ནམ་མཁའ།
ཁ་སང་ཕྱི་དྲོ་ཆུ་ཚོད་༥ཡས་མས་ཙམ་ཞིག་ལ་ང་རང་ལས་ཀ་གྲོལ་ནས་ནང་ལ་འགྲོ་སྐབས། ལམ་ཁའི་གཡས་གཡོན་ཚང་མར་གློག་འོད་འདྲ་མིན་གྱིས་འོད་མདངས་ཁྲ་ཆིལ་ལེ་འདུག་པས་ཡིད་དབང་འཕྲོག་པ་ཞིག་རེད། ལུང་པ་འདིའི་མི་ཆ་ཚང་གི་གདོང་ན་འཛུམ་མདངས་ཀྱིས་ཁེངས་ཞོར། བྲེལ་བྲེལ་འཚུབ་འཚུབ་ཀྱིས་ཚོང་ཁང་དང་གཞུང་ལམ་སྟེང་འགྲོ་བཞིན་འདུག ལུང་པ་འདིའི་མི་ལ་མཚོན་ན་དེ་རིང་གི་མཚན་མོ་འདི་གལ་ཆེན་ཞིག་ཡིན། ཡེ་ཤུ་འཁྲུངས་སྐར་ལ་ཁོ་རང་ཚོའི་ནང་མི་མཉམ་འཛོམས་དང་།ཕན་ཚུན་ལག་རྟགས་སྤྲོད་པའི་ལུགས་སྲོལ་ཡོད། འདི་ནི་ལོ་གཅིག་གི་ནང་ཐེངས་གཅིག་ནང་མི་མཉམ་འཛོམས་ཀྱི་དུས་ཚོད་ཞིག་རེད།
ང་རང་གཞུང་ལམ་འགྲམ་གྱི་ཚོང་ཁང་ཞིག་གི་ནང་ཅ་དངོས་ཞིག་ལ་བལྟ་རུ་ཕྱིན་པ་ཡིན། ཚོང་ཁང་དེའི་ནང་འགྲོ་སྐབས་ངས་དོན་སྣང་མ་བྱུང་མོད། ཕྱིར་ཚོང་ཁང་ནས་ཕྱི་ལོགས་སུ་སླེབས་དུས། དེའི་སྒོ་འགྲམ་ན་སློང་མོ་བ་མ་བུ་གཉིས་འདུག་པ་མཐོང་སོང་། ཁོ་གཉིས་ཀྱི་མདུན་ན་ལུང་པ་འདིའི་མི་རིགས་སྐྲ་སེར་བུ་མོ་ཞིག་དང་བུ་ཆུང་ཕལ་ཆེར་ལོ་ལྔ་དྲུག་ཞིག་ལ་སོན་པ་གཉིས་ཀྱིས་སློང་མོ་བ་མ་བུ་གཉིས་ལ་སྐད་ཆ་བཤད་བཞིན་འདུག མ་ཟད་སྐྲ་སེར་མ་བུ་གཉིས་ཀྱིས་སློང་མོ་བའི་བུ་ཆུང་ལོ་༣/༤ཙམ་ཞིག་ལོན་པ་དེ་ལ་ལག་རྟགས་ཞིག་ཉོས་ཏེ་སྤྲད་སོང་། ལག་རྟགས་དེ་ནི་ཕྲུག་གུ་ཚོས་རྩེད་མོ་རྩེད་ཆས་མོ་ཊ་ཆུང་ཆུང་དེ་འདྲ་ཞིག་དང་། སློང་མོ་བ་མོ་རང་ལ་དགུན་དུས་ཀྱི་གྱོན་ཆས་མཐུག་པོ་ཞིག་རེད།
སློང་མོ་བའི་བུ་ཆུང་ལོ་གསུམ་བཞི་ཅན་དེ་དགའ་ནས་ལམ་སེང་ཐང་ལ་བཞག་སྟེ་རྩེད་མོ་ལ་རོལ་འདོད་བྱས་མོད། འོན་ཀྱང་བུ་ཆུང་དེས་བེད་སྤྱོད་ཡག་པོ་ཞིག་བྱེད་ཤེས་ཀྱི་མི་འདུག་པས། རྩེད་ཆས་ཉོ་མཁན་གྱི་སྦྱིན་བདག་མའི་བུ་ཆུང་གིས་ཁོ་ལ་ཡག་པོ་ཞིག་བསླབས་སོང་། སློང་མོ་བ་བུད་མེད་དེའི་མིག་མཐའ་ན་མཆི་མ་འཁྱིལ་ནས་འདུག་པས་ང་རང་ཡང་སེམས་པ་གཏིང་ནས་སྐྱོ་སོང་། སློང་མོ་བ་དེ་གཉིས་ཕལ་ཆེར་༼རོ་མན་༽བ་ཞིག་རེད་འདོད། སྦྱིན་བདག་མའི་བུ་ཆུང་དེས་ཁོའི་ཨ་མ་ལ་ཁོ་གཉིས་དེ་རིང་དགུང་མོ་གང་ནས་སྡོད་ཀྱི་ཡོད་པ་རེད་ཟེར་ནས་སྐད་ཆ་དྲིས་སོང་མོད།ཁོའི་ཨ་མས་ལན་བཏབ་མ་སོང་། སྤྱིར་བཏང་ལུང་པ་འདི་རུ་༼རོ་མན་པ༽དང་དེ་མིན་མི་རིགས་གཞན་གྱི་སློང་མོ་བ་མང་པོ་ཡོད། དེ་ནི་ལུང་པ་གང་མང་ཞིག་ན་སློང་མོ་བ་ཕལ་ཆེར་མེད་ས་ཡོད་མི་སྲིད་ལབ་ན་མི་འགྲིག་པ་མེད།
ཡིན་ཡང་ངས་དེ་རིང་མཐོང་བས་སློང་མོ་བ་དེ་གཉིས་ཀྱི་སྐྱོ་ཉམས་དང་། སློང་མོ་བའི་བུ་ཆུང་གྲང་འདར་རྒྱག་བཞིན་པ་མ་ཟད། བྱིས་པའི་རེ་སྒུགས་ཀྱི་ལོ་གསར་ལ་ཁོང་མ་བུ་གཉིས་སྡོད་གནས་གཏན་འཁེལ་མེད་ལ་གཟུགས་པོ་ཚ་བོ་བྱེད་ཐུབ་པའི་ཟ་འཐུང་ཚ་བོ་ཞིག་ཀྱང་མེད་པས་ངོ་མ་སེམས་གཏིང་ནས་སྙིང་རྗེ་སྐྱེས་སོང་། ལུང་པ་གང་དུ་ཡིན་ཡང་སོ་སོའི་ལོ་རྩིས་ལྟར་གྱི་ལོ་གསར་ལ་སྤྲོ་སྣང་མེད་པའི་བྱིས་པ་ཞིག་ག་ལ་ཡོད། སློང་མོ་བའི་བུ་ཆུང་དེ་རིང་སྟབས་ཡག་ནས་སྙིང་རྗེ་ལྡན་པའི་མགོ་སེར་མ་བུ་འདི་གཉིས་ཀྱིས་ཁོ་གཉིས་ལ་ཡང་ལག་རྟགས་ཕྲན་བུ་སྤྲད་པ་འདི་ཅི་འདྲའི་ཡིད་སེམས་འགུལ་བ་ཞིག་མ་རེད་དམ། ང་རང་བསམ་གཞིགས་འདི་འདྲ་ཞིག་གི་ནང་ལྷུང་བའི་སྐབས། ཡང་བསྐྱར་ལུང་པ་འདིའི་རྒན་རྒོན་བཟའ་ཚང་གཉིས་ཀྱིས་ཁོ་གཉིས་ལ་སྐད་ཆ་འགའ་དྲིས་སོང་མོད། འོན་ཀྱང་སློང་མོ་བ་དེའི་ལུང་པ་འདིའི་སྐད་ཤེས་ཀྱི་མི་འདུག
ཡིན་ཡང་ཨ་མ་རྒན་མོ་དེས་རྣམ་འགྱུར་བསྟན་ཏེ་སློང་མོ་བའི་བུ་ཆུང་དེ་ཁྲིད་ནས་གྱོན་ཆས་བཙོང་སའི་ཚོང་ཁང་ལ་འགྲོ་ཟེར། དེ་ནས་སློང་མོ་བ་དེ་ཡང་མོའི་བུ་ཆུང་དེ་ཁྲིད་ནས་ཚོང་ཁང་ལ་ཕྱིན་སོང་། ངས་བསམ་པར་ཁོང་རྒན་རྒོན་གཉིས་ཀྱིས་ལག་རྟགས་ག་རེ་ཉོ་མིན་བལྟ་འདོད་བྱུང་བས་ང་རང་ཅུང་བསྡད་པ་ཡིན། བྱམས་བརྩེ་ལྡན་པའི་རྒན་རྒོན་བཟའ་ཚང་གཉིས་ཀྱིས་ཀྱང་སློང་མོ་བའི་བུ་ཆུང་དེ་ལ་དགུན་ལྭ་ཆ་ཚང་ཞིག་ཉོས་ནས་སྤྲད་ཡོད་པ་མ་ཟད། བུ་ཆུང་དེ་དང་ཁོའི་ཨ་མ་གཉིས་ལ་ད་རུང་མངར་ཟས་ཅོག་ལེ་ཊི་ཤོག་ཐུམ་ཞིག་ཉོས་འདུག ༼རོ་མན་པ༽འདི་ཚོ་ལུང་པ་འདིར་ལས་ཀ་བྱེད་ཆོག་པའི་གཞུང་གི་ཁྲིམས་མཐུན་གྱི་ཡིག་ཆ་མེད་པས་མེ་འཁོར་ནང་དང་སྲང་ལམ་སོགས་གང་སར་སློང་མོ་བྱེད་མཁན་མང་པོ་ཡོད། ཁོང་ཚོ་ཆབ་སྲིད་ཀྱི་སྐྱབས་བཅོལ་པར་གཞུང་གིས་ངོས་ལེན་བྱེད་ཀྱི་མེད་པས་གཞུང་གིས་དེ་ཙམ་གྱིས་དོན་སྣང་བྱེད་ཀྱི་མི་འདུག
༼རོ་མན་པ་༽འདི་ཚོ་དང་བསྡུར་ན། ང་ཚོ་བོད་པ་ཚོ་ནུབ་ཕྱོགས་གང་མང་གི་གཞུང་གིས་ཆབ་སྲིད་སྐྱབས་བཅོལ་པར་ངོས་ལེན་གཙང་མ་བྱེད་ཀྱི་ཡོད། དེ་ཡང་ཁ་གསལ་བོ་བྱས་ཏེ་བཤད་ན།བོད་ནང་གི་གཞི་ལུས་སྤུན་ཟླ་དཔའ་བོ་དང་དཔའ་མོ་ཚོའི་བཀའ་དྲིན་ཡིན། ང་ཚོ་བོད་རིགས་ཚོ་ནུབ་ཕྱོགས་ལུང་པ་གང་དུ་སོང་ནས་སྐྱབས་བཅོལ་ཞུས་ན་ཡང་། ཆབ་སྲིད་ཀྱི་སྐྱབས་བཅོལ་ཞིག་ཏུ་ངོས་ལེན་བྱེད་ཀྱི་ཡོད་པས་ང་རང་གཙོ་བྱས་བའི་ནུབ་ཕྱོགས་ལུང་པ་ན་སྐྱབས་བཅོལ་དུ་ཡོད་པའི་བོད་རིགས་ཚོས་བོད་ནང་གི་གཞི་ལུས་སྤུན་ཟླ་ཚོའི་བཀའ་དྲིན་བརྗེད་མི་འོས་པ་ཞིག་ཡིན།
སྤྱིར་ལུང་པ་འདིར་སྡོད་གནས་གཏན་འཁེལ་མེད་པའི་སྐྱོ་བོ་རིགས་ལ་རོགས་སྐྱོར་བྱེད་པའི་ཚོགས་པ་དེ་འདྲ་ཡོད། དབུལ་སྐྱོར་ཚོགས་པ་དེ་ཚོས་དགུན་དུས་གནམ་གཤིས་གྲང་བའི་སྐབས། ཁོ་རང་ཚོས་སྲང་ལམ་ན་བསྡད་ཡོད་པའི་མི་སྐྱོ་བའི་རིགས་མཚན་མོ་སྡོད་གནས་ཞིག་མཁོ་སྤྲོད་གནང་གི་འདུག་པ་མ་ཟད། སྲང་ལམ་གྱི་སྐྱོ་བོ་རིགས་ལ་ཟ་འཐུང་ཚ་བོ་རེ་སྤྲད་ཀྱི་འདུག་པ་འདི་ནི་སྟོབས་ཆེན་རྒྱལ་ཁབ་འདི་ཚོས་དམིགས་བསལ་གྱི་ཁྱད་པར་བ་ཞིག་རེད། སྲང་ལམ་ན་མི་ཚེ་བསྐྱལ་བའི་སྐྱོ་བོ་ཁ་ཤས་ཞིག་ལ།རོགས་སྐྱོར་ཚོགས་པ་ཚོས་གནམ་གཤིས་གྲང་བའི་སྐབས་ཨུ་ཚུགས་ཀྱིས་སྡོད་ཁང་ཞིག་ཏུ་ཁྲིད་ན་ཡང་འགྲོ་གི་མིན་ཟེར་མཁན་ཡང་མང་པོ་ཡོད། དབུལ་སྐྱོར་ཚོགས་པ་དེ་ཚོས་མཚན་གཅིག་གི་སྡོད་གནས་དེ་གར་མི་རིགས་འདྲ་མིན་དང་། ཆང་འཐུང་སྨྱོན་པ་སོགས་འདྲ་མིན་བཅོ་བརྒྱད་འདུག་ཟེར། དེ་ནི་ལོ་གཉིས་ཡར་སྔོན་ཞིག་ལ་ངའི་གྲོགས་པོ་ཞིག་ལ་ཁ་བརྡ་བྱས་ཏེ་ཤེས་རྟོགས་བྱུང་།
དེང་སང་ང་རང་བསྡད་སའི་ལུང་པ་འདིར་ཡང་བོད་རིགས་མང་པོ་སླེབས་ཡོད། ཁོང་ཚོ་ཡང་གཞུང་གི་དབུལ་སྐྱོར་ཚོགས་པ་དེ་ཚོས་བདག་སྐྱོང་འོག་དུས་ཡུན་ཅུང་ཙམ་རིང་འགྲོ་དགོས་ཀྱི་ཡོད་པ་རེད་ཟེར།ངའི་གྲོགས་པོ་བོད་པ་ཞིག་ལ་ངས་དེའི་སྐོར་ཐེངས་གཅིག་སྐད་ཆ་དྲིས་མྱོང་། ཁོས་དེ་གར་མཚན་མོ་སྡོད་སའི་གནས་ཁང་དེའི་ནང་མི་འདྲ་མིན་སྨྱོན་པ་དང་ཆང་འཐུང་ར་བཟི་མང་པོ་འདུག་པས་དང་པོ་སེམས་སྐྱོ་བ་འདྲ་ཞིག་རེད་ཟེར། ཡིན་ཡང་ཞིབ་ཏུ་བསམ་བློ་ཞིག་བཏང་དུས་སོ་སོའི་ལུང་པ་ནས་སྡོད་དབང་མེད་པར་མིའི་ལུང་པ་ལ་སྐྱབས་བཅོལ་དུ་སླེབས་ཡོད། མིའི་ལུང་པ་འདིར་མི་ཡི་རིན་ཐང་ལ་བརྩི་འཇོག་བྱས་ཏེ་བདག་པོ་ཞིག་རྒྱག་གི་ཡོད་པས་བློ་ཕམ་དགོས་དོན་མི་འདུག་ཟེར། ངས་ཀྱང་ཁོས་བཤད་པའི་སྐད་ཆ་ལ་གནས་ལུགས་ཀྱང་མཐོང་སོང་ལ། བསམ་བློ་གཏོང་སྟངས་ཡང་བོད་མི་རིགས་ཀྱི་གཤིས་ཀ་འདུག་བསམ་སོང་།
ང་རང་ལུང་པ་འདིར་ཐོག་མར་སླེབས་དུས་དབུལ་སྐྱོར་ཚོགས་པ་དེ་འདྲ་ཡོད་པ་ཤེས་རྟོགས་མ་བྱུང་པས་ང་རང་ངའི་གྲོགས་པོ་བཟའ་ཟླ་གཉིས་ཀྱི་ནང་ཟླ་ཤས་རིང་བསྡད་པ་ཡིན། ཁོ་གཉིས་ནི་ང་རང་ལ་མཚོན་ན་ལུང་པ་འདིའི་ནང་གི་བཀའ་དྲིན་ཆེ་ཤོས་ཞིག་ཡིན་པས་རྒྱུན་ཏུ་ངས་ཁོང་གཉིས་ཀྱི་བཀའ་དྲིན་བཞིན་ཡོད། གང་ལྟར་འཕྲོས་བཤད་མང་པོ་ཞིག་བྱས་སོང་བས་དྲ་གྲོགས་ཚོ་དགོངས་འགལ་མེད་པར་ཞུ།
༢༥/༡༢/༢༠༡༢ལ་བྲིས།
ངོ་སྤྲོད་དེའི་བར་མཚམས་ནས་ཉིད་ཀྱིས་ཀྱང་ཕྱག་རིང་རེ་བརྐྱང་གི་བསམས་སོང་མོད། ཡིན་ཡང་། ང་ཚོ་བོད་པ་ཚོ་ལེན་ཡ་མ་གཏོགས་གཏོང་རྒྱུའི་ཕྱོགས་ནས་་་་་་་་་
ཁྱེད་རང་སྡོད་ས་ལུང་པ་ག་རེ་ཡིན་མིན་གསལ་པོ་ཤེས་མ་སོང་།
ང་ཚོ་བོད་པ་ཚོ་རོ་མ་པ་ལ༼ཇིབ་སི་༽ལས་ལྷག་པ་ནུབ་ཕྱོགས་ལ་རོགས་རམ་ཐོབ་པ་འདི། མའོ་དང་རྒྱ་དམར་གཞུང་གི་བཀའ་དྲིན་རེད་ལབ་འདོད་དམ།
དངོས་བྱུང་འཚོ་བ་དང་འབྲེལ་ནས་ནུབ་ཕྱོགས་བོད་པའི་སྐྱབས་བཅོལ་གྱི་གནས་སྟངས་ཟུར་ཙམ་བརྗོད་འདུག་མོད།ཕྲན་བུ་དེས་ཡིད་ཚིམ་མ་སོང་།རབ་བྱུང་ན་ཁ་གསལ་བྱས་ཏེ་མང་ཙམ་འབྲི་ཐུབ་ན་ལེགས་སྙམ།
འདིར་ཀརྡོ་ལགས།ཁྱེད་ཀྱི་འདོད་པ་མ་ཚིམ་པའི་རྒྱུ་མཚན་གྱིས་མའོ་དང་རྒྱ་དམར་གྱི་བཀའ་དྲིན་ལབ་འདོད་དམ་ཟེར་ནས་ནམ་མཁའ་ལ་ཟུར་ཟ་ལྟ་བུ་ཞིག་བྱས་འདུག་མོད།ཡིན་ཡང་ང་རང་ཡང་ནུབ་ཕྱོགས་ཡུ་རོབ་ཏུ་སྐྱབས་བཅོལ་སླེབས་ནས་ལོ་ཤས་ཕྱིན་སོང་།ང་རང་བོད་ལ་ཡོད་དུས་ཆབ་སྲིད་ཀྱི་ལས་ཀ་འདྲ་བྱས་མྱོང་མེད།ནུབ་ཕྱོགས་སུ་སྡོད་ཐབས་ལ་དེའི་རིགས་ཀྱི་ལས་ཀ་བྱས་ཚུལ་ཞིག་བརྗོད་དགོས་ཀྱི་འདུག དེ་ལྟར་ཡིན་དུས་བོད་ནང་གི་དཔའ་བོ་དང་དཔའ་མོ་ཚོའི་ཕྱག་རྗེས་ཕར་བཙོང་པ་ལྟ་བུ་ཞིག་རེད།ཁྱེད་ལ་དགོས་བའི་ཚིག་༧གོང་ས༧མཆོག་གི་བཀའ་དྲིན་འབྲི་དགོས་ཀྱི་ཡོད་པ་རེད།ཡིན་ཡང་བོད་ནང་གི་དཔའ་བོ་དང་དཔའ་མོ་ཚོའི་བཀའ་དྲིན་རེད་ཟེར་མཁན་ད་ཐེངས་དང་པོ་མཐོང་སོང་བས་ང་རང་གིས་ངོས་ནས་ནམ་མཁས་བཤད་པ་དེ་གཏིང་ཟབ་མོ་ཡིན་མིན་མི་ཤེས་ཀྱང་བདེན་པ་རེད་བསམ་སོང་།
འདིར་སྐུ་ཞབས་ནམ་མཁས་སྐད་ཆ་དྲང་མོ་ཟུར་ཙམ་ཞིག་བྲིས་འདུག ཡིན་ཡང་འདི་ལས་ཅུང་ཟད་རྒྱས་པ་ཞིག་གི་ལམ་ནས་ཡུ་རོབ་ཀྱི་བོད་པའི་སྐྱབས་བཅོལ་བའི་གནས་སྟངས་གསལ་ཙམ་ཞིག་བྲིས་ཡོད་ན་ཕན་གྱི་རེད།གུས་མོ་ཧྥ་རན་སི་ལ་སྐྱབས་བཅོལ་བྱས་ཏེ་ལོ་གསུམ་ལྷག་ཕྱིན་སོང་། སྐབས་ཐོག་དེར་དཀའ་ངལ་མི་ཉུང་བ་ཞིག་མྱངས་དགོས་ཀྱི་འདུག་པ་མཟད།ད་རུང་བོད་ནང་གི་ཆབ་སྲིད་ཀྱི་ལས་འགུལ་སྤེལ་མེད་ཀྱང་དེའི་སྐོར་གྱི་ལས་ཀ་བྱས་ཚུལ་སོགས་རྫུན་ལུང་པ་གང་བཤད་དགོས་བྱུང་། བོད་ནང་གི་སྐྱེས་བ་ཡིན་ཚེ་ཡིག་ཆ་འགྲིག་མིན་ལ་དཀའ་ངལ་མི་འདུག་མོད།འོན་ཀྱང་རྒྱ་གར་ནས་སྐྱེས་བའི་མི་ཞིག་ཡིན་པ་ཤེས་ཚེ་ཡིག་ཆ་འགྲིག་ཡ་ཁེགས་པོ་ཡིན་པས་རྒྱ་གར་དུ་སྐྱེས་བའི་མི་ཚོས་ཀྱང་བོད་ནས་སྐྱེས་བ་ཡིན་ཚུལ་བཤད་པ་མ་ཟད།ཆབ་སྲིད་ཀྱི་ལས་འགུལ་སྤེལ་ཚུལ་སོགས་བཤད་དགོས་ཡོད།དེ་རིང་འདིར་མཐོང་དུས་སྐུ་ཞབས་འཇམ་དཀར་ལགས་ཀྱིས་གསུངས་པའི་བོད་ནང་གི་དཔའ་བོ་དཔའ་མོ་ཚོའི་བཞག་པའི་ཁྲག་གི་བྱས་རྗེས་ང་ཚོས་བཙོང་ནས་འདིར་སྡོད་ཐབས་བྱས་པ་དང་གཅིག་མཚུངས་རེད་འདོད་པས།གོང་གི་འཕྲོས་བཤད་དེ་བདེན་པ་རེད་བསམ་མོ།དེང་སང་རྒྱ་གར་ནས་ཧིན་སྒོར་འབུམ༨་ནས་ཡོང་མཁན་ཚང་མས་གནས་ཚུལ་འདིའི་རིགས་མཁྱེན་རྟོགས་ཡོང་དགོས་བར་འདུག་སྙམ།
སྐུ་ཞབས་ཀ་ཕྱག་ལགས།ཁྱེད་ཀྱིས་ངས་བྲིས་བའི་དངོས་བྱུང་འཚོ་བའི་ཟུར་འཕྲོས་དེ་ལ་གོ་བ་ཡ་མཚར་ཞིག་བླངས་འདུག་མོད།དེ་ནི་ཁྱེད་རང་གི་འདོད་ཚུལ་ཡིན་པས་ཕྲན་གྱིས་དེ་ལ་དགག་བྱ་ཅི་ཡང་བྱེད་དགོས་དོན་མི་འདུག་སྙམ།དྲ་གྲོགས་འགས་ལན་ལྟ་བུ་ཞིག་འདུག་པས་དེ་ཙམ་གྱིས་ཆོག་པར་སྙམ།
སྤྱིར་བོད་རིགས་ཚོས་ནུབ་ཕྱོགས་ལུང་པར་སྡོད་ཐབས་ལ་དྲ་གྲོགས་ཚོས་གསུངས་པ་བཞིན་བཤད་དགོས།དེ་ཙམ་གྱིས་མི་ཆོག་པར་རྒྱ་སྐད་ཤེས་མིན་ལ་ཡང་སྐྱབས་བཅོལ་ལས་ཁུང་གིས་བཅར་འདྲི་བྱེད་ཀྱི་འདུག་ཟེར།
ཡིན་ཡང་༢༠༠༨ནས་བཟུང་ཕལ་ཆེར་བོད་མི་ཡིན་ཚད་ལ་ནུབ་ཕྱོགས་ལུང་པར་བསྡད་ཆོག་པའི་མཆོག་མཆན་ཡི་གེ་ཐོབ་ཀྱི་ཡོད།དེའི་རྩ་བ་ནི་བོད་ནང་གི་གཞི་ལུས་སྤུན་ཟླ་དཔའ་བོད་དང་དཔའ་མོ་ཚོའི་བཀའ་དྲིན་ཡིན་པར་བསམ་སྟེ་བྲིས་པ་ཡིན། དེ་མ་ཡིན་པར་བསམ་ཚུལ་གཞན་ཞིག་ཡོད་ཚེ་གསུངས་དང་ཤེས་ཚོད་ཀྱིས་བསམ་ཚུལ་འབུལ་ཆོག་ད་ཐེངས་དེ་ཙམ་གྱིས་ཆོག་པར་རྗེས་མ་མཇལ་ཡོང་།སྤྱི་ལོ་གསར་བ་ཡང་སླེབས་ལ་ཉེ་བས་བོད་མི་རིགས་ཀྱི་བསམ་དོན་འགྲུབ་པའི་སྨོན་འདུན་དང་ཞོར་དུ་སྐུ་ཉིད་དང་དྲ་གྲོགས་ཡོངས་ཕྱོགས་གང་ཐད་ནས་བསམ་དོན་འགྲུབ་པའི་སྨོན་ལམ་ཡོད།བཀྲ་ཤིས།ཚེ་རིང་།
ནམ་མཁའ་ལགས། ཉིད་ནས་ནུབ་ཕྱོགས་པའི་གནས་ཚུལ་དངོས་བྱུང་བྲིས་འདུག་པས་དགའ་སྤྲོ་ཆེ།
ངོ་སྤྲོད་དེའི་བར་མཚམས་ནས་ཉིད་ཀྱིས་ཀྱང་ཕྱག་རིང་རེ་བརྐྱང་གི་བསམས་སོང་མོད། ཡིན་ཡང་། ང་ཚོ་བོད་པ་ཚོ་ལེན་ཡ་མ་གཏོགས་གཏོང་རྒྱུའི་ཕྱོགས་ནས་་་་་་་་་
གོང་གི་ཁྱུང་དཀར་དང་བློ་བཟང་གཉིས་ཀྱི་མཆན་ལ་དེ་ཙམ་བློ་མོས་མ་བྱུང་། རྒྱུ་མཚན་ནི་ང་ཚོ་བོད་པ་ཞིག་ཡིན་ཕྱིན་སྐྱབས་བཅོལ་ལ་བསླེབས་པ་ནས་གཞན་ཡུལ་གྱི་གནས་སྟངས་ལ་གོམས་དགོས་པ་དང་དེ་བས་གྲོད་ཁོག་གི་ཆེད་དུ་གཞན་ལ་ལག་པ་བཟེད་དགོས་པ་དེ་ཡང་དངོས་ཤུགས་ཙམ་མ་གཏོགས་ཚང་མ་གཅིག་པ་རེད་སྙམ་གིས། སོ་སོ་རང་ཉིད་ཁོ་ནས་འཇོན་པ་ཞིག་ཡོད་མ་རེད་གང་ལྟར་དངོས་ཤུགས་བརྒྱུད་གསུམ་ནས་གཞན་གྱི་དཔལ་འབྱོར་དང་འབྲེལ་ནས་འཚོ་བ་སྐྱེལ་གྱི་ཡོད་པ་ཤེས་པ་གནང་རོགས།
མ་ཟད་ནམ་མཁའ་ལགས་ཀྱིས་སྐྱབས་བཅོལ་བ་ཚོའི་གནས་སྟངས་དང་སེམས་ཀྱི་དཀའ་སྡུག་ཇི་འདྲ་ཡོད་པ་ཡག་པོ་བྲིས་འདུག