ཧོང་ཀོང་བོད་ཀྱི་གློག་བརྙན་དང་རིག་གཞུང་དུས་སྟོན།

གནས་ཚུལ་གཏོང་མཁན། འཕྲིན་ལས་རྒྱ་མཚོ།

 
ཁ་སང་སྟེ་ཟླ་འདིའི་ཚེས་ ༢ ཉིན་གྱི་ཕྱི་དྲོ་ཆུ་ཚོད་ ༥ བ་ནས་ཧོང་ཀོང་དུ་འཚོགས་བཞིན་པའི་བོད་ཀྱི་གློག་བརྙན་དང་རིག་གཞུང་དུས་སྟོན་རྔ་བོ་ཆེའི་ལྡིར་སྒྲས་མདུན་བསུས་ཏེ་དངོས་སུ་འགོ་བཙུགས་ཡོད་པ་དང་། དུས་སྟོན་དེ་ཉིད་ཀྱི་དབུ་འབྱེད་མཛད་སྒོ་རུ་འཁྲབ་སྟོན་པ་དང་རི་མོ་བ། དེ་བཞིན་དུ་སློབ་མ་སོགས་མི་གྲངས་བརྒྱ་ལ་ཉེ་པ་ཞིག་ཧོང་ཀོང་དུ་རྟེན་གཞི་བྱས་པའི་རྒྱ་ནག་སློབ་གྲྭ་ཆེན་མོར་ཚོགས་ཡོད།

དུས་སྟོན་འདིའི་ནང་དུ་བོད་ཀྱི་དངོས་ཡོད་གནས་ཚུལ་དང་འབྲེལ་བའི་གློག་བརྙན་གཟིགས་འབུལ་ཞུ་རྒྱུ་དང་། རང་ལུས་མེ་བསྲེགས་བྱས་པ་གཙོ་བྱས་པའི་བོད་ཀྱི་རང་དབང་འཐབ་རྩོད་མཚོན་པའི་རི་མོ་བདུན་ཅུ་ལྷག་འགྲེམས་སྟོན། འཛམ་གླིང་ཤར་ནུབ་ཀུན་ནས་ཕེབས་པའི་གློག་བརྙན་ཁྲབ་ཁྲིད་པ་དག་དང་ལྷན་དུ་བགྲོ་གླེང་། ཧོང་ཀོང་སྒྱུ་རྩལ་བ་འགས་མཛད་རིམ་རེ་རེ་ལ་བོད་ཀྱི་རིག་གཞུང་མཚོན་པའི་ཁྲབ་སྟོན་རེ་བྱ་རྒྱུ་བཅས་བདུན་ཕྲག་གཉིས་ཀྱི་རིང་ལ་ལས་རིམ་གོ་སྒྲིག་བྱས་ཡོད་པ་རེད།

དུས་སྟོན་འདི་ཉིད་ཀྱི་གཙོ་འགན་བཞེས་མཁན་སྒྲོར་ཐེ་ Dorothy ལགས་ཀྱིས་གསུང་བ་ལྟར་ན། དུས་སྟོན་འདི་འདྲ་ཞིག་ཧོང་ཀོང་ལ་འཚོགས་དགོས་པའི་དམིགས་ཡུལ་གཙོ་བོ་ནི་བོད་ཀྱི་བདེན་དོན་དང་འཐབ་རྩོད་ཀྱི་ངོ་བོ་རྒྱ་ནག་མི་མང་ལ་ངོ་འཕྲོད་དུ་འཇུག་དགོས་པ་དང་། རྒྱ་ནག་མི་མང་ལ་སྒུལ་ཤུགས་ཐེབས་ཐུབ་པའི་ཉིན་རྒྱ་ནག་གཞུང་ལ་རང་བཞིན་གྱིས་སྒུལ་ཤུགས་ཐེབས་ངེས་རེད། དེར་བརྟེན་ང་ཚོས་རྒྱ་ནག་མི་མང་ལ་གནས་ཚུལ་ངོ་མ་མཁོ་སྤྲོད་བྱེད་པར་ཤུགས་རྒྱག་དགོས། ཟེར།

གློག་བརྙན་དུས་སྟོན་འདི་ནི་ཧོང་ཀོང་དུ་སྒྲོར་ཐེ་ལགས་ཀྱིས་སྒེར་ངོས་ནས་བོད་ཀྱི་གློག་བརྙན་དུས་སྟོན་གོ་སྒྲིག་བྱས་པ་ཐེངས་གསུམ་པ་དེ་ཡིན་པ་དང་གཞི་རྒྱ་ཆེ་ཤོས་དེ་ཡང་ཆགས་ཡོད་པ་རེད། སྒྲོར་ཐེ་ལགས་ནི་ཧོང་ཀོང་གི་ཡུལ་མི་དཀྱུས་མ་ཞིག་རེད་ལ་ལོ་རེ་བཞིན་གསུམ་བཅུའི་དུས་དྲན་སོགས་སུ་བོད་དོན་ལས་འགུལ་སྣ་མང་ཞིག་སྤེལ་བཞིན་པ་རེད་འདུག

དྲ་ཐག་འདི་ནས་དུས་སྟོན་འདི་ཉིད་ཀྱི་གནས་ཚུལ་རྒྱས་གཟིགས་ཐུབ། http://www.hongkongtibetfilmfestival2015.com/