ཀ་བཙན་བླ་མ་སྐྱབས། ཀ་དག་སྒྲ་བསྒྱུར་སྐར་ཚོགས་ཁྲོད་ན་ཟླ་བ་བཞིན་དུ་མངོན་པར་འཕགས།།
ཁ་མིན་དོན་གྱིས་རིགས་ཞེན་ཆེ་བས་རིག་གཞུང་ལས་ལ་མི་ཚེ་བསྟིམས།།
ག་དུས་ཡིན་ཡང་དལ་ལྷོད་མེད་པར་ཤེས་བྱའི་དོ་ར་ལེགས་སྐྱོང་མཁན།།
ང་ལ་བཀའ་དྲིན་ཤིན་ཏུ་ཆེ་བའི་སློབ་དཔོན་མཆོག་ལ་མྱ་ངན་ཞུ།།
ཅ་དག་རིག་ཚན་སྣ་མང་བརྡ་ཆད་བརྒྱད་འབུམ་ལྷག་བརྒལ་གཏན་ལ་ཕབས།།
ཆ་ལུགས་སྤྱོད་མཛེས་དཔྱོད་ལྡན་སློབ་མས་ས་སྟེང་ཀུན་ལ་ཁྱབ་པ་དང་།།
ཇ་ཐུན་ཙམ་ཡང་ཆུད་ཟོས་མེད་པར་ཤེས་ཡོན་སློབ་གསོའི་རྐང་འཛིན་པ།། ཉ་མོ་བཞིན་དུ་རྣམ་རིག་བཀྲ་བའི་བདག་གི་དགེ་རྒན་དམ་པ་མཆོག།
ཏ་ཐཱ་ག་ཏའི་གསུང་རབ་གཙོས་པའི་གནའ་དེང་བོད་རྒྱའི་ཤེས་བྱ་དང་།།
ཐ་སྙད་གསར་རྙིང་ལོ་ཙཱ་བྱེད་པར་ངེས་པ་དོན་གྱི་གདེངས་སྤོབས་ཅན།།
ད་ལྟའི་དུས་འདིར་མེད་དུ་མི་རུང་སྒྲ་བསྒྱུར་མཁན་པོ་སངས་རྒྱས་མཆོག།
ན་བ་ངན་པས་ཞིང་གཞན་ཁྲིད་འདི་རྒྱ་བོད་མཁས་པའི་གྱོང་གུད་ཅིག།
པ་གོར་བཻ་རོ་ཙ་ན་ཇི་བཞིན་དེང་རབས་ལོ་ཙཱའི་ཁྲོད་ན་བརྗིད།།
ཕ་ཁོལ་སློབ་དཔོན་རྣམ་དཔྱོད་མངའ་བས་བསྟན་སྲིད་དོན་ལ་ལག་རྗེས་མང་།།
བ་ར་རུ་ཅི་མཆོག་སྲེད་དང་མཚུངས་ལས་དོན་སྒྲུབ་ལ་མཐུ་རྩལ་ཅན།།
མ་ལག་ཀུན་ལ་བཀའ་དྲིན་མཚུངས་མེད་བཤེས་གཉེན་དམ་པར་གདུང་འབོད་ཞུ།།
ཙ་རིའི་གངས་ལྗོངས་མཁས་པའི་གསུང་རབ་གླེགས་བམ་པོ་ཏི་སྟོང་ཕྲག་གྲངས།།
ཚ་གཅུན་སྲིད་ཇུས་དམར་པོའི་འོག་ནས་ཐབས་མཁས་པར་སྐྲུན་གནང་བ་ཡིས།།
ཛ་ཡའི་རྒྱལ་བསྟན་བསྐྱར་དར་དོན་ལ་བློ་མིག་སྒོ་མོ་ཕྱེས་པ་སོགས།།
ཝ་མ་ཝོལ་མིན་ལས་དོན་བསྒྲུབས་མཁན་སྐྱེས་ཆེན་ཁོང་ལ་ཡི་རངས་ཞུ།།
ཞ་སྨྱུག་འཛིན་མཁན་སློབ་གླིང་ར་བའི་འཛིན་སྐྱོང་ལས་ལ་འཇུག་ཞོར་དུ།།
ཟ་ཧོར་ཇོ་བོའི་ལམ་སྒྲོན་ལ་སོགས་སྟོན་པའི་གསུང་རབ་སྣ་ཚོགས་ལ།།
འ་ཅག་བླ་མ་ཤར་གདོང་གཙོས་པའི་བཤེས་གཉེན་དམ་པ་མང་བསྟེན་ནས།།
ཡ་མེད་རིག་བརྒྱའི་གནས་ལ་མཁྱེན་ཡངས་སློབ་དཔོན་ཆེན་མོ་རྒྱལ་གྱུར་ཅིག
ར་བ་གངས་ལྗོངས་ཡུལ་ན་རབ་གྲགས་ཚིག་རྒྱན་རིག་པའི་སྒོ་འབྱེད་དང་།།
ལ་རྒྱ་ཅན་གྱི་མཁས་པའི་གླེང་སྟེགས་སྤྲང་ཆར་གཙོ་སྒྲིག་གནང་བ་སོགས།།
ཤ་ཚའི་གཏམ་དང་རིན་ཐང་ཅན་གྱི་གསུང་རྩོམ་བཅུ་ཕྲག་བརྒལ་བ་བཅས།།
ས་སྒང་འདི་ལ་སྐྱེས་སུ་གནང་མཁན་མཁས་དབང་ཁྱེད་ལ་རྗེས་དྲན་ཞུ།།
ཧ་ལས་དགོས་པ་རྩོམ་རིག་གསར་བའི་ཤིང་རྟའི་སྲོལ་འབྱེད་གནང་བ་གཅིག། ཧ་ཅང་རྒྱ་ཆེའི་བསླབ་པ་ཟབ་པའི་སྒྲ་བསྒྱུར་མཁན་པོར་བཞུགས་པ་གཉིས།། ཧ་ལམ་གཞན་མེད་དཔེ་སྐྲུན་ལས་མཛད་ཕུལ་བྱུང་མཚན་སྙན་ཐོབ་པ་བཅས།།
ཧ་གཉིད་སད་པ་རིགས་ཞེན་ཅན་དེའི་མཛད་རྗེས་གཏན་དུ་གནས་གྱུར་ཅིག།
ཨ་ཆེན་གངས་ལྟར་སྐུ་གཟུགས་རབ་བརྗིད་མཁའ་བཞིན་དགོངས་པའི་དཔངས་མཐོ་ལ།།
ཨ་འཐས་རྡོ་རྗེ་བྲག་རི་དང་མཚུངས་དམ་བཅའི་ཚིག་ལ་འགྱུར་བ་མེད།།
ཨ་ལོང་འགྲིག་མའི་ལྕགས་ཐག་འབྲེལ་ལྟར་ལས་འཆར་འགོད་ལ་རིམ་པ་ཅན།།
ཨ་ཉིད་རྟོགས་པའི་ཤེས་བརྩོན་ཅན་ཁྱེད་ང་ཚོའི་ཚང་མའི་དཔེ་སྟོན་ལགས།།
ཨི་ཡིག་ལ་སོགས་བོད་ཀྱི་རིག་གཞུང་སྲུང་སྤེལ་གནང་སྟེ་ཚེ་མཐར་ཕྱིན།།
ཨུ་དུམ་ཝ་རའི་མེ་ཏོག་ཇི་བཞིན་ཁྱེད་འདྲ་བྱོན་པ་རེ་ཟུང་ཙམ།།
ཨེ་མ་ངོ་མཚར་མཛད་རྗེས་མཐའ་ཡས་སློབ་དཔོན་མཆོག་གི་བྱུང་བ་ཙམ།།
ཨོཾ་མཛད་འཕགས་མར་གསོལ་བ་འདེབས་བཞིན་འདིར་འགོད་བྱས་པ་དགེ་ལེགས་ཤོག།
ཀ་ཕྲེང་ཨུ་དུམ་ཝ་རའི་མེ་ཏོག་ཅེས་པ་འདི་ཡང་བདག་གི་རྩོམ་རིག་དགེ་རྒན་ཞིང་གཤེགས་དམ་པ། དགེ་རྒན་ཆེན་མོའམ་དེང་དུས་ཀྱི་ཞུ་ཆེན་གྱི་ལོ་ཙཱ་བ། བོད་ཀྱི་རྩོམ་རིག་གསར་བའི་སྣེ་ཁྲིད་མཁན་དང་མི་རིགས་ཀྱི་སློབ་གསོ་བ་ཆེན་པོ། རིག་གཞུང་ཉམས་ཞིབ་པ། ནང་དོན་རིག་པ་དང་ཚགས་པར་དུས་དེབ་སོགས། དེབ་གཟུགས་འདྲ་མིན་ལ་བགྱི་བའི་རྩོམ་སྒྲིག་དང་གཙོ་སྒྲིག་པ། མི་རིགས་སློབ་གསོའི་ལས་དོན་གྱི་སྣེ་ཁྲིད་པ་དང་བོད་ཀྱི་རིག་གཞུང་སྲུང་སྐྱོང་མཁན། རིགས་ལ་ཞེན་ཁོག་ཆེ་ཞིང་ཞལ་གསུང་ལག་ལེན་དུ་བསྟར་མཁན། ཐབས་ཤེས་ཟུང་དུ་འབྲེལ་ནས་འཛིན་སྐྱོང་སོགས་ལས་དོན་སྣ་ེམང་ལ་འཇུག་ལྡོག་མཁས་པའི་བོད་རིག་པའི་ཀ་ཆེན། སློབ་དཔོན་ཆེན་མོ་སངས་རྒྱས་མཆོག་སྐུ་ཚེ་མ་ཟིན་པའི་གཏམ་ངན་མཐོང་ཐོས་སུ་གྱུར་མ་ཐག་འགྱོད་གདུང་དང་ཕངས་སེམས་ཆེན་པོ་དང་བཅས་ཁོང་གི་སློབ་མའི་མིང་འཛིན་པ་ཀ་བཙན་བླ་མ་སྐྱབས་ཀྱིས། ཕྱི་ལོ་༢༠༢༣ / ༢ / ༢༧ ཉིན་གྱི་ཞོགས་པར་ཨ་རིའི་རྒྱལ་ས་ནས་མགྱོགས་བྲིས་སུ་བགྱིས་པ་དགེ་བའི་རྒྱུ་རུ་འགྱུར་བ་ཤོག