བརྒྱུད་སྤྲོད་པ། དོན་འགྲུབ་བཀྲ་ཤིས།
ཟླ་འདིའི་ཕྱི་ཚེས་༡༠ ཉིན་མགོ་ལོག་ཁུལ་དར་ལག་རྫོང་སྟག་ཐོག་ཡུལ་ཚོའི་རུ་ཆེན་གསུམ་པའི་སློབ་མ་ཀར་མེ་ཟེར་བ་ཞིག་ལ་རྒྱ་གཞུང་ཉེན་རྟོག་པས་གཅར་རྡུང་དྲག་པོ་བཏང་སྟེ་བསད་ཡོད་འདུག འདི་གར་མགོ་ལོག་དམ་ཆོས་དཔལ་བཟང་ལགས་ཀྱིས་གནས་ཚུལ་མཁོ་སྤྲོད་གནང་བ་ལྟར་ན། ཟླ་འདིའི་ཕྱི་ཚེས་༧ ཉིན་མགོ་ལོག་ཁུལ་དར་ལག་རྫོང་གི་མགོ་ཁྲིད་ཚོས། སྟག་ཐོག་ཡུལ་ཚོའི་ཡུལ་དཔོན་འོས་འདེམས་ཀྱི་ཚོགས་འདུ་བསྡུས་ཡོད་པ་དང་། སྐབས་དེར་མང་ཚོགས་ཀྱིས་བཀྲ་ཤིས་ཟེར་བའི་བོད་མི་ཞིག་ལ་འོས་བླུགས་ཡོད་ཀྱང་། སྲིད་གཞུང་གིས་དེ་ལ་མོས་མཐུན་མ་བྱས་པར་ངེས་པར་དུ་རྒྱ་མི་ཞིག་འདེམས་དགོས་པའི་བཀའ་རྒྱ་བཏང་བར་བརྟེན། ཕྱོགས་གཉིས་བར་ཁ་རྩོད་ཤོར་ཡོད་པ་མ་ཟད། ཡུལ་མི་ཚོས་སྲིད་གཞུང་གི་འོས་མི་དེར་འོས་མ་བླུགས་པར་རང་ཁྱིམ་དུ་ལོག་ཡོད་འདུག
དེ་ནས་ས་གནས་སྲིད་གཞུང་གིས་ཉེན་རྟོག་པ་ཆེད་མངགས་ཀྱིས་རྗེས་འདེད་གཏོང་དུ་བཅུག་སྟེ་འོས་བླུགས་དགོས་པའི་བཙན་སྐུལ་བྱེད་སྐབས། ཡུལ་མི་ཚོས་ང་ཚོས་ཁྱེད་ཅག་གི་འདོད་མོས་ལྟར་འོས་མ་བླུགས་པར་ཁྱེད་ཚོ་མ་དགའ་བ་བྱུང་ཡོད་པས། དེ་ལ་དགོངས་དག་ཞུས་པ་ཡིན། ཡིན་ནའང་། ང་ཚོར་སོ་སོའི་ཡུལ་དཔོན་འོས་འདེམས་བྱེད་པའི་ཐོབ་ཐང་ཡོད་སྟབས། ཁྱེད་ཚོས་གཏན་འཁེལ་བྱས་པའི་འོས་མི་དེར་འོས་གཏན་ནས་བླུགས་རྒྱུ་མིན། ཞེས་ཉེན་རྟོག་པའི་བཀའ་རྒྱར་གཏན་ནས་དང་ལེན་མ་བྱས་པར་བརྟེན། ཡུལ་དཔོན་འོས་མི་བཀྲ་ཤིས་དང་བློ་སྐལ། གངས་དགའ། གངས་རྡོ་ཕ་བུ་གསུམ་སོགས་བོད་མི་ ༡༣ འཛིན་བཟུང་བྱས་ཏེ་རྫོང་ཐོག་ཏུ་འདྲི་གཅོད་བྱེད་བཞིན་ཡོད་པ་མ་ཟད། ཕྱི་ཚེས་༡༠ ཉིན་སྟག་ཐོག་ཡུལ་ཚོའི་སློབ་མ་ཀར་མེ་ཟེར་བ་ཞིག་ལ་ཉེན་རྟོག་པས་གཅར་རྡུང་དྲག་པོ་བཏང་སྟེ་ཕྱི་ཚེས་ ༡༡ ཉིན་རྫོང་སྨན་ཁང་ནས་འདས་གྲོངས་སུ་ཕྱིན་ཡོད་འདུག
ད་ལྟའི་ཆར་སྟག་ཐོག་མང་ཚོགས་ཀྱིས་རྫོང་སྲིད་གཞུང་ལ་སློབ་མ་ཀར་མེ་བསད་པའི་གྱོད་དོན་ཁྲིམས་ཐོག་ནས་ཐག་གཅོད་ནན་པོ་བྱེད་དགོས་རྒྱུ་དང་། མི་མང་གིས་ཡུལ་དཔོན་འདེམས་པའི་དམངས་གཙོའི་ཐོབ་ཐང་མིང་དོན་དང་མཚུངས་བ་སྤྲོད་དགོས་པའི་འབོད་སྐུལ་གཏུག་བཤེར་བྱེད་བཞིན་ཡོད་པ་མ་ཟད། རྫོང་སྲིད་གཞུང་གིས་གུ་ཡངས་དང་བསམ་ཤེས་མ་བྱས་ཚེ་མཇུག་འབྲས་ཅི་བྱུང་བཤད་ཚོད་མི་ཐེབས་པས། མ་འོངས་པར་མཇུག་འབྲས་ཅི་བྱུང་ཚང་མ་སྲིད་གཞུང་གིས་འགན་འཁུར་དགོས་སྐོར་བརྗོད་ཀྱི་ཡོད་པ་དང་། ཕྱོགས་གཉིས་ནས་གྱོད་དོན་ཞི་བའི་སྒོ་ནས་ཐག་གཅོད་ཡོང་སླད་ཡུལ་ཚོའི་གནད་ཡོད་མི་སྣ་དང་བསམ་ཤེས་འགའ་རེ་གཟུ་དཔང་དུ་ཕྱིན་ཡོད་འདུག
རྒྱ་གཞུང་ཉེན་རྟོག་པས་བསད་པའི་སློབ་མ་ཀར་མེ་ཟེར་བ་དེ་ད་ལྟ་ལོ་ན་ ༢༢ ཡིན་པ་དང་། ཁོང་གི་ཕ་མིང་ལ་བློ་ཉི་ཟེར་བ་དང་། མགོ་ལོག་ཁུལ་དར་ལག་རྫོང་སྟག་ཐོག་ཡུལ་ཚོའི་རུ་ཆེན་གསུམ་པ་ནས་ཡིན་འདུག ཡུལ་མི་ཚོས་བཤད་པ་ལྟར་ན། ཉེན་རྟོག་པས་ཁོང་གི་མཁལ་མར་རྡོག་ཐོས་ཤུགས་ཆེན་གཞུས་རྐྱེན་མཁལ་མར་གཏོར་སྐྱོན་ཐེབས་ཏེ་འདས་གྲོངས་སུ་ཕྱིན་ཡོད་འདུག
ཡོང་ཁུངས། བོད་ཀྱི་བང་ཆེན།