བོད་འབྱོར།
1973ལོར་མདོ་སྨད་རེབ་གོང་གི་སྨད་པ་ནག་ཀྱཱ་སྡེ་བར་སྐྱེས། 1995ལོའི་ཟླ7པར་མཚོ་སྔོན་མི་རིགས་སློབ་གྲྭ་ཆེན་མོའི་གྲངས་ཉུང་མི་རིགས་སྡེ་ཁག་ནས་སློབ་མཐར་ཕྱིན། 1998ལོའི་ཟླ7པར་ཀྲུང་གོའི་སྤྱི་ཚོགས་ཚན་རིག་ཞིབ་འཇུག་གླིང་གི་གེ་སར་སྒྲུང་དང་བོད་ཀྱི་རྩོམ་རིག་ཞིབ་འཇུག་སློབ་མའི་འཛིན་གྲྭ་ནས་མཐར་ཕྱིན། 2012ལོའི་ཟླ1པར་དབྱིན་ཇིར་སློབ་འགྲིམས་སུ་བསྐྱོད་ཅིང་རཱེ་ཇེན་སློབ་གྲྭ་ཆེན་མོ་ནས་དབྱིན་ཇིའི་སློབ་གསོ་ལ་ཉམས་ཞིབ་མཛད།
2011ལོར་བོད་ཀྱི་ཤེས་རིག་དཔྱད་འབྲས་སུ་ཕུལ་བའི༼གེ་སར་སྒྲུང་དང་གནའ་བོའི་བོད་ཀྱི་དམངས་སྲོལ༽ཞེས་པ་ཡིག་འབྲུ་སུམ་འབུམ་ལྔ་ཁྲི་ལྷག་བརྒལ་བའི་ཆེད་དེབ་དེ་མི་རིགས་དཔེ་སྐྲུན་ཁང་ནས་ཕུལ་བྱུང་བརྩམས་ཆོས་ཀྱི་གྲས་སུ་བདམས་ཏེ་པར་བསྐྲུན་འགྲེམ་སྤེལ་བྱས། ཁོང་གིས་སྔ་རྗེས་སུ་ཀྲུང་གོ་བོད་རིག་པ་དང་བོད་ལྗོངས་ཞིབ་འཇུག་སོགས་རྒྱལ་ཁབ་དང་ཞིང་ཆེན་རིམ་པའི་དུས་དེབ་སྣ་ཚོགས་ཀྱི་སྟེང་དཔྱད་རྩོམ་བཞི་བཅུ་ལྷག་སྤེལ་མྱོང་། 2012ལོར་མཚོ་སྔོན་ཞིང་ཆེན་རྩོམ་མཐུན་དང་གེ་སར་ཞིབ་འཇུག་སའོ་གཉིས་ཀྱིས་གཙོ་སྒྲུབ་བྱས་པའི་ཞིང་ཆེན་ཡོངས་ཀྱི་བགྲོ་གླེང་སྐབས་དང་པོའི་གེ་སར་རིག་གཞུང་ཞིབ་འཇུག་ཆེད་རྩོམ་ལས་ཨང་གཉིས་པ་དང་བོད་ཡིག་ལས་ཨང་དང་པོའི་བྱ་དགའ་ཐོབ། 2012ལོར་མཚོ་སྔོན་ཞིང་ཆེན་
གེ་སར་ཞིབ་འཇུག་ཆེད་མཁས་པའི་འོས་མིར་བདམས། 2016ལོའི་ཟླ9པར༼ བོད་ཀྱི་སློབ་གསོའི་གནས་བབ་ཞིབ་འཇུག༽ཅེས་པའི་ཡིག་འབྲུ་བཞི་འབུམ་ལྔ་ཁྲིའི་བདག་ཉིད་ཅན་དེ་མི་རིགས་དཔེ་སྐྲུན་ཁང་ནས་པར་དུ་བསྐྲུན། 2016-2017ལོ་གཉིས་ཀྱི་རིང་སྤུས་ལེགས་སློབ་ཁྲིད་འགྲན་བསྡུར་ཁྲོད་ཁུལ་ཡོངས་ལས་ཨང་གཉིས་པའི་བྱ་དགའ་ཐོབ། 2016-2017ལོའི་ཟླ་9པར་རྨ་ལྷོ་ཁུལ་མི་དམངས་སྲིད་གཞུང་གིས་སྤུས་ལེགས་སློབ་གསོའི་ལས་བྱེད་པར་བདམས། 2018ལོའི་ཟླ9པར་མཚོ་སྔོན་ཞིང་ཆེན་མི་དམངས་སྲིད་གཞུང་གིས་རབ་བཅུ་པའི་འབྲིང་རིམ་ཁྱད་འཕགས་དགེ་རྒན་དུ་བདམས། 2018ལོའི་ཟླ12པར་རྒྱལ་ཁབ་མི་དོན་པུའུ་དང་སློབ་གསོ་པུའུ་ནས་མཐོ་རིམ་རྩེ་གྲས་དགེ་རྒན་དུ་བདམས། 2018ལོར་ཞིང་ལྗོངས་ལྔའི་བོད་ཡིག་བསླབ་གཞི་རྩོམ་སྒྱུར་ཁང་གི་ཆེད་མཁས་པའི་ཁོངས་མིར་བདམས། 2018ལོར་ཨ་རིའི་སློབ་སྔོན་སློབ་གསོ་དང་བོད་ཀྱི་སློབ་སྔོན་སློབ་གསོའི་གཤིབ་བསྡུར་ཞིབ་འཇུག་ཅེས་པའི་དཔྱད་རྩོམ་དེ་བོད་ཁུལ་གྱི་སློབ་གསོའི་ཞིབ་འཇུག་ལས་ཕུལ་བྱུང་དཔྱད་རྩོམ་དུ་བདམས། ཡང་ལོ་དེར་འཛམ་གླིང་ན་གཞོན་ནང་ཆོས་ཚོགས་པའི་ཞིབ་འཇུག་གླེང་སྟེགས་སྟེང་༼ ནང་ཆོས་དང་བོད་ཁུལ་གྱི་འཚོ་བའི་སློབ་གསོ༽ཞེས་པར་དཔྱད་གླེང་བྱ་དགའ་ཐོབ།
སྔ་རྗེས་སུ་རེབ་གོང་རྫོང་དབྱི་ཧྥུ་མི་རིགས་སློབ་འབྲིང་སོགས་སུ་སློབ་བུ་མང་དུ་བསྐྱངས་པར་མ་ཟད། རེབ་གོང་གྲོང་ཁྱེར་སློབ་དཔྱོད་ཁང་དུ་སློབ་གསོའི་བྱ་བཞག་ལ་ཤ་ཐང་དུ་འབད་འབུངས་གནངས་པ་དང་མདོ་སྟོད་སྨད་གཙོས་ས་ཁུལ་གང་མང་ལ་ཕེབས་ཏེ་སློབ་གསོའི་འཆད་ཁྲིད་ཐེངས་ཉི་ཤུ་ལྷག་གནང་། གཞན་མཚོ་སྔོན་རྒྱང་སྒྲོག་བརྙན་འཕྲིན་ཁང་དུ་འཆད་ཁྲིད་ཐེངས་བདུན་གནང་བ་དང་། ཨ་མདོ་བརྙན་འཕྲིན་ཁང་ནས་འཆད་ཁྲིད་ཐེངས་གཉིས་བྱས། 2018ལོའི་ཟླ12མཚོ་སྔོན་ཞིང་ཆེན་མཐོ་རིམ་དགེ་རྒན་དུ་བདམས། 2019ལོར་རྨ་ལྷོ་ཁུལ་གྱི་འཇོན་མི་སྣེ་ཁྲིད་པར་བདམས་པ་སོགས་རྗེས་སུ་ཡི་རངས་བྱ་དགོས་པའི་དོན་ཆེན་མང་པོར་དཀའ་ངལ་གདོང་གིས་བསུས་དང་བསུ་བའི་མོད་ལ་མི་འདོད་རྐྱེན་ངན་ཞིག་གིས་ཡུན་རིང་མནར་ཞིང་ལོ་ཤས་བསྙུངས་ནས་2022་ལོའི་ཟླ་12་པའི་ཚེས་21་ཉིན་སྐུའི་འཕེན་པ་རྫོགས་པར་སློབ་བུ་ཀུན་ཀྱིས་མྱ་ངན་ཞུ།
