སྐྲ་ལོ་ཐུང་ཐུང་ཁ་དོག་བསྒྱུར་བའི།།
ཨ་མཆོག་གཉིས་ལ་ཨ་ལུང་བཏགས་པའི།།
སློབ་ཆེན་སློབ་མའི་མིང་གི་སྦུག་ན།།
ཁ་བ་བོད་པའི་སོན་རྩ་རུལ་འདུག།
ཉིན་མོར་གཏི་མུག་གྲོང་ལ་མྱུལ་བཞིན།།
མཚན་མོར་ཞབས་བྲོ་ཁང་ན་འདུར་བཞིན།།
ཁ་སང་དེ་རིང་ཟང་ཟིང་ཁྲོད་ན།།
ཁ་བ་བོད་པའི་སོན་རྩ་རུལ་འདུག།།
ཐ་མག་ཆང་གི་བཟི་ཁའི་བར་ན།།
ན་ཆུང་བུ་མོའི་ལུས་ལ་ཆགས་བཞིན།།
གཞན་སྐད་བོད་སྐད་བསྲེས་མའི་ཀློང་ན།།
ཁ་བ་བོད་པའི་སོན་རྩ་རུལ་འདུག།
བོད་ཡིག་བོར་བའི་ས་མཐའ་འདི་ན།།
ཕྱི་སྐད་དར་བའི་བོད་པའི་གྲོང་ན།།
སྦྲང་དཀར་རྩམ་པའི་དྲི་མ་མེད་པའི།།
ཁ་བ་བོད་པའི་སོན་རྩ་རུལ་འདུག།
མི་རིགས་རྩ་དོན་ཁོ་ཚོས་མི་ཤེས།
རིགས་ཞེན་ལ་རྒྱ་ཁོ་ཚོར་མེད་ཀི།
མ་ཎི་ཡིག་དྲུག་ཁོང་ཚོས་མི་འདོན།།
སོན་རྩ་འདི་ཚོ་རུལ་ནས་ཡོད་ཀི།
བཙན་པོའི་གདུང་རྒྱུད་རུལ་ནས་ཡོད་ཀི།
སྲོལ་རྒྱུན་བཟང་བོ་གཡུག་ནས་ཡོད་ཀི།
ཡ་རབས་གཤིས་ཀ་ལྷད་ཀྱིས་གོས་པའི།།
ཁ་བ་བོད་པའི་སོན་རྩ་འདི་ཚོ།།
རྒྱལ་བའི་དགོངས་པ་ཁོང་ཚོས་མི་རྟོགས།།
རྒྱལ་རབས་ལོ་རྒྱུས་ཁོང་ཚོར་མི་གསལ།།
ཀླད་པ་སྟོང་བའི་བོད་པའི་སོན་རྩ།།
དུས་རབས་འདི་ཡི་གྲུ་ན་རུལ་འདུག།།
བཤད་པའི་ཁ་ལྕེ་ཁོང་ཚོ་མི་བདེ།།
ལས་ཀའི་འཇོན་ཐང་ཁོང་ཚོར་མེད་ཀི།
རང་དོན་ཆུང་ཆུང་འགྲུབ་ལ་མ་འགྲུབ།།
ཁ་བ་བོད་པའི་སོན་རྩ་རུལ་འདུག།།
རྫུན་དང་ཕྲ་མ་ཁོག་ལ་སྦས་བཞིན།།
ཡར་ཚོགས་སློབ་ཐུན་ཁོང་ཚོ་ཆད་ཀི།
གཞོན་དུས་མི་ཚེ་ལེ་ལོའི་བར་ན།།
ཁ་བ་བོད་པའི་སོན་རྩ་རུལ་འདུག།།
ལོ་ལོན་ཕ་མའི་འགྲོ་སོང་བར་ན།།
སྤུན་དང་ན་ཟླའི་སེམས་ཁུར་ནང་ན།།
ས་ཡ་དྲུག་གི་ལས་དབང་གཡུག་ཞོག།
སློབ་ཐོན་ལག་འཁྱེར་རག་ལ་མ་རག།
རང་ཁ་རང་གསོ་ཐུབ་ཀི་མི་འདུག།
གསར་གཏོད་བྱེད་པའི་སྙིང་སྟོབས་མེད་ཀི།
ཆིག་སྒྲིལ་དེ་ཡང་ཐ་སྙད་ཙམ་ཞིག།
ཁ་བ་བོད་པའི་སོན་རྩའི་བོར་འདུག།
ལྡི་ལི་བོད་པའི་སློབ་ཆེན་སློབ་མ་དག་་གི་སྡོད་གནས་(youth host)་ནང་ཞག་ཅིག་བསྡད་པའི་ཚོར་བ།
སློབ་ཆེན་སློབ་མ་རུལ་བ་མ་རེད།།
ཁྱེད་ཀྱི་སྣ་ལ་སྐྱག་པ་གོས་འདུག།།
ལན་གཅིག་ཁྱེད་ཀྱི་སྣ་ཙོག་བཀྲུས་ནས།།
གཞན་གྱི་སྟེང་དུ་དྲི་མ་བསྣོམས་རོགས།།
མགོ་ནས་ཤོ་ལོ་ཀ་གཉིས་གསུམ་ཞིག་བཀླགས་པས་་་རྡི་ལིའི་མཐོ་སློབ་ཁང་སེམས་ལ་དྲན་ནས་ཡོང་གི་་་་་ངའི་དྲན་པ་ནོར་མི་འདུག་་་་སྙན་ངག་པ་ཁྱོས་འཇོན་འདུག་་་་ངོ་མ་དེ་འདྲ་ཞིག་ཡིན་ཡ།