གཙུག་ལག་རང་གྲོལ་དང་མིག་ཆུ། (ཡོ་རོབ།)
ངེད་གཉིས་འདས་པའི་ལོ་གཅིག་གི་རིང་ལ་བོད་མི་སྐྱབས་བཅོལ་བ་ཚོ་འདུས་སྡོད་བྱས་ཡོད་སའི་ཡོ་རོབ་ཀྱི་ལུང་པ་ཆེ་ཁག་ཚང་མའི་ནང་དུ་ཕྱིན་པ་མ་ཟད། ལུང་པ་དེ་དག་གི་ནང་གི་བོད་པའི་གནས་ཚུལ་ཆེ་འབྲིང་ཆུང་གསུམ་ཚང་མར་རྒྱུས་ལོན་བྱེད་ཁུལ་བྱས་པ་ཡིན། ཡིད་སྐྱོ་བ་ཞིག་ལ་ང་ཚོའི་ཧ་གོ་བའི་དོན་དག་མང་ཆེ་བ་གཏམ་ངན་ཤ་སྟག་རེད། དཔེར་ན། ༧སྐུའི་འཁྲུངས་སྐར་སྐབས་ཀྱི་མཚན་ཚོགས་ལ་སོགས་པའི་ཐོག་ཏུ་བོད་པ་ནང་ཁུལ་དབར་འཛིང་རེས་བྱས་ནས་ས་གནས་ཉེན་རྟོག་པར་དཀའ་ངལ་བཟོ་བ་དང་། གཞིས་ཆགས་དང་གསར་འབྱོར་དབར་ཁྱད་གསོད་དང་ཕྱོགས་རེས་བྱེད་པ། བོད་པའི་བུད་མེད་མང་དག་ཅིག་གིས་ལོ་མང་འགྲོགས་པའི་རང་གི་བཟའ་ཟླ་དང་ཕྲུ་གུ་བསྐྱུར་ནས་མི་གཞན་པའི་རྐུབ་ལ་རྒྱུགས་པ་སོགས་རེད།(འདིའི་སྐོར་ལ་ཧོན་འཐོར་བའི་གཏམ་རྒྱུད་མང་པོ་ཡོད།)
འོན་ཀྱང་། དགའ་འོས་པའི་གནས་ཚུལ་གཅིག་རྒྱུས་ལོན་བྱུང་པ་ནི། ཧོ་ལན་ཌི་རྒྱལ་ཁབ་ནང་ཡོད་པའི་བོད་ཀྱི་ཟ་ཁང་གི་བདག་མོས་རང་ཉིད་ཀྱི་ཟ་ཁང་བརྒྱུད་ནས་དེར་ཡོད་ཀྱི་བོད་པ་སུམ་བརྒྱ་ལྷག་གི་མཐུན་སྒྲིལ་གྱི་ཨ་ལོང་གཅིག་ཏུ་སྦྲེལ་བར་འབད་བཞིན་པའི་བསྔགས་འོས་ཀྱི་ཕྱག་ལས་གནང་སྟངས་སྐོར་རེད།
ཨོཾ་བོད་ཀྱི་ཟ་ཁང་དེ་ཧོ་ལན་ཌི་རྒྱལ་ས་ཨམ་སིཀྲར་སྒྲམ་གྲོང་ཁྱེར་གྱི་ལྟེ་བར་ཆགས་འདུག་ལ། ཟ་ཁང་དེ་འཛུགས་མཁན་ནི་༡༩༨༠ གྱ་གྲངས་ནང་རྒྱལ་ཁབ་དེའི་ནང་ཐོག་མར་ཕེབས་མཁན་གྱི་ཨ་ཅག་ཚེ་དབྱངས་སྒྲོལ་མ་ལགས་རེད། མོ་ནི་ལུང་པ་དེའི་ནང་སྐྱབས་བཅོལ་ཞུ་མཁན་བོད་པ་དང་པོ་དེ་ཡིན་པ་མ་ཟད། ལུང་པ་དེའི་ནང་བོད་ཀྱི་ཟ་ཁང་ཐོག་མ་འཛུགས་མཁན་དེ་ཡང་ཡིན་འདུག ཧོ་ལན་ཌི་རྒྱལ་ཁབ་ནང་བོད་པ་སྐྱབས་བཅོལ་བའི་གྲངས་འབོར་ཡོ་རོབ་རྒྱལ་ཁབ་གཞན་དག་དང་བསྡུར་ན་ཉུང་བ་ཡོད་པས། ཨ་ཅག་ལགས་ཀྱིས་ཐོག་མའི་ཆར་རང་གི་ཟ་ཁང་དེ་གཉེར་ཞོར། བོད་པའི་སྐྱིད་སྡུག་ཚོགས་པ་བཙུགས་པ་དང་། བོད་མི་སྐྱབས་བཅོལ་བའི་གྲངས་འབོར་ལོ་རེ་བཞིན་ཇེ་མང་དུ་སོང་བ་བསྟུན། སྐྱིད་སྡུག་ཚོགས་པ་དེ་རིམ་བཞིན་བོད་རིགས་ཚོགས་པའི་ངོ་བོར་བསྒྱུར་ནས་ལོ་མང་རིང་ཚོགས་པ་དེའི་ནང་ཕྱག་ལས་གནང་ཤིང་། རང་ཉིད་ཀྱི་ཟ་ཁང་ནང་བོད་པའི་སྐྱབས་བཅོལ་བ་གང་མང་ལ་ལས་ཀ་སྤྲད་ནས་ཁོ་ཚོའི་འཚོ་བའི་རྨང་གཞི་སྲ་བརྟན་ཡོང་བའི་ཆ་རྐྱེན་བསྐྲུན་ཡོད་ལ། ད་ཆ་མོའི་ཟ་ཁང་ནང་ལོ་མང་རིང་ལས་ཀ་བྱས་མྱོང་བའི་ལས་མི་ཁག་ཅིག་གིས་རང་རང་ས་ནས་བོད་ཀྱི་ཟ་ཁང་གསར་བ་ཆུང་ཆུང་འགའ་ཡང་ལོགས་སུ་སྒོ་འབྱེད་བྱེད་ཐུབ་པ་བྱུང་ཡོད།
བོད་པའི་སྐྱབས་བཅོལ་བ་རྙིང་པ་ཚོ་རང་མགོ་ཐོན་པ་དང་བསྟུན། ཨ་ཅག་ཚེ་དབྱངས་སྒྲོལ་མ་ལགས་ཀྱིས་ལུང་པ་དེའི་ནང་གསར་དུ་འབྱོར་བའི་བོད་པའི་སྐྱབས་བཅོལ་བ་ཚོར་རང་གི་ཟ་ཁང་ནང་མུ་མཐུད་ནས་ལས་ཀ་སྤྲོད་ཀྱི་འདུག་པ་མ་ཟད། སྐྱབས་བཅོལ་བ་གསར་པ་ཚོར་རྒྱལ་ཁབ་དེའི་ནང་སྡོད་ཆོག་པའི་ཁྲིམས་མཐུན་གྱི་ཡིག་ཆ་རེག་པའི་ཐད་ལ་ཡང་རོགས་རམ་བྱེད་ཀྱི་འདུག
ད་དུང་དེ་ལས་ཡིད་སྨོན་བྱེད་དགོས་པ་ཞིག་ནི། བོད་ཀྱི་ཟ་ཁང་དེའི་ཉིན་རེའི་ཡོང་འབབ་ཧ་ཅང་མཐོ་ན་ཡང་། ཟླ་རེའི་ཚེས་༡༥ ཉིན་ཟ་ཁང་གི་ཉིན་གཅིག་རིང་གི་ཚོང་ལས་དོར་ནས། བོད་པ་ཚོ་མཉམ་འཛོམས་ཡོང་བའི་སྤྲོ་སྐྱིད་ཀྱི་ཁོར་ཡུག་ཅིག་བསྐྲུན་འདུག་ལ། ཉིན་དེར་ཟ་ཁང་ནང་འཛོམས་པའི་བོད་པ་ཚང་མས་དགའ་སྤྲོའི་གཏམ་གླེང་ཙམ་མ་ཟད། ཁ་བཏོན་དགེ་སྦྱོར་སོགས་ཆོས་ཕྱོགས་ཀྱི་བྱེད་སྒོ་མི་ཉུང་བ་ཞིག་རང་མོས་ཐོག་སྤེལ་བའི་སྲོལ་བཟང་ཞིག་ཆགས་ཏུ་བཅུག་ཡོད་པ་དེ་རེད།
ཨ་ཅག་ལགས་ཀྱིས་བཏོད་པའི་ཧོ་ལན་ཌི་ནང་གི་སྲོལ་བཟང་དེས་ངའི་ཕ་ཡུལ་ཨ་མདོའི་ཕྱོགས་སུ་ཟླ་རེའི་ཚེས་༡༥ ཉིན་ཁྱིམ་ཚང་རེ་རེ་བཞིན་རེས་མོས་སུ་འཁོར་ནས་སོ་སོའི་ཁྱིམ་དུ་ཞབས་རིམ་བཀོད་སྒྲིག་བྱེད་པ་དང་ཞལ་ལག་སྦྱིན་པ་སོགས་ཀྱིས་མཚོན་པའི་སྲོལ་རྒྱུན་གྱི་གོམས་གཤིས་བཟང་པོ་དེ་དག་དྲན་གསོ་ཐེངས་ཤིག་བསླངས་བྱུང་བས། ཨ་ཅག་ལགས་ཀྱི་ལས་དོན་བྱེད་ཕྱོགས་ལ་སེམས་གཏིང་ནས་རྗེས་སུ་ཡི་རངས་མི་བྱེད་ཐུ་མེད་བྱུང་།
ཧོ་ལན་ཌི་ཨོཾ་བོད་ཀྱི་ཟ་ཁང་དེ་ཆེ་ས་ནས་རྒྱལ་ཁབ་ཅིག་གི་གྲོས་ཚོགས་ར་བ་དང་མཚུངས་ལ། ཆུང་ས་ནས་གྲོང་པའམ་སྡེ་བ་ཆུང་ཆུང་གི་༼མ་ཎི་ཁང་༽དང་གཉིས་སུ་མི་འདུག་པས། གལ་ཏེ་ཀློག་པ་པོ་གང་རུང་ཞིག་ཡོ་རོབ་གླིང་གི་ཧོ་ལན་ཌི་རྒྱལ་ཁབ་ནང་སླེབས་པ་ཡིན་ན། ཨོཾ་བོད་ཀྱི་ཟ་ཁང་ནང་ཐེངས་གཅིག་སོང་ནས་ཨ་ཅག་ཚེ་དབྱངས་སྒྲོལ་མའི་སར་ལུང་པ་དེའི་ནང་གི་བོད་པའི་གནས་ཚུལ་སྐོར་ཞིབ་ཕྲ་རྒྱུས་ལོན་བྱེད་རྒྱུ་མ་བརྗེད་པ་གནང་རོགས་ཞེས་ཞུ་འདོད་བྱུང་།
མིའི་སྤྱི་ཚོགས་ནང་གནས་ཚུལ་ཡག་སྡུག་མང་པོ་མཐོང་རྒྱུ་ཡོད་དང་ཡོད། མངོན་དུ་གསལ་མི་གསལ་ལས་ཧོ་ལཎ་ཌི་ཅིག་པོ་ལ་ཨེ་ཡིན་ནམ།གང་ལྟར་རོབ་ཙམ་བྲིས་འདུག་པས་བསྔགས་འོས་སོ།།
ཨ་ཅག་ཚེ་དབྱངས་ཀྱི་ཕ་ཡུལ་གང་ནས་ཡིན་མིན་དང་ ཁོང་རང་གི་འདྲ་པར་ཞིག་བྱུང་ན་རྩོམ་དེ་ཆ་ཚང་བ་ཞིག་ཡོང་བ་འདུག་ བཟའ་ཁང་གི་སྒོ་བྱང་ཐོག་རྒྱ་ཡིག་ ༼ བོད་ ཟེ་ཁྲོན་༽ཞེས་བྲིས་འདུག་པས་དེའི་དོན་གང་ཡིན་ནམ།
ཧོ་ལན་གྱི་ཟ་ཁང་དེ་བསྟོད་པའི་ཆེད་དུ། ཡུ་རོབ་ལུང་པ་གཞན་པའི་བོད་པ་ཚོར་མཐའ་གཅིག་ཏུ་སྨད་དགོས་པ་ཨེ་ཡོད། ཡུལ་སྐོར་ཟིན་ཐོ་འབྲི་རྒྱུ་ཡིན་ན། ཞིབ་ཚགས་ཁུངས་ལུང་ཡོད་པ་ཞིག་བྲིས་དཱ། འབྲི་སྟངས་ལ་བལྟས་ན། ད་རུང་ཤེས་ཡོན་གྱི་ན་སོ་ཆ་ཚང་སྨིན་མི་འདུག