མི་གསོན་པོ།
གཙུག་ལག་སློབ་གྲྭ་འདིའི་ནང་དུ་དགའ་སྐྱིད་སྤྲོ་གསུམ་དང་ལྡན་པའི་འཚོ་བ་རོལ་ཏེ་ལོ་ངོ་ཧྲིལ་པོ་གསུམ་བརྒལ་ཟིན་པའི་དེ་རིང་། ངས་སྦྱངས་འབྲས་ལ་གདེངས་ཚོད་རྙེད་པ་དང་གཟེངས་སུ་ཐོན་པའི་གྲུབ་འབྲས་བླངས་པའི་ལོ་རྒྱུས་ཤིག་བཤད་རྒྱུ་མེད་ཀྱང་སོ་སོའི་དབྱིན་སྐད་ཀྱི་ཤེས་ཚད་ལ་དཔག་པའི་བློ་བསྐྱེད་དང་ཉམས་མྱོང་རྟོགས་སད་སོགས་གང་ཐད་ནས་རང་ཉིད་ཀྱི་མི་ཚེ་ནང་དུ་གཟི་བརྗིད་ཀྱི་ལོ་རྒྱུས་མཐོ་རུ་བཏང་བའི་བྱ་གཞག་ཅིག་བསྐྲུན་ཡོད་པའི་ངེས་ཤེས་ཀྱིས་སེམས་ཚོར་སྙིང་ཁམས་སྨིན་པས་སེམས་པ་ནི་དགའ་སྤྲོས་ཁེངས།
དེ་ཡང་ལོ་ངོ་གསུམ་གྱི་ཡར་སྔོན་ཆེས་ཐོག་མའི་གོམས་སྣེ་སློབ་གླིང་འདི་རུ་འཇོག་སྐབས་རང་ཉིད་ཀྱི་གནད་སྟངས་དང་མཐོ་སློབ་ཀྱི་འཚོ་བ་གཉིས་འཚམ་པོ་མེད་པའི་ཚོར་སྣང་ཞིག་གིས་རང་གིས་གདམས་ཟིན་པའི་ལམ་ཁ་དེ་ནོར་སོང་བའི་འདུ་ཤེས་ཤིག་སེམས་གཏིང་ནས་སྐྱེས་མྱོང་། རྒྱུ་མཚན་ནི་འདུ་འཛིང་རྒོད་ཅིང་རང་དབང་མོད་པའི་སློབ་ཆེན་གྱི་འཚོ་བ་ནི་ཀུན་སྤྱོད་ལ་ཚོད་འཛིན་དགོས་པའི་ཆོས་ལུགས་ཀྱི་བསླབ་ཁྲིམས་དང་། ཆོས་ལུགས་ཀྱི་བསླབ་ཁྲིམས་དང་འབྲེལ་བ་ཆེན་པོ་མེད་ཀྱང་ཆོས་ལུགས་ལ་སྙད་པའི་ཡུལ་གྱི་གོམས་སྲོལ་དོག་པོ་ཁག་དང་ལྷན། མི་ཚེ་མཉམ་དུ་འགྲོགས་ཟིན་པའི་བན་དེ་ཞིག་གིས་ངོས་ནས་བཤད་ན་ངོ་མ་བློ་ཡུལ་དུ་ཤོང་མི་ཐུབ་པའི་གནད་དོན་ཞིག་རེད་ཅེས་བཤད་ཐུབ།
དེ་ལས་ཀྱང་རང་ངོས་ནས་དཀའ་ངལ་འཕར་མ་ཞིག་གིས་མགོ་བོ་དགྱེ་མི་ཐུབ་པའི་གནོན་ཤུགས་ནན་མོ་ཞིག་གི་འོག་ཏུ་ཚུད་པ་ནི་དབྱིན་སྐད་ཀྱི་སྦྱངས་འབྲས་གཞི་རིམ་གྱི་ཤེས་ཚད་ཙམ་ཡང་རྒྱུད་ལ་མེད་པ་དེས་ངའི་སྤོབས་པ་དང་སྤྲོ་སྣང་ཡོད་ཚད་འབུར་འཇོམས་བཏང་སོང་། ཐ་ན་འཛིན་རིམ་ནང་དུ་རང་ཉིད་ངོ་སྤྲོད་བྱེད་རྒྱུ་ཙམ་ལའང་རྔུལ་ཆུས་ངོ་གདོང་ཐེངས་མང་བཀྲུས་མྱོང་ལ་ཉིན་རེའི་སློབ་ཚན་ཧྲིལ་པོའི་ནང་ནས་ཚིག་གཅིག་ཙམ་ཡང་གོ་མ་ཐུབ་པའི་དཀའ་ངལ་འཕྲད་པའང་ཐེངས་ཉུང་ཉུང་མིན། དེ་ལྟར་ཕམ་ཁ་དང་ངོ་ཚ་ད་དུང་འཇིགས་སྐྲག་སོགས་ཀྱིས་གྲགས་ཅན་གྱི་སློབ་ཆེན་ཞིག་གི་ནང་དུ་འཛུལ་རྒྱུ་འདི་རང་གི་གནས་བབས་དང་དུས་རིམ་སོགས་ཆེས་མི་འོས་པ་ཉིད་དུ་ངོས་འཛིན་བྱེད་དགོས་བྱུང་།
འོན་ཏེ་བསྟན་འཛིན་རྒྱ་མཚོ་ཞེས་པའི་༧གོང་ས་མཆོག་གི་མཚན་གྱི་གཟི་བརྗིད་འོག་སློབ་སྦྱོང་བྱེད་རྒྱུའི་གོ་སྐབས་ཐོབ་པའི་བཀའ་དྲིན་གྱི་སེམས་ཚོར་དང་། རང་གི་བླ་མ་མི་འགྱུར་རྡོ་རྗེས་རང་ལ་བཅང་པའི་རེ་སེམས་ཟབ་མོ་དེས་ངས་ཕྱི་གཤོལ་བྱེད་རྒྱུའི་འདུན་པ་རྒྱབ་ཏུ་བསྐྱུར་ཏེ་རི་ལྟར་མཐོ་ཞིང་རྡོ་ལྟར་འཁྲེགས་པའི་མདུན་ལྗོངས་ཀྱི་དཀའ་ངལ་དག་ལ་གདོང་ལེན་བྱེད་རྒྱུའི་ཆོད་སེམས་བརྟན་པོར་བཅང་ཏེ་གོམ་པ་རེ་རེ་བྱས་ཏེ་མདུན་དུ་སྤོས། ༧བསྟན་འཛིན་རྒྱ་མཚོ་ཡིད་དུ་བསྒོམས་ཤིང་མི་འགྱུར་རྡོ་རྗེ་སེམས་ནས་དྲན་པས་ངའི་སེམས་ཤུགས་ལ་ཚེ་སྲོག་རྙེད། དུས་དེ་ནས་ངས་ཉིན་རེར་ཚིག་རེ་ཤེས་པ་ཙམ་གྱིས་ཉིན་བརྒྱར་ཚིག་བརྒྱ་ཤེས་པའི་ལེགས་བཤད་དེ་སྙིང་དུ་བཟུང་ནས་འབད་བརྩོན་བྱས་འབྲས་དེ་རིང་ངས་ཞིབ་འཇུག་སློབ་མའི་སློབ་ཐོན་གྱི་ལག་ཁྱེར་རྒྱལ་ཁའི་ངང་ནས་ལེན་རྒྱུ་བྱུང་བ་འདི་རང་གི་མི་ཚེ་ནང་དུ་ཧ་ཅང་དགའ་འོས་པའི་བྱ་གཞག་དང་གྲུབ་འབྲས་ཤིག་ཅི་ལ་མིན།
གང་ལྟར་ལོ་ངོ་གསུམ་སྟེ་ལོ་ཟླའི་ཕུང་པོ་ཉིན་མཚན་འཁོར་འགྲོས་ཀྱིས་བཞུད་པའི་ཉིན་ཞག་ཆིག་སྟོང་ལྷག་གི་དུས་ཡུན་ནང་། གནའ་དེང་གི་ཤེས་བྱ་ལ་ཅི་དགར་འཇུག་པའི་སློབ་ཆེན་གྱི་ཁོར་ཡུག་འདི་ནས་ངས་རང་ཉིད་ཀྱི་དགའ་ཕྱོགས་དང་མཐུན་པའི་སློབ་ཚན་དབང་རྩ་རིག་པའི་ངོ་སྤྲོད་དང་། ཀླད་ཁམས་ལ་ཞིབ་འཇུག་བྱེད་པ། འཛམ་གླིང་ཆོས་ལུགས་ཆེན་པོ་ཁག་གི་ངོ་སྤྲོད་དང་སྙིང་དོན། ཉེ་རབས་རྒྱ་ནག་གི་ཡར་རྒྱས། ནང་བསྟན་དཔལ་འབྱོར་རིག་པ། སེམས་ཁམས་རིག་པའི་ངོ་སྤྲོད། རྒྱུན་ལྡན་མིན་པའི་སེམས་ཁམས་རིག་པ། ཚོར་སེམསའགྲེལ་བཤད་ཀྱི་སེམས་ཁམས་རིག་པ། སྤྱི་ཚོགས་སེམས་ཁམས་རིག་པ། ནུབ་ཕྱོགས་ལྟ་གྲུབ་ཀྱི་བྱུང་རིམ། སེམས་གཅོང་བཅོས་ཐབས་ཀྱི་སེམས་ཁམས་རིག་པ། མཁྱེན་རྟོགས་ཀྱི་ལམ། རིག་གཞུང་དང་ནུས་པའི་ཤེས་རྟོགས་སོགས་འགྲོ་བ་མི་ཡི་སྤྱི་ཚོགས་དང་འཚོ་གནས་ལ་ཕན་ཐོག་དང་དགོས་མཁོའི་རང་བཞིན་ཅན་གྱི་ཤེས་ཡོན་གྱི་ཁ་ཕྱོགས་ལ་རང་ནུས་གང་ཡོད་ཀྱིས་འབད་འབུང་བྱས་ཏེ་ནོར་བུ་གླིང་ནས་ལག་སྟོང་དུ་གྱུར་པའི་ངང་ཚུལ་མ་ཡིན་པ་གནའ་དེང་གི་རིག་པའི་གཞུང་ལུགས་སྣ་ཚོགས་ལ་རྒྱུས་ལེན་ཅུང་ཟད་བྱུང་བའི་རིན་ཐང་ལ་བསམ་ཚེ་མི་ཚེ་དང་དུས་ཚོད་སྟོང་ཟད་དུ་བཏང་མེད་པའི་ཚོར་ཤེས་ཀྱི་འདུན་པ་རབ་ཏུ་བརྟས།
དེས་ན་བླ་མའི་བཀའ་དྲིན་དང་། ཕ་མའི་བྱམས་སྐྱོང་། སྤུན་གྲོགས་ཀྱི་སེམས་ཁུར་ཀུན་ཀྱང་ཆུད་ཟོས་སུ་བཏང་མེད་པའི་སེམས་ཚོར་ཟབ་མོས་ཁྱེད་ཅག་གི་བཀའ་དྲིན་ཆ་ཤས་ཙམ་འཇལ་བའི་གོ་སྐབས་ཐོབ་སོང་སྙམ་པའི་སེམས་ཀྱི་དགའ་བདེ་ནི་རྒྱ་མཚོའི་རྦ་རླབས་ཇི་བཞིན་གྱེན་དུ་འཕྱོ་ཞིང་རྩེན། མདོར་ན་ངའི་མི་ཚེ་དང་མི་ཚེའི་རིན་ཐང་ཁྱེད་ཅག་གིས་བསྩལད་གནང་བས་ཁྱེད་ཅག་གི་རེ་འདུན་དང་མཐུན་པའི་སྒོ་ནས་མ་འོང་མདུན་ལྗོངས་མི་རིགས་དང་སྤྱི་ཚོགས། འཆམ་མཐུན་དང་ཞི་བདེ། བསྟན་པ་དང་འགྲོ་བ་སོགས་ལ་ཁ་ཕྱོགས་པའི་བསྒྲུབ་འོས་ཀྱི་ཞབས་ཞུའི་རྣམ་གྲངས་ཇི་སྙེད་ཅིག་འཆར་སྣང་གི་གཟུགས་བརྙན་རྟག་འཛིན་གྱི་བསམ་བློ་དང་སྦག་ཏེ་དམ་བཅའི་རི་མོ་སྙིང་དབུས་སུ་ལན་བརྒྱར་བཀོད་ཡོད།
དེའི་ཕྱིར་བརྒྱུད་རིམ་འདི་དག་གི་ནང་དུ་དངོས་ཤུགས་བརྒྱུད་གསུམ་ནས་རྒྱབ་སྐྱོར་དང་རོགས་རམ་བྱེད་མཁན་མཁས་དབང་མ་སུ་སྒྲར་ལིང་ཏྲོན་དང་། སློབ་གྲྭའི་འགོ་གཙོ་རྗོ་ནི་ཐན་ལ་ཤ། ཁྱད་པར་ལས་རིམ་འདིའི་གོ་སྒྲིག་པ་༧བསྟན་འཛིན་རྒྱ་མཚོ་ལྷན་ཁང་དང་དེ་བཞིན་འཛིན་རིམ་ཁག་གི་དགེ་རྒན་དང་ནང་སྦྱོང་གི་དགེ་རྒན་རྣམ་པ་གཞན་ཡང་རིག་གཞུང་ལྷན་ཁང་གི་ལས་བྱེད་རྣམ་པ་བཅས་ལ་ངས་གུས་འདུད་བཅས་ཐུགས་རྗེ་དང་བཀའ་དྲིན་ཆེ་ཞེས་ཞུ་རྒྱུ་ཡིན། ཁྱེད་ཅག་གི་བཀའ་དྲིན་དང་བྱམས་སྐྱོང་ཚིག་ཐོག་ནས་འཇལ་མི་ཐུབ་ཀྱང་སེམས་ཐོག་ནས་བརྗེད་མི་སྲིད།
དེ་རིང་སློབ་ཐོན་གྱི་ཉིན་འདིར་སློབ་ཆེན་གྱིས་ང་ལ་སྟེར་བ་ནི་ཤོག་བུའི་ཐོག་ཏུ་མིང་བྱང་འཁོད་པའི་ལག་ཁྱེར་ཙམ་མིན་པར་སློབ་གྲྭའི་རེ་འདུན་དང་ངའི་འགན་འཁྲི་ངོ་མ་སྟེ་སྤྱི་ཚོགས་ཐོག་ཏུ་ཤེས་ཡོན་པས་བསྒྲུབ་དགོས་པའི་བྱ་བ་ཇི་སྙེད་ཧུར་ཐག་གིས་འབད་དགོས་པའི་སྐུལ་ལྕགས་དང་ཡིད་ཆེས་དེ་ཡིན་སྟབས་ངས་ནམ་ཡང་རང་གི་ལས་འགན་དང་སློབ་གྲྭའི་རེ་བ་ཆུད་ཟོས་སུ་གཏོང་མི་སྲིད། དེ་བཞིན་རང་ཉིད་ཆེས་དགའ་བའི་སློབ་གླིང་འདི་དང་ཁ་གྱེས་ཏེ་སྤྱི་ཚོགས་ཤིག་དང་མི་རིགས་ཤིག་གི་ལས་དབང་ལ་འགན་ཁུར་དགོས་པའི་གནད་ལུགས་ཟབ་མོས་གོམ་ཁ་མདུན་དུ་སྤོ་བའི་ཚེ། ཕ་མེས་གོང་མ་རྣམས་ཀྱིས་ཟུངས་ཁྲག་གིས་བསྐྲུན་པའི་གཟི་བརྗིད་དང་རིན་ཐང་ཅན་གྱི་མི་རིགས་འདི་ཕྱི་ནང་གི་རྒྱུ་རྐྱེན་མང་པོས་ཡལ་ལ་ཉེ་དུས། ང་ཚོས་བློ་བརྟན་འགྱུར་མེད་ཀྱིས་མི་རིགས་ཀྱི་བསམ་བློ་དང་བསམ་བློ་དེ་ལྡན་གྱི་ལངས་ཕྱོགས་བཟུང་དེ་མྱུར་སྐྱོབ་དང་རྒྱུན་འཛིན་བྱེད་རྒྱུ་ནི་དུས་རབས་ཀྱིས་བསྐུལ་བའི་འགན་འཁྲི་ཞིག་ཡིན་པའི་ངེས་ཤེས་གཏིང་ནས་རྙེད།
རྒྱུ་མཚན་དེ་དག་གིས་ངས་མ་འོང་པའི་མདུན་ལྗོངས་སུ་འོད་སྟོང་ལྡན་པའི་ལམ་བུ་ཞིག་བསྐྲུན་རྒྱུ་ཆོད་སེམས་བརྟན་པོ་ཡོད་ལ་བོད་མི་རིགས་ཀྱི་ཤ་ཁྲག་རུས་གསུམ་གྱིས་ང་ལ་ཚེ་སྲོག་སྟེར་བ་བཞིན་དུ་ངས་ཀྱང་བོད་མི་རིགས་འདི་ལ་ཚེ་སྲོག་དྲོན་མོས་ལེགས་སྐྱེས་ཤིག་ཅིས་ཀྱང་འབུལ་དགོས། ད་དུང་བོད་མི་རིགས་ཀྱི་ལོ་རྒྱུས་ནང་དུ་ནག་ཐིག་འགྲོ་བའི་མི་ཚེའི་བྱུང་བ་ཅུང་ཟད་ཙམ་ཡང་མི་འཇོག་རྒྱུ་དམ་བཅའ་བརྟན་པོ་བཅས་མི་གསོན་པོ་ནས་སློབ་ཐོན་ཉིན་བྲིས།། །།
སྤྱིར་ངའི་ཁོར་ཡུག་ཏུ་མི་ཕལ་ཆེ་བ་ཤི་ཟིན་རུང་། འདི་རིང་མི་གསོན་པོ་ཞིག་དང་མི་སྐད་གསོན་པོ་ཞིག་གོ་དུས་ནག་ཡོར་རེར་ལུས་པའི་ངའི་སེམས་ཁམས་སུ་ངལ་གསོ་གསོན་པོ་ཞིག་སྟེར་བྱུང་ངོ་།
ག་རེ་མི་གསོན་པོ། སུ་གང་ཡིན་མི་ཤེས་པའི་མིང་མེད་མཁན་ཞིག་ལ་གསོན་པོ་ཞེས་བརྗོད་ཀྱི་རེད་དམ།
གྲུབ་རྒན་ཚང་རྒས་ཁར་སློབ་ཐོན་གནང་བ་དེར་རྟེན་འབྲེལ་ཞུ། ད་སྐྱེ་བ་ཕྱི་མར་བཅོལ་བ་ཡི་སོགས་ཀྱི་ཚིག་རོ་དེ་ཚོ་མ་སྐྱོར་བར་སྐྱེ་བ་འདི་ལ་བཅོལ་བ་ཡི་ནོར་ལ་རང་ཉིད་ལེན་དང་མཚུངས་པ་ཞིག་གནང་རོགས།
ད་འདིར་ཁྱེད་ཅག་ལ་ལས་འགན་ཆེན་པོ་ཞིག་ཡོད་པ་དེ་ཤེས་ཡོད་ཚོད་རེད།ངའི་རེ་བ་ལྟར་ན་དེང་དུས་ཀྱི་ཚན་རིག་ལག་ཤེས་སོགས་ཀྱི་སློབ་དེབ་མང་པོ་བོད་ཡིག་ཐོག་བསྒྱུར་ནས་བོད་ཡིག་རང་གི་ཐོག་ནས་བསླབས་ཐུབ་པ་བྱེད་དགོས།དེ་ལྟར་བྱུང་ན་བོད་མི་རིགས་ཀྱི་ཚེ་སྲོག་ཏུ་གྱུར་བའི་བོད་ཡིག་གི་ཚེ་སྲོག་བརྟན་པོ་ཡོང་གི་རེད།དེ་མིན་བཙན་བྱོལ་གཞུང་ནས་ཕྱི་རྒྱལ་ལུང་པ་སློབ་སྦྱོང་ལ་བཏང་རྗེས་སུ་འབྲས་བུ་ཨ་སྒོར་མ་གཏོགས་མི་དགོས་མཁན་དེ་འདྲ་བྱུང་ན་ཕན་མེད་དུ་གྱུར་བ་རེད་འདོད་པས། བསྟན་འཛིན་རྒྱ་མཚོས་རེ་བ་དེ་ངོས་འཛིན་བྱེད་ཐུབ་དགོས་སོ།