ཨ་ཁུས་ཁྱེད་གཉིས་ལ་དགོངས་དག་ཞུ།

འབའ་སྲས།

སོང་ན་ལམ་ཁ་མི་བདེ་ཀྱག་ཀྱོག་གི་འཇིག་རྟེན།།
དྲིས་ན་དྲང་བོར་མི་བརྗོད་རྫུན་གཏམ་གྱི་མི་ཡུལ།།
ཆུང་བ་ཆུང་སར་མི་འཇོག་ཁྲེལ་མེད་ཀྱི་དུས་རབས།།
འདི་འདྲ་ཞིག་ནས་ཁྱེད་གཉིས་སྐྱེས་པ་དེ་ནོར་སོང་།།

འཁྱུད་འདོད་ལག་པའི་སེན་མོ་ཚེར་མ་ལྟར་སྐྱེས་མེད།།
མཆུ་སྦྱོར་ཁ་སྒོ་འཛུམ་པ་མེ་ཏོག་བཞིན་གད་མེད།།
འོ་བྱེད་ཆགས་སྤྱོད་བ་སྤུ་ར་རྩི་ལྟར་གཟིངས་མེད།།
མ་ཉེས་ཁ་གཡོག་འདྲ་པར་སུ་ཞིག་གིས་བླངས་སོང་།།

ཕན་ཚུན་འཁྱུད་ན་བདེ་བའི་ཚོར་བ་དེ་མི་ཤེས།།
ཁ་དང་ཁ་གཉིས་སྦྱར་བའི་བྲོ་བ་དེ་མི་རྙེད།།
མ་གཞི་མཇེ་དང་གཉའ་མའི་དོན་དག་ཀྱང་མི་གོ།
ཁྱེད་གཉིས་འོ་བྱོས་ཟེར་མཁན་གཏེ་རྒན་དེ་སུ་རེད།།

ཆུང་ཆུང་ལུས་ལ་བོད་ལྭ་དམར་དམར་ཞིག་གཡོགས་ཏེ།།
ལག་པའི་མཐིལ་ཆུང་ཕན་ཚུན་བྲང་ཁ་ལ་སྦྱར་ནས།།
དམ་པོས་འོ་ཞིག་བྱོས་དང་ཀ་ར་ཡི་བརྔན་པ།།
སྟེར་ཞེས་ལྟད་མོར་ལྟ་མཁན་འདྲེ་ནག་དེ་སུ་རེད།།

བྱིས་པ་བསམ་མེད་ཡིན་ཡང་དྭངས་གཙང་གི་སེམས་པ།།
ཨ་མའི་ནུ་ཞོ་འཇིབ་ལས་དྲན་རེག་གིས་རྣོག་མེད།།
འོན་ཀྱང་ཁྱོད་གཉིས་འདི་ལྟར་འཁྱུད་དོ་ཞེས་བཤད་དེ།།
བྱིས་པའི་སེམས་ཁམས་བཅོམ་པའི་ལག་དམར་དེ་སུ་རེད།།

བྱིས་པ་ཆུང་ཆུང་མེ་ཏོག་ཆུང་ཆུང་གི་འདབ་མ།།
ཉི་ཟེར་རྡུལ་ཕྲེང་ཟེགས་པའི་རྩེད་དགའ་ལ་བསྟིམས་ཀྱང་།།
རོ་ནག་འབུད་རྒྱུ་སྲིན་པོ་སྒྲ་སྒྲོགས་ཀྱི་སྐྱག་གྲོགས།།
མགོ་དགུ་དག་གིས་བྱིས་པའི་ལང་ཚོ་དེ་བཅོམ་སོང་།།

ད་ནི་གཅེས་ཕྲུག་གཉིས་ཀྱིས་མིག་ཆུ་དེ་མ་ཕོད།།
ཀ་ཁ་ག་ང་སྦྱོང་ཕྱིར་སློབ་གྲྭ་རུ་ཆས་དང་།།
འདྲེ་ལག་པར་ལེན་དྲ་ལམ་རྒྱུད་འགོད་ཀྱི་ལག་དམར།།
དེ་ཚོའི་ཚབ་ཏུ་ཨ་ཁུས་དགོངས་དག་ཅིག་ཞུ་ཆོག །

༡༨/༠༦/༡༣