ་ལི་བླ་མའི་ཆོས་ལུགས་མཐུན་འབྲེལ་གྱི་བྱ་འགུལ་དེ་དུས་ཚོད་འདི་དང་སྟབ་བསྟུན་ནས་རྒྱལ་སྤྱིའི་ཐོག་ཏུ་ཕེབས་པ་ཡིན་པ་ཡིན་ན་གོ་སྐབས་ཤིག་རེད།