སླུ་བྲིད་གཅིག་གིས་ར་སྤྲོད་བྱས།།

སྟག་སྨྱོན།

————–
དེ་རིང་སྐྱོ་སྣང་དྲག་པོ་ཞིག་གིས་སེམས་བུའི་མགོ་ལ་བསྣུན་བཞིན་འདུག།
རྨ་ཁ་ཤོར་འདྲའི་མིག་ཆུའི་ཤ་འོད་མཁུར་མཚོས་ངོས་སུ་ཤུགས་ཀྱིས་འབབ།།
རྩིབ་མ་དཀར་པོའི་མཐའ་ནས་བསྐོར་བའི་ཡ་ཁོག་རུས་པའི་སླ་ངའི་ནང།།
དམར་པོ་ཁྲག་གི་ནང་དུ་བཙོས་པའི་གློ་སྙིང་གཉིས་ཀ་ལྷོག་ལྷོག་ཁོལ།།

བཟོད་སྲན་བྲལ་བའི་ན་ཟུག་ཅིག་གིས་དབང་རྩའི་འདབ་མ་སྦྲིད་ནས་འདུག།
ཀླད་ཞོའི་སྤྲིན་ནག་འཁྲུགས་པའི་གསེབ་ཏུ་སྐྱོ་གདུང་དྲག་པོའི་གློག་འོད་འཁྱུག།
སྙིང་གི་དབུས་ཀྱི་བཟོད་པའི་སྒོམ་ཆེན་དེ་རིང་གང་དུ་བྲོས་པ་འདྲ།།
བཀྲ་ཤིས་རྟགས་བརྒྱད་རི་མོ་མཛེས་པའི་སྲོག་གི་ཕོར་ཆུང་བརྡབ་ལ་ཁད།།

ཨ་ཁ་བདག་གི་བློ་གཏད་བཅོལ་སའི་གྲོགས་པོ་དེ་རིང་འགྱུར་བ་འདྲ།།
སྒེའུ་ཁུང་མདུན་གྱི་རི་བོ་ཁོ་ཡང་དེ་རིང་མགོ་བོ་སྐྱོག་ནས་འདུག།
ཉེ་བའི་འགྲམ་གྱི་གཙང་བོ་དེ་ཡང་དེ་རིང་ང་ལ་འཇབ་ནས་འགྲོ།།
ཡོད་ཚད་འདི་ལྟར་གློ་བུར་ཉིད་དུ་གཞན་ལ་འགྱུར་བས་ཞེད་སྣང་ཆེ།།

ཇོ་བོའི་མདུན་དུ་པུས་མོ་བཙུགས་ཏེ་མནའ་བཅད་བཟོས་པ་མིན་ན་ཡང་།།
མི་རིགས་གཅིག་གི་ཟུངས་ཁྲག་དྲོན་མོ་བགོ་བཤའ་བརྒྱབ་ནས་མཉམ་དུ་སྤྱོད།།
ཕ་ཡུལ་གཅིག་པའི་དུང་སེམས་ཟབ་མོས་སེམས་གཉིས་ལྷད་མེད་དམ་དུ་བཅིངས།།
སྲོག་དང་མི་ཚེ་བཅོལ་རེས་བྱས་ནས་ས་མཐའ་ཞིག་ཏུ་ཉི་མ་བསྐྱལ།།

ལོས་བདེན་ཤཀྱ་མུ་ནེས་གསུངས་པ་ཐམས་ཅད་མི་རྟག་འགྱུར་བའི་ཆོས།།
བློ་གཏད་བྲལ་བ་འཁོར་བའི་ཆོས་ཉིད་སླུ་བྲིད་གཅིག་གིས་ར་སྤྲོད་བྱས།།
མི་བདེ་འཇིག་རྟེན་འཁོར་བའི་སྡུག་བསྔལ་ན་ཟུག་གཅིག་གིས་དྲན་གསོ་བསླངས།།
མཚོ་ན་མེ་ཡིས་བཅོམ་པ་ལྟ་བུའི་རྨས་མའི་སེམས་འདི་ཇི་ལྟར་གསོ།།

དངས་གཙང་ནམ་མཁའི་དབྱིངས་སུ་བཞུགས་པའི་ལྷ་ཡི་བུ་མོ་ལུས་ཕྲ་ཚོ།།
དོ་ནུབ་གཙང་བཙོག་སྣང་བ་དོར་ནས་བདག་གི་ཁང་ཆུང་ནང་ལ་ཤོག།
སྤོས་དང་མེ་ཏོག་སྣ་ཚོགས་བསྲེས་པའི་མཆོད་པ་བཤམ་རྒྱུ་མེད་ན་ཡང་།།
ཆང་དང་སྦུ་རག་གང་འདོད་ཕུལ་ཆོག་མཚན་གཅིག་ང་ལ་འདུག་རོགས་བྱོས།།

དེ་རིང་བདག་གིས་མི་རྟག་མཐོང་སྟེ་ད་དུང་སེམས་ལ་ཞེད་སྣང་འདུག།
མ་ཟད་འཇིགས་རུང་སླུ་བྲིད་ཡོང་ནས་བདག་གི་དམར་ཆུང་སྙིང་ལ་སྙབས།།
བརྩེ་སེམས་ཆེ་བའི་ལྷ་མོའི་ཁོར་ཚོགས་སྐུ་མཁྱེན་དེ་རིང་འདི་ལ་ཤོག།
འཇིགས་དངངས་ཆེན་པོས་སྨྱོ་ལ་ཁད་ཀྱི་འབྲོག་བུ་ང་ལ་འདུག་རོགས་མཁོ།།

དཔའ་རྩལ་ཆེ་བའི་ཕ་རྒན་རྒོད་པོས་ཁོ་བོ་བཞག་ནས་ཞིང་དུ་གཤེགས།།
བྱམས་སེམས་དྲོ་བའི་མ་མ་རྒན་མོ་མ་ནི་འདོན་བཞིན་བོད་ན་ཡོད།།
ཆུ་རྡོ་གྲང་མོ་སེམས་ལ་རུམ་བཞིན་ས་མཐར་ལུས་པའི་འབྲོག་ཕྲུག་ང།།
དོ་ནུབ་འདི་རུ་གཅིག་བུར་ལྷག་པས་ཞག་གཅིག་བདག་ལ་ཉལ་རོགས་གནང།།