སྲིད་སྐྱོང་བློ་སེང་གིས་༧རྒྱལ་བ་རིན་པོ་ཆེར་ངོ་རྒོལ་བྱེད་ཀྱི་འདུག

ནམ་མཁའ།

གོང་གི་རྩོམ་བྱང་འདི་བཀོད་དེ་བྲིས་བའི་འོག་གི་བསམ་ཚུལ་དང་པོ་འདི་ནི། སྲིད་སྐྱོང་བློ་སེང་གིས་༧གོང་ས༧རྒྱལ་བ་རིན་པོ་ཆེ་ལ་སྲིད་ཕྱོགས་ནས་དབང་ཆ་མེད་པའི་རྣམ་པ་སྟོན་ཕྱིར་དུ། ཚོགས་ཟུར་སྤེན་པ་ཚེ་རིང་ལགས་ཀྱི་མགོ་ལ་ཞྭ་མོ་ནག་པོ་གཡོག་སྟེ། ཨ་རིའི་དོན་གཅོད་ནས་གནས་དབྱུང་བཏང་དུས་བྲིས་པ་ཞིག་ཡིན་མོད། འོན་ཀྱང་དེ་རིང་བར་དུ་དྲ་ཐོག་ཏུ་མ་བཀོད་པར་བཞག་པ་ཡིན། དེ་ལྟར་འཇོག་དགོས་བའི་རྒྱུ་མཚན་ནི། བོད་ཆོལ་གསུམ་ཆིག་སྒྲིལ་ཞིག་བྱུང་ན་བསམ་པའི་རེ་བ་རྒྱབ་སྟེ་མ་བཀོད་པ་ཡིན། ཡིན་ན་ཡང་། ཁ་སང་དེ་རིང་ཡང་བསྐྱར་སྲིད་སྐྱོང་བློ་སེང་ཨ་རིའི་ཕོ་བྲང་དཀར་པོའི་ནང་དུ་ཕེབས་ཐུབ་པའི་ང་རྒྱལ་གྱིས་༧གོང་ས༧རྒྱལ་བ་རིན་པོ་ཆེ་ལ་མངོན་སུམ་དོད་པོས་ངོ་རྒོལ་དང་འབྲེལ་མཐོང་ཆུང་ལྟ་བུ་བྱས་སོང་པས། ངའི་སེམས་ནས་བཟོད་སྒོམ་བྱེད་ཐབས་བྲལ་པས་འདིར་བཀོད་པ་ཡིན་ལ། བསམ་ཚུལ་ཐུང་ངུ་འདི་ཀློག་མཁན་ཚོས་ཀྱང་དེ་ལྟར་བསམ་གཞིགས་བྱེད་ཐུབ་པའི་རེ་བ་ཡོད།

དང་པོ། བློ་སེང་དང་སྤེན་ཚེ་གཉིས་ཀྱི་སྲིད་སྐྱོང་གི་འོས་བསྡུ་མཇུག་སྒྲིལ་རྗེས། སྐུ་ངོ་ཚོགས་ཟུར་སྤེན་པ་ཚེ་རིང་ལགས་ཨ་རིའི་དོན་གཅོད་ལ་བསྐོ་བཞག་གནང་ཞིང་། ཚོགས་ཟུར་སྤེན་ཚེ་མཆོག་གིས་ཨ་རིའི་དོན་གཅོད་ཀྱི་ཕྱག་ལས་གནང་བཞིན་པའི་སྐབས་དེར། ༧གོང་ས༧མཆོག་ཨ་རི་ལ་ཕེབས་ཞིང་། ཨ་རིའི་གྲོས་ཚོགས་གོང་འོག་གང་ཞིག་ཡིན་མིན་དེ་རིང་ཡིད་ངོགས་སུ་གསལ་བོ་མེད་ཀྱང་། ༧གོང་ས༧མཆོག་དང་ཨ་རིའི་གྲོས་ཚོགས་ཀྱི་འཐུས་མི། དེ་བཞིན་དུ་སྲིད་སྐྱོང་བློ་སེང་ཚོགས་ཟུར་སྤེན་པ་ཚེ་རིང་ལགས་བཅས། སྐུ་འཁོར་གནད་ཡོད་ཡོངས་ཅོག་ཙེ་གཅིག་གི་མཐའ་སྐོར་ནས་བཞེས་ལགས་མཆོད་བཞིན་འདུག་པ་མཐོང་པས་ཡིད་སེམས་སྤྲོ་བ་ཞིག་རེད། མཛད་སྒོ་དེ་རྫོགས་མཚམས་སུ་༧གོང་ས༧མཆོག་གིས་ཚོགས་ཟུར་སྤེན་པ་ཚེ་རིང་བཙལ་ཏེ། ཨ་རིའི་གྲོས་ཚོགས་ཀྱི་འཐུས་མི་ཞིག་ལ་སྐུ་ངོ་སྤེན་པ་ཚེ་རིང་ངོ་སྤྲོད་བྱས་ནས། ང་ཚོའི་ཨ་རིའི་དོན་གཅོད་གསར་པ་ཁོ་རང་ཡིན་པས་ཁྱེད་ཚོས་ཁོ་ལ་རོགས་རམ་ག་རེ་གནང་དགོས་ན་རོགས་པ་བྱེད་རོགས་ཅེས་ངོ་སྤྲོད་གནང་སྟངས་ནི། ཕ་ཞིག་གིས་རང་གི་བུ་གནད་ཡོད་མི་ཞིག་ལ་ངོ་སྤྲོད་བྱེད་པ་དང་གཅིག་མཚུངས་སུ་མཐོང་པས། སྐབས་དེར་ང་རང་གི་སེམས་སུ་༧གོང་ས༧མཆོག་ཐུགས་དཀྱིལ་ནས་བོད་ཀྱི་བདེ་སྡུག་ནི་དུས་ཚོད་སྐར་ཆ་གཅིག་ལ་ཡང་བློས་གཏོང་བྱེད་མི་འདུག་སྙམ་སྟེ། ང་རང་ཉིད་ཀྱི་སེམས་གཏིང་ནས་སྨྲེངས་སུ་བཅུགས་སོང་།

ཚོགས་ཟུར་སྤེན་པ་ཚེ་རིང་ལགས་ཀྱིས་ཨ་རིའི་དོན་གཅོད་གནང་བའི་སྐབས་དེར། ཨ་རིའི་གྲོས་ཚོགས་འཐུས་མི་མང་པོ་རྡ་རམ་ས་ལར་གདན་འདྲེན་ཞུས་ཏེ་བཙན་བྱོལ་བོད་མིའི་སྒྲིགས་འཛུགས་ངོ་སྤྲོད་བྱས་ཤིང་། ཨ་རི་དང་ཁེ་ཎ་ཊ་བཞུགས་པའི་བོད་རིགས་སྤྱི་མཐུན་ཚོགས་པ་སོ་སོ་ལ་འབྲེལ་བ་བྱས་ཏེ། སྐུ་ངོ་ཁོ་རང་སྐུ་དངོས་སུ་ཨ་རིའི་གྲོང་ཁྱེར་འདྲ་མིན་དང་ཁེ་ཎ་ཊ་སོགས་སུ་ཕེབས་ནས་བཙན་བྱོལ་བོད་མིའི་སྒྲིགས་འཛུགས་དང་༧གོང་ས༧མཆོག་གི་བཀའ་དགོངས་ཅི་བཞིན་འགྲེལ་བཤད་བྱས་ཡོད། ང་རང་ཉིད་ཀྱི་མཐོང་སྣང་ལ་དེའི་སྔོན་གྱི་ཨ་རིའི་དོན་གཅོད་ཚོས་ལས་དོན་དེ་འདྲ་སྒྲུབ་ཐུབ་མེད། ཚོགས་ཟུར་སྤེན་པ་ཚེ་རིང་ལགས་ཨ་རིའི་དོན་གཅོད་གནང་བའི་དུས་ཡུན་ཐུང་ངུ་དེའི་རིང་ལ། ཨ་རིའི་གནད་ཡོད་མི་སྣ་དང་བོད་རིགས་ཚོགས་པ་ཡོངས་ལ་ནུས་པ་ཆེན་པོ་ཞིག་ཐོན་དང་ཐོན་བཞིན་ཡོད་པའི་སྐབས་དེ་འདྲ་ཞིག་ལ།

སྲིད་སྐྱོང་བློ་སེང་དང་ཚོགས་ཟུར་གཉིས་ཀྱི་སྲིད་སྐྱོང་འོས་བསྡུའི་འགྲན་རྩོད་ཀྱི་ན་ཟུག་དེ། སྲིད་སྐྱོང་བློ་སེང་གི་སེམས་ནས་ཡལ་མེད་སྟབས་ཡང་བསྐྱར་ན་ཟུག་དེ་སློང་རྐྱེན་གོང་དུ་ཞུས་ཟིན་པའི་གནད་དོན་འགའ་སྟེ། ༧གོང་ས༧རྒྱལ་བ་རིན་པོ་ཆེ་ཡིས་སྐུ་ངོ་སྤེན་པ་ཚེ་རིང་ཨ་རིའི་དོན་གཅོད་ལ་བསྐོ་བཞག་གནང་བ་ལ། སྲིད་སྐྱོང་བློ་སེང་ལ་འདོད་པ་མེད་པར་མ་ཟད། སྲིད་སྐྱོང་ཁོ་རང་ཡོད་སར་ཨ་རིའི་གྲོས་ཚོགས་འཐུས་མི་ཚོར་སྐུ་ངོ་སྤེན་པ་ཚེ་རིང་ངོ་སྤྲོད་བྱས་པ་དེ་ཡང་སྲིད་སྐྱོང་བློ་སེང་གི་བློ་ལ་འགྲོ་མེད། ལྷག་པར་དུ་སྐུ་ངོ་སྤེན་པ་ཚེ་རིང་ཨ་རིའི་དོན་གཅོད་གནང་ཡུན་རིང་ལ། ཨ་རིའི་གྲོས་ཚོགས་འཐུས་མི་འགའ་རྡ་སར་གདན་འདྲེན་ཞུས་པ་དང་། ཨ་རི་དང་ཁེ་ཎ་ཊ་ཡི་གྲོང་ཁྱེར་སོ་སོར་ཕེབས་ཏེ་བོད་རིགས་ཡོངས་ལ་འབྲེལ་གཏུགས་བྱས་པ་སོགས་སྐུ་ངོ་སྤེན་ཚེ་ཡི་འཇོན་ཐང་ལ་ཕྲག་དོག་སྐྱེས་ཏེ། སྲིད་སྐྱོང་བློ་སེང་གི་བློ་ལ་རྩ་བ་ནས་འགྲོ་གི་མེད་སྟབས། གོ་སྐབས་བཙལ་ཏེ་སྐུ་ངོ་སྤེན་པ་ཚེ་རིང་གི་མགོ་ལ་ཞྭ་མོ་ནག་པོ་གཡོགས་པ་རེད།

གང་ལྟར་ཡང་། ཡང་བསྐྱར་སྲིད་སྐྱོང་བློ་སེང་གི་སེམས་སུ་ན་ཟུག་སྐྱེས་ཞིང་། ལྷག་པར་དུ་སྲིད་སྐྱོང་གི་སེམས་སུ་སྦས་ཏེ་ཕྱི་ལ་བཏོན་མ་ཐུབ་པའི་སྲིད་ཕྱོགས་ཀྱི་དབང་ཆ་ཁོ་རང་གཅིག་པོ་ལས། ཐ་ན་༧གོང་ས༧རྒྱལ་བ་རིན་པོ་ཆེ་སོགས་གཞན་སུ་ལ་ཡང་མེད་པའི་རྣམ་པ་སྟོན་ཆེད། སྐུ་ངོ་སྤེན་པ་ཚེ་རིང་ཨ་རིའི་དོན་གཅོད་ནས་གནས་དབྱུངས་བཏང་བ་རེད། སྲིད་སྐྱོང་བློ་སེང་གི་བྱེད་སྟངས་འདིས་གང་ཞིག་མཚོན་ཐུབ་ཟེར་ན། ༧གོང་ས༧རྒྱལ་བ་རིན་པོ་ཆེར་ཁྱེད་རང་ཆོས་ཕྱོགས་ཀྱི་དབུ་ཁྲིད་ཡིན་པ་ལས། སྲིད་ཕྱོགས་ནས་སྐུ་ཚབ་དོན་གཅོད་བསྐོ་བཞག་སོགས་བྱེད་པའི་དབང་ཆ་མེད་པའི་རྣམ་པ་བསྟན་སྟེ། དོན་དངོས་སུ་༧གོང་ས༧རྒྱལ་བ་རིན་པོ་ཆེ་ལ་ངོ་རྒོལ་བྱེད་ཀྱི་ཡོད་པ་རེད། དེ་མིན་སྐུ་ངོ་སྤེན་པ་ཚེ་རིང་ཨ་རིའི་དོན་གཅོད་ནས་བརྗེ་བོ་རྒྱག་སྐབས། ཨ་རི་དང་ཁེ་ཎ་ཊ་ཡོ་རུབ་སོགས་སུ་སྲིད་སྐྱོང་ཕེབས་དུས། ས་གནས་གང་ས་ནས་བོད་རིགས་ཚོ་ཡར་ལངས་ཏེ་ངོ་རྒོལ་བྱེད་དགོས་དོན་མེད། བཙན་བྱོལ་བོད་མི་ཚོས་བསམ་བློ་ཞིབ་མོ་ཞིག་ཐོངས་དང་། ཨ་རི་དང་ཁེ་ཎ་ཊ་ཡོ་རུབ་སོགས་སུ་ཁོ་ལ་ངོ་རྒོལ་བྱེད་པའི་སྐབས། སྲིད་སྐྱོང་ཁོ་རང་བསམ་བཞིན་དུ་ངོ་རྒོལ་གང་དུ་བྱེད་སའི་ལུང་པ་དེར་སྒེར་ཐོག་ནས་འགྲོ་བསྐྱོད་བྱེད་ཀྱི་ཡོད།

གང་ལྟར་ཡང་། ཨ་རི་དང་ཡོ་རུབ་སོགས་སུ་སྲིད་སྐྱོང་བློ་སེང་ལ་ངོ་རྒོལ་བྱེད་ཀྱི་ཡོད་པ་ཤེས་བཞིན་དུ། སྲིད་སྐྱོང་བློ་སེང་ཕྱོགས་བསྐྱོད་བྱེད་བཞིན་པ་འདིས་གང་ཞིག་མཚོན་ཐུབ་བམ་ཟེར་ན། ༧གོང་ས༧རྒྱལ་བ་རིན་པོ་ཆེ་ཡིས་དབུ་ཁྲིད་པའི་ཆོལ་གསུམ་ཆིག་སྒྲིལ་གྱི་ནུས་པ་མཉམ་སྤུངས་བྱས་ཏེ་བཙུགས་པའི་བཙན་བྱོལ་བོད་མིའི་སྒྲིགས་འཛུགས་དེ་གཏོར་བཤིགས་བྱེད་འདོད་ཡོད་པ་གསལ་བོར་མཚོན་ཐུབ། གལ་སྲིད་དེ་ལྟར་བསམ་བློ་བཏང་མེད་ཚེ། ཨ་རི་དང་ཁེ་ཎ་ཊ་ཡོ་རུབ་སོགས་སུ་ཕྱོགས་བསྐྱོད་བྱེད་དུས་བོད་མི་ཚོས་བསུ་བ་བྱེད་པའི་ཚབ་ལ་ཁོ་ལ་ངོ་རྒོལ་བྱེད་ཀྱི་འདུག་པས། བོད་ཆོལ་གསུམ་གྱི་ཆིག་སྒྲིལ་དེ་འཐོར་ས་རེད་སྙམ་ནས། ཁོ་རང་ཕྱོགས་བསྐྱོད་བྱེད་པ་འདི་མཚམས་འཇོག་བྱེད་དགོས་སྙམ་པའི་བསམ་བློ་འཁོར་དགོས་མོད། འོན་ཀྱང་ཁོ་རང་གིས་བསམ་བློ་དེ་ལྟར་གཏོང་བ་ལས། རྐང་བཙུགས་ནས་ནུབ་ཕྱོགས་ལུང་པར་ཕྱོགས་བསྐྱོད་བྱས་ཏེ། ཆོལ་གསུམ་ཆིག་སྒྲིལ་ལ་གཏོར་བཤིགས་གཏོང་དུ་འགྲོ་བར་མཚམས་འཇོག་བྱས་མེད་ལ། ཁོའི་ལས་རོགས་བཀའ་ཤག་ཁོག་སྟོང་ཅན་དེ་ཚོས་ཀྱང་ཁོ་ལ་ཚིག་གཅིག་བཤད་མེད།

གཉིས་པ། བོད་ཀྱི་གཏམ་དཔེ་ཞིག་གིས་སྣེ་དྲངས་ཏེ་བཤད་ན། མར་མེ་ཚར་ཁ་གསལ་ཟེར་བ་ལྟར། སྲིད་སྐྱོང་བློ་སེང་དང་ཨ་རིའི་དོན་གཅོད་གཉིས་ཨ་རིའི་ཕོ་བྲང་དཀར་པོའི་ནང་ཕེབས་པ་དེ་རེད། སྲིད་སྐྱོང་བློ་སེང་ཨ་རིའི་ཕོ་བྲང་དཀར་པོའི་ནང་ཕེབས་ཐུབ་པ་འདི་ལ། ཕྱོགས་གཅིག་ནས་བཤད་ན་བོད་མི་ཚོས་གཟི་བརྗིད་རེད་ཅེས་ལབ་ན་ཡང་མ་འགྲིག་པ་མེད་མོད། འོན་ཀྱང་འདི་ལ་ང་ཚོས་ཤེས་དགོས་བའི་རྒྱུ་རྐྱེན་གལ་ཆེན་གཅིག་ཡོད།

རྒྱུ་རྐྱེན་དེ་ནི། ཨ་རི་དང་རྒྱ་ནག་གཉིས་ཚོང་དམག་རྒྱབ་སྟེ་རྒྱལ་ཁབ་གཉིས་ཀྱི་འབྲེལ་ལམ་གྲང་དམག་གི་དུས་ལ་སླེབས་ཤིང་། ཨ་རིའི་སྲིད་འཛིན་ཊོ་ནེལ་ཁྲོམ་གྱིས་དབུ་ཁྲིད་པའི་ཨ་རིའི་སྲིད་གཞུང་གིས་རྒྱ་ནག་ལ་བསམ་བཞིན་དུ་ཁོང་ཁྲོ་ཅི་ལྟར་སློང་ཐབས་ལ་འབད་ཀྱི་ཡོད་ལ། རྒྱ་ནག་གིས་ཀྱང་ཨ་རི་ལ་དེ་ལྟར་བྱེད་ཀྱི་ཡོད། ཐ་ན་རྒྱ་ནག་ནས་ཁྱབ་པའི་ནད་ཡམས་དེ་ཡང་ཨ་རི་ནས་ཐོག་མར་བྱུང་ཚུལ་བཤད་དེ། རྒྱ་ནག་མི་དམངས་དང་འཛམ་གླིང་མི་དམངས་ལ་རྫུན་ས་གཞི་ལ་མི་ཤོངས་བ་བཤད་བཞིན་ཡོད། དེས་རྐྱེན་ཨ་རིའི་དཔོན་པོ་མཐོ་རིམས་མི་སྣ་ཆེད་མངགས་ཐེ་ཝན་ལ་ཕེབས་ཤིང་། ཨ་རིའི་ཕྱི་སྲིད་བློན་ཆེན་གྱིས་ཡོངས་གྲགས་བྱས་ཏེ། ཐེ་ཝན་ནི་ནམ་ཡང་རྒྱ་ནག་གི་འོག་ཏུ་བསྡད་མྱོང་མེད་ཅེས་བཤད་དེ་རྒྱ་ནག་ལ་ཁོང་ཁྲོ་སློང་ཅི་ཐུབ་བྱས་པ་ལྟར། བོད་ཀྱི་སྲིད་སྐྱོང་བློ་སེང་ཡང་ཨ་རིའི་ཕོ་བྲང་དཀར་པོའི་ནང་གདན་འདྲེན་ཞུས་པ་དེ་ཡང་རྒྱ་ནག་སྲིད་གཞུང་ལ་ཁོང་ཁྲོ་སློང་བྱེད་གཅིག་ཡིན་པར་སྙམ་བཞིན་ཡོད་། དེ་མིན་ཨ་རིའི་སྲིད་འཛིན་ཊོ་ནེལ་ཁྲོམ་གྱིས་ལོ་ངོ་བཞི་རྫོགས་ལ་ཉེ་བར་དུ། དམིགས་གསལ་ཨ་རིའི་བོད་དོན་སྐུ་ཚབ་ཡང་བསྐོ་བཞག་བྱས་མེད།

དེ་ལྟ་ན་ཡང་། སྲིད་སྐྱོང་བློ་སེང་ཨ་རིའི་ཕོ་བྲང་དཀར་པོའི་ནང་དུ་ཕེབས་རྗེས། ཁོས་མངོན་སུམ་དོད་པོས་ག་རེ་བཤད་ཀྱི་འདུག་ཟེར་ན། ལོ་ངོ་དྲུག་བཅུའི་རིང་བོད་ཀྱི་ཆབ་སྲིད་འགོ་ཁྲིད་ཞིག་ཕོ་བྲང་དཀར་པོའི་ནང་ཕེབས་པ་ཐེངས་དང་པོ་ཡིན་ཟེར་བ་མ་ཟད། ལྷག་པར་དུ་ཁོས་གསལ་བོ་བཟོ་དགོས་པ་ཞིག་ལ། ༧གོང་ས༧རྒྱལ་བ་རིན་པོ་ཆེ་བོད་ཀྱི་ཆབ་སྲིད་དབུ་ཁྲིད་ཀྱི་མིང་ཐོག་ནས། ཨ་རིའི་ཕོ་བྲང་དཀར་པོའི་ནང་ཕེབས་ཡོད་པ་མ་རེད་ཅེས་འུར་གཏམ་གནམ་ལ་མི་ཤོངས་པ་བཤད་ཀྱི་འདུག སྲིད་སྐྱོང་བློ་སེང་གིས་བཤད་པའི་སྐད་ཆ་ཅི་ཞིག་གོ་ཐུབ་ཟེར་ན། ༧གོང་ས༧རྒྱལ་བ་རིན་པོ་ཆེ་ལ་སྲིད་སྐྱོང་ཁོ་རང་བཞིན་དུ་འཇོན་ཐང་དང་ནུས་པ་མེད་པའི་རྣམ་པ་གསལ་བོར་གོ་ཐུབ་ཀྱི་འདུག

དེ་ལྟར་ཡིན་ན། ལོ་རབས་བརྒྱད་བཅུའི་མཇུག་ཙམ་ནས་༧གོང་ས༧རྒྱལ་བ་རིན་པོ་ཆེ་ཨ་རིའི་ཕོ་བྲང་དཀར་པོའི་ནང་ཕེབས་སྟེ། ཞིང་གཤེགས་དམ་པ་བྷོའུ་ཤུ་རྒན་པ་ལ་མཇལ་འཕྲད་གནང་དུས་བོད་ཀྱི་ཆབ་སྲིད་དབུ་ཁྲིད་སུ་ཡིན་ནམ། སྐབས་དེར་ཁྱེད་རང་དང་ཁྱེད་ཀྱི་ལས་རོག་བཀའ་ཤག་ཁོག་སྟོང་ཅན་ཚོ་བོད་ཀྱི་ཆབ་སྲིད་དབུ་ཁྲིད་ཡིན་ནམ། ཡང་ན། རྒྱལ་བ་རིན་པོ་ཆེ་སྐབས་དེར་ཆོས་ཀྱི་དབུ་ཁྲིད་ཁོ་ནའི་མིང་ཐོག་ནས་ཕེབས་ཏེ། བྷོའུ་ཤུ་རྒན་པ་ལ་གསུང་ཆོས་གནང་བ་རེད་དམ་བོད་དོན་སྐོར་གསུངས་པ་རེད། དེ་བཞིན་དུ་ཁི་ལེན་ཊོན་དང་འཇོར་ཇི་བྷོའུ་ཤུ་གཉིས་ལ་མཇལ་འཕྲད་གནང་དུས་ཀྱང་། བོད་ཀྱི་ཆབ་སྲིད་དབུ་ཁྲིད་སུ་ཡིན་ནམ། ཨོ་བྷ་མ་ལ་ཨ་རིའི་ཕོ་བྲང་དཀར་པོའི་ནང་མཇལ་འཕྲད་གནང་དུས། ཁྱེད་རང་སྲིད་སྐྱོང་ཡིན་མོད། འོན་ཀྱང་ཁྱེད་རང་གདན་འདྲེན་མ་ཞུས་པར་༧གོང་ས༧མཆོག་མཆོག་གདན་འདྲེན་ཞུས་ཡོད། སྐབས་དེར་ཨོ་བྷ་མས་བོད་ཀྱི་ཆབ་སྲིད་དབུ་ཁྲིད་ཞིག་ཏུ་ངོས་འཛིན་གནང་སྟེ་གདན་འདྲེན་ཞུས་པ་རེད་དམ། ཆོས་ཀྱི་དབུ་ཁྲིད་ཁོ་ན་ངོས་འཛིན་བྱས་ཏེ་གདན་དྲངས་པ་རེད། དེ་དུས་༧གོང་ས༧མཆོག་གིས་བོད་ཀྱི་སྲིད་དོན་ཕྱོགས་ནས་བཀའ་སློབ་གནང་བ་རེད་དམ། ཨོ་བྷ་མ་ལ་གསུང་ཆོས་ལམ་རིམ་ཆེན་མོ་གནང་བ་རེད། གང་ལྟར་ཡང་། ཁྱེད་རང་གིས་བཤད་སྟངས་འདིས་གང་ཞིག་མཚོན་ཐུབ་བམ་ཟེར་ན། ༧གོང་ས༧རྒྱལ་བ་རིན་པོ་ཆེ་ཡིས་ཅི་ཡང་མ་འཇོན་ཤིང་ཅི་ཡང་མ་ནུས་པ་ཞིག ཁྱེད་རང་གཅིག་པོས་འཇོན་ཚུལ་དང་ནུས་ཚུལ་བཤད་ཀྱི་ཡོད་པ་མ་ཟད། སྐད་ཆ་འདིའི་ཤུགས་སུ་༧གོང་ས༧རྒྱལ་བ་རིན་པོ་ཆེ་ལ་ངོ་རྒོལ་དང་མཐོང་ཆུང་བྱེད་ཀྱི་ཡོད་པ་གསལ་བོར་ཤེས་ཐུབ་ཀྱི་འདུག་པས། བོད་ཀྱི་སྲིད་སྐྱོང་བློ་སེང་གིས་རྒྱལ་བ་རིན་པོ་ཆེ་ལ་ངོ་རྒོལ་བྱེད་ཀྱི་ཡོད་པ་མ་ཟད་མཐོང་ཆུང་ཡང་བྱེད་ཀྱི་འདུག་ཟེར་གྱི་ཡོད།

གལ་སྲིད་ཁྱེད་རང་ལ་ལོ་ངོ་བཅུའི་རིང་བྱས་རྗེས་ཞིག་ཡོད་ན། བཙན་བྱོལ་སྤྱི་ཚོགས་ཀྱི་ཆོལ་གསུམ་ཆིག་སྒྲིལ་གྱི་ནུས་པ་དེ་སྲན་མ་བརྩིགས་ངོས་སུ་གཏོར་བ་ལྟར་བྱས་ཡོད་པ་དེ། ཁྱེད་དང་ཁྱེད་ཀྱི་ལས་རོགས་བཀའ་ཤག་ཁོག་སྟོང་ཅན་ཚོས་བྱས་རྗེས་སུ་བརྩིས་ཆོག་ལ། དེ་མིན་ཁྱེད་ཀྱིས་ལོ་ངོ་བཅུའི་རིང་དུས་ཚོད་བསྐྱལ་ཕྱིར། དུས་ཚོད་མང་པོ་འཕྲོ་བརླགས་བཏང་སྟེ་བཤད་པའི་ལྔ་དང་ལྔ་བཅུ་ཡི་འཆར་གཞི་དེ། དབྱིན་རྩོམ་གྲགས་ཅན་འཇམ་དབྱངས་ནོར་བུས་བཤད་པ་ལྟར། འཆར་གཞི་ཁོག་སྟོང་མང་པོ་སྒྲིགས་པ་དེ་ཡིན་སྲིད། བཙན་བྱོལ་བོད་མི་ཚོས་གང་གཟབ་བྱེད་དགོས་པ་ཞིག་ལ། སྲིད་སྐྱོང་བློ་སེང་དང་ཁོའི་ཕྱོགས་གཏོགས་པ་ཚོས། རྗེས་མ་མུ་མཐུད་ནས་བཙན་བྱོལ་སྤྱི་ཚོགས་ནང་མདའ་དཀྲུགས་ཕུ་དཀྲུགས་བྱེད་སྲིད་པས། ང་ཚོ་ཆ་ཚང་གིས་ད་ལྟ་ནས་གང་གཟབ་བྱེད་དགོས་པ་དེ་རེད།

8/12/2020ལ་ཡོ་རུབ་ནས་ནམ་མཁས་བྲིས།