སྲིད་སྐྱོང་བློ་བཟང་སེངྒེ་ལ་འོས་ཚིག་བཀྲ་ཤིས་རྟགས་བརྒྱད།

དཔལ་དགྱེས་པ་རྡོ་རྗེ།
 

༧མཁས་དབང་འབུམ་རམས་པ་དཔལ་ལྡན་སྲིད་སྐྱོང་བློ་བཟང་སེངྒེ་ལ་འོས་ཚིག་བཀྲ་ཤིས་རྟགས་བརྒྱད་ཅེས་བྱ་བ་བཞུགས་སོ།།

བླ་མ་དཀོན་མཆོག་གསུམ་ལ་ཕྱག་འཚལ་ལོ།། དེ་ཡང་སོ་སོས་བདམས་པའི་དཔོན་པོ་དེ་བདེན་པ་དང་རང་གིས་ཡིད་ཆེས་བྱེད་ཆོག་པ་དང་གཞན་དོན་དང་སྤྱི་ཕན་ལ་འབད་པ་ཞིག་དགོས་པ་སྨོས་ཅི་དགོས། མང་གཙོ་ཟེར་བ་དེ་ཡང་རྒྱུ་ནོར་དཔུང་ཤུགས་ལ་བརྟན་པ་མ་ཡིན་པར་བདེན་པའི་བགྲོ་གླེང་དང་བཟང་སྤྱོད་དགོས་པར་ཆོས་ལྡན་བོད་ཀྱི་ལམ་ལུགས་ལ་མོས་གུས་དད་པ་ཕྱི་གསལ་ནང་གསལ་བྱུང་བར་རང་ངོས་ནས་དགའ་སྤོབས་བཅས་སྨྲས་ན་འདི་ལྟར།

༡༽ འདས་པའི་ལོ་རྒྱུས་རིང་མོར་སྤྱི་ཕན་མཛད་བཟང་གི་བརླབ་ཆེན་ལ་བདེན་པ་ཕྱི་གསལ་ནང་གསལ་གྱིས་ལོ་ངོ་བཞི་ལྔའི་རིང་ལ་སྲིད་སྐྱོང་བློ་བཟང་སེང་གེ་མཆོག་གིས་གཉིས་སྨན་དབུ་མའི་བུམ་པ་བཟང་པོའི་ལམ་ལུགས་འཛམ་གླིང་ཤར་ནུབ་དུ་གཟི་བརྗིད་འབར་བའི་འོད་སྣང་ལ་ཉི་ཤར་ལག་པས་མི་ཁེབས་པའི་དཔེ་ལྟར་རྒྱ་དོལ་འུག་པའི་མིག་ལ་ཚ་གཟེར་ཞིག་སྟེར་བ་ནི་ཀུན་གསལ་མེ་ལོང་དུ་ཤར་བ་ལྟར་བྱུང་བ་ནི་སྒེར་མི་འགའ་རེར་སོ་སོའི་རྐུབ་སྟེགས་དང་བོད་དོན་གཉིས་ལས་རྐུབ་སྟེགས་གལ་ཆེན་བྱེད་པ་དང་གཏན་ནས་འདྲ་མ་སོང་བས་ཡིད་ཆེས་བྱུང་ངོ་།།

༢༽ གཙོ་བོ་གངས་ཅན་པ་གཞི་བྱེས་གཉིས་ལ་རང་གི་སྲིད་སྐྱོང་ཡོད་པས་ཆིག་སྒྲིལ་གྱི་རྣམ་པ་གཞན་དང་མ་འདྲ་བ་ཞིག་བྱུང་བ་ནི་སྐྱ་མིན་སེར་མིན་གྱི་གཞུང་འཛིན་ཞིག་མིན་པར་སྐྱ་བོ་ཆོས་དད་ཤེས་ཡོན་གྱི་འཛམ་གླིང་རྩེར་སོན་པའི་སློབ་མཐར་ཕྱིན་པ་ཞིག་གིས་སྲིད་སྐྱོང་བ་དུས་རབས་ཉེར་གཅིག་པར་བོད་ལ་ཐོག་མར་ཆགས་པ་ནི་དགའ་འོས་པ་དང་དེ་ཡང་ཤེས་བརྩེ་གཉིས་ལྡན་གྱིས་བོད་ཀྱི་རང་དབང་སླར་གསོ་བྱ་བྱེད་ཀྱི་སྲོག་རྩ་ཡིན། འདས་པའི་ལོ་བཞིའི་རིང་ལ་ལོ་རྒྱུས་ཐོག་བྱུང་མྱོང་མེད་པའི་ཆིག་སྒྲིལ་དང་གསོན་ཉམས་དོད་པའི་བོད་རང་འགུལ་གྱིས་སྲིད་སྐྱོང་བློ་བཟང་སེང་གེ་ལགས་ཀྱིས་ཕྲིན་ལས་ཀྱི་དུང་སྒྲ་སྙན་མོས་བོད་མིའི་དབུ་རྣ་འཛམ་གླིང་དང་ཁྱད་པར་རྒྱ་ནག་ལ་མི་བཟོད་པའི་རྣ་རྦུག་ལ་ཟུག་ངུ་གསར་བ་ཞིག་སྤྲད་པར་བོད་མིའི་ཚེ་སྲོག་གི་མཛད་བཟང་ཞིག་ཏུ་ཡིད་ཆེས་རྙེད་པའོ།།

༣༽ མི་ལོ་དྲུག་ཅུའི་རིང་སྐུ་ངལ་ཚད་མེད་པ་དང་སྐུ་ངལ་ཡིན་རིང་མ་སོས་པའི་༧གོང་ས་མཆོག་ཀྱང་སྐུ་ཚེའི་ནང་ནང་ངལ་གསོས་དུས་ཡུན་རིང་ཤོས་དེ་ཨ་རིའི་གྲོང་ཁྱེར་མི་ནི་སོ་ཊ་མ་ཡོ་སྨན་ཁང་དུ་ (Prostate) ཞེས་ལྒང་པའི་སྨན་བཅོས་དང་སྐུའི་ངལ་གསོ་ཟླ་གཅིག་ལྷག་བཅས་མཛད་པ་ནི་མཛད་དཀའ་ལྟ་ཅི་མཛད་རྒྱས་ལེགས་གྲུབ་བྱུང་བ་ནི་ཆོས་འཇིག་རྟེན་ལ་ཕྱག་རྗེས་པདྨ་དཀར་པོ་ལྟ་བུ་གནང་ཡོད་པས་ཡིད་ཆེས་དང་གུས་བཀུར་བྱས་པ་ཡིན་ནོ།།

༤༽ དམིགས་བསལ་གྱི་ཁྱད་ཆོས་ནི་སྲིད་སྐྱོང་བློ་བཟང་སེང་གེ་ནི་བླ་མ་ལ་ངོ་ལྐོག་མཚུངས་པའི་དད་གུས། ཕ་མའི་བྱམས་བརྩེ་ལ་བྱས་ཤེས་དྲིན་བཟོ་མཁན། གཙུག་ལག་འབུམ་རམས་པ་ཆེན་པོ་ཞིག་ལ་འཇིག་རྟེན་བོད་མིའི་སྐུ་དྲག་ཚོས་བྱེད་སྟངས་ལས་ལྡོག་སྟེ་འཕགས་ཡུལ་དྷ་རམ་སྰ་ལ་ནས་ལ་དྭགས་སོགས་ཕྱི་ཕྱོགས་ཀྱི་བོད་འབངས་ཉམ་ཆུང་བྱིས་པ་ནས་ཆེ་དབུ་དཀར་ཡན་ཆོད་ལ་སྲིད་སྐྱོང་ཉིད་འབངས་མི་གཅོས་མ་སྙིང་རྗེ་ཆེན་པོ་ཅན་ཞིག་ཡོད་པར་ཉམ་ཆུང་ཚོས་དགའ་དུང་དང་རོགས་དན་གནང་བ་ཚོ་ལ་ཐུན་མིན་བོད་ཀྱི་ཁྱད་ཆོས་བཞིན་སྡུག་བསྔལ་གྱི་ཚ་གདུང་སེལ་བའི་གདུགས་དཀར་མཛེས་པ་ཞིག་མངོན་པས་ཡིད་ཆེས་དང་བརྩི་བཀུར་ཡོད་དོ།།

༥༽ གངས་ལྗོངས་རྒྱལ་ས་གཉིས་པའི་གདན་ས་དྷ་རམ་སྰ་ལར་དམངས་གཙོ་ཀ་བ་གསུམ་དང་གཞུང་འབྲེལ་ཡིན་མིན་གྱི་མང་གཙོའི་ལམ་ལུགས་ནས་འོས་འདེམས་བྱས་པའི་སྲིད་སྐྱོང་བློ་བཟང་སེང་གེ་ལགས་ཀྱིས་དེང་རབས་ཀྱི་ཤེས་ཡོན་དང་དཔལ་འབྱོར་ཉིས་བརྩེགས་ཀྱིས་གོང་འཕེལ་གཏོང་ཞིང་ཆོས་དཔལ་རིག་པའི་ཡོན་ཏན་གྱི་དཔལ་བེའུའི་མཛད་བཟང་གི་རི་མོ་བསུབ་ཏུ་གྲལ་བའི་རྨིང་གཞི་བརྟན་པོ་ཞིག་དུས་རབས་ཉེར་གཅིག་པའི་གངས་ཅན་པ་ཡོངས་ལ་དམིགས་དཔེ་ལེགས་ཤོས་སུ་གནང་བར་ཡིད་ཆེས་དང་དགའ་སྤྲོ་ཆེན་པོ་བརྟས་སོ།།

༦༽ གོང་ས་མཆོག་ལ་ལག་བྱིས་དང་སྤུན་ཟླ་ཕུ་ནུའི་ནང་ལ་དཔུང་ངོམས་མི་དགོས་པར་བདེན་པ་སྨྲ་མཁས་དཔའ་བོ་རྒྱལ་ཐུབ་པའི་དྲང་བདེན་རིགས་པའི་དཔའ་བོས་རྒྱལ་སྤྱི་རང་བཞིན་ལྡན་པའི་སྟོབས་ཆེན་གྱི་རྒྱལ་པོ་སྲིད་འཛིན་ཁག་གི་གཙོ་འཛིན་ཚོ་དང་དཔུང་བ་བཤུབས་ཐུབ་པའི་ཕོ་རྒོད་སྤྱང་དྲང་གཉིས་ལྡན། གངས་ཅན་བསྟན་སྲིད་ཀྱི་ཆོས་འཁོར་ཕྱོགས་ཀྱི་མུ་མཐའ་བསྐོར་ནུས་པས་རྒྱལ་འགོང་དམ་སྲིས་ཀླད་ཁྲག་གཏོར་ནུས་པ་ཞིག་བཟོས་པ་ཡང་ང་ཚོས་རང་ནས་སྙིང་དུ་བརྣག་པའི་དུས་འབྲས་གཡུར་དུ་སྨིན་པར་འཇིག་རྟེན་ཡ་རབས་དམ་པའི་སྤྱོད་པ་བཟང་པོ་ཡིན་པར་སྨོས་ཅི་དགོས།།

༧༽ ཤེས་བརྩེ་གཉིས་ལྡན་གྱི་སྲིད་སྐྱོང་སྲིད་སྐྱོང་བློ་བཟང་སེངྒེ་མཆོག་གིས་གསང་རྒྱ་དམ་པོས་བོད་རྒྱ་ཞི་མོལ་གྱི་ཟམ་པ་གཙུགས་ཤིང་མཁས་པས་མཁས་པའི་བར་དང་ཚོང་དཔོན་དང་ཚོང་དཔོན་བར་འབྲེལ་ནས་ལུགས་གཉིས་ཀུན་མཐུན་གྱི་སྤྱན་རིས་གསེར་ཉའི་འཛུམ་མདངས་ལ་གཙོ་དང་ཟུར་ནས་ཕག་དང་ལུག་གིས་རྟུལ་ཞུགས་འཛིན་པ་དག་ལ་བྭམས་དང་སྙིང་རྗེས་དགའ་དང་གུས་པའི་རྣམ་འགྱུར་བཅས་བྱེད་དགོས་པར་མཛད་དཀའ་རྒྱལ་བའི་སྲས་ཀྱི་སྤྱོད་པ་རྟག་ཏུ་གངས་ཅན་བོད་འབངས་ཡོངས་ལ་སྤྱི་ཕན་གནང་བའི་དེད་དཔོན་གནང་བ་ནི་གངས་ཅན་བོད་འབངས་ཡོངས་ཀྱི་སྐལ་མཉམ་གྱིས་བསོད་ནམས་བསགས་པའི་འབྲས་བུ་ཡང་དག་ཅིག་ཡིན་པར་སྨོས་ཅི་འཚལ།།

༨༽ ཕྱི་ནང་གསང་བའི་འགལ་རྐྱེན་དང་གཞི་མེད་ཀྱི་སྒྲོ་བཀུར་ངན་པའི་རིགས་ལ་མི་འཇིགས་སྤོབས་པའི་སེངྒེའི་ང་རོ་རྒྱལ་ཁམས་སུ་ཁྱབ་ཅིང་རྒྱ་དམར་དྲག་པོས་དཔུང་ཆེན་ལ་ཕ་ཡབ་ཞལ་དཀར་དཔའ་བོའི་སྙིང་སྟོབས་ལྡན་ཞིང་བཀའ་ཟུར་བན་རྒོད་དང་གྲྭ་རྒོད་ཀྱི་ཅི་འདྲི་བ་དག་ལ་བཀའ་ལན་གནམ་ལྕགས་ཀྱི་ཐོག་འདྲ་བས་དྭོགས་པའི་ཕུང་པོ་རྡུལ་ཕྲན་ཐལ་བར་གཏོར་བའི་སྨྲ་མཁས་དབང་པོ། བསྟན་པའི་རྒྱལ་མཚན་མི་ནུབ་གཡོ་བ་མེད་པར་ཛམ་གླིང་གོ་ལ་ཟླུམ་པོའི་ཡངས་སྟེང་ལ་འཛུགས་པའི་གངས་ཅན་བོད་པའི་སྲིད་རྒྱལ་མི་དབང་བློ་བཟང་སེངྒེ་ལ་སྲིད་རྒྱལ་འོས་ཤིང་འཚམས་པར་དུང་ལེན་དང་རྒྱ་ཁའི་ཁ་གཡང་བཅས་བསྒྲགས་ན་དབྱིངས་ན་བཞུགས་པའི་རྒྱལ་བ་སྲས་དང་བཅས་པ་དང་གངས་ཅན་བསྟན་སྲུང་རྒྱ་མཚོས་སྲིད་སྐྱོང་བློ་བཟང་སེངྒེས་གངས་ཅན་བསྟན་སྲིད་ལ་བླ་ན་མེད་པའི་མཛད་བཟང་དར་སྨན་རྒྱས་པའི་མཐུན་འགྱུར་མཛད་པར་གྱུར་ཅིག་གུ།།

ཞེས་པ་འང་རབ་གནས་མེ་སྤྲེལ་ཟླ་ཚེས་དགེའི་བར་ཨེ་ཝྃ་ཡིད་བཞིན་ནོར་བུའི་ཆོས་ཚོགས་ཁང་ནས་རིག་འཛིན་དཔལ་དགྱེས་པ་རྡོ་རྗེས་ཕྱི་ལོ་ཟླ་ཚེས་༣་༡༣་༢༠༡༦ ལའོ།